Author: +9251

معروف سماجی رہنما و ماہر تعلیم حنید لاکھانی نے کہا ہے کہ شہر قائد میں جگہ جگہ گندگی کے ڈھیر لگے ہوئے ہیں جس کی وجہ سے شہر میں مختلف وبائی امراض پھیل رہے ہیں کراچی کے وہ علاقے جہاں غریب یا متوسط گھرانے رہ رہے ہیں وہاں صفائی ستھرائی کا کوئی جامع نظام نہ ہونے کی وجہ سے زیادہ گندگی پھیل رہی ہے اور گندی گلیوں میں جب بچے کھیلتے ہیں تو مختلف جراثیم لگنے سے وہ بیمار ہوجاتے ہیں ، ان خیالات کا اظہار انہوں نے حنید لاکھانی سیکرٹریٹ سے جاری کردہ بیان میں کیا ، حنیدلاکھانی نے کہا کہ کراچی میں کچرے کے ڈھیرو ں سے اٹھنے والا تعفن اوربدبو نے شہریوں کو شدید ذہنی کوفت اور اذیت میں مبتلا کردیا ہے کئی ماہ تک کراچی کی شاہراہوں ہر کچر ا پڑ ا رہتا ہے لیکن انتظامیہ کے پاس اس کو ٹھکانے لگانے کے لیے کوئی منصوبہ بندی یا وقت نہیں ہوتا جس کی وجہ سے کراچی کی شاہراہیں بھی تباہ ہورہی ہیں اور آدھی سڑک پر کچرا ہونے کی وجہ سے ٹریفک کی روانی بھی متاثر ہوتی ہے متعلقہ اداروں کی غفلت اور لاپرواہی سے صفائی ستھرائی کے معاملات اور نظام تباہ و برباد ہوچکا ہے جبکہ شہر کی صفائی کے لیئے جاری ہونے والا فنڈ بھی کرپشن کی نذر ہوجاتا ہے، انہوں نے کہا کہ کراچی پاکستان کا ایسا شہر ہے جہاں سے اربوں کا ٹیکس جمع ہوتا ہے بیرون ممالک سے لوگ کراچی آتے ہیں بڑی بڑی کاروباری شخصیات اور سیاسی و سماجی شخصیات اس شہر میں بستی ہیں لیکن ان سب کے باوجود کراچی میں گندگی کے ڈھیر لگے ہوتے ہیں اور یہ گندگی کا یہ مسئلہ کو ئی ایک روز یا ایک ماہ کا نہیں ہے کہ جو انتظامیہ کو نظر نہ آتا ہو سالوں سے شہر میں گندگی کے ڈھیر، سیوریج نظام کی تباہی، نکاسی آب کے سسٹم کا نہ ہوتا سمیت دیگر ایسے مسائل ہیں جو صرف اور صرف انتظامیہ کی سستی اور نا اہلی کی وجہ سے ہیں ورنہ اگر انتظامیہ اپنی ذمہ داریوںکو احسن اور پوری ایمانداری سے نبھائے تو یہ مسائل تو پیداہی نہ ہوں یہ وہ مسائل ہیں جن کو اپنے ہاتھ سے پیدا کیا گیا ہے انہوں نے مزید کہا کہ ایسا محسوس ہوتا ہے کہ کراچی کو کسی سازش کے تحت گندگی کے ڈھیر میں تبدیل کیا گیا ہے لیکن باشعور کراچی کے شہری اپنے شہر کو کسی بھی سازش کا چال کا شکار نہیں ہونے دیں گے

کراچی : پیپلزپارٹی کے ایم پی اے جام اویس سمیت تین ملزمان کے جسمانی ریمانڈ میں مزید تین دن کی توسیع کردی ۔
کراچی کی ملیرکورٹ نے ناظم جوکھیوقتل کیس میں پیپلزپارٹی کیایم پی اے جام اویس سمیت تین ملزمان کے جسمانی ریمانڈ میں مزید تین دن کی توسیع کردی ہے۔ملیرکورٹ میں ناظم جوکھیو قتل کیس کی سماعت ہوئی ،پولیس نے مرکزی ملزم رکن صوبائی اسمبلی جام اویس کو عدالت میں پیش کیا۔
جام اویس کی پیشی پر ملیرکورٹ میں وکلا نے جام اویس کیخلاف شدید نعرے بازی بھی کی۔

جبکہ دوران سماعت تفتیشی افسر نے عدالت کو بتایا کہ مقدمے میں نامزد مزید دو ملزمان مفرور ہیں، مفرور ملزمان سے متعلق تفتیش کرنی ہے، تلاش کیلئے چھاپے مارے جارہے ہیں۔جس پر عدالت نے ناظم جوکھیوقتل کیس میں جام اویس سمیت 3ملزمان کے جسمانی ریمانڈ میں مزید 3دن کی توسیع کرتے ہوئے آئندہ سماعت پر پیشرفت رپورٹ طلب کرلی ہے ۔

جامعہ بنوریہ عالمیہ کے مہتمم مفتی نعمان نعیم نے کہاکہ مہنگائی کنٹرول کرنے میں حکومت ناکام دکھائی دے رہی ہے، بے ہنگم مشکلات کے پیش نظرعوام کی ذرائع آمدنی کاانتظام کرنا حکومت کے اخلاقی، آئینی اورفرائض میں شامل ہے، روز مرہ کی اشیا خورد ونوش کی بڑھتی ہوئی قیمتیں غریب کے منہ کا نوالہ چھین رہی ہیں،سیاستدانوں ،حکمرانوںاوررفاہی ادروں کو عوامی دادرسی کیلئے اپنااپناکرداراداکرنے کی ضرورت ہے۔
ان خیالات اظہار گزشتہ روز جامعہ بنوریہ عالمیہ میں ملاقات کیلئے آئے ہوئے مزدوررہنماں سے گفتگوکرتے ہوئے مہتمم جامعہ بنوریہ عالمیہ مولانا نعمان نعیم نے کیا ، اس موقع پر انہوں نے بنوریہ ویلفیئر ٹرسٹ کے ذمہ داران کو کم آمدن والے گھرانوں کی مالی معاونت کیلئے اقدامات اٹھنے کا حکم دیا،ان کا کہنا تھاکہ بیرون ممالک میں مہنگائی کا تناسب پاکستان سے زیادہ ہے یہ حقیقت ہے لیکن وہاں روزگار اور تنخواہوں کا تناسب یہاں سے بہتر ہے اس لیے اس طرح سے موازانہ کرنے سے پہلے معروضی حالات کا بھی جائزہ لینا چاہیے ، بے ہنگم مشکلات کے پیش نظرعوام کی ذرائع آمدنی کاانتظام کرنا حکومت کی اخلاقی، آئینی فرائض میں شامل ہے۔
انہوں نے کہاکہ عوام نے حکمرانوں کا انتخاب اچھی توقعات کے ساتھ کیا ہے اور حکمران طبقے کے ماضی میں دعوے بھی ایسے رہے ہیں جن سے جان چھڑایا نہیں جاسکتا ، عوام شکوی شکایت کا حق رکھتی ہے، انہیں یہ کہہ کر خاموش نہیں کیاجاسکتا کہ ”عالمی سطحی پر مہنگائی ہی” بلکہ ٹھوس اقدامات پر توجہ دینی ہوگی اور شہروں میں پرائس کنٹرول اتھارٹی کو منظم کرکے نرخوں کے جانچ پڑتال کے نظام میں بہتری لانی ہوگی ۔

لیاری میڈیکل کالج کی انتظامیہ حکومت سندھ کے ویژن کے مطابق لیاری کے غریب عوام کو جدید طبی سہولتوں کی فراہمی کیلئے کوشاں ہے ،ٹیم ورک کیوجہ سے لیاری جنرل اسپتال کے مریضوں کو دیگر سرکاری اسپتال منتقل کرنے کاعمل نہ ہونے کے برابر ہو گیا ہے بلکہ تدریسی اسپتال میں بہتر سہولیات کی بناء پر دیگر سرکاری اسپتالوں کے مریض لیاری اسپتال میں علاج کرانے کو ترجیح دیتے ہیں ۔
ان خیالات کا اظہار شہید محترمہ بے نظیر بھٹو لیاری میڈیکل کالج کی پرنسپل پروفیسر انجم رحمان نے اسپتال میں انڈو اسکوپی ڈیپارٹمنٹ کی افتتاحی تقریب سے خطاب کرتے ہوئے کیا ۔اس موقع پر اسپتال کے میڈیکل سپریٹینڈنٹ ڈاکٹر زبیر آغا ،ڈاکٹر بروہی ،عذیر رستم بلوچ ،اقبال انصاری،جمیل شاہ ،ملا عبد الغنی ،اعجاز بلوچ ،عاطف بلوچ ،عاصم بلوچ ،ریاض بابل اور دیگر بھی موجود تھے ۔
پروفیسر انجم رحمان نے کہا کہ وزیر صحت ڈاکٹر عذرا فضل پیچوہو لیاری جنرل اسپتال کو کراچی کا مثالی سرکاری اسپتال بنانے کی خواہاں ہیں وہ اپنی طبی اور نیم طبی عملے کی ٹیم کے ہمراہ شب روز اسپتال میں مریضوں کے علاج و معالجے کی سہولیات کو بہتر اور جدید بنانے کیلئے کوشاں ہیں ۔اس موقع پر طبی اور نیم طبی عملے نے پروفیسر انجم رحمان گلدستے پیش کئے ۔

اوڈیرولال کی رہائشی خاتون نے اپنے بھتیجے پر مبینہ جنسی زیادتی کا الزام عائد کیا ہے۔تفصیلات کے مطابق ہالا کے علاقے اوڈیرولال کی رہائشی خاتون نے اپنے سگے بھتیجے پر الزام عائد کیا ہے کہ اس نے زیادتی کا نشانہ بنایا اور منہ بند رکھنے کے لئے دھمکیاں دے رہا ہے۔ متاثرہ خاتون کے مطابق اس کا بھتیجا شوکت اسے اوطاق پر لے گیا اور زبردستی جنسی زیادتی کا نشانہ بنایا، میں دہائی دیتی رہی کہ ظلم مت کرو لیکن اس نے ایک نہ سنی اور زیادتی کا نشانہ بناڈالااور جب واقعہ کی رپورٹ درج کرانے تھانے گئی تو پولیس نے مقدمہ درج کرنے کے بجائے مجھ پر طنز کے تیر برسانا شروع کردیئے۔
خاتون نے کہاکہ بھتیجا زیادتی کے بعد منہ بند رکھنے کے لیے دھمکیاں دے رہا ہے، اس نے کہاکہ زبان کھولنے پر وہ مجھے قتل کردے گا، چیف جسٹس پاکستان گلزار احمد، وزیراعلی سندھ مراد علی شاہ اور آئی جی سندھ سے درخواست ہے کہ مجھے انصاف دلایا جائے۔

کور ہیڈکوارٹرز کراچی میں کمانڈ کی تبدیلی کی تقریب کا انعقاد
لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کردی ۔

تفصیلات کے مطابق لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، نئے تعینات ڈی جی آئی ایس آئی لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کردی۔ پاک فوج کے شعبہ تعلقات عامہ آئی ایس پی آر کے مطابق کور ہیڈکوارٹرز کراچی میں کمانڈ کی تبدیلی کی تقریب کا انعقاد ہوا، لیفٹیننٹ جنرل محمد سعید نے کورکمانڈر کراچی کی ذمہ داریاں سنبھال لیں، لیفٹیننٹ جنرل ندیم انجم نے کمانڈ لیفٹیننٹ جنرل محمد سعید کے حوالے کی۔
واضح رہے رواں سال 26 اکتوبر کو پاک فوج کے لیفٹیننٹ جنرل ندیم احمد انجم کو آئندہ کیلئے باقاعدہ نئے ڈائریکٹر جنرل انٹر سروسز انٹیلی جنس( ڈی جی آئی ایس آئی) تعینات کردیا گیا ہے، وزیراعظم عمران خان کے دستخط کے بعد ڈی جی آئی ایس آئی کی تقرری کا نوٹیفکیشن جاری کیا جا چکا ہے۔ موجودہ ڈی جی آئی ایس آئی لیفٹیننٹ جنرل فیض حمید 19 نومبر تک اپنے عہدے پر کام جاری رکھیں گے۔ لیفٹیننٹ جنرل ندیم انجم کے باقاعدہ چارج سنبھالنے کے بعد موجودہ ڈی جی آئی ایس آئی لیفٹیننٹ جنرل فیض حمید کورکمانڈر پشاور کا عہدہ سنبھال لیں گے ۔

شہر میں مافیا نے دودھ مہنگا کردیا جس کے نتیجے میں دودھ 140 روپے لیٹر جبکہ دہی 220 روپے کلو کردیا گیا۔

کراچی میں دودھ سرکاری نرخ سے 46 روپے زائد میں فروخت ہونے لگا۔ ڈیری مافیا نے 8 نومبر سے دودھ 10 روپے لیٹر اضافے کا اعلان کیا تھا۔ ایسوسی ایشن نے کہا ہے کہ دو ماہ بعد فی لیٹر قیمت میں مزید 30 روپے کا اضافہ کیا جائے گا۔

کمشنر کراچی کی زیرِ صدارت 25 اکتوبر اور 4 نومبر کو متعلقہ ایسوسی ایشنز کے اجلاس منعقد ہوچکے ہیں اور 4 نومبر کو ڈیری فارمرز ہول سیلرز اجلاس میں تخمینہ مرتب کرنے کے لیے کمیٹی بنادی گئی تھی۔ قیمت کے تعین کے حوالے سے قائم کمیٹی کی سفارشات سے قبل اضافہ غیر قانونی ہے۔