Tag: کھیل

پاکستان کرکٹ ٹیم کے سابق کپتان وسیم اکرم کی اہلیہ شنیرا اکرم نے سوشل میڈیا پر گردش کرنے والی ان جعلی خبروں اور مصنوعی ذہانت (AI) سے تیار کردہ ویڈیوز کی سختی سے تردید کر دی ہے، جن میں دعویٰ کیا جا رہا تھا کہ وسیم اکرم دل کا دورہ پڑنے سے انتقال کر گئے ہیں۔

افواہوں کا جواب دیتے ہوئے شنیرا اکرم نے سوشل میڈیا پر ایک نئی ویڈیو شیئر کی، جس میں وسیم اکرم جم میں ورزش کرتے ہوئے نظر آ رہے ہیں،ویڈیو میں سابق کپتان مختلف ورزشیں کرتے دکھائی دے رہے ہیں، آخر میں وہ کیمرے کی طرف دیکھ کر مسکراتے بھی ہیں۔

شنیرا اکرم نے ویڈیو کے ساتھ لکھا کہ یہ ریکارڈنگ میں نے سوشل میڈیا پر پھیلنے والی جعلی خبروں اور AI ویڈیوز کے جواب میں شیئر کی ہے انہوں نے لکھا کہ جیسا کہ آپ دیکھ سکتے ہیں، وہ جم میں ہیں اور بالکل خیریت سے ہیں۔

شنیرا اکرم کی اس ویڈیو کے بعد مداحوں نے اطمینان کا اظہار کیا اور واضح ہو گیا کہ سوشل میڈیا پر گردش کرنے والی افواہیں غلط ہیں وسیم اکرم کو کچھ نہیں ہوا ، وہ بالکل خیریت سے ہیں۔

فیفا ورلڈ کپ 2026 کے پری کوارٹر فائنل میں انگلینڈ نے ایک سنسنی خیز مقابلے کے بعد میزبان میکسیکو کو 2-3 سے شکست دے کر کوارٹر فائنل کے لیے کوالیفائی کر لیا۔

تاریخی ازٹیکا اسٹیڈیم میں کھیلے گئے میچ میں انگلینڈ نے پہلے شاندار کھیل پیش کرتے ہوئے برتری حاصل کی، تاہم دوسرے ہاف میں ایک کھلاڑی کے ریڈ کارڈ کے باعث ٹیم کو بقیہ وقت 10 کھلاڑیوں کے ساتھ کھیلنا پڑا، جس کے بعد میکسیکو نے زبردست کم بیک کرتے ہوئے 2 گول کیے اور میچ کو انتہائی د لچسپ بنا دیا۔

انگلینڈ کی جانب سے جوڈ بیلنگھم نے 2 گول اسکور کیے جبکہ کپتان ہیری کین نے پنالٹی پر ایک گول کرکے ٹیم کی فتح میں اہم کردار ادا کیا،ریڈ کارڈ کے بعد میکسیکو نے مسلسل حملے کی ،میزبان ٹیم نے آخری لمحات میں انگلینڈ کے دفاع پر شدید دباؤ ڈالا، تاہم انگلش ٹیم نے بھرپور دفاع کرتے ہوئے اپنی برتری برقرار رکھی اور فتح اپنے نام کرلی،اس کامیابی کے ساتھ انگلینڈ نے کوارٹر فائنل میں جگہ بنالی، جہاں اس کا مقابلہ ناروے سے ہوگا، جس نے اسی روز 5 مر تبہ کے عالمی چیمپیئن برازیل کو 1-2 سے شکست دے کر بڑا اپ سیٹ کیا تھا،دوسری جانب میزبان میکسیکو کا ورلڈ کپ سفر اختتام پذیر ہوگیا-

فیفا ورلڈ کپ 2026 کے پری کوارٹر فائنل میں ناروے کے ہاتھوں 2-1 کی تکلیف دہ شکست کے بعد برازیل کے سپر اسٹار فارورڈ نیمار نے بین الاقوامی فٹبال سے ریٹائرمنٹ کا اعلان کر دیا۔

34 سالہ نیمار نے میچ کے بعد جذباتی انداز میں مقامی ٹی وی چینل سے گفتگو کرتے ہوئے کہا کہ میں نے پوری کوشش کی، میں نے ہر ممکن جدوجہد کی، لیکن اب یہ سفر ختم ہو گیا میں نے یہاں سے آغاز کیا تھا اور یہیں اپنے کیریئر کا اختتام کر رہا ہوں۔

نیمار کا اشارہ نیویارک کے میٹ لائف اسٹیڈیم کی جانب تھا، جہاں انہوں نے 2010 میں امریکا کے خلاف برازیل کی سینیئر ٹیم کی نمائندگی کرتے ہوئے اپنے بین الاقوامی کیریئر کا آغاز کیا تھا 16 برس بعد اسی میدان میں ناروے کے ہاتھوں ورلڈ کپ سے اخراج کے ساتھ ان کا قومی ٹیم کا سفر بھی اختتام کو پہنچ گیا۔

برازیل ایک بار پھر چھٹے عالمی اعزاز کی امید کے ساتھ ناک آؤٹ مرحلے میں اترا تھا، تاہم ناروے نے حیران کن کارکردگی دکھاتے ہوئے اسے ٹورنامنٹ سے باہر کر دیا میچ میں برازیل کا واحد گول نیمار نے انجری ٹائم میں پنالٹی پر کیا، لیکن وہ ٹیم کو شکست سے نہ بچا سکے۔

2026 کا ورلڈ کپ طویل انجری مسائل کے بعد نیمار کے لیے عالمی اعزاز جیتنے کا آخری سنہری موقع سمجھا جا رہا تھا، تاہم یہ خواب بھی ادھورا رہ گیا انہوں نے برازیل کی جانب سے 129 بین الاقوامی میچوں میں 80 گول کیے اور اس طرح قومی ٹیم کی تاریخ کے سب سے زیادہ گول کرنے والے کھلاڑی بنے، جبکہ انہوں نے اس فہرست میں لیجنڈری فٹبالر پیلے کو بھی پیچھے چھوڑ دیا۔

انہوں نے اپنے کیریئر میں 4 فیفا ورلڈ کپ کھیلے، لیکن عالمی ٹائٹل نا حاصل کر سکے، 2014 کے ورلڈ کپ میں سیمی فائنل سے قبل انجری کے باعث باہر ہو گئے، 2018 میں برازیل کو بیلجیئم نے کوارٹر فائنل میں شکست دی، 2022 میں کروشیا کے خلاف کوارٹر فائنل میں اضافی وقت میں گول کرنے کے باوجود برازیل پنالٹی شوٹ آؤٹ میں ہار گیا، جبکہ 2026 میں ناروے نے آخری 16 کے مرحلے میں ہی اس کا سفر ختم کر دیا۔

فیفا فٹبال ورلڈ کپ 2026 کے پری کوارٹر فائنل میں ناروے پانچ بار کی عالمی چیمپئن برازیل کو 1-2 سے شکست دے کر پہلی مرتبہ ورلڈ کپ کے کوارٹر فائنل میں پہنچ گئی-

نیویارک، نیوجرسی اسٹیڈیم میں کھیلے گئے اس سنسنی خیز مقابلے میں ناروے کے اسٹار اسٹرائیکر ایرلنگ ہالینڈ نے آخری لمحات میں دو گول اسکور کرکے اپنی ٹیم کو تاریخی فتح دلائی، برازیل کی جانب سے واحد گول اضافی وقت کے دسویں منٹ میں نیمار جونیئر نے پنالٹی کک پر کیا، تاہم یہ گول ٹیم کو شکست سے نہ بچا سکا۔

میچ کے آغاز ہی میں ناروے نے گول کیا تھا، لیکن آف سائیڈ قرار دیے جانے کے باعث اسے مسترد کر دیا گیا اس کے بعد برازیل کو پہلے ہاف میں پنالٹی کا موقع ملا، تاہم ناروے کے گول کیپر اوریان نیلینڈ نے برونو گیماریش کی پنالٹی شاندار انداز میں روک کر اپنی ٹیم کو بڑا نقصان ہونے سے بچا لیا نیلینڈ نے میچ کے دوران کئی اہم سیوز کیے اور برازیل کے متعدد یقینی گول ناکام بنائے، جس پر انہیں میچ کے نمایاں کھلاڑیوں میں شمار کیا گیا۔

برازیل نے پہلے ہاف اور دوسرے ہاف میں کئی خطرناک حملے کیے، تاہم ناروے کے دفاع اور گول کیپر نے انہیں کامیاب نہ ہونے دیا دوسرے ہاف میں برازیل کے کوچ نے نیمار جونیئر کو میدان میں اتارا، جس کے بعد برازیل کے حملوں میں تیزی آئی، لیکن ناروے نے دباؤ کا بھرپور مقابلہ کیا میچ کے 79 ویں منٹ میں اینڈریاس شیلڈروپ کے خوبصورت کراس پر ایرلنگ ہالینڈ نے طاقتور ہیڈر کے ذریعے گیند جال میں پہنچا کر ناروے کو برتری دلائی۔

مقررہ وقت کے آخری منٹ میں ہالینڈ نے ایک اور شاندار گول اسکور کرکے اپنی ٹیم کی برتری دوگنی کر دی اضافی وقت میں برازیل کو دوسری پنالٹی ملی، جسے نیمار جونیئر نے گول میں تبدیل کیا، تاہم وقت کم ہونے کے باعث برازیل میچ میں واپسی نہ کر سکا ناروے اب کوارٹر فائنل میں انگلینڈ یا مشترکہ میزبان میکسیکو میں سے کسی ایک ٹیم کا سامنا کرے گا۔

1990 کے بعد یہ پہلا موقع ہے کہ برازیل کوارٹر فائنل تک رسائی حاصل نہ کر سکا برازیل نے 24 سال بعد عالمی ٹائٹل جیتنے کی امید کے ساتھ اطالوی کوچ کارلو اینچیلوتی کی خدمات حاصل کی تھیں، تاہم ٹیم اس بار بھی ٹرافی کے حصول میں کامیاب نہ ہو سکی۔

تاریخی کامیابی کے بعد ناروے کےایرلنگ ہالینڈ نے روایتی انداز میں ڈرم بجا کر جشن کا آغاز کیا ڈرم کی گونج پر کھلاڑیوں اور شائقین نے خوب خوشی کا اظہار کیا اور پورا اسٹیڈیم ناروے کی تاریخی فتح کے نعروں سے گونج اٹھا، ایرلنگ ہالینڈ کے ٹورنامنٹ میں مجموعی گولوں کی تعداد سات ہوگئی اور وہ سب سے زیادہ گول کرنے والے کھلاڑیوں میں شامل ہوگئے۔

انگلینڈ کی کرکٹ ٹیم نے بھارت کو دوسرے ٹی20 میچ میں 4 وکٹوں سے شکست دے دی-

مانچسٹر میں کھیلے گئے میچ میں بھارت کی جانب سے دیا گیا 191 رنز کا ہدف انگلش ٹیم نے 19 اوورز میں 6 وکٹوں کے نقصان پر حاصل کر لیا ہدف کے تعاقب میں جیکب بیتھل نے شاندار بیٹنگ کا مظاہرہ کرتے ہوئے 46 گیندوں پر ناقابل شکست 76 رنز اسکور کیے اور ٹیم کی کامیابی میں کلیدی کردار ادا کیا کپتان ہیری بروک اور ٹام بینٹن نے 39، 39 رنز کی اننگز کھیلیں، جبکہ وِل جیکس 9 اور سام کرن 7 رنز بنا کر آؤٹ ہوئے۔ جبکہ فِل سالٹ اور جوس بٹلر کھاتہ کھولے بغیر پویلین واپس لوٹ گئے۔

بھارت کی جانب سے ارشدیپ سنگھ سب سے کامیاب بولر رہے جنہوں نے 3 وکٹیں حاصل کیں، جبکہ اکشر پٹیل، ورون چکرورتی اور ہرشت رانا نے ایک، ایک کھلاڑی کو آؤٹ کیا۔

اس سے قبل ٹاس جیت کر پہلے بیٹنگ کرنے والی بھارتی ٹیم نے مقررہ 20 اوورز میں 7 وکٹوں کے نقصان پر 190 رنز بنائے تھےبھارت کی جانب سے ایشان کشن 49 رنز کے ساتھ نمایاں بلے باز رہے، جبکہ ابھیشیک شرما نے 43، کپتان شریاس ایر نے 37، ویبھو سوریا ونشی نے 14، ہرشت رانا نے 6، شیوم ڈوبے نے 5 اور اکشر پٹیل نے 2 رنز اسکور کیے انگلینڈ کی جانب سے سام کرن نے عمدہ بولنگ کرتے ہوئے 3 وکٹیں حاصل کیں، جبکہ وِل جیکس، لیام ڈاسن اور جوفرا آرچر نے ایک، ایک وکٹ اپنے نام کی۔

واضح رہے کہ سیریز کا پہلا ٹی ٹوئنٹی میچ بارش کے باعث بغیر کسی نتیجے کے ختم ہوگیا تھا جبکہ اس کامیابی کے بعد انگلینڈ نے پانچ میچوں کی سیریز میں 0-1 کی برتری حاصل کر لی ہے۔

پی سی بی نے ایبٹ آباد شہر میں کرکٹ گراؤنڈ بنانے کا معاہدہ کر لیا۔

پاکستان کرکٹ بورڈ (پی سی بی) اور ایبٹ آباد یونیورسٹی آف سائنس اینڈ ٹیکنالوجی کے درمیان ہائی پرفارمنس کرکٹ سنٹر کے قیام کے لیے 25 سالہ مفاہمتی یادداشت (ایم او یو) پر دستخط کر دیے گئے۔

معاہدے کے مطابق ایبٹ آباد یونیورسٹی اپنے کیمپس میں کرکٹ گراؤنڈ کے لیے زمین فراہم کرے گی جبکہ پی سی بی جدید معیار کے مطابق کرکٹ گراؤنڈ تعمیر کرے گا گراؤنڈ میں اعلیٰ معیار کی میچ اور پریکٹس پچز، پویلین، جدید مشینری اور ڈومیسٹک کرکٹ کے معیار کے مطابق تمام ضروری سہولیات فراہم کی جائیں گی۔

یونیورسٹی کھلاڑیوں اور کوچز کی رہائش کے لیے اپنے ہوسٹل اور میس کی سہولیات بلا معاوضہ فراہم کرے گی جبکہ پی سی بی اس گراؤنڈ کو سال بھر ریجنل ٹریننگ کیمپوں اور ریجنل اکیڈمی کی سرگرمیوں کے لیے استعمال کرے گا اس منصوبے سے ایبٹ ریجن کے انڈر 15، اسکول، فرسٹ کلاس اور دیگر سطحوں کے کرکٹرز کو جدید تربیتی سہولیات میسر آئیں گی، جس سے خطے میں کرکٹ کے فروغ کو نئی تقویت ملے گی۔

مفاہمتی یادداشت پر پی سی بی کے سینئر جنرل مینیجر ڈومیسٹک کرکٹ آپریشنز اسامہ شارون اور ایبٹ آباد یونیورسٹی کے حکام نے دستخط کیے اس موقع پر اسامہ شارون نے کہا کہ یہ منصوبہ ایبٹ ریجن کے کھلاڑیوں کے لیے خوش آئند اور حوصلہ افزا قدم ہے، جو مقامی ٹیلنٹ کو نکھارنے اور قومی سطح پر آگے بڑھانے میں اہم کردار ادا کرے گا۔

فیفا ورلڈ کپ 2026 میں نیدرلینڈز کے خلاف یادگار کامیابی کے بعد مراکش کے دفاعی کھلاڑی عیسیٰ دیوپ کا ایک مختصر مگر ایمان افروز بیان سوشل میڈیا پر تیزی سے وائرل ہو رہا ہے۔

فیفا ورلڈکپ 2026ء کے ناک آؤٹ مرحلے (راؤنڈ آف 32) میں نیدرلینڈز (ہالینڈ) کے خلاف تاریخی کامیابی کے بعد، مراکشی کوچ اور کھلاڑیوں نے میچ کے بعد کی پریس کانفرنسز اور انٹرویوز میں شکرِ خداوندی اور اپنی قوم کی محنت کا بھرپور اعتراف کیا، کھلاڑیوں نے اس جذباتی جیت کو اپنے ملک، دنیا بھر کے مسلمانوں اور افریقی شائقین کے لیے ایک عظیم اعزاز قرار دیا،کھلاڑیوں نے اپنی کامیابی کو اپنی محنت کے ساتھ ساتھ اللہ کی مدد سے منسوب کیا اور ہر مشکل مرحلے پر صبر اور شکر کا مظاہرہ کیا۔

میچ کے اختتام پر گفتگو کرتے ہوئے عیسیٰ دیوپ نے کہا کہ’ہم مسلمان ہیں، ہم اس دنیا میں بہت تھوڑے وقت کے لیے آئے ہیں، ہر چیز اللہ کی ہے اور ہمیں ہر حال میں اسی کا شکر ادا کرنا چاہیے-

ان کے اس بیان کو دنیا بھر کے فٹبال شائقین، خصوصاً مسلم مداحوں کی جانب سے خوب سراہا جارہا ہے،سوشل میڈیا پر صارفین نے کہا کہ عیسیٰ دیوپ نے کامیابی کے موقع پر اپنی فتح کا سہرا اپنی محنت کے بجائے اللہ تعالیٰ کے فضل و کرم کو دے کر عاجزی اور ایمان کا خوبصورت مظاہرہ کیا۔

واضح رہے کہ مراکش نے نیدرلینڈز کو سنسنی خیز مقابلے کے بعد پنالٹی شوٹ آؤٹ میں شکست دے کر ورلڈ کپ کے اگلے مرحلے میں جگہ بنائی اس تاریخی کامیابی کے بعد عیسیٰ دیوپ کی گفتگو نہ صرف فٹبال حلقوں بلکہ سوشل میڈیا پر بھی موضوعِ بحث بن گئی جہاں ہزاروں صارفین نے ان کے الفاظ کو متاثر کن اور حوصلہ افزا قرار دے رہے ہیں-

کوچ کے مطابق، مراکش نے پورا میچ شاندار انداز میں کنٹرول کیا۔ ان کا بنیادی ہدف دنیا بھر میں موجود اپنے کروڑوں مداحوں کے چہروں پر خوشی لانا تھا،س فتح کے بعد کھلاڑیوں اور کوچ نے زور دیا کہ مراکش کی ٹیم نے ایک بار پھر دنیا کو یہ ثابت کر دیا ہے کہ وہ کسی بھی بڑی ٹیم کے مدِ مقابل ڈٹ کر کھیلنے کی مکمل صلاحیت رکھتے ہیں،اس سنسنی خیز مقابلے میں مراکش نے نیدرلینڈز کو پنالٹی شوٹ آؤٹ کے ذریعے 2-3 سے شکست دے کر ورلڈکپ کے پری کوارٹر فائنل (راؤنڈ آف 16) میں رسائی حاصل کی تھی-