Tag: baaghi

نئی دہلی (اے پی پی) سابق بھارتی وزیراعظم منموہن سنگھ نے کہا ہے کہ مودی حکومت نے ملکی معیشت کا بیڑہ غرق کردیا، ان کی غلط پالیسیوں کے باعث ملکی معاشی صورتحال بہت خراب ہے.

تفصیلات کے مطابق بھارت کے سابق وزیراعظم اور اقتصادی امور کے ماہر ڈاکٹر منموہن سنگھ نے کہا ہے کہ مودی حکومت نے ملکی معیشت کا بیڑہ غرق کردیا ہے، ماضی قریب میں تیزی سے ترقی کرتی بھارتی معیشت نریندر مودی کی غلط پالیسیوں اور اقتصادی بدانتظامی کے باعث بہت خراب ہے۔ ان خیالات کا اظہار انہوں نے گزشتہ روز ایک بیان میں کیا۔ڈاکٹر منموہن سنگھ نے کہا کہ گزشتہ سہ ماہی کے دوران ملک کی مجموعی قومی پیداوار کی شرح نمو 5 فیصد رہی حکومت اس صورتحال سے نکلنے کے لیے انتقامی سیاست کے بجائے اقتصادی ماہرین اور دانشوروں کی مشاورت سے اقدامات کرے۔ ان کا کہنا تھا کہ اس وقت ملک میں روزگار کا بحران ہے، حکومتی غلط پالیسیسوں سے لاکھوں افراد بے روزگار ہوچکے ہیں، صرف آٹو موبائل سیکٹر سے ساڑھے تین لاکھ افراد کو نکال دیا گیا ہے۔

انہوں نے کہا کہ پیداواری شعبے کی شرح نمو صرف 0.6 فیصد، گھریلو سطح پر اشیاء کی طلب کم ہوکر 18 ماہ کی کم ترین سطح پر پہنچ چکی جبکہ مجموعی قومی پیداوار کی شرح نمو 15 سال کی کم ترین سطح پر ہے۔ ٹیکس کے سلسلے میں تاجروں سے زبردستی ہورہی ہے جبکہ ٹیکس وصولی کی شرح بھی انتہائی کم ہے، کاشتکاروں کو ان کی فصل کا مناسب معاوضہ نہیں مل رہا جس سے ان کی آمدنی کم ہوئی ہے۔

کابل (اے پی پی) دوحہ میں طالبان سے مذاکرات کے بعد زلمے خلیل زاد کی کابل میں صدر غنی سے ملاقات ہوئی.

تفصیلات کے مطابق افغانستان کے لیے امریکا کے خصوصی مندوب زلمے خلیل زاد نے کابل میں افغان صدر اشرف غنی سے ملاقات کی ہے۔ افغان حکام کی طرف سے بتایا گیا کہ اس ملاقات میں خلیل زاد نے صدر غنی کو قطر کے دارالحکومت دوحہ میں افغان طالبان کے ساتھ ہونے والے مذاکرات کے تازہ ترین دور کے نتائج سے آگاہ کیا۔ صدر غنی کے ایک ترجمان کے مطابق یہ ملاقات اتوار کو ہوئی۔ زلمے خلیل زاد اس ملاقات سے کچھ ہی دیر پہلے دوحہ سے کابل پہنچے تھے۔

امریکا طالبان کے ساتھ مذاکرات کے ذریعے کسی امن معاہدے تک پہنچنا چاہتا ہے، تاکہ واشنگٹن کے لیے افغان جنگ اپنے اختتام کو پہنچ جائے۔ افغان جنگ امریکا کے لیے اس کی تاریخ کی طویل ترین جنگ بن چکی ہے۔

بیروت (اے پی پی) عسکریت پسند گروہ حزب اللہ نے اسرائیلی فوج پر حملہ کردیا.

تفصیلات کے مطابق لبنان کے عسکریت پسند گروہ حزب اللہ نے اسرائیل کے شمالی علاقے میں متعدد ٹینک شکن راکٹ داغے ہیں جس میں اسرائیلی فوج کو جانی نقصان اٹھانا پڑا ہے تاہم اسرائیل نے اس دعوے کی تردید کی ہے۔ حزب اللہ کی جانب سے اس کارروائی کو گزشتہ ہفتے بیروت میں اسرائیلی ڈرون حملے کا ردعمل قرار دیا جا رہا ہے۔ اسرائیل کے فوجی ذرائع نے اس بات کی تصدیق کی ہے کہ اْس کے ایک فوجی اڈے اور فوجی گاڑیوں کی جانب راکٹ داغے گئے ہیں اور سرحدی علاقے میں واقع فوجی اڈے پر دو سے تین ٹینک شکن میزائل گرے ہیں۔

حزب اللہ نے دعویٰ کیا ہے کہ شام میں اْس کے دو کارکنوں کی ہلاکت کے جواب میں اس حملے میں متعدد اسرائیلی فوجی زخمی اور ہلاک ہوئے ہیں حزب اللہ کے حملے کے بعد اسرائیل نے جوابی کارروائی میں جنوبی لبنان میں گولہ باری کی ہے اور اس کا کہنا ہے کہ اس نے 100 کے قریب گولے داغے ہیں اور اس کارروائی میں حزب اللہ کی عسکری ٹھکانوں کو نشانہ بنایا گیا ہے۔