Author: +9251

ٹی20ورلڈکپ:شاہین آفریدی نےفینز کی خواہش پوری کردی

آئی سی سی قومی کرکٹ ٹیم کے فاسٹ بولر شاہین شاہ آفریدی کی اِن سوئنگ ڈلیوری کا فین ہوگیا، کرکٹ کونسل نے تاريخی لمحات کو ڈيجيٹل ٹوکن اين ايف ٹی کے طور پر فروخت کرنے کا فيصلہ کيا ہے

کرکٹ کونسل (آئی سی سی) نے بھارت کیخلاف میچ میں شاہین شاہ آفریدی کی وکٹ لینے کے تاریخی لمحات کو ڈیجیٹل آرٹ کی شکل میں فروخت کرنے کا فیصلہ کرلیا۔

آئی سی سی قومی کرکٹ ٹیم کے فاسٹ بولر شاہین شاہ آفریدی کی اِن سوئنگ ڈلیوری کا فین ہوگیا، کرکٹ کونسل نے تاريخی لمحات کو ڈيجيٹل ٹوکن اين ايف ٹی کے طور پر فروخت کرنے کا فيصلہ کيا ہے جبکہ آئی سی سی کی ڈیجیٹل ٹیم شاہين آفريدی کی گيند کو آرٹ کی شکل دے گی۔

آئی سی سی کی جانب سے بال کو فيز ايپ پر نيلامی کے ليے پيش کيا جائے گا جبکہ اين ايف ٹی خریدنے والا شخص وی آئی پی باکس ميں ٹی20 ورلڈکپ کا فائنل دیکھے گا۔

بھارت کے خلاف ميچ کے ہيرو شاہين آفريدی نے روہت شرما کے علاوہ کے ايل راہول اور ويرات کوہلی کو بھی آوٹ کيا تھا۔

دوسری جانب ٹی20 ورلڈکپ کے 5 میچز میں 6 وکٹیں حاصل کی ہیں جس میں ایک میڈن اوور جبکہ بھارت کیخلاف 31 رنز کے عوض 3 کھلاڑیوں کو آؤٹ کرنے کی کارکردگی شامل ہے۔

محمد رضوان ٹی ٹوئنٹی میں ایک سال میں ایک ہزار رنز بنانے والے پہلے کھلاڑی بن گئے۔

قومی کرکٹ ٹیم کے وکٹ کیپر بلے باز محمد رضوان نے رواں سال کئی اعزاز اپنے نام کیے ہیں اور ٹی ٹوئنٹی ورلڈکپ کے دوران بھی انہوں نے متعدد ریکارڈ توڑے۔

ٹی ٹوئنٹی ورلڈکپ کے دوران اپنے آخری گروپ میچ میں رضوان نے کلینڈر ایئر میں 1668 رنز بناکر کرس گیل کا عالمی ریکارڈ توڑ ڈالا تھا اور اب انہوں نے ایک اور تاریخ رقم کردی۔

وزیراعظم عمران خان نے پاکستان کی جیت کی صورت میں ٹی 20 ورلڈ کپ کا فائنل دیکھنے کا فیصلہ کیا ہے۔

ذرائع کے مطابق دبئی میں جاری آئی سی سی ٹی ٹوینٹی ورلڈ کے سیمی فائنل میں آج پاکستان کا مقابلہ آسٹریلیا سے ہے، اور اگر پاکستان سیمی فائنل میں فتح حاصل کرلیتا ہے تو وزیراعظم عمران خان ایونٹ کا فائنل میچ دیکھنے اور کھلاڑیوں کی حوصلہ افزائی کے لئے دبئی جائیں گے، وزیراعظم عمران خان کے ساتھ وفاقی وزیر فواد چوہدری بھی ہوں گے۔

پاکستان اور آسٹریلیا کی کرکٹ ٹیموں کے درمیان میچ کے حوالے سے بات کرتے ہوئے وفاقی وزیر اطلاعات فواد چوہدری کا کہنا تھا کہ وزیراعظم سے درخواست کی ہے کہ اگر ہم فائنل میں پہنچے تو وزیراعظم فائنل دیکھنے ضرور جائیں، آج پاکستان اور آسٹریلیا کا میچ دو بڑی اور تگڑی ٹیموں کے درمیان مقابلہ ہے، پاکستان کرکٹ ٹیم جس طریقے سے آج شاندار کھیل کا مظاہرہ کر رہی ہے، ایسی کارکردگی بہت کم رہی ہے۔
فواد چوہدری کا کہنا تھا کہ آج کا میچ جیت کر ہم نے فائنل میں نیوزی لینڈ سے سیکیورٹی کا مسئلہ بھرپور طریقے سے حل کرنا ہے، اس لئے آج کا میچ جیتنا ضروری ہے، آج کا میچ ضرور جیتیں گے، پوری قوم اپنی ٹیم کے ساتھ کھڑی ہے، تمام کھلاڑیوں کے پاس سپر سٹار بننے کا موقع ہے، پانچ مختلف پلیئرز کو مین آف دی میچ کا اعزاز ملا ہے، اب دیکھتے ہیں چھٹے میچ میں کس کو یہ اعزاز حاصل ہوتا ہے۔

دوسری جانب ذرائع کا کہنا ہے کہ وزیرداخلہ شیخ رشید بھی ٹی ٹونٹی ورلڈکپ فائنل دیکھنے دبئی جائیں گے، اور انہوں نے وزیراعظم عمران خان سے دبئی جانے کی اجازت مانگ لی ہے۔

شیخ رشید گزشتہ ماہ پاکستان اور بھارت کا میچ دیکھنے دبئی گئے تھے، تاہم ٹی ایل پی کے دھرنوں اور احتجاج کے باعث ہونے والی کشیدہ صورتحال کے باعث وزیراعظم نے شیخ رشید کو میچ سے پہلے وطن واپس بلا لیا تھا اور وفاقی وزیر کو وطن واپس لوٹنا پڑا تھا، تاہم اب شیخ رشید فائنل میچ دیکھنے دبئی جائیں گے۔

اکستان کرکٹ بورڈکے چئیرمین رمیزراجا نے کرکٹ مداحوں کےلئے بڑا اعلان کردیا۔

چئیرمین پی سی بی رمیزراجا کا ویڈیو پیغام میں کہنا تھا کہ میں بطورکرکٹرآپ سے بات کررہا ہوں اورمجھے پتا ہے کہ شائقین کرکٹ کی کیا اہمیت ہوتی ہے۔ کرکٹ بورڈ کوکہہ دیا ہے فین انگجیمنٹ کا الگ سے ڈپارٹمنٹ بنا رہے ہیں۔پی ایس ایل، آسٹریلیا میں آپ کوایک الگ طرزکا کرکٹ بورڈ نظرآئے گا جہاں فینز کی ہم خدمت کررہے ہوں گے۔

رمیز راجا نے کہا کہ کرکٹ مداحوں کوای میلز کی جائیں گی۔سیزن کے ٹکٹس دیں گے اور لیزرشوز کریں گے۔انٹرٹینمنٹ اسٹیشنزبنائیں گے۔اندازہ ہے کہ سیکورٹی سے لڑجھگڑکردھکے کھاتے ہوئے مداح اندرآتے ہیں توہم ان کوتفریح فراہم کرنا چاہتے ہیں۔میرا اگلا ٹارگٹ یہ ہے کہ مداحوں کی خدمت ہوکیونکہ مداح ہماری طاقت ہیں۔

رمیزراجا کا مزید کہنا تھا کہ چھوٹے سے کھلاڑی کومداح بڑا بنا دیتا ہے۔کھلاڑی کواچھی پرفارمنس کے لئے پش کرتے ہیں آپ کے لئے دعائیں کرتے ہیں میں صرف ایک چیزچاہتا ہوں کہ پاکستان ٹیم سے ہماری توقعات ہزارگنا بڑھ جائیں اورتوقعات یہ ہیں کہ یہ جتیں گے آسانی سے ہاریں گے نہیں۔

چئیرمین پی سی بی نے کہا کہ اگرشائقین کی یہ سوچ بھی ہوجاتی ہے توہم بہت کامیاب ٹٰیم بن سکتے ہیں کیونکہ پہلے کیا ہوتا تھا کہ ہم ہارنے کے لئے تیارہوتے تھے اورایک طرح سے ہم پھس سے رہتے تھے۔میں ہمیشہ کہتا ہوں کہ مداحوں کے ساتھ یہ زیادتی ہوتی تھی کیونکہ ان کا یہ حق ہے کہ جب ٹیم گراؤنڈ میں اترے تویہ بہترین پاکستان کی ٹٰیم ہواورکسی بھی ٹیم کوہراسکے۔

رمیز راجا کا کہنا تھا کہ آج مجھے دومہینے ہوگئے ہیں بطورچئیرمین کرکٹ بورڈ میں نے یہ بات کی ہے کہ چائے پلانے والے سے لے کر چئیرمین پی سی بی تک فیل ہوتا ہے اگرپاکستان نمبرون ٹیم نہیں بنتی تو۔سب کو اس پر طاقت لگانی چاہئیے کہ پاکستان نمبرون کیسے ہوسکتا ہے۔

کراچی: نسلہ ٹاور متاثرین کے معاوضے سے متعلق ایم کیو ایم پاکستان نے سندھ ہائیکورٹ سے رجوع کرلیا۔

ایم کیو ایم نے درخواست میں موقف اپنایا ہے کہ سندھ حکومت نسلہ ٹاور متاثرین کو معاوضہ ادا کرے۔ ایم کیو ایم رہنما کنور نوید جمیل نے میڈیا سے بات کرتے ہوئے کہا کہ ہم نے نسلہ ٹاور کے متاثرین سے متعلق سندھ ہائیکورٹ میں درخواست دائر کی ہے۔ متاثرین کو سندھ حکومت کی جانب سے معاوضہ ملنا چاہیے۔ نسلہ ٹاور کو ایس بی سی اے نے تعمیر کی اجازت دی تھی۔

کنور نوید جمیل نے کہا کہ ایس بی سی اے ایسے پروجیکٹس کی کروڑوں کے فیس وصول کرتی ہے۔ لوگ ایسے مہنگی پراپرٹی لیں اور پھر پتہ چلے کے پراپرٹی غیر قانونی ہے تو لوگ کہاں جائیں گے۔لوگوں کا جو نقصان ہوا ان کے گھر گئے ، انہیں سندھ حکومت مارکیٹ ریٹ کے حساب سے رقم ادا کرے۔ اس بات کو آئندہ یقینی بنایا جائے کہ جو ادارہ تعمیر کی اجازت دے اور وہ غیر قانونی نکلے تو اس سرکاری ادارے کو ذمہ دار قرار دیا جائے۔ جب گجرنالہ اور لیاری ندی کے لوگوں کو حکومت نے معاوضہ دیا تو نسلہ ٹاور سمیت دیگر پروجیکٹس کے متاثرین کو بھی حکومت واجبات ادا کرے۔

گلشن اقبال، لیاری کے بعد رنچھوڑ لائن میں قائم عمارت کی باری آگئی، سندھ ہائیکورٹ نے سول اسپتال کے پیچھے رنچھوڑ لائن میں قائم عمارت کا غیر قانونی حصہ گرانے کا حکم دیدیا۔ جسٹس ظفر احمد راجپوت کی سربراہی میں دو رکنی بینچ کے روبرو سول اسپتال کے پیچھے رنچھوڑ لائن میں قائم عمارت کا غیر قانونی تعمیرات سے متعلق درخواست پر سماعت ہوئی۔
درخواست گزار کے وکیل نے موقف دیا کہ ڈی جی ایس بی سی اے اور ڈائریکٹر کیخلاف توہین عدالت کارروائی کی جائے۔ 13 سال سے عمل نہ کرنے پر عدالت ایس بی سی اے حکام پر سخت برہم ہوگئی۔ ایس بی سی اے وکیل نے موقف دیا کہ دو 2012 میں غیر قانونی تیسری منزل پر کارروائی کی تھی۔ جسٹس ظفر احمد راجپوت نے تصاویر کا جائزہ لینے کے بعد ریمارکس دیئے کارروائی ایسی ہوتی ہے۔

ذرا سا ہتھوڑا مارا، چار بلاک نکالے اور بس۔ یہ فرضی اور نمائشی کارروائی نہیں چلے گی۔ جسٹس محمد فیصل کمال عالم نے ریمارکس دیئے 2008 سے کیس چل رہا ہے ایسے تو ساری زندگی چلے گا۔ وکیل ایس بی سی اے نے موقف دیا اس وقت کے ڈی جی تو ریٹائرڈ ہوگئے۔ عدالت نے ریمارکس دیئے انہیں وارنٹ گرفتاری جاری کرکے بلا لیں گے۔ عدالت نے غیر قانونی تیسری فلور کو مکمل ختم کرنے کا حکم دیدیا۔ عدالت نے آئندہ سماعت پر متعلقہ ڈائریکٹر کو رپورٹ کے ہمراہ پیش ہونے کا حکم دیدیا۔ عدالت نے کیس کی سماعت تین ہفتوں کے لیے ملتوی کردی۔

باپ کی طرف سے زیادتی کا شکار ہونے والی حوا کی بیٹی کی دردناک کہانی نے سب کے ہوش اڑا دئیے۔
متاثرہ لڑکی کا کہنا ہے کہ میرے والد میرے کمرے میں آتے تھے اور مجھے ہراساں کرتے تھے پھر کہتے تھے کہ رات کو میرے کمرے میں آنا۔متاثرہ بچی نے مزید کہا کہ میرے پاپا پانچ چھ ماہ سے مجھے بہت زیادہ تنگ کر رہے تھے۔
کوئی بھی گھر سے باہر جاتا تو وہ میرے کمرے میں آ جاتے اور مجھے ٹچ کرتے۔مجھے ماں کو بتانے کی صورت میں دھمکی دی کہ وہ انہیں مار دیں گے۔پہلے تو میں ڈرتی رہی لیکن پھر والدہ کو بتایا جس کے بعد انہوں نے کلمہ پڑھتے ہوئے کہا کہ کیا میں اپنی بیٹی کے ساتھ ایسا کر سکتا ہوں؟۔لیکن وہ گن پوائنٹ پر مجھے دھمکیاں دیتے رہے اور غلیظ کام میں ساتھ دینے پر والدہ اور مجھے جان سے مارنے کی دھمکیاں دی۔
اتوار کے روز ماں گھر سے باہر گئیں تو وہ تو پھر آ گئے۔اگرچہ میری بات کا کوئی یقین نہیں کرتا تھا کہ آخر ایک باپ کیسے یہ کر سکتا ہے۔اس لیے جب گھر خالی تھا تو مجھے معلوم تھا وہ ضرور آئیں گے۔میں نے موبائل آن کر کے رکھ دیا جس نے تمام ویڈیو ریکارڈ کر لی۔متاثرہ لڑکی نے مزید کہا کہ میرے والد مجھے گندی نظروں سے دیکھتے تھے اور غلیظ کام میں ساتھ دینے پر پیسوں کی بھی پیشکش کرتے تھے۔
ویڈیو میں دیکھا جا سکتا ہے کہ کس طرح سفاک شخص نے اپنی ہی پیدا کی ہوئی ننھی کلی کو نوچ ڈالا۔لڑکی نے اپنی مدد آپ کے تحت ظالم باپ کے خلاف ثبوت اکھٹا کیا اور پھر اپنے اہل خانہ کو دکھایا۔سوشل میڈیا پر بیٹی کی عزت کی دھجیاں اڑانے والے باپ کو کڑی سے کڑی سزا دینے کا مطالبہ کیا جا رہا ہے۔افسوس کی بات تو یہ ہے قانون نافذ کرنے والے اداروں نے بھی مقدمہ درج کرنے میں تاخیر کی۔جب کہ سفاک شخص نے لڑکی کا میڈیکل کرنے والی ڈاکٹر کو بھی اپنے ساتھ ملا لیا جس کی وجہ سے ڈاکٹر نے 24 گھنٹے بعد لڑکی کا میڈیکل کیا۔واضح رہے بیٹی کے ساتھ زیادتی کرنے والا سفاک شخص خود بھی محکمہ پولیس میں بطور کانسٹیبل کام کرتے ہیں۔

کراچی سے گرفتار جعلی میجر عثمان شاہ سے متعلق سنسنی خیز انکشافات سامنے آئے۔
با خبر ذرائع کے مطابق 70 کروڑ روپے کی اسمگل شدہ چھالیہ پکڑوانے والے کسٹمز انٹیلی جنس کے مخبر فضل کے قتل کا مرکزی کردار جعلی میجر عثمان شاہ اصلی پولیس کی گاڑیاں اور ایک اعلیٰ پولیس افسر کا دیا گیا وائرلیس سیٹ استعمال کرتا تھا۔
خفیہ ادارے کا میجر ظاہر کرکے عثمان شاہ پولیس افسران کا اعتماد حاصل کر چکا تھا۔ گرفتار ملزم نے محکمہ انسداد دہشتگردی کی تفتیشی ٹیم کے سامنے کچھ انکشافات بھی کیے۔ دوران تفتیش یہ بات سامنے آئی کہ ملزم کے پاس اعلیٰ پولیس افسر کا وائرلیس سیٹ بھی موجود تھا۔ پولیس افسر نے خود کو میجر ظاہر کرنے والے اس مجرم سے متاثر ہوکر اپنا سرکاری وائرلیس سیٹ ملزم کو دے رکھا تھا، ملزم عثمان عرف میجر کے مطانق وہ وائرلیس سیٹ سے پولیس کمیونیکیشن کی مدد لیا کرتا تھا، وائرلیس سیٹ سے پولیس کی موومنٹ اور پوزیشن کی تفصیلات لی جاتی تھیں۔
ذرائع کے مطابق ملزم وائر لیس پر ہونے والی بات چیت اور پولیس کے تمام کال سائن کی معلومات رکھا کرتا تھا۔ پولیس تفتیش میں یہ بات سامنے آئی کہ کسٹمز انٹیلی جنس کے مخبر مقتول فضل کے موبائل فون کا کال ڈیٹا ریکارڈ میجر عثمان نے ہی نکلوایا تھا۔ جبکہ سابق ایس ایچ او ہارون کورائی کے ساتھ فضل کو گھر سے اغواء کرنے میں بھی میجر عثمان شاہ شریک تھا اور چھالیہ مافیہ کے ساتھ مل کر مخبر فضل کے قتل کی منصوبہ بندی میں بھی میجر عثمان شاہ کا ہی ہاتھ تھا۔
اس حوالے سے محکمہ انسداد دہشتگردی ذرائع کا کہنا ہے کہ مخبر فضل کو سرجانی ٹاؤن سے پولیس موبائل میں اغواء کرکے اسٹیل ٹاؤن میں قتل کیا گیا تھا۔ واضح رہے کہ قتل اور اغواء کے مقدمات میں جعلی میجر عثمان شاہ، سابق ایس ایچ او ہارون کورائی سمیت 6 ملزمان گرفتار ہیں جن سے مزید تفتیش کی جا رہی ہے ۔