Author: +9251

وفاقی وزیر برائے ماحولیاتی تبدیلی شیری رحمان کا کہنا ہے کہ ہم ماحولیاتی آفات کے تباہ کن سال سے گزر رہے ہیں، خاص کر اگر پاکستان کی بات کی جائے تو پاکستان اس وقت آب و ہوا کی تباہ کاریوں سے گزر رہا ہے۔ وقت آگیا ہے کہ اہم فیصلے اور اقدامات کیے جائیں۔

عالمی کلین ایئر ڈے پر پیغام دیتے ہوئے وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ آج پاکستان دنیا بھر کی ماحولیاتی ہنگامی صورت حال کی صف اول میں کھڑا ہے۔ ہوا کا معیار اور فضائی آلودگی ان اہم ماحولیاتی مسائل میں سے ایک ہے۔ ہمارے شہروں اور گاؤں کو ہوا کی آلودگی کا سامنا ہے۔

انہوں نے کہا کہ پاکستان اس وقت آب و ہوا کی تباہ کاریوں سے گزر رہا ہے۔ ہم ماحولیاتی آفات کے تباہ کن سال سے گزر رہے ہیں۔ ماحولیاتی تبدیلی کے حوالے سے فیصلے اور اقدامات کرنے کا وقت اب ہے۔

فضائی الودگی پر بات کرتے ہوئے شیری رحمان کا کہنا تھا کہ عالمی سطح پر گرین ہاؤس گیسز کے اخراج میں 1 فیصد سے بھی کم حصہ ڈالنے کے باوجود، ہم فضائی آلودگی کو بہتر بنانے اور اخراج کو کم کرنے کے لیے پرعزم ہیں، وزارت ماحولیاتی تبدیلی پاکستان کلین ایئر پروگرام کے ذریعے فضائی آلودگی کے خلاف ترجیحی بنیادوں پر لڑنے میں مصروف ہے۔

انہوں نے یہ بھی کہا کہ اس پروگرام کا مقصد آلودگی پھیلانے والے اہم شعبوں بشمول صنعتوں، ویسٹ مینجمنٹ کمپنیوں کی سرگرمیوں اور اقدامات کو مربوط کرنا ہے، وزارت ماحولیاتی تبدیلی گیسز اخراج کو کم کرنے کے لیے مختلف شعبوں کے ساتھ کام کر رہے ہیں، کیوں کہ ہمارے لیے یہ ایک فیصلہ کن دہائی ہے۔ ماحولیاتی تبدیلی کے حوالے سے فیصلے اور اقدامات کرنے کا وقت اب ہے، 2050 نہیں۔

وفاقی وزیر نے تشویش کا اظہار کرتے ہوئے کہا کہ ماحولیاتی تبدیلی دنیا میں نیا معمول بن چکی ہے۔ ماحولیاتی تبدیلی کی کوئی سرحدیں نہیں، ایک ملک پر ماحولیاتی تبدیلی کے اثرات دوسرے ممالک پر بھی پڑے گے۔ تمام ممالک کو اپنی ہوا کو صاف کرنے کے لیے مربوط اور اجتماعی عالمی کوششیں کرنی چاہئے۔ پاکستان ایک صاف ستھرے اور صحت مند مستقبل میں سرمایہ کاری کرنے کے لیے تمام ممالک کے ساتھ کام کرنے کا منتظر ہے۔

جہانگیر ترین نے بلوچستان کیلئے مزید 1 کروڑ امداد کا اعلان کردیا ہے.

سیلاب زدہ علاقوں اور سیلاب زدگان کی مدد کیلئے سابق وفاقی وزیر جہانگیر ترین سرگرم ہوگئے ہیں۔ سیلاب زدہ علاقوں میں بحالی کیلئے کام کیلئے جہانگیر ترین کی جانب سے بدھ 7 ستمبر کو بلوچستان حکومت سے رابطہ کیا گیا۔ اس موقع پر بلوچستان کے سیلاب متاثرین کيلئے جہانگری ترین کی جانب سے مزید ایک کروڑ روپے کی امداد کا اعلان کیا گیا۔

واضح رہے کہ اس سے قبل جہانگیر ترین کی جانب سے خيبرپختونخوا اور جنوبی پنجاب کيلئے بھی امداد کا اعلان کیا گیا تھا۔ جہانگیر ترین کی جانب سے پاکستان تحریک انصاف ( پی ٹی آئی ) سے تعلق رکھنے والے ممبر قومی اسمبلی صاحبزادہ صبغت اللہ سے بھی رابطہ کیا گیا۔ اپر دیر میں سیلاب اور حالیہ بارشوں سے ہونے والی تباہ کاریوں کے بعد بحالی کے کام کیلئے بھی سابق وفاقی وزیر نے 25 لاکھ روپے فراہم کرنے کا اعلان کیا تھا. اس موقع پر جہانگیر ترین کا کہنا تھا کہ سیلاب سے متاثرہ پاکستانیوں کی بحالی میں سب کو مل کر کردار ادا کرنا ہوگا۔

واضح رہے کہ جہانگیر خان ایک پاکستانی کارباری کھلاڑی ہیں جو سیاست دان کے طور پر زیادہ مشہور ہيں ۔ ترین خان 2002 سے 2017 کے درمیان تین بار پاکستان کی قومی اسمبلی کے رکن رہ چکے ہیں۔ ترین کو سابق وزیراعظم پاکستان اور چیئر مین تحریک انصاف عمران خان کا دایاں ہاتھ اور اہم ترین مشیر سمجھا جاتا تھا۔ مگر بعد میں انہوں نے عمران خان سے اپنی راہیں جدا کر لیں ۔ان کے بیٹے علی ترین بھی سیاست میں مصروف ہيں ۔

اسلام آباد ہائی کورٹ نے کہا ہے کہ بلوچ طلبا کو اس عدالت سے مایوس واپس نہیں جانے دیں گے

اسلام آباد ہائی کورٹ نے حکومت سے دو ہفتوں میں بلوچ طلبا کو ہراساں کرنے سے روکنے کیلئے کئے گئے اقدامات کی رپورٹ طلب کرلی ہے۔

اسلام آباد ہائی کورٹ میں آج بروز بدھ 7 ستمبر کو بلوچ طلبا ہراسانی کیس کی سماعت ہوئی۔ اس موقع پر وزارت انسانی حقوق کی نمائندہ ایمان مزاری بھی عدالت میں پیش ہوئے۔ چیف جسٹس نے کہا کہ کیا آج اس سے بھی زیادہ کوئی اور اہم معاملہ ہے؟ ایک صوبے کے طلبا شکایت لائے ہیں کہ ہراساں کیا جا رہا ہے، طلبا کہتے ہیں اپنے صوبے جائیں تو غائب ہو جاتے ہیں، جس پر ایمان مزاری کا کہنا تھا کہ حکومت نے 30سے زائد بلوچ طلبا کے معاملے پر خط کا جواب نہیں دیا۔

اٹارنی جنرل کا کہنا تھا کہ بلوچ طلبا کے معاملے پر کمیشن سربراہ چیئرمین سینیٹ سے بات کروں گا۔ بلوچ طلبا ہراسانی کیس کی سماعت کے دوران چیف جسٹس اطہر من اللہ نے استفسار کیا کہ کیا وفاقی حکومت ان بچوں کے پاس گئی ہے، 17 سالہ فیروز بلوچ بھی لاپتا ہے، یہ سب کون کررہا ہے۔ یہ ٹیسٹ کیس تھا سب جماعتوں کے لوگوں پر مشتمل کمیشن بنایا۔

عدالت نے استفسار کیا کہ کیا کسی سیاسی لیڈر نے چیئرمین سینیٹ کو کمیشن اجلاس بلانے کا کہا؟ کیا کسی سیاسی لیڈر نے اس مسئلے پر جلسے میں بات کی؟ انہوں نے یہ بھی کہا کہ بلوچ طلبا کو اس عدالت سے مایوس واپس نہیں جانے دیں گے۔ طلبا یہ احساس لیکر جائیں گے کہ وہ ملک کے اہم ترین شہری ہیں۔

عدالت نے اٹارنی جنرل کو بلوچ طلبا پر قائم کمیشن کے ممبران سے رابطہ کرنے کی ہدایت کردی۔ اس دوران اٹارنی جنرل اشتر اوصاف نے بلوچ طلبا کا معاملہ تاحال حل نہ ہونے کا ذمہ دار سابق حکومت کو ٹھہرایا۔ اشتر اوصاف کا کہنا تھا کہ آپ نے دیکھا کہ سابق وزیراعظم عمران خان نہ پارلیمنٹ میں آئے نہ انہوں نے پارلیمنٹ کو اہمیت دی۔ اگر وہ کوشش کرتے تو یہ معاملہ حل ہوسکتا تھا۔ اب عدالت نے یہ بوجھ ہم پر ڈالا ہے تو ہم اس ذمہ داری سے پیچھے نہیں ہٹیں گے۔

چیف جسٹس نے اپنے ریمارکس میں کہا کہ سیاسی جماعتوں نے بلوچ طلبا کو ترجیح بنایا ہوتا تو وہ آج یہاں نہ آتے، اگر بلوچ طلبہ کسی کی ترجیح ہوتے تو سیاسی جلسوں کے دوران اُن کے مسائل پر بات کی جاتی۔ عدالت نے حکومت کو ہدایت کی کہ کمیشن کے ذریعے طلبہ کو یقین دلائیں کہ وہ اہم ہیں، بلوچ طلبا کو اس عدالت سے مایوس واپس نہیں جانے دیں گے۔ اس موقع پر چیف جسٹس اسلام آباد ہائی کورٹ نے اٹارنی جنرل کو رپورٹ عدالت میں پیش کرنے کیلئے دو ہفتوں کی مہلت دیتے ہوئے سماعت ملتوی کردی۔ جسٹس اطہر من اللہ کا یہ بھی کہنا تھا کہ اس دوران کسی بلوچ طالب علم کو شکایت ہو تو اٹارنی جنرل سے رابطہ کرے۔

گزشتہ 24 گھنٹوں میں سیلاب کے باعث 18 افراد ہلاک جبکہ 17 زخمی

آج ملک کے بیشتر حصوں میں موسم بنیادی طور پر گرم رہے گا جس میں خیبر پختون خواہ اور گلگت میں چند مقامات پرگرج چمک کے ساتھ بارش متوقع ہے۔ 8 ستمبر کو ملک کے بیشتر حصوں میں بنیادی طور پر گرم موسم متوقع ہے جبکہ کےپی کے بالائی علاقوں سمیت مختلف مقامات پر موسم جزوی طور پر ابر آلود رہنے کا امکان بھی ہے۔

نیشنل فلڈ رسپانس کوریڈی نیشن سنٹر کے مطابق: گزشتہ 24 گھنٹوں کے دوران سیلاب کے باعث 18 افراد جان کی بازی ہار گئے جبکہ متاثرین 17 زخمی ہوئے۔ تاہم اب تک مجموعی طور پر 1343 افراد جان کی بازی ہار چکے ہیں اور 12720 زخمی ہو چکے ہیں۔

نیشنل فلڈ رسپانس کوریڈی نیشن سنٹر کا کہنا ہے کہ: اب تک 383 آرمی ایوی ایشن ہیلی کاپٹر مختلف علاقوں میں پھنسے ہوئے لوگوں کو نکالنے کے لیے روانہ کیے جا چکے ہیں۔ گزشتہ 24 گھنٹوں میں 20 اڑان بھری گئی تھی اور 217 پھنسے ہوئے افراد کو نکالا گیا جبکہ 30 ٹن امدادی سامان سیلاب متاثرین تک پہنچایا گیا۔

اعلامیہ کے مطابق: اب تک سندھ، جنوبی پنجاب اور بلوچستان میں 147 ریلیف کیمپس اور سیلاب متاثرین کے لیے امدادی سامان جمع کرنے اور آگے تقسیم کرنے کے لیے ملک بھر میں 278 ریلیف آئٹمز کلیکشن پوائنٹس قائم کیے گئے ہیں۔
علاوہ ازیں عطیات کی مدد میں اب تک 4973 ٹن اشیائے خوردونوش کے ساتھ 925 ٹن غذائی اشیاء اور 2850229 ادویات جمع کی جا چکی ہیں جبکہ 4377.9 ٹن خوراک 887 ٹن غذائی اشیاء اور 2596769 ادویات تقسیم کی جا چکی ہیں۔

علاوہ ازیں گزشتہ دنوں آئی ایس پی آر نے بتایا تھا کہ: پاک فضائیہ نے فضائی پروازیں کرکے 1521 اہلکاروں کو ریسکیو کیا، 2763 خیمے، 106495 کھانے کے پیکٹ، 1161113 کلو گرام راشن، 134486 لیٹر 165 شہروں میں پانی فراہم کیا گیا۔ جبکہ لوگوں کو خوراک، خشک راشن اور طبی امداد فراہم کی گئی ہے۔

پی اے ایف ہیلی کاپٹرز سیلاب سے متاثرہ افراد کو بچانے اور ان علاقوں میں مدد فراہم کرنے میں مصروف عمل ہیں کیونکہ زمینی راستے سے اکثر علاقوں میں مکمل طور پر کٹ گئے ہیں۔ علاوہ ازیں اس وقت پی اے ایف سندھ، نواب شاہ، سکھر، میرپور خاص، تلہار، جیکب آباد، سہون، اور بلوچستان سمنگلی، قلعہ عبداللہ اور قلعہ سیف اللہ۔ پنجاب میں راجن پور اور ڈی جی خان، جی بی، گلگت اسکردو، غذر، نلتر، گانچھے۔ کے پی کے، نوشہرہ، چارسدہ، خاصگی، سیدو شریف، شانگلہ،میں اپنی امدادی و آپریشن کاروائیوں میں مصروف عمل ہے۔
سڑکوں کی مرمتی
ملک کے مختلف حصوں میں سڑکوں اور راستوں کی صورتحال ابھی بھی مسدود ہے N-95 – (بحرین – لائکوٹ – لائیکوٹ – کالام)، N-55 ڈی آئی خان کے قریب پروآ میں ہر قسم کی ٹریفک کے لیے، N-50 سگو میں ہر قسم کی ٹریفک کے لیے وانگو پہاڑیوں کے 24 کلومیٹر حصے میں لینڈ سلائیڈنگ کی وجہ سے پل اور M-8 بند ہے۔