Author: +9251

لاہور:درویش صحافت کا ایک عہد تمام ہوا۔سینئرصحافی قدرت اللہ چودھری وفات پاگئے ،اطلاعات کے مطابق سینئرصحافی،تجزیہ نگار اور گروپ ایگزیکٹو ایڈیٹر روزنامہ پاکستان قدرت اللہ چودھری کرونا وائرس کا شکار ہو کر لاہور میں وفات پا گئے۔

قدرت اللہ چودھری چند ہفتے قبل کرونا کی عالمی وبا کا شکار ہو کر سروسز ہسپتال میں زیر علاج رہے، کئی ہفتوں تک بیماری سے لڑنے کے بعدتین نومبر، بروز بدھ کی شام طبعیت زیادہ بگڑنے کے باعث ہسپتال لے جایا گیا لیکن وہ جانبر نہ ہو سکے۔

قدرت اللہ چودھری گزشتہ پانچ دہائیوں سے زائد عرصہ تک شعبہ صحافت سے منسلک رہے، روزنامہ جنگ، نوائے وقت، دن، مشرق اور پاکستان جیسے مئوقر قومی اخبارات میں ایڈیٹر کے اہم عہدے پر ذمہ داریاں سر انجام دیں، وہ جنگ یونین، لاہور پریس کلب اور پنجاب یونین آف جرنلسٹس کے پلیٹ فارم سے کارکن صحافیوں کے حقوق کی جدوجہد کرتے رہے۔

قدرت اللہ چودھری کی رحلت سے ملکی صحافت کا ایک روشن باب ختم ہو گیا ہے، ملک بھر کی صحافتی تنظیموں نے قدرت اللہ چودھری کی وفات کو اصولی صحافت کا عظیم نقصان قرار دیتے ہوئےگہرے دکھ اور غم کا اظہار کیا ہے۔ اللہ تعالی جنت الفردوس میں انہیں اعلی مقام عطاء فرمائیں۔(آمین)

لاڑکانہ:وائے ناکامی! متاعِ کارواں جاتا رہا کارواں کے دل سے احساسِ زیاں جاتا رہا:دیکھ لیا قوم نے آپ کا احساس:اطلاعات کے مطابق چیئرمین پیپلزپارٹی بلاول بھٹو کا کہنا ہے کہ وزیراعظم کا ریلیف پیکیج مذاق کے سوا کچھ نہیں ہے۔

اس حوالے سے ذرائع کے مطابق وزیراعظم عمران خان کے ریلیف پیکیج پر بلاول بھٹو نے ردعمل دیتے ہوئے کہا کہ وزیراعظم نے دعویٰ کیا کہ کچھ خاندان 30 فیصد رعایت سے مستفید ہوں گے، کچھ خاندانوں کو چھ ماہ کے لیے رعایت پر تیل، آٹا اور دالیں ملیں گی۔

"وزیر اعظم ٹی وی پر آکر احساس پروگرام کی بڑی بڑی باتیں تو کررہے ہیں مگر انہیں حقیقت میں عوام کی تکالیف کا احساس نہیں ہے۔"
چیئرمین پاکستان پیپلز پارٹی بلاول بھٹو زرداری@BBhuttoZardari
1/2 pic.twitter.com/Ne0l6zvNtn

— PPP (@MediaCellPPP) November 3, 2021

بلاول بھٹو نے کہا کہ غربت سے دوچار 20 کروڑ افراد کے لیے 30 فیصد رعایت انتہائی کم ہے، 3 سال میں گھی 108 فیصد، آٹا 50 فیصد، گیس 300 فیصد ہوئی ہے۔

دوسری جانب مسلم لیگ ن کی ترجمان مریم اورنگزیب نے وزیراعظم کے پیکیج کو فراڈ پیکیج قرار دیتے ہوئے مستعفی ہونے کا مطالبہ کردیا۔انہوں نے کہا کہ عمران خان نے ریلیف پیکیج نہیں تکلیف پیکیج کا اعلان کیا ہے، یہ عوام کے لیے تاریخی پیکیج نہیں بلکہ تاریخی دھوکا ہے۔

مریم اورنگزیب نے کہا کہ عمران خان کا تکلیف پیکیج عوام کے لیے مہنگائی کا نیا تباہ کن طوفان ہوگا، اگلے چھ ماہ مزید مہنگائی، بیروزگاری، معاشی تباہی بڑھے گی یہ ریلیف پیکیج ہے۔انہوں نے سوال کیا کہ آٹا، چینی، بجلی، پیٹرول مزید مہنگے ہوں گے یہ آپ کا ریلیف پیکیج ہے۔

واضح رہے کہ اس سے قبل وزیراعظم عمران خان نے مہنگائی میں پسے عوام کے لیے ‏‏120ارب روپے کے پیکیج کا اعلان کیا تھا، جس سے13کروڑلوگ مستفید ہوں گے، 6ماہ تک پیکج کےتحت گھی،آٹا،،دال کی قیمت میں ‏‏30فیصد رعایت میں ملےگا۔

اسلام آباد:رحمان ملک کا وزیراعظم عمران خان کو خط:خط کے اہم مندرجات سامنے آگئے،اطلاعات کے مطابق سابق وزیرداخلہ سینیٹر رحمان ملک نے وزیراعظم عمران خان کو ایک خط لکھا ہے جس میں مطالبہ کیا ہے کہ فیٹف کے امتیازی سلوک کیخلاف پاکستان عالمی عدالت انصاف میں جائے،

سابق وزیرِداخلہ سینیٹر رحمان ملک نے وزیراعظم عمران خان اور صدر فیٹف کو خط لکھتے ہوئے کچھ اہم گزارشات بھی پیش کی ہیں

رحمان ملک نے وزیراعظم عمران خان کو کہا ہےکہ پاکستان فیٹف کے امتیازی سلوک کے خلاف عالمی عدالت انصاف میں جائے، وزیراعظم وزارت قانون و خارجہ کو فیٹف کیخلاف عالمی عدالت انصاف میں جانے کی احکامات جاری کریں،

رحمان ملک کا یہ بھی کہنا تھا کہ فیٹف کی جانب سے پاکستان کو مسلسل نشانہ بنانے پر پوری قوم کو انتہائی تشویش ہے، ان کا مزید کہنا تھا کہ فیٹف کیوجہ سے نہ صرف پاکستانی معیشت بلکہ بین الاقوامی سطح پر اس کی ساکھ کو نقصان پہنچ رہا ہے،

رحمان ملک نے مزید کہا کہ جون 2018 سے فیٹف نے پاکستان کو گرے لسٹ میں رکھا ہوا ہے،ہر اجلاس میں فیٹف پاکستان کو گرے لسٹ میں برقرار رکھنے کا فیصلہ کرتا ہے، کچھ دشمن ممالک فیٹف کو مذموم مقاصد کے حصول کیلئے پاکستان کیخلاف استعمال کر رہے ہیں،

رحمان ملک نے کہاکہ پاکستان نے فیٹف کے 88 فیصد سے زیادہ مطالبات پر تعمیل کیا ہوا ہے، عدم تعمیل کے باوجود دوسرے کئی ممالک کو مکمل استثنیٰ حاصل ہے، امریکہ کا 22.5%، فرانس 25%، اسرائیل 12.5%، اور جاپان کا 27.5% عدم تعمیل ہے،

رحمان ملک نے مزید کہا کہ بھارت فیٹف کی طرف سے دیئے گئے اہداف کو پورا کرنے میں ناکام رہا ہے،پاکستان کو یہ جاننے کا حق ہے کہ پاکستان کے خلاف یہ امتیازی سلوک کیوں ہے، امریکہ کو بطور شکایت کنندہ کیسے قبول کیا جا سکتا ہے جو خود 22.5 فیصد فیٹف کی تعمیل نہیں کر رہا ہے، امتیازی سلوک کیخلاف پاکستان کو جارحانہ پالیسی اختیار کرنا چائیے،

دبئی :افغانستان کو 66رنز سے شکست دے کر بھارت کی ٹی20 ورلڈ کپ میں پہلی فتح ،اطلاعات کے مطابق ٹی20 ورلڈ کپ میں بھارت نے بلے بازوں کی عمدہ کارکردگی کی بدولت افغانستان کو 66 رنز سے شکست دے کر ایونٹ میں پہلی کامیابی حاصل کر لی۔

ابوظبی میں کھیلے گئے میچ میں افغانستان کے کپتان محمد نبی نے ٹاس جیت کر بھارت کو بیٹنگ کی دعوت دی۔

آئی سی سی مینز ٹی ٹوئنٹی ورلڈ کپ کے سپر 12 مرحلے میں گروپ 2 کے میچ میں بھارت نے افغانستان کو یکطرفہ مقابلے کے بعد 66 رنز سے شکست دیکر ایونٹ میں پہلی کامیابی حاصل کرلی۔

بھارت کے 211 رنز کے ہدف کے تعاقب میں افغانستان نے مقررہ 20 اوور میں 7 وکٹوں کے نقصان پر 144 رنز بنائے، کریم جنت 42 اور کپتان محمد نبی 35 رنز بناکر نمایاں رہے۔

بھارت نے اننگز کا آغاز کیا تو اوپنرز نے ابتدا سے ہی جارحانہ انداز امیں بیٹنگ کی اور ابتدائی 10اوورز میں کوئی بھی وکٹ نہ گرنے دی۔

روہت شرما اور لوکیش راہل نے پاور پلے میں عمدہ کھیل پیش کیا اور 100 رنز سے زائد کی شراکت قائم کرتے ہوئے بڑے مجموعے کی بنیاد رکھی۔

روہت شرما نے فارم میں واپس آتے ہوئے 37 گیندوں پر نصف سنچری اسکور کی جبکہ لوکیش راہل نے بھی بہترین بیٹنگ کرتے ہوئے ففٹی اسکور کی۔

دونوں کھلاڑیوں نے شاندار بیٹنگ کرتے ہوئے 140 رنز کی شراکت قائم کی جس کے بعد روہت شرما کور میں کیچ دے کر پویلین لوٹ گئے تاہم آؤٹ ہونے سے قبل انہوں نے 3 چھکوں اور 8 چوکوں کی مدد سے 74رنز بنائے۔

لوکیش راہل نے 48 گیندوں پر چھ چوکوں اور دو چوکوں سے مزین 69 رنز کی اننگز کھیلی لیکن گلبدین نے ان کی وکٹیں بکھیر کر افغانستان کو دوسری کامیابی دلا دی۔

اوپنرز کے آؤٹ ہونے کے باوجود پانڈیا اور پنت نے بہترین بیٹنگ کا سلسلہ جاری رکھتے ہوئے اختتامی اوورز میں چھکوں اور چوکوں کی بارش کردی۔

بھارت نے مقررہ اوورز میں دو وکٹوں کے نقصان پر 210 رنز بنائے جو اب تک اس ٹورنامنٹ کا سب سے بڑا اسکور ہے۔

دونوں نے کھلاڑیوں نے 21 گیندوں پر 63 رنز کی ساجھے داری قائم کی، پانڈیا نے 13 گیندوں پر 35 جبکہ پنت نے 13 گیندوں پر 27 رنز بنائے۔

افغانستان نے اننگز کا آغاز کیا تو اسکور ابھی 13 تک ہی پہنچا تھا کہ بھارت کو پہلی کامیابی مل گئی اور شامی نے محمد شہزاد کی اننگز کا خاتمہ کردیا۔

اگلے اوور کی پہلی ہی گیند پر جسپریت بمراہ کو چھکا مارنے کی کوشش میں حضرت اللہ زازئی کیچ ہو گئے۔

رحمٰن اللہ گرباز نے دو چھکوں کی مدد سے 19رنز بنائے لیکن رویندرا جدیجا نے ان کی اننگز کا خاتمہ کردیا جبکہ 59 کے مجموعے پر گلبدین نائب بھی 18رنز بنا کر روی چندرن ایشون کی گیند پر ایل بی ڈبلیو قرار پائے۔

نجیب اللہ زدران بھی صرف 11 رنز بنا سکے اور ایشون نے انہیں آؤٹ کر کے اپنی دوسری وکٹ حاصل کر لی۔

پانچ وکٹین گرنے کے بعد محمد نبی کا ساتھ دینے کریم جنت آئے اور دونوں نے 47رنز کی شراکت قائم کر کے اپنی ٹیم کی سنچری مکمل کرائی، نبی 35 رنز بنانے کے بعد آؤٹ ہوئے جبکہ راشد خان کھاتا بھی نہ کھول سکے۔

افغانستان نے مقررہ 20 اوورز میں 7 وکٹوں کے نقصان پر 144رنز بنائے ہیں۔

میچ کے لیے دونوں ٹیمیں ان کھلاڑیوں پر مشتمل تھیں۔

افغانستان: محمد نبی (کپتان) حضرت اللہ زازئی، محمد شہزاد (وکٹ کیپر)، رحمٰن اللہ، شرف الدین اشرف، نجیب اللہ زدران، گلبدین نائب، کریم جنت، راشد خان، نوین الحق، حامد حسن۔

بھارت: ویرات کوہلی(کپتان)،روہت شرما، لوکیش راہل، سوریا کمار یادیو، ریشابھ پنت، ہردک پانڈیا، رویندرا جدیجا، شردُل ٹھاکر، روی چندرن ایشون، محمد شامی، جسپریت بمراہ ۔