Author: +9251

سرمد سلطان کھوسٹ کی فلم ”کملی“ کی سکریننگ کراچی کے بعد کل لاہور میںہونے جا رہی ہے فلم کی تمام کاسٹ لاہور پہنچ چکی ہے۔فلم تین جون کو سینما گھروں کی زینت بنے گی ۔کراچی میں اس فلم کی سکریننگ کے دوران وہاں موجود معروف شخصیات نے کھڑے ہو کر صبا قمر کے لئے تالیاں بجائیں اور ان کے کام کی بے حد تعریف کی، اس کے بعد صباقمر خود کے جذبات پر قابو نہ رکھ سکیں اور ان کی آنکھیں آنسوﺅں سے بھر گئیں تھیں سرمد سلطان کھوسٹ اس موقع پر صباقمر سے بغل گیر ہوئے اور انہیں چپ کروایا اور اس سے بھی اچھا کام کرنے کے لئے حوصلہ افزائی کی ۔سرمد سلطان کھوسٹ کی اس فلم کےلئے شائقین بے چینی سے انتظار کررہے ہیں ۔فلم کی ٹیم کا کہنا ہے کہ سوا دو گھنٹے کی اس فلم کو دیکھنے کے بعد یقینا کئی سوالات جنم لیں گے جن کے جواب ڈھونڈنے کے لئے ہمیں اپنے اردگرد دیکھنا ہو گا اپنے رویوں کو دیکھنا ہو گا عورت کے ساتھ کیسا سلوک کیا جا رہا ہے اس پر نظر ثانی کرنی ہوگی ۔عورت ایک جیتا جاگتا انسان ہے اس کے جذبات ہیں یہ ماننا ہو گا ۔کسی کے گرد زندگی کا گھیرا تنگ کرکے انسان خود بھی خوش نہیں رہا سکتا یہ سوچنا ہو گا۔
”کملی“ جیسی فلمیں کم کم بنتی ہیں سرمد سلطان کھوسٹ یقینا داد کے مستحق ہیں جو شائقین کے لئے مختلف اور روٹین سے ہٹ کر چیزیں لاتے ہیں ۔

منجھے ہوئے گلوکار سجاد علی اور نوجوان نسل کی نمائندہ گلوکارہ آئمہ بیگ پہلی بار ہوں گے ایکساتھ ایک ہی سٹیج پر۔آئمہ خود بھی سجاد علی کی مداح ہیں یہ دونوں گلوکار لندن کے مختلف شہروں میںہونے والے شوز کاحصہ بنیں گے ۔یقینا لندن میں موجود آئمہ بیگ اور سجاد علی کے پرستاروں کے لئے یہ بڑی خوشخبری ہے۔
واضح رہے کہ سجاد علی ایک لیونگ لیجنڈ ہیں ان کے ساتھ گلوکاری کرنا یا ایک سٹیج شئیر کرنا کسی بھی نئے گلوکار کا خواب ہو سکتا ہے ۔ سجاد علی کو ان کو انکی خوبصورت گائیکی کی وجہ سے ہر نسل کے لوگ سننا پسند کرتے ہیں ۔ان کے گلے کا سُر کمال ہی اونچا ہے ،ان کے گائے ہوئے گیت آج بھی مقبول ہیں اور

ہندوستان میں ان کے گیتوں کو بارہا کاپی بھی کیا گیا۔ دوسری طرف آئمہ بیگ بھی لاکھوں دلوں کی دھڑکن اور نوجوان نسل کی پسندیدہ گلوکار ہیں ان کے گائے ہوئے گیت معروف پاکستانی ہیروئینز پر پکچرائز ہوئے ہیں اس حوالے سے آئمہ بیگ کہتی ہیں کہ میں کوشش کرتی ہوں کہ جس ایکٹریس پرمیرا گانا پکچرائز ہونا ہو اسی کے انداز میں گاﺅں تاکہ سننے والوں کو لگے کہ یہ ہیروئین خود ہی گا رہی ہے۔دونوں گلوکار نوجوان نسل میں مقبول ہیں ان کی ایکساتھ پرفارمنس کو یقینا سراہا جائیگا

عفت عمر نے حال ہی میں ایک انٹرویودیا ہے اس میں انہوں نے کہا کہ میں مریم نواز میں مستقبل کی لیڈ ردیکھ رہی ہوں، انہوں نے مجھے اپنے جلسے میں آنے کی دعوت دی شاید بطورعورت وہ مجھے ایسا کہہ رہی ہیں اور میں بھی ان کو بطور عورت ہی سپورٹ کررہی ہوں ۔اس وقت اگر ہم دیکھیں تو مریم نواز جمہوریت کی بقاء کی جنگ لڑرہی ہیں ۔جن جن سیاسی لیڈروں کو عمران خان کے دور میں پکڑا گیا ان پر کچھ بھی ثابت نہیں ہوا لہذا میں ان کو چور ڈاکو کرپٹ ماننے سے انکاری ہوں۔امریکہ نے عمران خان کی حکومت ختم کی میں یہ بھی نہیں مانتی عمران نے آخر ایسا کیا کیا ہے جو وہ

اپنی حکومت کے خاتمے کا الزام امریکہ پر لگا رہے ہیں ۔میں پی ڈی ایم کو سپورٹ کررہی ہوں اور عمران خان نے یہ بھی دن دکھا دئیے ہیں کہ اب میں مولانا فضل الرحمان کی بھی سپورٹر ہوں۔میں فوری انتخابات کے حق میں نہیں ہوں جو جماعتیں برسراقتدار آئی ہیں انہیں کام کرنے دیا جائے آخر انہوں نے پہلے بھی تو ملک چلایا ہی ہے نا ۔اس وقت مسلم لیگ ن کا سب کچھ داﺅ پر لگا ہوا ہے انہیں بس کام کرنے دیا جائے میاں نواز شریف کے دور میں پاکستان نے ترقی کی عمران خان چا ر برس میں ہی ملک کو کتنا پیچھے لے آئے۔

شہروز سبزواری نے اپنے فیس بک اکاﺅنٹ پر اپنی اور اپنی اہلیہ کی تصویر لگا کر کیپشن لکھا ” میری زندگی کی محبت کو شادی کی سالگرہ مبارک ہو“ پوسٹ شئیر کرتے ہی دونوں کے دوستوں نے مبارکباد دینا شروع کر دی۔ دونوں شادی کے بندھن میں آج ہی کے دن دو سال پہلے بندھے تھے ۔دونوں ایک ساتھ خاصے خوش دکھائی دیتے ہیں شہروز سبزواری اپنی اہلیہ سے بے حد محبت کرتے ہیں ایک انٹرویو میں انہوں نے کہا تھا کہ صدف بے حد خوبصورت ہونے کے ساتھ ساتھ ایک بہترین بیوی بھی ہیں میںخوش نصیب ہوں کہ مجھے ان کا ساتھ ملا۔شادی کی پہلی سالگرہ پر شہروز نے ایک وڈیو لگائی اور اس وڈیو میں صدف کنول کورونا ٹیسٹ کرواتے ہوئے ڈر رہیں تھیں اور شہروز انہیں تسلی دے رہے تھے شہروز نے کپیشن لکھا تھا کہ میں تم سے بہت محبت کرتا ہوں لیکن تمہاری یہ وڈیو مجھے ہر بار ہنسا دیتی ہے۔

صدف کنول ماڈلنگ کی دنیا کا ایک بڑا نام ہیں انہوں نے ملک کے تمام نامور ڈیزائنرز کے ساتھ کام کیا ہے ۔واضح رہے کہ شہروز سبزواری نے صدف سے پہلے سائرہ یوسف سے شادی کی تھی ان دونوں کی ایک بیٹی بھی ہے دونوں کی طلاق کی وجوہات تو سامنے نہیں آسکیں کیونکہ نہ ہی سائرہ نے اس رشتے کے ٹوٹنے پر کوئی بات کی اور نہ ہی شہروز بولے لیکن صدف کنول سے جب شہروز کی شادی ہوئی تو سوشل میڈیا پر کہا گیا کہ صدف کنول نے سائرہ یوسف کا گھر توڑا ہے اس حوالے سے شہروز نے ایک وڈیو بیان جاری کر کے کہا کہ اس بات میں سچائی نہیں لہذا صدف کنول کے بارے میں ایسی باتیں نہ کی جائیں ۔انہوں نے بلکہ یہاں تک کہہ دیا تھا کہ ہم دونوں کی علیحدگی صدف کیا کسی بھی عورت کی وجہ سے نہیں ہوئی ۔

فوک گلوکار عنایت حسین بھٹی کی 23ویں برسی کے موقع پر ہم نے ان کے بیٹے وسیم عباس سے خصوصی گفتگو کی ۔وسیم عباس نے کہا کہ ان کے فن پر کیا بات کروں میں بطور بیٹا ہی بات کروں گا ۔انکی یادیں دل میں آج تک زندہ ہیں اورہر وقت دل و دماغ پر چھائی رہتی ہیں ماں باپ کا یقینا کوئی نعم البدل نہیں ہے۔ماں باپ کا سایہ درخت کے سائے کی طرح ہوتا ہے ، چھن جائے تو دنیا ہی اجڑ جاتی ہے ہمارے والد اپنی اولاد سے پیار نہیں عشق کرتے تھے پیار تو بہت ہی چھوٹا لفظ ہے۔مجھے یاد ہے کہ میرے پاس اپنے والد کی نسبت چھوٹی گاڑی تھی اور میرے والد مجھے کہا کرتے تھے کہ تم بڑی گاڑی لو تو میں کہا کرتا تھا کہ اچھا لے لوں گا اب میں نے اگر کہیں دور دراز شوٹنگ کے سلسلے میں جانا ہوتا تھا

تو وہ اُس دن کیا کرتے کے میرے اٹھنے سے پہلے ہی میری چھوٹی گاڑی لیکر جا چکے ہوتے مقصد یہ ہوتا کہ میںان کی گاڑی میں جاﺅں میں نے ایک دن امی سے پوچھا ابو ایسا کیوں کرتے ہیں تو امی بولیں کہ تمہارے والد چاہتے ہیں کہ تم محفوظ گاڑی میں جاﺅ۔اسی طرح سے ان کو جب معلوم پڑتا کہ میرے کسی بچے کی طبیعت خراب ہے تو کہیں بھی ہوتے چاہے شہر سے باہر ہی کیوں نہ ہوتے اپنا کام چھوڑ کر واپس گھر آجاتے اورگھر آکر کہہ دیتے کہ میرا تو کام ہی جلدی ختم ہو گیا ۔تو اس طرح سے وہ ہماری کئیر کرتے تھے ہوتے ہیں سبھی کے باپ ایسے لیکن میرے باپ کی خصوصیات ایسی تھیں کہ رشک آتا ہے کہ کوئی باپ اتنا بھی اچھا ہو سکتا ہے۔عنایت حسین بھٹی کے دور کے تمام فنکار ہی سونا تھے میرے والد عوامی گلوکار تھے جو بھی گیت گایا وہ آج تک سپر ہٹ ہے ۔