Author: +9251

سینیٹ قائمہ کمیٹی برائے پیٹرولیم کےاجلاس میں چیئرمین سینیٹر عبدالقادر کا کہنا تھا کہ مجھے نہیں لگتا کہ حکومت پیٹرولیم مصنوعات سستی کر پائے گی

چیئرمین سینیٹر عبد القادر کی زیر صدارت سینیٹ قائمہ کمیٹی برائے پیٹرولیم کا اجلاس ہوا جس میں وزیر پیٹرولیم اور سیکریٹری موجود نہیں تھے۔ اجلاس میں ان کا کہنا تھا کہ مجھے نہیں لگتا کہ حکومت پیٹرولیم مصنوعات سستی کر پائے کیونکہ ابھی تو آگے جاکر حکومت کو پیٹرولیم مصنوعات پر جی ایس ٹی بھی لگانا ہے، آئی ایم ایف کو بجٹ میں 750ارب روپے پیٹرولیم سے بتائے گئے ہیں۔
چیئر مین کمیٹی نے سوال کیا کہ وزیر پیٹرولیم اور سیکریٹری کیوں نہیں آئے، پہلے بھی ہم نے اسی وجہ سے اجلاس ملتوی کیا تھا،آج بھی دونوں وزیر اور سیکریٹری نہیں ہیں ۔

حکام پیٹرولیم ڈویژن نے بتایا کہ وزیر مملکت پیٹرولیم مصدق ملک قطرمیں ہیں، سیکرٹری پیٹرولیم کو بخار ہے اور کورونا کی علامات ہیں،فدا محمد نے کہا کہ یہ سب بہانے ہوتے ہیں بخار کے، جب تک متعلقہ وزیر اورسیکر یٹری نہیں آتے اجلاس جاری نہ کیا جائے،عون عباس نے کہا کہ یہ سب مذاق بنایا گیا ہے۔

چیئر مین کمیٹی نے کہا کہ ہمیں پیٹرولیم ڈویژن اور متعلقہ افسران کو سن لینا چاہیے،عون عباس نے کہا کہ اس سے کیا فرق پڑے گا،جواب میں چیئر مین کمیٹی نے کہا کہ اجلاس کرلیتے ہیں، اراکین اپنا احتجاج ریکارڈ کرا دیں۔
سیف اللہ ابڑو نےکہاکہ سیکریٹری پیٹرولیم کو سمن کیا جائے، عون عباس نے اس موقع پر کہا کہ میں تو حاضری نہیں لگاؤں گا، ہم یہاں ٹی اے ڈی اے کے لیے نہیں آتے جس کے بعد وہ اجلاس چھوڑ کر چلے گئے تاہم اراکین کمیٹی عون عباس کو مناکر واپس لے آئے۔

اجلاس میں رکن کمیٹی فدا محمد نے کہا کہ دنیا میں پیٹرولیم مصنوعات سستی اور پاکستان میں مہنگی ہو رہی ہیں، اس کی وجہ کیا ہے ؟ اس پر چیئرمین اوگرا مسرور خان نے جواب دیا کہ اوگرا پی ایس او سے پیٹرولیم مصنوعات کی درآمدی قیمت کی بنیاد پر قیمتوں پر ورکنگ کرتا ہے، پیٹرولیم مصنوعات کی قیمتوں کا تعین کسی ایک روز کی خام تیل کی قیمت پر نہیں ہوتا،اوگرا اپنے صارفین کا مکمل تحفظ کرتا ہے۔

مسرور خان نے کہا کہ اوگرا پیٹرولیم مصنوعات کی قیمتوں کے تعین میں اپنے طور پر ایک پیسہ اوپر نیچے نہیں کرسکتا، پاکستان ضرورت کا 70فیصد پیٹرول درآمد کرتا ہے،30 فیصد پیٹرول مقامی ریفائنریز بناتی ہیں، جبکہ پاکستان میں 50 فیصد ڈیزل درآمد اور 50فیصد مقامی ریفائنریاں بناتی ہیں۔

کمیٹی رکن فدا محمدنے سوال کیا کہ پیٹرولیم مصنوعات کی قیمتیں کیوں بڑھیں؟،کہیں پی ایس او کے پاس پرانا مہنگا اسٹاک تو نہیں پڑا تھا، نہیں لگتا حکومت پیٹرولیم مصنوعات سستی کر پائے گی۔

چیئرمین کمیٹی نے کہا کہ آئی ایم ایف کو بجٹ میں 750 ارب روپے پیٹرولیم سے بتائے گئے ہیں، ابھی تو آگے جا کر حکومت کو پیٹرولیم مصنوعات پر جی ایس ٹی بھی لگانا ہے۔ سی ایف او سوئی سدرن نے کہاکہ کے الیکٹرک کو سوئی سدرن کے 125ارب روپے دینے ہیں، سیف اللّٰہ ابڑو نے کہاکہ پیٹرولیم مصنوعات پر پریمیم میں کمی لانے کے اقدامات کیے جائیں۔

کمیٹی کو بریفنگ میں پی ایس او حکام نے کہا کہ ہم نے حکومت سے 100ارب مانگے تھے، ہمیں مجموعی طور پر 52ارب روپے ملے ہیں۔ سیف اللّٰہ ابڑو نے سوال کیا کہ کے الیکٹرک حکومتی اداروں کی ادائیگی کیوں نہیں کرتا، کے الیکٹرک پاور سیکٹر کا گردشی قرضہ بڑھا رہا ہے، کے الیکٹرک کو وفاقی حکومت کے بھی 300ارب روپے دینے ہیں، کے الیکٹرک مافیا ہے۔

چیئرمین پاکستان تحریک انصاف اور سابق وزیر اعظم عمران خان ضمانت قبل از گرفتاری کیلئے آج انسداد دہشتگردی کی عدالت میں پیش نہیں ہوں گے۔

ذرائع کے مطابق سابق وزیر اعظم عمران خان نے ضمانت قبل از گرفتاری کیلئے اے ٹی سی اسلام آباد میں آج پیش نہ ہونے کا فیصلہ کر لیا۔ ذرائع کا کہنا ہے کہ تحریک انصاف کی لیگل ٹیم سے مشاورت کے بعد چیئرمین تحریک انصاف عمران خان کی عدالت میں پیش ہونے یا نہ ہونے کا فیصلہ ابھی کچھ دیر میں ہوگا۔

ذرائع کا یہ بھی کہنا ہے کہ چیئرمین پی ٹی آئی عمران خان پیشی سے متعلق قانونی اور سیاسی کمیٹی کے اراکین سے مشاورت کریں گے۔ عمران خان سے قانونی ٹیم کے اراکین آج ملاقات کریں گے۔ ذرائع کے مطابق ہری پور جلسہ کے بعد عمران خان کاانسداد دہشت گردی عدالت میں جانے کا امکان ہے۔ جبکہ اسلام آباد ہائی کورٹ نے عمران خان کو 3روز کی حفاظتی ضمانت دے رکھی ہے۔

یاد رہے کہ سابق وزیراعظم عمران خان کی دہشت گردی کی دفعات کے تحت درج مقدمے میں 25 اگست تک ضمانت منظور کر لی گئی تھی. گزشتہ پیر کو اسلام آباد ہائی کورٹ کے جسٹس محسن اختر کیانی اور جسٹس بابر ستار پر مشتمل ڈویژن بینچ نے حکم سنایا تھا.

سابق وزیراعظم عمران خان کی جانب سے دہشت گردی کی دفعات کے تحت درج مقدمے میں ضمانت قبل از وقت گرفتاری کی درخواست پر رجسٹرار آفس نے اعتراضات لگاتے ہوئے اعتراضات وقتی طور پر ہٹاتے ہوئے درخواست سماعت کے لیے مقرر کی تھی۔ خیال رہے کہ پیر کو اسلام آباد ہائی کورٹ میں پی ٹی آئی کے وکلا بابر اعوان اور فیصل چودھری کی وساطت سے ضمانت قبل از گرفتاری کی درخواست دائر کی گئی تھی.

دوران سماعت عمران خان کے وکیل بابر اعوان نے موقف اپنایا تھا کہ ’ہم انسداد دہشت گردی کی عدالت سے رجوع کریں گے۔‘
جسٹس محسن اختر کیانی نے ریمارکس دیے تھے کہ ’اعتراض ہے کہ بائیومیٹرک نہیں کرایا۔ آپ بائیو میٹرک کرانے لیے لیے حفاظتی ضمانت چاہتے ہیں؟ اس پر بابر اعوان نے بتایا تھا کہ انسداد دہشت گردی کی عدالت کے جج چھٹی پر ہیں اس لیے ہائی کورٹ سے رجوع کیا ہے.

عدالت نے ریمارکس دیے تھے کہ عمران خان کے بائیو میٹرک تصدیق کا اعتراض دور کیا جاتا ہے، تین دن کی راہداری ضمانت منظور کر رہے ہیں۔

تاہم عمران خان کے خلاف انسداد دہشت گردی ایکٹ کے خلاف ایف آئی آر کے اندراج کے بعد متوقع گرفتاری کے پیش نظر پارٹی کارکنان کی بڑی تعداد رات سے بنی گالہ میں موجود ہے۔ کارکنان نے عمران خان کی گرفتاری کے خلاف نعرے لگاتے ہوئے ان کی سکیورٹی کے لیے بنی گالہ کے باہر ڈیرے ڈالے ہوئے ہیں جبکہ سنیچر کو ان کے خلاف مقدمے کے اندراج کے بعد لاہور اور دیگر شہروں میں بھی پی ٹی آئی کے کارکنان باہر نکل آئے تھے اور احتجاج کیا تھا.

سابق وزیر اعظم اور تحریک انصاف کے سربراہ عمران خان کے خلاف پولیس کے اعلیٰ افسران اور ایڈیشنل سیشن جج زیبا چوہدری کو ’ڈرانے اور دھمکانے‘ پر انسداد دہشت گردی ایکٹ کے تحت مقدمہ درج کیا گیا تھا۔ مقدمہ تھانہ مارگلہ میں مجسٹریٹ صدر اسلام آباد علی جاوید کی مدعیت میں درج کیا گیا تھا. درج ایف آئی آر کے مطابق شہباز گل کی گرفتاری کے خلاف تحریک انصاف کی ایک ریلی زیرو پوائنٹ سے ایف نائن پارک نکالی گئی جس کی قیادت عمران خان نے کی تھی اور ایف نائن پارک میں منعقدہ جلسے سے خطاب کرتے ہوئے عمران خان نے اچانک پولیس افسران اور ایڈیشنل سیشن جج کو ڈرانا اور دھمکانا شروع کر دیا تھا. جبکہ ایف آئی آر میں عمران خان کے خطاب کا متن بھی شامل کیا گیا ہے۔

ادھر امریکی محکمۂ خارجہ کے ترجمان نیڈ پرائس کا کہنا ہے کہ سابق وزیرِ اعظم عمران خان پر لگنے والے الزامات سے متعلق آگاہ ہیں۔ لیکن یہ معاملہ براہِ راست امریکا سے متعلق نہیں ہے، اور یہ پاکستان کے قانونی اور عدالتی نظام کا معاملہ ہے۔
نیڈ پرائس کا مزید کہنا ہے کہ پاکستان میں کسی سیاسی جماعت کے دوسری جماعت کے مقابل آنے پر امریکا کوئی مؤقف نہیں رکھتا۔
امریکی محکمۂ خارجہ کے ترجمان نے یہ بھی کہا ہے کہ پاکستان اور دنیا میں جمہوری، آئینی اور قانونی اصولوں کو پرُامن طریقے سے قائم رکھنے کی حمایت کرتے ہیں۔

پاکستان تحریک انصاف کے سینیٹر اور سابق وزیر خانہ خزانہ شوکت ترین نے لندن میں جہانگیر ترین سے ملاقات کا انکشاف کیا ہے۔

لاہور میں پریس کانفرنس کے دوران شوکت ترین نے کہا کہ انہوں نے لندن میں جہانگیر ترین سے ملاقات کی تھی۔ سابق وزیر خزانہ نے کہا کہ جہانگیر ترین اور پی ٹی آئی کے درمیان دوریوں میں کوئی کمی نہیں آئی، انہوں نے پارٹی میں واپس آنے سے متعلق کوئی رضامندی ظاہر نہیں کی، وہ اس وقت پارٹی میں واپس آنے کی سوچ بھی نہیں رکھتے۔

پریس کانفرنس کے دوران شوکت ترین نے کہا کہ مہنگائی نے عوام کی کمر توڑ دی، بجلی کے بل لیے لوگ سڑکوں پر ہیں، پانچ منی بجٹ آچکے ایک اور آنے والا ہے۔

سابق وزیر خزانہ نے کہا کہ ترسیلات زرمیں کمی ہوئی ہے اور تجارتی خسارہ 4ارب سے زائد ہوگیا ہے۔ ہمارے دور میں 2، 4 ارب ادھر اُدھر ہونے پر پوچھا جاتا تھا، اب آئی ایم ایف حکمرانوں سے کیوں نہیں پوچھتا۔
شوکت ترین کا مزید کہنا تھا کہ ملک کو دلدل سے نکالنے کیلئے عبوری حکومت کے قیام میں مدد کے لئے تیار ہیں۔

واضح رہے کہ گزشتہ دنوں جہانگیر خان ترین نے اپنی سیاسی جماعت عوامی تحریک انصاف بنانے کا عندیہ دیا تھا.

باغی ٹی وی اسلام آباد نے انکشاف کرتے ہوئے لکھا تھا کہ: "جہانگیرخان ترین نے علیم خان، مخدوم خسرو بختیار، عون چوہدری اور چوہدری سرور کے ہمراہ پاکستان کی سیاست میں نئے انداز کے ساتھ اُبھرنے کا فیصلہ کر لیا۔ باغی ٹی وی کے باوثوق ذرائع کے مطابق جہانگیر خان ترین نے اپنی سیاسی جماعت بنانے کا عندیہ دے دیا ہے جبکہ نئی سیاسی جماعت کے منشور کی تیاری آخری مراحل میں ہے.

باغی ٹی وی کو ذرائع نے اس وقت بتایا تھا کہ: جہانگیر خان ترین کی سیاسی جماعت کا نام "عوامی تحریکِ انصاف ” کثرتِ رائے سے تجویز کیا جا چُکا ہے. جس کو منظور بھی کرلیا گیا ہے اور عوامی تحریکِ انصاف بنائے جانے میں جہانگیر خان ترین کے دیرینہ ساتھیوں علیم خان، مخدوم خسرو بختیار، عون چوہدری، اور چوھدری سرور کیساتھ اسحاق خاکوانی و دیگر نامور سیاسی شخصیات کا مکمل تعاون شامل ہے.
جبکہ باغی ٹی وی نے پارٹی پرچم بارے دعوی تھا کہ اپنے قارئین کو یہ بھی بتاتے چلیں کہ پارٹی پرچم تین رنگ کا ھو گا جس میں سُرخ، سفید اور سبز رنگ شامل ہے جبکہ انتخابی نشان ابھی زیرِ غور ہے.