Tag: baaghi

معروف شاعر شہزاد احمد کی
آج ساتویں برسی ہے *

چپ کے عالم میں وہ تصویر سی صورت اس کی
بولتی ہے تو بدل جاتی ہے رنگت اس کی

آنکھ رکھتے ہو تو اس آنکھ کی تحریر پڑھو
منہ سے اقرار نہ کرنا تو ہے عادت اس کی

ہے ابھی لمس کا احساس مرے ہونٹوں پر
ثبت پھیلی ہوئی بانہوں پہ حرارت اس کی

وہ اگر جا بھی چکی ہے تو نہ آنکھیں کھولو
ابھی محسوس کئے جاؤ رفاقت اس کی

وہ کبھی آنکھ بھی جھپکے تو لرز جاتا ہوں
مجھ کو اس سے بھی زیادہ ہے ضرورت اس کی

وہ کہیں جان نہ لے ریت کا ٹیلہ ہوں میں
میرے کاندھوں پہ ہے تعمیر عمارت اس کی

بے طلب جینا بھی شہزاد طلب ہے اس کی
زندہ رہنے کی تمنا بھی شرارت اس کی
….
جناب شہزاد احمد ایک سچے شاعر تھے انہوں نے "جام بکف” شاعروں کی طرح اپنی تشہیر کی خاطر کوئی منفی راستہ نہیں اپنایا حالانکہ وہ ادبی ادارے کے سربراہ بھی رہے۔ان کا ایک شعر ملاحظہ کیجئے ۔۔بہت دیر تک اس شعر کی کیفیت آپ کو سرشار رکھے گی۔۔!!

اس راہ سے گزرے تھے کبھی اہل نظر بھی
اس خاک کو چہرے پہ ملو آنکھ میں ڈالو

عدیم ہاشمی کی پیدائش*
اردو کے ممتاز شاعر، ادیب اور ڈرامہ نگار عدیم ہاشمی کی تاریخ پیدائش اگست1946ء ہے۔
عدیم ہاشمی کا اصل نام فصیح الدین تھا اور وہ بھارت کے شہر ڈلہوزی میں پیدا ہوئے تھے۔
عدیم ہاشمی کا شمار اردو کے جدید شعرا میں ہوتا تھا۔
ان کے متعدد شعری مجموعے شائع ہوئے جن میں ترکش، مکالمہ، فاصلے ایسے بھی ہوں گے، میں نے کہا وصال، مجھے تم سے محبت ہے، چہرا تمہارا یاد رہتا ہے، کہو کتنی محبت ہے اور بہت نزدیک آتے جارہے ہو کے نام سرفہرست ہیں۔ انہوں نے پاکستان ٹیلی وژن کے لئے ایک ڈرامہ سیریل ’’آغوش‘‘ بھی تحریر کیا اور مشہور ڈرامہ سیریز گیسٹ ہائوس کے لئے بھی کچھ ڈرامے تحریر کئے۔
5 نومبر 2001ء کو عدیم ہاشمی امریکا کے شہر شکاگو میں وفات پاگئے اور وہیں پاکستانیوں کے قبرستان میں آسودۂ خاک ہیں۔
ان کے اشعا ر ملاحظہ ہوں-:
بچھڑ کے تجھ سے نہ دیکھا گیا کسی کا ملاپ
اڑا دیئے ہیں پرندے شجر میں بیٹھے ہوئے
……٭٭٭……
فاصلے ایسے بھی ہوں گے یہ کبھی سوچا نہ تھا
سامنے بیٹھا تھا میرے اور وہ میرا نہ تھا
……٭٭٭……
بہت نزدیک آتے جارہے ہو
بچھڑنے کا ارادہ کر لیا کیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ چشمِ زر کہاں، یہ مِری چشمِ تَر کہاں
ٹکرائی بھی تو جا کے نظر سے نظر کہاں

جانا ہے تم کو جاؤ، چلے ہو مگر کہاں

میں ڈھُونڈتا پھروں گا تمہیں دَر بہ دَر کہاں

قصر شہی کی بات ہے قصر شہی کے ساتھ

تیری گلی کہاں ، تِرے دیوار و دَر کہاں

دولت سے خوابگاہ تو جو بھی خرید لو

نِیندیں مگر خرید سکے مال و زَر کہاں

تُو آگ ہی لگا کے ذرا خُود کو دیکھ لے

تجھ پر یونہی پڑے گی کِسی کی نظر کہاں

میں اپنا آپ ڈھُونڈ رہا ہوں جہان میں

مجھ کو عدیم اور کِسی کی خبر کہاں

یہ کِس مقابلے کے لیے جا رہے ہو تم

آنسو کہاں عدیم، صدف کا گہر کہاں

ن۔م۔ راشد کا یوم پیدائش*
ن۔م۔ راشد کا اصل نام نذر محمد تھا اور وہ اگست 1910ء کواکال گڑھ ضلع گوجرانوالہ میں پیدا ہوئے تھے۔
علامہ اقبال کی وفات کے بعد اردو شاعری جن شعرا کی بدولت عہد آفرین تبدیلیوں سے دوچار ہوئی ان میں ن م راشد کا نام بلاشبہ سرفہرست ہے۔
اس میں شک نہیں کہ حالی اور آزاد سے لے کر اقبال تک اور اقبال سے لے کر جوش‘ حفیظ جالندھری اور اختر شیرانی تک اردو نظم نے بڑا تیز سفر کیا لیکن یہ سفر نظم نگاری کی دیرینہ روایات کے دائرے ہی میں ہوا۔
لیکن ن م راشد اور ان کے ایک اور ممتاز ہم عصر میرا جی کے یہاں اس نظم نے ہیئت و اسلوب میں ایک ایسی تبدیلی کی بنیاد ڈالی جس نے نظم کا سانچہ ہی بدل ڈالا۔
ن۔م راشد کا پہلا مجموعہ ’’ماورا‘‘ 1941ء میں شائع ہوا تو گویا یہ ٹھہرے ہوئے تالاب میں ایک پتھر کی مثال ثابت ہوا۔
راشد نے اپنی نظموں میں نہ صرف یہ کہ نظم آزاد کا کامیاب تجربہ کیا بلکہ مغرب کے شعرا بالخصوص انگلستان اور فرانس کے جدید شعرأ سے متاثر ہو کر نظم نگاری کے فن کو نئے طریقوں سے برتنے کی کوشش کی۔
یہ نظم سادہ اور بیانیہ شاعری سے خاصی مختلف تھی اور اس نظم میں افسانوی اور ڈرامائی انداز کے جدید اسالیب بدرجۂ اتم موجود تھے۔
ابتدا میں ن۔م راشد اور میرا جی‘ دونوں ہی شدید تنقید کا نشانہ بنے لیکن انہوں نے جو بیج بویا وہ بہت جلد تناور درخت کی شکل اختیار کرگیا۔
خود راشد نے ماورا کے بعد اردو شاعری کو کئی یادگار مجموعے عطا کیے جن میں ایران میں اجنبی‘لا= انسان اور گمان کا ممکن شامل ہیں۔
ان کے علاوہ دوسرے شعرأ نے بھی غیر محسوس طریقے سے ان کا اتباع کیا اور یوں اردو شاعری کے صحن میں نئے دریچے کھلتے چلے گئے۔
ن۔م راشد نے اپنی زندگی مختلف ممالک میں بسر کی۔
زندگی کے آخری ایام میں وہ لندن میں مقیم تھے۔جہاں وہ 9 اکتوبر 1975ء کو وفات پاگئے ان کی وفات کے بعد ان کی وصیت کے مطابق ان کی لاش کو نذر آتش کردیا گیا
۔وہ زندگی بھر دنیا کو چونکاتے رہے تھے اور موت کے بعد بھی اپنی یہ عادت ترک نہ کرسکے۔۔!!!

گوجرانوالہ: کرکٹر حسن علی کی مستقبل میں بننے والی دلہن کی سوشل میڈیا پر وائرل ہونے والی تصاویر جعلی نکلیں.

تفصیلات کے مطابق حسن علی کی دلہن بننے والی لڑکی کے حوالے سے کچھ تصاویر سوشل میڈیا پر شیئر کی جارہی تھی. اس حوالے سے کہا جارہا تھا کہ شاید یہی وہی لڑکی ہیں جن کی شادی حسن علی کے ساتھ ہونی ہے. تاہم اب کچھ میڈیا رپورٹس سے پتا چلا ہے کہ وہ لڑکی جس کی تصاویر سوشل میڈیا پر شیئر کی جارہی ہیں، دراصل حسن علی کی بننے والی دلہن نہیں بلکہ امریکہ کی بیوٹی بلاگر ہیں جو خوبصورتی کے ٹپس دیتی ہیں. یہ ہی نہیں ان کا نام شامیہ ازمین ہے جو نہ صرف شادی شدہ بلکہ ایک بچے کی ماں بھی ہیں. دوسری جانب جس کی شادی حسن علی سے ہونی ہے ان کا نام شامیہ آرزو ہے جو ایک بھارتی نجی ائیرلائن میں فلائٹ انجینئر ہیں.
واضح رہے کہ حسن علی کی شادی کی خبریں کچھ دنوں سے سوشل میڈیا پر چل رہی ہیں. اس حوالے سے شادی اگست کے آخر میں ہونے کا امکان ہے جس کے لیے دونوں خاندان کے درمیان رابطے جاری ہیں.