Author: +9251

وزارت انفارمیشن ٹیکنالوجی و ٹیلی کمیونیکیشن کے تعاون سے کراچی پریس کلب میں صحافیوں کیلئے ڈیجیٹل اسٹوڈیو قائم کردیا گیا جس کا افتتاح وفاقی وزیر آئی ٹی و ٹیلی کمیونیکیشن سید امین الحق نے ہفتہ کو پریس کلب میں منعقدہ ایک پروقار تقریب میں کیا۔ اس موقع پر ممبر آئی ٹی سید جنید امام، کراچی پریس کلب کے صدر فاضل جمیلی، سیکرٹری رضوان بھٹی نے ڈیجیٹل اسٹوڈیو کے قیام کے حوالے سے تفصیلات سے آگاہ کیا۔
تقریب میں کراچی پریس کلب کی نائب صدر شازیہ حسن،جوائنٹ سیکرٹری ثاقب صغیر،خازن عبدالوحیدراجپر، کورننگ باڈی ارکان عبدالوسیع قریشی، فاروق سمیع،حامدالرحمن،عبدالعزیزہنگور سمیتسابق صدر امتیاز خان فاران،اے ایچ خانزادہ سمیت صحافیوں کی بڑی تعداد نے شرکت کی۔

اس موقع پر خطاب کرتے ہوئے وفاقی وزیر سید امین الحق نے کہا کہ ایم کیوایم نے بلا امتیاز رنگ و نسل و سیاسی وابستگیوں سے بالاتر ہوکر ہمیشہ عوام کی خدمت کا شعار اپنایا ہے۔

مجھے نہیں معلوم کہ کراچی پریس کلب کی باگ دوڑ کس گروپ کے پاس ہے اور نہ مجھے اس سے دلچسپی ہے۔کراچی پریس کلب صحافیوں کی سہولت کا ایک مرکز ہے، اگر میں یا میری جماعت اس ادارے کیلئے کچھ اچھا کررہے ہیں تو اس کے پیچھے صرف ایک ہی مقصد ہے کہ صحافیوں کو سہولیات فراہم کرنا۔انہوں نے کہاکہ کہ میرے پاس وزارت آئی ٹی کا قلمدان ہے، کراچی پریس کلب میں ڈیجیٹل اسٹوڈیو کے قیام کیلئے مجھ سے جو ہوسکا وہ میں نے کیا ہے کیونکہ یہ تمام صحافی میرے ہیں۔
ڈیجیٹل اسٹوڈیو کے قیام سے مجھے امید ہے کہ صحافیوں کو اپنے پیشہ ورانہ فرائض کی ادائیگی میں مزید آسانیاں فراہم ہوں گی۔ میں کراچی پریس کلب کے عہدیداران اور گورننگ باڈی کے ساتھ ساتھ تمام صحافتی تنظیموں کو اس بات کا یقین دلاتا ہوں کہ ایم کیوایم نے جس طرح ماضی میں بھی صحافتی مسائل پر آواز بلند کرنے میں ہمیشہ پہل کی ہے۔وفاقی وزیر آئی ٹی نے کہا کہ ہمارا اصل مقصد عوام کی خدمت ہے تو جب بھی ملک و قوم کے خلاف کوئی عمل ہوگا ایم کیوایم اس کا حصہ کبھی نہیں ہوگی۔
اس موقع پر سید امین الحق نے سندھ حکومت کی عوام دشمنی پالیسی پر کڑی تنقید کرتے ہوئے کہا کہ سندھ پر تقریبا 13 برسوں سے پیپلز پارٹی کی بلاشرکت غیرے حکومت ہے۔ان 13 برسوں میں پیپلز پارٹی نے کراچی، حیدرآباد، سکھر، لاڑکانہ، نوابشاہ سمیت سندھ بھر کے عوام کے ساتھ جو سلوک کیا ہے اور اس کا انفراسٹرکچر جس سازش کے تحت تباہ کیا جارہا ہے وہ کسی سے ڈھکا چھپا نہیں۔
سندھ کے عوام کو تاریکیوں، پسماندگی اور جہالت میں مبتلا کرکے انھیں ذہنی اور جسمانی طور پر غلام بنانے کی سازش پیپلز پارٹی کی جانب سے کی جارہی ہے۔ اور میں آپ سب کو بتادوں کہ اگر پیپلز پارٹی کے اس عمل کے خلاف آپ سب نے آواز بلند نہیں کی تو آپ کا سندھ، ہمارا سندھ پتھروں کے دور کا صوبہ بن جائے گا۔ کوئی یہ بتائے کہ پیپلز پارٹی نے ان 13 برسوں میں سندھ میں تعلیم، صحت، روزگار، سڑکوں پانی و سیوریج کے نظام، سمیت عام آدمی کی زندگی بہتر بنانے کیلئے کون سے اقدامات کیئے۔
سندھ حکومت بتائے کہ 13 برسوں میں مختص کردہ 1800 ارب روپے سے زائد ترقیاتی فنڈز کہاں استعمال ہوئے۔ کتنی یونیورسٹیاں، اسپتال، سڑکیں تعمیر کی گئیں۔۔ جواب ۔۔۔۔ صفر بٹا صفر سے زیادہ کچھ نہیں ہوگا۔۔ البتہ سندھ کے وزرا کے دعوے، سیاسی بیانات، اور الزام تراشیاں اس عرصے میں ضرور عروج پر رہی ہیں۔ اس کے ساتھ ہی جب بھی وزیراعلی سندھ کو صوبے کے منصوبوں میں شرکت کیلئے ہم نے دعوت دی انھوں نے کبھی سنجیدگی کا مظاہری نہیں کیا بلکہ جواب تک دینے کی زحمت نہیں کی جاتی۔
وفاقی وزیر آئی ٹی نے کہا کہ ایم کیو ایم موجودہ حکومت کا حصہ ہیمیری ایک وزارت آئی ٹی نے چاروں صوبوں میں جس طرح بلاامتیاز عوامی منصوبے شروع کیئے ہیں اس جیسی کوئی ایک مثال مجھے کوئی لاکر بتادے۔ سید امین الحق نے بتایا کہ سندھ کے 19 اضلاع کے 3 ہزار 227 پسماندہ علاقوں میں براڈ بینڈ سروسز کی فراہمی کے 6 مختلف پراجیکٹس پر 3 ارب 38 کروڑ روپے کرچ کیئے جارہے ہیں یہ منصوبے دسمبر 2022 تک مکمل اور اس سے ایک کروڑ افراد کو سہولیات فراہم ہوں گی۔
ٹیکنالوجی کی بڑھتی ضروریات اور ہائی اسپیڈ انٹر نیٹ و موبائل سروسز کیلئے سندھ کے 7 اضلاع کی 230 یونین کونسلوں میں ایک ہزار 905 کلومیٹر طویل فائبر آپٹیکل کیبل بچھانے کے 3 مختلف منصوبوں پر 5 ارب 10 کروڑ روپے خرچ کیئے جارہے ہیں جس کی تکمیل سے 75 لاکھ کی آبادی کو سہولیات میسر ہوں گی۔سید امین الحق نے کہا کہ کراچی میں اسٹیٹ آف آرٹ آئی ٹی پارک منصوبہ 31 ارب روپے کی لاگت سے شروع کیا جارہا ہے جس سے نہ صرف ہزاروں افراد کو روزگار ملے گا بلکہ کراچی انفارمیشن ٹیکنالوجی کے شعبے میں اپنے ہنر مندوں کے ذریعے ڈیجیٹل دنیا سے منسلک ہوجائے گا۔

بلاول بھٹو زرداری کی خورشید احمد شاہ کے صاحبزادے سید فرخ شاہ کو ضمانت کی منظوری پر مبارکباد

پاکستان پیپلز پارٹی کے چیئرمین بلاول بھٹو زرداری نے سید خورشید احمد شاہ کے صاحبزادے و رکنِ سندھ اسمبلی سید فرخ شاہ کو ان کی ضمانت کی منظوری پر مبارکباد دی ہے۔ پی پی پی میڈیا سیل بلاول ہاوس کی جانب سے جاری کردہ بیان کے مطابق پی پی پی چیئرمین نے سید خورشید احمد شاہ اور سکھر کے جیالوں کو بھی سید فرخ شاہ کی ضمانت کی منظوری پر مبارکباد دی۔

چیئرمین بلاول بھٹو زرداری کا کہنا تھا کہ ظلم کی زنجیریں ٹوٹ رہی ہیں، نیب گردی کا خاتمہ نوشتہ دیوار ہے۔ آج فرخ شاہ کو نیب کے جھوٹے مقدمے میں ضمانت ملی ہے، کل ایسے تمام جھوٹے مقدمات کا خاتمہ ناگذیر ہے۔ پی پی پی چیئرمین نے کہا کہ پارٹی کے سینیئر رہنما و پارلیمنٹرین سید خورشید احمد شاہ اور ان کے اہلخانہ کو نیازی حکومت نے سیاسی انتقام کا نشانہ بنایا۔ انہوں نے کہا کہ نیب گردی سمیت سلیکٹڈ حکمرانوں سے تمام مظالم کا حساب آئندہ عام انتخابات میں لیں گے، جو اب زیادہ دور نہیں۔

ذیابیطس کے عالمی دن اور انسولین کی دریافت کے سو سال مکمل ہونے پر صنوفی پاکستان کی جانب سے منعقدہ پریس کانفرنس سے خطاب کرتے ہوئے پاکستان کے ممتاز طبی ماہرین نے مریضوں کے علاج میں مدد کے لیے منصوبہ سازی کی ضرورت پر زور دیا۔ ماہرین میں پاکستان انڈوکرین سوسائٹی کے سابق صدر پروفیسر ڈاکٹر سعید اے مہر، انٹرنیشنل سوسائٹی آف انڈوکرینالوجی کے ایگزیکٹو کمیٹی ممبر ڈاکٹر عباس رضا، پاکستان انڈوکرین سوسائٹی کے ایگزیکٹو ممبر ڈاکٹر فیصل مسعود قریشی شامل تھے۔
تقریب سے خطاب کرتے ہوئے صنوفی پاکستان کے ہیڈ آف ڈایابیٹس فرنچائز سلمان شمیم نے کہا، ”صنوفی نے 1923 میں پہلی بار انسولین کی بڑے پیمانے پر تیاری کر کے اسے زندگی بچانے والی ادویہ کی حیثیت سے فعال کیا۔

اس وقت سے ہم نے اس تحقیق میں اہم کردار ادا کرتے ہوئے اس کی علاج کی تاثیر کو آج پندرہ ملین افراد تک پہنچا یا ہے۔ انسولین سے قبل ذیابیطس کا واحد علاج فاقہ کشی کی حد تک پرہیزی خوراک پر مشتمل تھا۔

” سلمان شمیم نے حاضرین کو مزید بتایا کہ فرینکفرٹ میں واقع صنوفی کا انسولین کیمپس انسولین کی مہارت اور دنیا میں انسولین کی پیداوار کا سب سے بڑا مرکز ہے۔ انٹرنیشنل ڈایابیٹس فیڈریشن کے جانب سے جاری کردہ تازہ ترین اعداد و شمار کے مطابق دنیا بھر میں چین اور بھارت کے بعد اب پاکستان میں ذیابیطس کے مریضوں کی تعداد سب سے زیادہ ہے۔ پاکستان میں ذیابیطس کے ساتھ زندگی گذارنے والے ایک چوتھائی سے زیادہ بالغ افراد غیر تشخیص شدہ ہیں۔
پروفیسر ڈاکٹر سعید اے مہر نے ملک میں ذیابیطس کے مریضوں کی بڑھتی ہوئی تعداد پر تشویش کا اظہار کرتے ہوئے کہا، ”ہم ذیابیطس کے مریضوں کی تعداد میں امریکہ کو بھی پیچھے چھوڑتے ہوئے آج دنیا میں تیسرے نمبر پر ہیں۔” ڈاکٹر عباس رضا نے تقریب سے خطاب کرتے ہوئے انسولین تھراپی تشخیص کرنے میں ڈاکٹروں کو درپیش رکاوٹوں کا ذکر کرتے ہوئے ملک میں ذیابیطس کے علاج میں انسولین سے ہچکچاہٹ کو ایک حقیقی آزمائش قرار دیا۔
ڈاکٹر عباس نے بتایا، ”کھانے والی ادویہ سے ذیابیطس پر قابو پانے میں ناکام مریضوں کو انسولین تھراپی کے فوائد کو اجاگر کرنا وقت کی اہم ضرورت ہے۔” ڈاکٹر فیصل قریشی کے مطابق انسولین کی باسہولت دستیابی کے باوجود اس کا مناسب استعمال نہیں کیا جارہا ہے۔ انہوں نے کہا کہ پیچیدگیوں کے آغاز سے قبل اس علاج کی افادیت سے متعلق معالجین اور مریضوں کو آگاہ کرنے کی ضرورت ہے۔
سلمان شمیم نے اپنے اختتامی کلمات میں بتایا کہ صنوفی، مریضوں کی منفرد ضروریات کے مطابق ذیابیطس کے علاج کے لیے طبی ماہرین کے ساتھ مصروفِ عمل ہے۔ انہوں نے ملک بھر میں ذیابیطس کے علاج سے متعلق اپنی ٹیم کے ذریعے شروع کیے گئے مریضوں کی معاونت کے مختلف منصوبوں کا حوالہ بھی دیا۔ صنوفی اس سال کی ورلڈ ڈایابیٹس کیمپین کے لیے بین الاقوامی ذیابیطس فیڈریشن کے باضابطہ شراکت داروں میں سے ایک ہے۔

جماعت اسلامی ضلع کیماڑی کے تحت مہنگائی، اسٹریٹ کرائم ، منشیات فروشی ،بجلی گیس کی لوڈشیڈنگ اور پانی کے بدترین بحران کے خلاف بنارس چوک پر مظاہرہ کیا گیا۔مظاہرے سے امیر جماعت اسلامی کراچی حافظ نعیم الرحمان ،امیر ضلع کیماڑی فضل احد ،صدر پبلک ایڈ و سابق ممبر صوبائی اسمبلی حمیداللہ خان ایڈوکیٹ سمیت دیگرنے خطاب کیا۔
حافظ نعیم الرحمن نے مظاہرے سے خطاب کرتے ہوئے کہاکہ حکمران جماعتوں نے کراچی کو سونے کا انڈہ دینے والی مرغی سمجھ لیا ہے،کراچی ملک کی آمدنی میں آدھا حصہ دیتا ہے اسکی آبادی کو آدھا گن کر اس شہر کے ساتھ بدترین زیادتی کی گئی ہے،اورنج لائن اور گرین لائن بس سروس کراچی کے شہریوں کے ساتھ مذاق کے مترادف ہے۔
کراچی والوں کو جھوٹے وعدے اور جعلی افتتاح نہیں چاہئیں،اب کراچی کے عوام بیدار ہوگئے ہیں ،حق دو کراچی کی تحریک گلی اور محلے کی سطح پر منظم ہورہی ہے ،ہر جگہ عوام اپنے علاقے کی بحالی اور مسائل کے حل کے لیے تحریکیں چلا رہے ہیں،کراچی کے تین کروڑ لوگوں کی توانا اور واحد آواز صرف جماعت اسلامی ہے،ہم احتجاج اور مزاحمت کا راستہ کبھی نہیں چھوڑیں گے۔

انہوں نے مزید کہا کہ پولیس اور رینجرز کی موجودگی میں شہر کراچی بالخصوص کیماڑی میں قتل و غارت گری ،جرائم اور منشیات فروشی منظم ہو رہی ہے،ضلع میںمنشیات فروشی پولیس کی کارکردگی پر سوالیہ نشان ہے،نشے کی روک تھام اورجرائم کو قابو کرنے کے لئے آئی جی سندھ عملی اقدامات اٹھائیں،جرائم کو کنٹرول کرنا پولیس کی بنیادی ذمہ داری ہے۔فضل احد نے کہا کہ ملسل شکایات اور احتجاج کے باجود علاقے میں امن و مان کی صورت حال بہتر نہیں ہورہی ،پولیس کی مجرمانہ غفلت کے باعث جرائم اور منشیات فروشی بڑھتی جارہی ہے۔
انہوں نے مزید کہا کہ ضلع کیماڑی میں پانی بجلی اور گیس کے بدترین بحران سے عوام پریشان ہیں۔تباہ سڑکوں نے عوام کی زندگی اجیر ن بنا دی ہے ۔ضلع کیماڑی کو اسکا حق دلانے کے لئے جدوجہد مزید تیز کریں گے۔حمید اللہ خان ایڈوکیٹ نے خطاب کرتے ہوئے مطالبہ کیا کہ ضلع کیماڑی میں بجلی پانی اور گیس کی لوڈشیڈنگ ختم کی جائے اور علاقے میں امن و امان کی صورت حال کو بہتر بنایا جائے۔

سیکرٹری جنرل جماعت اسلامی پاکستان امیر العظیم نے کہا ہے کہ جماعت اسلامی آئندہ آنے والے ہر انتخابات میں اپنے جھنڈے نشان اور منشور پر حصہ لے گی۔ سندھ باب الاسلام ہے جو دعوت و عظیمت کی ایک مثال ہے۔سندھ میں راہ حق کے قافلے نے مقامی و بین الاقوامی اسٹیبلشمینٹ کی مزاحمت و مخالفت اور سازشوں کا ثابت قدمی کے ساتھ مقابلہ کیاہے۔
جس کی وجہ سے یہاں کی قیادت کو سخت آزمائش سے بھی گزرنا پڑا ہے۔ دعوت ہی ہماری پہلی و آخری ترجیح ہے۔ تحرک اسلامی کے ہر کارکن کو اپنی دعوت و تربیت کا مثالی نمونہ پیش کرناچاہئے۔ان خیالات کا اظہار انہوں نے قباء آڈیٹوریم میں صوبائی مجلس شوریٰ سے خطاب کرتے ہوئے کیا۔ سندھ کے امیر محمد حسین محنتی، قیم کاشف سعید شیخ، نائب امراء، نائب قیمین ودیگر ذمے داران بھی موجود تھے۔

اجلاس میں سینئر صحافی فیض اللّہ خان کے والد قاری فرہاد خان، راؤ علیہم ودیگر مرحومین کے لیے دعائے مغفرت بھی کی گئی۔امیر العظیم نے ذمے داران کو مخاطب ہوتے ہوئے کہاکہ ہماری توجہ ہر حال میں دعوت پر ہونی چاہئے۔اپنے لٹریچر کو فروغ دینے کی ضرورت ہے جو ہماری بنیاد ہے۔اس لٹریچر نے کئی نسلوں کے ایمان کو بچایا ہے۔ اس لٹریچر کے ذریعے جماعت اسلامی کی دعوت و پیغام کو ہر شہر و گوٹھ تک پہنچایا جائے۔انہوں نے کہاکہ جماعت اسلامی اب تنظیم کے دائرے سے نکل کر ایک تحریک کی شکل اختیار کررہی ہے،جماعت اسلامی کے شمولیتی جلسوں میں علماء ،مشائخ اورمعاشرے کے موثرافراد کی شمولیت تبدیلی کی نوید ہے۔

کراچی پریس کلب کے تحت زندگی بچائو، سیکھو اور سکھائو ڈرل ایکسرسائز کی گئی، ایکسرسائز کے ذریعے صحافیوں کسی بھی حادثے، سانحے، بم دھماکے کے نتیجے میں اپنی صحافتی ذمہ داریوں کے ساتھ زخمیوں کہ زندگی بچانے کے طریقے بتائے گئے ۔

اس ڈرل ایکسرسائز کا انعقاد کراچی پریس کلب نے کیا جس میں ٹراما اور ایمرجنسی ایکسپرٹ ڈاکٹر راشد عقیل نے ڈرلنگ ایکسرسائزکرائی، اس موقع پر صدر کراچی پریس کلب فاضل جمیلی، سیکریٹری رضوان بھٹی، گورننگ باڈی کے اراکین حامد الرحمن، فاروق سمیع، کے یو جے کے نائب صدراسلم خان سمیت سینئر صحافیوں کی بڑی تعداد موجود تھی۔

ڈاکٹر راشدعقیل نے کہا کہ اس ایکسرسائز کا مقصد صحافی اور عوام کو آگاہی دینا ہے، پاکستان میں زلزلے بھی آئے، بم دھماکے بھی ہوئے، ٹرین ایکسیڈنٹ بھی ہوتے رہتے ہیں، جہاز بھی کریش ہوئے ایسیمیں امداد کیلیے سب سے پہلے عوام یا صحافی پہنچتے ہیں جنہیں کچھ ٹیکنیکس سکھا دی جائیں تو وہ زخمیوں کی زندگی بچا سکتے ہیں، انہوں نے کہا یہ المیہ ہے کہ حادثہ کے بعد بہت سے لوگ ویسے کی کھڑے ہوجاتے ہیں اور ویڈیو بنانا شروع کر دیتے ہیں، عوام کو آگاہی دینے میں میڈیا کا بڑا کردار ہے، زندگی بچائو ،سیکھو اور سکھائو کی آگہی فراہم کررہے ہیں ۔

صدر کراچی پریس کلب فاضل جمیلی نے کہا کہ کراچی پریس کلب اپنے اراکین کے لیے وقتا فوقتا ورکشاپس منعقد کراتا رہتا ہے تاکہ صحافی ٹیکنیکل اور سافٹ اسکلز بھی سیکھیں، اس طرح کہ ڈرلز ایکسرسائز اپنی نوعیت کی منفرد ایکسرسائز ہیں جس میں گھر، محلے، سڑک یا کہیں بھی کسی حادثے کی صورت میں انسانی جان بچائی جا سکے، ایکسرسائزکے موڈریٹر اور رکن مجلس عاملہ حامدالرحمن نے تمام مہمانوں کا شکریہ ادا کرتے ہوئے کہا کہ یہ اس سلسلے کی پہلی ایکسرسائز ہے اور یہ ایکسرسائز منعقد ہوتی رہیں گی جس کا دائرہ کار بڑھایا جائے گا۔