Author: +9251

سابق وزیر داخلہ اور عوامی مسلم لیگ کے سربراہ شیخ رشید کا کہنا ہے کہ 8، 9 سال سے جھوٹ بولنا چھوڑ دیا ہے۔

لال حویلی میں پریس کانفرنس کرتے ہوئے سربراہ عوامی مسلم لیگ شیخ رشید کا کہنا تھا کہ ملک میں 13 حکمران جماعتیں ہیں اورعمران خان تنہا ہے، 62 وزراء ہیں اور 17 کے محکمے نہیں، ایک مولوی کی طبیعت خرابی پر 8،8 لوگ ملنے جارہے ہیں۔

شیخ رشید نے کہا کہ بلاول بھٹو کو دوروں سے فرصت نہیں، وہ آج تک دفتر نہیں گئے، تمام ممالک کے سامنے جھولی پھیلائی گئی کسی نے پیسے نہیں دیئے، پہلے بھی آپ کو کچھ نہیں ملا، معیشت بچانے کے لیے کسی اور کو رابطے کرنا پڑ رہے.
سابق وزیر داخلہ کا کہنا تھا کہ ہماری حکومت کے خلاف سازش لندن سے ہوئی، آج پھر یہ لندن میں میٹنگز کر رہے ہیں، نواز شریف سے کہتا ہوں جو لوگ آپ کے پاس آرہے ہیں وہ اقتدار کے بھوکے ہیں۔

شیخ رشید نے کہا کہ دعا ہے یہ لوگ الیکشن کی طرف جائیں، اس بات کا حامی ہوں کہ الیکشن کی تاریخ دیں، میں بیٹھنے کو تیار ہوں، حکمرانوں کو مفت مشورہ ہے کہ الیکشن میں تاخیر نہ کریں، جتنا الیکشن تاخیر سے ہوگا عمران اتنے ہی مقبول ہوگا، امپورٹڈ حکومت سے ہمارے کمزور حلقے مزید مضبوط ہوگئے ہیں، 13 پی ڈی ایم جماعتیں غرق ہو چکی ہیں، آصف زرداری صرف سندھ کی حد تک سیاست کرتے ہیں۔

سابق وفاقی وزیر نے کہا کہ تمام طاقتوں کو کہنا چاہتا ہوں کہ ملک کو تباہی سے بچائیں، آج کمرشل بینکوں میں 5 ارب ڈالر کم ہوئے، ڈالر سستا ہوگیا لیکن غریب مر گیا، آٹا 100 روپے کلو ہو گیا، لوگ خودکشیاں کررہے ہیں، میرے حلقے میں گزشتہ روز 77 ڈکیتی کی وارداتیں ہوئیں، ملک کو تباہی کی طرف لے جایا جا رہا ہے۔

شیخ رشید نے مزید کہا کہ نیب کے قانون میں ترامیم ا اپنی ذات کے لیے کی گئیں، نیب میں ترامیم 1100 ارب ڈالر کے لیے کی گئیں۔ رانا ثنااللہ حکومت کو تباہ کر دیں گے، شہباز گل کے ڈرائیور کی اہلیہ کے ساتھ ظلم ہوا.

سربراہ عوامی لیگ نے کہا کہ 8، 9 سال سے جھوٹ بولنا چھوڑ دیا ہے، لیکن لگتا ہے اس ملک میں جھوٹ بکتا ہے، جو کچھ بھی دکھایا جا رہا ہے اس سے حکمرانوں کو نقصان پہنچ رہا ہے، اکتوبر نومبر تک انتخابات کے دعوے پر قائم ہوں۔

شیخ رشید نے کہا کہ میری وزارت داخلہ میں ایک بندے پر بھی مقدمہ کٹے تو میں حاضر ہوں، میں وزیر داخلہ تھا تب تک کے مذاکرات سے واقف ہوں، کوئی ان کو سیلوٹ کرنا نہیں چاہتا، ان کو میری سیاست سے خوف ہے، میرے اوپر پندرہ مقدمات ہیں جن کا متن ایک سا ہے، میں اللہ کو راضی کر رہا ہوں، عمران کے ساتھ ہوں۔

سندھ ہائیکورٹ نے پی ٹی آئی ممنوعہ فنڈنگ سے متعلق سابق گورنر سندھ عمران اسماعیل اور رکن صوبائی اسمبلی ڈاکٹر سیما ضیا کے خلاف ایف آئی اے کو کارروائی سے روک دیا ہے۔ ہائیکورٹ میں پی ٹی آئی ممنوعہ فنڈنگ سے متعلق الیکشن کمیشن کے فیصلے کے بعد ایف آئی اے کی انکوائری سے متعلق سابق گورنر سندھ عمران اسماعیل اور سیما ضیاء کی درخواست کی سماعت ہوئی۔

درخواست گزاروں کے وکیل نے موقف دیا کہ میرے موکلین کیخلاف جن 3 بینک اکاؤنٹس کی بنیاد پر انکوائری کی جارہی ہے وہ بند ہیں۔ ایف آئی اے کی جانب سے جاری کیا گیا کال اپ نوٹس کالعدم قرار دیا جائے اور انکوائری ختم کی جائے۔ درخواست کے حتمی فیصلے تک ایف آئی اے کو کسی بھی آرڈر جاری کرنے سے روکا جائے۔

عدالت نے ایف آئی اے کو تحقیقات جاری رکھنے کی ہدایت کرتے ہوئے سابق گورنر عمران اسماعیل اور سیما ضیا کے خلاف کارروائی سے روک دیا۔ عدالت نے ایف آئی اے و دیگر اداروں سے 24 ستمبر کو جواب طلب کرلیا۔

دوسری جانب ایف آئی اے نے فارن فنڈنگ کیس میں اکاؤنٹس کی چھان بین کيلئے چاروں صوبوں اور اسلام آباد میں ٹیمیں تشکیل دے دیں۔ ایف آئی اے کی جانب سے جاری بیان کے مطابق پی ٹی آئی کی غیر ملکی فنڈنگ کی تحقيقات میں اکاؤنٹس کی چھان بین کيلئے چاروں صوبوں بشمول وفاقی دارالحکومت اسلام آباد میں ٹیمیں تشکیل دے دی گئی ہیں۔

ایف آئی اے کے مطابق اسلام آباد ميں ٹیم کی قیادت ڈپٹی ڈائریکٹر آمنہ بیگ کريں گی، جب کہ ان کی 6 رکنی ٹیم میں اجمل صدیق، سردار اللہ بابر، اصغر بلوچ، ریحانہ کوثر اور ارباب عباسی شامل ہوں گے۔ ایف آئی اے حکام نے بتایا کہ بلوچستان میں ایف آئی اے کی ٹیم محمد علی ابڑو، محمد راشد بھٹی، افروز احمد کلہواڑ اور راجہ محمد امتیاز پر مشتمل ہوگی۔

خيبرپختونخوا کی 5 رکنی ٹیم کی قیادت ڈپٹی ڈائریکٹر محمد آفتاب بٹ کریں گے، جب کہ ان کی ٹیم میں افضل نیازی، طاہر خان، عرفان اللہ اور صائمہ ندیم شامل ہوں گی۔ سندھ زون ون کی 5 رکنی ٹیم کی سربراہی ڈپٹی ڈائریکٹر رابعہ قریشی کریں گی، اور اس ٹیم میں رؤف شیخ، سبین غوری، آفتاب وٹو اور راحت خان شامل ہيں۔

پنجاب زون ون ٹیم کے سربراہ ڈپٹی ڈائریکٹر میاں عامر اقبال ہوں گے، اور ٹیم میں محمد یوسف،شاہد علی اور عرفان خان شامل ہيں۔

صدر مملکت عارف علوی نے چئیرمین پیمرا محمد سلیم بیگ کو مزید تین سال کیلئے توسیع دے دی ہے۔

چئیرمین پیمرا محمد سلیم بیگ کو مزید تین سال کیلئے توسیع دے دی گئی ہے، صدر مملکت نے چئیرمین پیمرا کے عہدے میں توسیع دینے کی منظوری دے دی ہے۔ چیئرمین پیمرا کے عہدے میں توسیع کا نوٹیفکیشن بھی جاری کردیا گیا ہے، جس کے مطابق سلیم بیگ 30 ستمبر 2025 تک اس عہدے پر برقرار رہیں گے۔ محمد سلیم بیگ تقریبا ساڑھے تین سال سے چئیرمین پیمرا کے عہدے پر فرائض سرانجام دے رہے ہیں۔

واضح رہے کہ گزشتہ حکومت نے 2018 میں تعینات کیا تھا اور 28 جون 2022ء سے چیئرمین پیمرا کا عہدہ خالی تھا، سلیم بیگ کی بطور چیئرمین پیمرا 4 سالہ مدت 27 جون 2022ء کو ختم ہوگئی تھی۔ جبکہ وفاقی کابینہ نے گزشتہ دنوں سلیم بیگ کی ایک سال کیلئے دوبارہ چیئرمین پیمرا تعیناتی کی منظوری دے دی تھی۔ اور ذرائع کا کہنا تھا کہ وفاقی کابینہ نے چیئرمین پیمرا کی تعیناتی کی منظوری سرکولیشن سمری کے ذریعے دی.

علاوہ ازیں: چیئرمین پیمرا کی تعیناتی کیلئے صدر مملکت عارف علوی کو ایڈوائس بھجوائی گئی تھی۔
یاد رہے کہ سابقہ وفاقی حکومت نے اس وقت کے صدر کی منظوری کے بعد سلیم بیگ کو پاکستان الیکٹرانک میڈیا ریگولیٹری اتھارٹی (پیمرا) کا چیئرمین مقرر کیا تھا. سلیم بیگ انفارمیشن گروپ کے سینیئر افسر ہیں اور وزارت اطلاعات میں پی آئی او کے طور پرفرائض انجام دیتے رہے۔

اس وقت کی سرچ کمیٹی نے چیئرمین پیمرا کی تقرری کے لیے تین نام وزیراعظم کو بھجوائے تھے جن میں سے سلیم بیگ کے نام کی مںظوری دی گئی تھی۔ سابقہ وزیراعظم کی جانب سے منظوری کے بعد سمری صدر مملکت کو بھجوائی گئی تھی جنہوں نے اس پر دستخط کردیے تھے.چیئرمین پیمرا کی تقرری سپریم کورٹ کے احکامات کی روشنی میں کی گئی تھی، 5 رکنی سرچ کمیٹی نے چیئرمین پیمرا کے عہدے کیلئے 62 امیدواروں کے انٹرویو کیے تھے۔

یہ بھی یاد رہے کہ دسمبر 2017 میں لاہور ہائیکورٹ نے سلیم بیگ سے قبل پاکستان الیکٹرانک میڈیا اینڈ ریگولیٹری اتھارٹی (پیمرا) کے چیئرمین ابصار عالم کی تعیناتی کالعدم قرار دی تھی۔ شہری منیر احمد نے ایڈووکیٹ اظہر صدیق کی وساطت سے ابصار عالم کی بطور چئیرمین پیمرا تقرری کو چیلنج کرتے ہوئے لاہور ہائیکورٹ میں درخواست دائر کی گئی تھی۔
اس وقت درخواست گزار نے مؤقف اختیار کیا تھا کہ ابصار عالم کی تقرری کے لیے 2 بار اخبارات میں اشتہار دیئے گئے، وہ پہلے اشتہار کے تعلیمی معیار پر پورا نہ اترے تو دوسری بار کم اہلیت کا اشتہار جاری کیا گیا۔