Author: +9251

آئی ایم ایف کو ٹیکس چھوٹ قومی اسمبلی سے لازمی قراردینے کی یقین دہانی

پاکستان نے بین الاقوامی مالیاتی فنڈ(آئی ایم ایف)کو قومی اسمبلی سے منظوری کے بغیر ٹیکس ایمنسٹی اسکیم اور ٹیکس چھوٹ نہ دینے کی شرائط پر عملدرآمد کی یقین دہانی کروادی ہے.

یہ یقین دہانی پاکستان اور آئی ایم ایف کے درمیان طے پانے والے لیٹر آف انٹنٹ میں کروائی گئی ہے ۔ پاکستان اور آئی ایم کے درمیان طے پانے والے لیٹر آف انٹینٹ کے مطابق ٹیکس ایمنسٹی اسکیم اور ٹیکس چھوٹ قومی اسمبلی سے منظوری کے بغیر نہیں دی جائے گی جبکہ ٹیکس ایمنسٹی اسکیم اور ٹیکس چھوٹ کے لیے ایس آر او جاری کرنے پرپابندی ہوگی۔

ذرائع کے مطابق ایل او آئی میں یہ بھی کہا گیا ہےکہ کسی شعبے کو ٹیکس رعایت کے لیے،کنسٹرکشن سیکٹر اور خفیہ اثاثے ظاہرکرنے کے لیے ایمنسٹی بھی قومی اسمبلی سے منظور کرانا ہوگی۔

ایل او آئی کے مطابق سیلز ٹیکس میں باہمی ہم آہنگی کے لیے صوبوں کےساتھ مل کرکام کیاجائے گا جس کیلئےعالمی بینک کا تعاون حاصل ہوگااورپاکستان نے ان شرائط پرعملدرآمد کے لیے لیٹر آف انٹینٹ میں آئی ایم ایف کو یقین دہانی کرائی ہے۔

خیال رہے کہ گزشتہ روز خبر سامنے آئی تھی کہ پاکستان کیلئے 1.7 ارب ڈالر کے اجراء کی منظوری 29 اگست کو متوقع ہے

آئی ایم ایف کے ایگزیکٹو بورڈ کے اجلاس کا کیلنڈر جاری کر دیا تھا جس کے مطابق پاکستان کیلئے ایک ارب سترہ کروڑ ڈالر کی اگلی قسط کی منظوری پیر 29 اگست کو متوقع ہے، ساتویں اور آٹھویں اقتصادی جائزے کی بنیاد پر قرض پروگرام کا حجم چھ ارب ڈالر سے بڑھا کر سات ارب ڈالر کیئے جانے اور پروگرام میں جون دو ہزار تئیس تک توسیع بھی متوقع ہے۔

آئی ایم ایف کے ایگزیکٹو بورڈ کے اجلاس کے جاری کیلنڈر کے مطابق یہ بات بھی سامنے آئی تھی کہ : آئی ایم ایف کی جانب سے پاکستان کیلئے 1.7 ارب ڈالر کے اجراء کی منظوری29اگست کو متوقع ہوپائے گی

تاہم اس خبر کے ذرائع کے مطابق: 7ویں، 8 ویں اقتصادی جائزے کی بنیاد پر قرض پروگرام میں توسیع کا بھی امکان ہے، عالمی مالیاتی فنڈز کے ایگزیکٹیو بورڈ اجلاس میں ساتویں اور آٹھویں اقتصادی جائزے پر غور کیا جائے گا۔
قرض پروگرام کی بحالی کیلئے پاکستان آئی ایم ایف کی تمام پیشگی شرائط پوری کر چکا ہے۔ البتہ حکومت نے بعض کارکردگی اہداف پر چھوٹ کی درخواست کر رکھی ہے جن کا تعلق زرمبادلہ ذخائر کے اہداف، مانیٹری پالیسی اور بنیادی خسارے سے ہے۔

سابقہ حکومت کی طرف سے بجلی اور پیٹرولیم مصنوعات سمیت بعض شعبوں کو دی جانے سبسڈی کی وجہ سے بجٹ خسارہ ہدف سے کئی گنا تجاوز کر گیا تھا۔ اور پاکستان چھ ارب ڈالر کے قرض پروگرام کے تحت اب تک تین ارب ڈالر حاصل کر چکا ہے جبکہ مزید ایک اعشاریہ ایک سات کی قسط کا اجراء ایگزیکیٹو بورڈ اجلاس کے بعد متوقع ہو پائے گی۔
آئی ایم ایف سے فنڈز ملنے سے پاکستان کے زرمبادلہ زخائر میں نہ صرف بہتری آئے گی بلکہ پاکستان کو آئی ایم ایف سے اگلے ایک سال کے دوران مزید تقریبا تین ارب ڈالر بھی مل سکیں گے۔

واضح رہے گزشتہ دنوں وزیر خزانہ مفتاح اسماعیل نے عندیہ دیا تھا کہ آئی ایم ایف کی طرف سے بہت جلد قرض مل جائے گا.

اگست 23, 2022
لمپی اسکن بیماری کیخلاف ‘کے پی’ میں حکام کا خصوصی مہم شروع کرنیکا فیصلہ

خیبر پختوںخوا حکومت نے جانوروں میں تیزی سے پھیلتی لمپی اسکن بیماری کے موثر تدارک کے لیے بڑے پیمانے پر خصوصی مہم شروع کرنے کا فیصلہ کرلیا ہے۔

وزیر اعلیٰ خیبر پختونخوا محمود خان کی زیر صدارت لمپی اسکن ڈیزیز سے متعلق اجلاس ہوا،جس میں صوبہ بھر میں بیماری کی تازہ صورتحال کا جائزہ اور آئندہ کے لائحہ عمل سے متعلق اہم فیصلے کیے گئے۔
مہم کے دوران 70 لاکھ مال مویشیوں کو لمپی اسکن ڈیزیز سے بچاؤ کے ٹیکے لگائے جائیں گے اور اس مقصد کے لیے ہنگامی بنیادوں پر انجیکشن خریدنے کا فیصلہ کیا گیا ہے۔

محکمہ خزانہ کو بڑے پیمانے پر ویکسین کی خریداری کے لیے درکار فنڈز ترجیحی بنیادوں پر فراہم کرنے کی ہدایت کر دی گئی جبکہ کم سے کم وقت میں زیادہ سے زیادہ مویشیوں کو ٹیکے لگانے کے لیے افرادی قوت کی دستیابی کے لیے ہنگامی بنیادوں پر اقدامات کا فیصلہ کیا گیا ہے۔
وزیراعلیٰ خیبر پختونخوا محمود خان کا کہنا تھا کہ لمپی اسکن ڈیزیز کا بروقت تدارک اس وقت صوبائی حکومت کی اہم ترجیح ہے کیونکہ لائیو اسٹاک صوبے کے ذیادہ تر لوگوں کا واحد ذریعہ آمدن ہے، اس بیماری کے مزید پھیلنے کی صورت میں غریب لوگوں کو بہت نقصان پہنچنے کا خدشہ ہے اس لیے لوگوں کو اس ممکنہ نقصانات سے بچانے کے لیے بروقت اور نتیجہ خیز اقدامات کی ضرورت ہے۔

انہوں نے ہدایت دی کہ محکمہ لائیو اسٹاک، ضلعی انتظامیہ اور دیگر تمام متعلقہ محکمے فوری طور پر ایک قابل عمل پلان ترتیب دے کر اس پر عملدرآمد کو یقینی بنائیں، اس سلسلے میں ہم معمولی تاخیر کے بھی متحمل نہیں ہوسکتے اور ویکسین کی خریداری کے لیے آج ہی احکامات جاری کیے جائیں۔
وزیراعلیٰ کا کہنا تھا کہ اس بیماری کی روک تھام کے لیے ہنگامی بنیادوں پر ٹھوس اقدامات کی ضرورت ہے اور اس سلسلے میں ایک ہفتے کے اندر لائحہ عمل تیار کرکے اس پر عملدرآمد شروع کیا جائے، صوبائی حکومت بیماری کی روک تھام کے لیے درکار تمام مالی وسائل فراہم کرے گی۔

اگست 23, 2022
ماضی میں توہین عدالت پر کن پاکستانی سیاست دانوں نے سزائیں پائی ہیں؟

ماضی میں توہین عدالت پر کن پاکستانی سیاست دانوں نے سزائیں پائی ہیں؟

ملکی تاریخ میں کئی سیاستدانوں کو اعلیٰ عدلیہ نے توہین عدالت پر سزائیں سنائیں ہیں جس میں يوسف رضا گيلانی کو عدالت کا حکم نہ ماننے پر وزارت عظمیٰ سے ہاتھ دھونا پڑے تھے.

جبکہ مسلم لیگ نواز کے دو وزرا اور ایک سینیٹر کو ججوں کے خلاف شعلہ بیانی مہنگی پڑی تھی، چھ ارکان اسمبلی اور ایک کارکن نے سپریم کورٹ حملہ کیس میں قید اور نااہلی کی سزا بھگتی ہے۔ تین وزرائے اعظم اور ایک سابق آرمی چیف توہین عدالت کیسز میں بری بھی ہوئے جبکہ مسلم لیگ نواز کے دانیال عزیز، طلال چوہدری اور سینیٹر نہال ہاشمی کو سزا بھگتنا پڑی ہیں۔

پیپلزپارٹی کے یوسف رضا گیلانی ملکی تاریخ کے واحد وزیراعظم ہیں جن کو توہین عدالت پر سزا بھگتنا پڑی تھی، سوئس حکام کو خط نہ لکھنے پر ان کی سزا تو عدالت کی برخاستگی تک بمشکل ایک منٹ تھی مگر اس کے نتیجے میں وہ وزیراعظم کے اعلیٰ ترین منصب سے محروم ہو گئے تھے.

سینیٹر نہال ہاشمی کو بھی اسی جرم میں ایک ماہ قید ، 50 ہزار جرمانہ ہوا تھا ، پانچ برس کیلئے نااہل بھی قرار دیدیا گیا تھا.
سپریم کورٹ حملہ کیس میں مسلم لیگ نواز کے ارکان اسمبلی چوہدری تنویر ، سردار نسیم ، اختر محمود ایڈووکیٹ ، طارق عزیز ، میاں منیر ، اختر رسول اور ایک کارکن شہباز گوشی کو ایک ایک ماہ قید اور جرمانے کی سزا ہوئی تھی۔

ملکی تاریخ کے پہلے منتخب وزیراعظم ذوالفقار علی بھٹو کے خلاف فیصل آباد کے گھنٹہ گھر چوک میں ایک تقریر پر توہین عدالت کی کارروائی ہوئی۔ میاں نوازشریف کے خلاف اپنے دوسرے دور میں توہین عدالت کی فرد جرم لگی تھی۔
عمران خان وزیراعظم بننے سے پہلے توہین عدالت کی کارروائی کا سامنا کر چکے ہیں، سابق آرمی چیف مرزا اسلم بیگ پر بھی اسی الزام میں کیس چلاتھا، تاہم یہ سبھی خوش قسمت رہے کہ باعزت بری ہو گئے۔

اگست 23, 2022
وزٹ ویزا کے غلط استعمال پر یو اے ای نے پاکستانیوں کو ڈی پورٹ کرنا شروع کردیا

متحدہ عرب امارات نے وزٹ ویزا کے نام پر ملازمت کے لیے آنے والے پاکستانیوں کو ڈی پورٹ کرنا شروع کردیا ہے.

باغی ٹی وی اسلام آباد کے مطابق پاکستانی شہری وزٹ ویزا کے نام پر متحدہ عرب امارات جارہے ہیں جہاں وہ وزٹ ویزا کا غلط استعمال کرتے ہوئے ملازمت کے لیے کوششیں کرتے ہوئے پائے جاتے ہیں جس پر یو اے حکام نے سخت نوٹس لے لیا ہے اور وزٹ ویزا پر آنے والوں کو واپس وطن بھیجنا شروع کردیا ہے۔

اس حوالے سے اوورسیز ایمپلائمنٹ پرموٹرز ایسوسی ایشن کے چیئرمین کی جانب سے وزیر سمندر پار پاکستانی ساجد حسین طوری کو ایک خط لکھا گیا ہے جس میں کہا گیا ہے کہ پاکستانیوں کی جانب سے متحدہ عرب امارات کے وزٹ ویزا کا غلط استعمال کیا جارہا ہے، وزٹ ویزا کے غلط استعمال کی وجہ سے متحدہ عرب امارات نے پاکستان کے لیے امیگریشن پالیسی سخت کردی ہے۔

خط میں مزید کہا گیا ہے کہ پاکستان کے 20 شہروں سے جاری ہونے والے پاسپورٹس پر متحدہ عرب امارا کی جانب سے ویزا جاری نہیں کیا جارہا ہے، پاکستانیوں کے لیے وزٹ ویزا کی شرائط میں چھ ماہ کی بینک اسٹیٹمنٹ اور 5 ہزار درہم کی شرط عائد کردی گئی ہے، جعلی ایجنٹس سادہ لوح افراد کو لاکھوں روپے میں وزٹ ویزا پر یو اے ای بھیج رہے ہیں۔ جو کہ سراسر نااصافی ہے لہذا اب ایسی حرکت کی روک تھام کیلئے کاروائی عمل میں لائی جائے گی.

خط میں وفاقی حکومت سے مطالبہ کیا گیا ہے کہ وہ جعلی ایجنٹوں کے خلاف سخت کارروائی عمل میں لائے کیونکہ وزٹ ویزا پر متحدہ عرب امارات جانے والے افراد کو متعلقہ دستاویزات نہ ہونے کی وجہ سے روزگار نہیں ملتا اور وہ بھیک مانگنے پر مجبور ہوجاتے ہیں، جعل ساز ایجنٹس کی وجہ سے رجسٹرڈ اور قانونی کام کرنے والے پرموٹرز بدنام ہورہے ہیں۔

اگست 23, 2022
ماں بننے کےبعد بھی والد کی طرح جوان نظر آرہی ہوں سونم کپور

بالی وڈ اداکارہ سونم کپور جو حال ہی میں ایک بیٹے کی ماں بنی ہیں انہوں نے کہا ہےکہ میں 37 سال کی عمر میں ماں بنی ہوں اور مجھے لگتا ہے کہ میں ابھی بھی جوان ہوں اور جوان لگتی ہوں. انہوں نے اپنے والد کو اس کا کریڈٹ دیتے ہوئے کہا کہ میں نے یہ خوبی اپنے والد سے پائی ہے وہ عمر کے اس حصے میں بھی جوان نظر آتے ہیں. ووگ کے ساتھ انٹرویو میں انہوں نے کہا کہ میرے والدین دادا دادی بننے کے لئے شاید اس طرح سے تیار نہ تھے جس طرح سے ہونا چاہیے.سونم نے کہا کہ جب میں نے اپنی پریگنینسی کی خبر والدین کو سنائی تو میرے والد انیل کپور فلم جگ جگ جیو کی چندی گڑھ میں شوٹنگ کررہےتھے.وہ شاید اس وقت ریڈی نہ تھے نانا بننے کےلئے لیکن اس خبر کے بعد انہوں نے ایک نواسے کی دعا کی. سونم نے مزید کہا کہ ان

کے والد نے ہمیشہ اپنی بیٹیوں کے کیریئر پر توجہ دی انہوں نے دیکھا کہ ہم کیا کررہے ہیں اور کیا نہیں لیکن انہوں نے کبھی یہ چیز نہیں‌دیکھی کہ ہم کس کو ڈیٹ کررہے ہیں کس کو نہیں یا کب شادی کررہے ہیں وہ ہمیشہ یہی کہتے رہے ہیں تب شادی کریں جب آپ ذہنی طور پر تیار ہوں. یاد رہے کہ سونم کپور کے ہاں حال ہی میں بیٹے کی ولادت ہوئی ہے اور پوری کپور فیملی بیٹے کی آمد پہ کافی بہتر ہیں.

اگست 23, 2022
پبلک اکاؤنٹس کمیٹی نے ڈیم فنڈ معاملے پر سپریم کورٹ کے سابق چیف جسٹس ثاقب نثار کو طلب کرلیا

پبلک اکاؤنٹس کمیٹی نے ڈیم فنڈ معاملے پر سپریم کورٹ کے سابق چیف جسٹس ثاقب نثار کو طلب کرلیا ہے.

پیبلک اکؤنٹس کمیٹی کا اجلاس چیئرمین نور عالم خان کی زیر صدارت میں ہوا، جس میں کمیٹی رکن برجیس طاہر نے کہا کہ ڈیم فنڈ سے متعلق اشتہارات پر 14 ارب خرچ ہوئے جب کہ 9 ارب اکٹھے ہوئے۔ لہذا بتایا جائے کہ ڈیم فنڈ ڈیمز پر استعمال کیوں نہیں ہو رہا؟۔ انہوں نے کہا کہ ہم ججز کو دھمکیاں تو نہیں دے رہے۔ رکن کمیٹی مشاہد حسین سید نے کہا کہ ڈیم فنڈ سے متعلق انکوائری ہونی چاہیے۔

چیئرمین پی اے سی نور عالم خان نے کہا کہ سابق چیف جسٹس ثاقب نثار متنازع ہیں۔ وہ بھی ڈیم فنڈ پر جوابدہ ہیں۔ چیف جسٹس پاکستان ڈیم فنڈ کے معاملے پر غیر آئینی اسٹے آرڈرز کو دیکھ لیں۔ پی اے سی نے رجسٹرار سپریم کورٹ کو ڈیم فنڈ پر بریفنگ کے لیے طلب کرتے ہوئے سابق چیف جسٹس ثاقب نثار کو بھی بلا لیا۔

علاوہ ازیں پبلک اکاؤنٹس کمیٹی کے اجلاس میں چیئرمین نیب آفاق سلطان نے شرکت کی۔ چیئرمین پی اے سی کا کہنا تھا کہ نیب آئینی خلاف ورزیاں کررہا ہے۔ افسران سے اثاثوں اور بھرتیوں کا ریکارڈ مانگتے ہیں تو نیب عدالت چلا جاتا ہے۔جو تفصیلات طلب کی گئی ہیں وہ تفصیلات کیوں نہیں دی گئیں۔ پبلک اکاؤنٹس کمیٹی نے اسٹیبلشمنٹ ڈویژن کے سیکرٹری، کابینہ سیکرٹری، سیکرٹری قانون اور آئی جی اسلام آباد کو فوری طلب کرلیا۔ چیئرمین نور عالم خان نے کہا کہ میں ان کو بتاتا ہوں کہ پی اے سی کی کیا طاقت ہے۔ چئیرمین پی اے سی نے آڈیٹر جنرل سے نیب کے اکاؤنٹس کی تفصیلات مانگ لیں

اجلاس میں چیئرمین نیب سے سوال کیا گیا کہ پشاور ہائیکورٹ کے بی آر ٹی منصوبے میں بے ضابطگیوں سے متعلق انکوائری کے حکم پر نیب نے کیا کیا؟، جس پر چیئرمین نیب آفتاب سلطان نے کہا کہ بی آر ٹی سے متعلق انکوائری کا آغاز 2018ء میں کیا۔ بی آر ٹی انکوائری کنٹریکٹ میں بے ضابطگی، ڈیزائن میں خرابیوں اور کئی گنا زیادہ لاگت سے متعلق تھی۔ سابق چیف جسٹس ثاقب نثار نے بی آر ٹی انکوائری پر اسٹے دیدیا تھا۔ چیئرمین پی اے سی نے کہا کہ آج پشاور سے ڈی جی آئے ہوتے تو بی آر ٹی پر جواب بہتر انداز میں دیتے۔ پبلک اکاؤنٹس کمیٹی نے نیب سے بی آر ٹی انکوائری کی ٹائم لائن بھی طلب کرلی۔

علاوہ ازیں پبلک اکاؤنٹس کمیٹی کے اجلاس کے دوران چیئرمین نیب نے بتایا ہے کہ بی آر ٹی پشاور میں 32 ارب 86 کروڑ کے نقصان کو 26 ارب کا منافع ظاہر کیا گیا۔ اجلاس کے دوران نیب افسران کے اثاثوں کے معاملے پر پھر گرما گرمی ہوئی، اس موقع پر نور عالم خان اور آفتاب سلطان کے درمیان سخت جملوں کا تبادلہ بھی ہوا۔

نور عالم خان نے کہا کہ پی اے سی احکامات کی مسلسل خلاف ورزی ہو رہی ہے، آفتاب سلطان نے سابق چیئرمین،ڈی جیز نیب کے اثاثے جمع کرانے کی یقین دہانی کرائی۔ چیئرمین کمیٹی نے اجلاس میں ڈی جی نیب پختونخوا کی عدم شرکت پر برہمی کا اظہار کرتے ہوئے نیب اکاؤنٹس کے آڈٹ کا حکم دے دیا، پبلک اکاؤنٹس کمیٹی نے آڈیٹر جنرل کو نیب افسران کے سفری الاؤنس کا ریکارڈ بھی پیش کرنے کا حکم دے دیا۔

جبکہ بی آر ٹی منصوبے میں کرپشن کے حوالے سے چیئرمین نیب آفتاب سلطان نے اس کرپشن کے کیس پر بریفنگ دی۔ چیئرمین نیب نے کہا کہ بی آر ٹی پشاور میں 32 ارب 86 کروڑ کے نقصان کو 26 ارب کا منافع ظاہر کیا گیا، منصوبے کی لاگت 49 ارب روپے سے بڑھ کر 69 ارب ہوگئی۔
بی آر ٹی پشاور کی تعمیر کے ٹھیکے دینے کے دوران بے ضابطگیاں پائی گئی ہیں، پشاور ہائی کورٹ نے بھی کیس کی تحقیقات کا حکم دیا تھا، نیب تحقیقات چل رہی تھیں کہ سپریم کورٹ نے حکم امتناع جاری کردیا۔

اگست 23, 2022
بگ باس 16 کی میزبانی، سلمان خان کی جگہ کون لے گا؟

بالی وڈ کے دبنگ سلمان خان جو ایک لمبے عرصے سے بگ باس کی میزبانی کررہے ہیں، ان کے حوالے سے کافی عرصے سے خبریں گردش کررہی ہیں کہ انہیں معاوضے کے معاملے میں بگ باس کی انتظامیہ سے شکایات ہیں اور انہوں نے بگ باس کی انتظامیہ سے معاوضہ بڑھانے کا بھی کہا ہے. تازہ اطلاعات ہیں کہ سلمان خان کے ساتھ بگ باس انتظامیہ کی معاوضے کے ھوالے سے بات نہیں بن رہی کیونکہ اداکار نے ایک ارب روپے مانگے ہیں. سلمان خان کی طرف سے اتنی بڑی رقم کے مطالبے کے بعد بگ باس نے روہت شیٹی سے رابطہ کیا ہے کہ وہ اس سیزن کی میزبانی کریں. دوسری طرف اس حوالے سے بھی خبریں گردش کررہی ہیں کہ بگ باس کی انتظامیہ نے روہت

شیٹی کے ساتھ رابطہ کرنے کی تردید کر دی ہے اور کہا ہے کہ سلمان خان کی جگہ روہت شیٹی کو بگ باس 16 کی میزبانی کی پیشکش کرنے کی خبریں بالکل غلط ہیں. یاد رہے کہ سلمان خان بگ باس کے ابھی تک کے سب سے مقبول میزبان ہیں ان سے پہلے اس شو کی میزبانی اداکارہ شلپا شیٹی اور امیتابھ بچن کر چکے ہیں لیکن شائقین ان کی میزبانی سے بالکل بھی متاثر نہیں ہوئے یہی وجہ ہے کہ سلمان خان کو انکی جگہ میزبانی کی آفر کی گئی. سلمان خان کی پہلے سیزن کی میزبانی نے ہی دیکھنے والوں کے دل جیت لئے یوں گزشتہ 13 برس سے سلمان خان بگ باس کی میزبانی کے فرائض انجام دے رہے ہیں ان کے علاوہ شائقین کسی اور کو بگ باس کا شاید میزبان دیکھنا نہیں‌چاہتی .

اگست 23, 2022
شہباز گل کے کمرے سے برآمد موبائل فونز کو فرانزک کیلئے بھیجنے کا فیصلہ

اسلام آباد پولیس نے پارلیمنٹ لاجز میں عمران خان کے چیف آف اسٹاف ملزم شہباز گل کے کمرے سے ملنے والے موبال اور سیٹیلائٹ فونز کو فرانزک آڈٹ کیلئے بھیجنے کا فیصلہ کیا ہے۔

پولیس کے مطابق ضابطہ کی کارروائی کے بعد موبائل فونز فرانزک کیلئے بھجوائے جائيں گے، گزشتہ روز پولیس نے پارلیمنٹ لاجز میں شہباز گل کے فلیٹ سے دو آئی فون، ایک سیٹلائٹ فون، یو ایس بی سمیت دیگر اشیاء برآمد کی تھیں۔
اسلام آباد پولیس کا کہنا ہے کہ شہباز گل کے کمرہ سے برآمد ہونے والی پستول کی ملکیت کی تصدیق کی جا رہی ہے، لائسنس پیش نہ کرنے پر الگ سے مقدمہ درج ہوگا۔

واضح رہے کہ پیر کی شب اسلام آباد پولیس نے پارلیمنٹ لاجز میں شہباز گل کے کمرے پر چھاپہ مار کر وہاں سے سیٹلائٹ فون، موبائل فون، پستول، ڈائری اور ديگر اشياء برآمد کی تھیں۔ پوليس چھاپے کے وقت شہباز گل کو بھی ساتھ لائی تھی، پی ٹی آئی رہنما شہباز گل نے کہا کہ کمرے سے ملنے والا میرا پرس ڈرائیور کے پاس ہوتا تھا۔ شہباز گل نے پستول کو اپنے ہاتھ میں لینے کے بعد اسے الٹ پلٹ کر دیکھا جس کے بعد انہوں نے اسے اپنا ماننے سے انکار کردیا۔

پی ٹی آئی رہنما نے کہا تھا کہ میرے پاس اے کے 47 ہے، جس کا لائسنس بھی موجود ہے۔ شہباز گل نے اپنے بیان میں کہا کہ یہ پستول میرا نہیں ہے، جبکہ یہ کمرہ بھی میرے زیر استعمال نہیں ہے۔پی ٹی آئی رہنما نے کہا کہ یہ کمرہ میرے گارڈز کے زیر استعمال ہے، یہ پستول بھی ان ہی کا ہوگا۔

شہباز گل سے سوال کیا گیا کہ تھا کیا ان پر جنسی تشدد کیا گیا ہے؟ جس کے جواب میں انہوں نے کہا تھا کہ جی ہاں مجھ پر جنسی حملہ ہوا ہے۔ کچھ دیر پارلیمنٹ لاجز میں رہنے کے بعد پولیس شہباز گل کو لےکر پنجاب ہاؤس چلی گئی تھی، جہاں ان کے زیر استعمال کمرے کی بھی تلاشی لی گئی۔

اگست 23, 2022
قرۃ العین بلوچ نے نیرہ نور کے ساتھ بتائے لمحوں کو کیا یاد

نوجوان نسل کی نمائندہ گلوکارہ قرۃ العین بلوچ نیرہ نور سے ہیں بہت ہی متاثر. انہوں نے نیرہ نور کے لئے ایک ٹویٹ کیا اور لکھا کہ مجھے ان کی وفات پر دلی افسوس ہے. انہوں نے نیرہ نور کے ساتھ گزرے ہوئے لمحات کو بھی اس ٹویٹ میں یاد کیا. انہوں نے لکھا کہ ” مجھے اپنی زندگی میں جو حقیقی اعزاز حاصل ہوا وہ یہ تھا کہ مجھے نیرہ نور جی کے ساتھ بیٹھنے اور گہری، بامعنی گفتگو کرنے کا موقع ملا۔ انہوں نے اپنے ٹوئٹ میں مزید لکھا ہے کہ نیرہ نور ایک ایسی آواز کی مالک تھیں جس نے شاعری کو زندگی بخشی، وہ آواز جو ہمیشہ زندہ رہے گی”۔قرۃ العین بلوچ نے نیرہ کو خوبصورت الفاظ کے زریعے یاد کیا تو ان

کے مداحوں نے بھی نیرہ نور کی شان میں کمنٹس کئے اور کہا کہ نیرہ نور کی وفات پاکستانی میوزک انڈسٹری کے لئے بہت بڑا دھچکا ہے. یاد رہے کہ بلبل پاکستان لیجنڈری گلوکارہ نیرہ نور چند روز قبل 71 برس کی عمر میں کراچی میں انتقال کر گئی تھیں ان کی طبیعت کچھ بہتر نہ تھی اور گھر میں ہی ٹریٹمنٹ لے رہی تھیں. ان کے انتقال کی خبر ان کے پرستاروں پر بجلی بن کر گری. نیرہ نور نے کمال انداز میں غزلیں گائیں انہوں نے فلمی ہیروئینز کو بھی اپنی آواز دی ان کے گیت غزلیں نغمے سب آج تک زبان زد عام ہیں.

اگست 23, 2022
سلیم معراج کہاں چھٹیاں گزارنا پسند کرتے ہیں ؟‌

ورسٹائل اداکار سلیم معراج نے حال ہی میں ایک انٹرویو دیا ہے اس میں انہوں نے کہا کہ مجھے لاہور شہر بہت پسند ہے،یہاں وقت گزارنا بہت اچھا لگتا ہے.انہوں نے بتایا کہ مجھے جب بھی چھٹیاں ہوتی ہیں میں لاہور چلا جاتا ہوں وہاں وقت گزارتا ہوں اور مجھے بہت مزا آتا ہے. سلیم معراج نے کہاکہ کراچی شہر بھی میرے دل کے بہت قریب ہے بلکہ میں تو اس شہر کو اپنا دل کہوں گا. سلیم معراج نے کہا کہ میں نہیں جانتا کہ میرا کیا تاثر ہے میں کیسا لگتا ہوں لیکن حقیقت یہ ہے کہ میں بہت ہی کم گو ہوں ، کسی سے زیادہ اور جلدی گھلتا ملتا نہیں ہوں کوئی بلائے تو بہت اچھے طریقے سے بات کرتا

ہوں. انہوں نے کہا کہ شاید یہی وجہ ہے کہ مجھے شوبز کے لوگ کم ہی اپنی پارٹیوں میں بلاتے ہیں بلکہ میں‌یہ کہوں گا کہ مجھے کوئی اپنی پارٹی میں بلاتا ہی نہیں. اگر کوئی بلائے تو یقینا میں جائوں بھی. انہوں نے ایک سوال کے جواب میں کہا کہ ذاتی طور پر میں بہت زیادہ ہجوم میں جانا پسند نہیں کرتا میں زرا تنہائی میں زیادہ اچھا محسوس کرتا ہوں. یاد رہے کہ سلیم معراج رواں برس ریلیز ہونے والی فلم گھبرانا نہیں ہے میں بھی نظر آئے تھے اس میں انہوں نے ایک اہم کردار ادا کیا تھا جسے شائقین کی طرف سے خاصا سراہا گیا. سلیم معراج کا شمار بہترین اداکاروں میں ہوتا ہے.

اگست 23, 2022