Author: +9251

واشنگٹن : عالمی ادارہ صحت سے منظور شدہ ویکسینز قبول:امریکہ نے اعلان کردیا ،اطلاعات کے مطابق امریکا کی جانب سے اب ایسے بین الاقوامی مسافروں کو اپنی سرزمین پر قبول کیا جائے گا جو امریکی ریگولیٹرز یا عالمی ادارہ صحت کی جانب سے منظور کردہ کووڈ 19 ویکسینز کا استعمال کرچکے ہوں گے۔

یہ اعلان سینٹرز فار ڈیزیز کنٹرول اینڈ پریونٹیشن (سی ڈی سی) کی جانب سے 8 اکتوبر کو رات گئے کیا گیا۔20 ستمبر کو وائٹ ہاؤس کی جانب سے اعلان کیا گیا تھا کہ امریکا کی جانب سے نومبر میں 33 ممالک کے ویکسینیشن مکمل کرانے والے افراد کے لیے کووڈ 19 سے متعلق سفری پابندیوں کو اٹھا لیا جائے گا۔

اس وقت یہ واضح نہیں کیا گیا تھا کہ کونسی ویکسینز کے سرٹیفکیٹس کو قبول کیا جائے گا۔

اب سی ڈی سی کے ترجمان نے خبررساں ادارے رائٹرز کو بتایا کہ ایف ڈی اے اور عالمی ادارہ صحت نے اب تک 6 ویکسینز کی منظوری دی ہے اور ان کی ویکسینیشن کرانے والوں کو امریکا آنے کی اجازت ہوگی۔

سی ڈی سی نے بتایا کہ حال ہی میں فضائی کمپنیوں کو قابل قبول ویکسینز سے آگاہ کرنے کے لیے اضافی ہدایات اور تفصیلات جاری کی جائیں گی۔

ایئر لائنز آف امریکا نامی تجارتی گروپ نے اس حوالے سے کہا کہ سی ڈی سی کا منظور شدہ ویکسینیز کا استعمال کرنے والے افراد کو امریکا آنے کی اجازت دینے کا اعلان اچھا ہے، ہم انتظامیہ کے ساتھ مل کر نومبر 2021 میں نئے ویکسین اور ٹیسٹنگ فریم ورک پر عملدرآمد کے لیے تیار ہیں۔

امریکا کی نئی کووڈ 19 ویکسین پالیسی کا اطلاق وہاں آنے والے لگ بھگ تمام غٰر ملکی افراد پر ہوگا۔سی ڈی سی کی جانب سے غیر ملکی مسافروں کے لیے نئے کانٹیکٹ ٹریسنگ قوانین کو حتمی شکل دے کر 15 ستمبر کو وائٹ ہاؤس میں نظر ثانی کے لیے بھیجا گیا تھا اور اس کو جلد شائع کیا جائے گا۔

سی ڈی سی کی جانب سے استثنیٰ کے تفصیلی قوانین بھی جاری کیے جائیں گے جن میں ایسے بچوں کو شامل کیا جائے گا جو ابھی ویکسینیشن کے اہل نہیں یا ایسے ممالک جہاں ابھی ویکسینز عام دستیاب نہیں۔

دوحہ: قطر میں امریکا اور طالبان کے درمیان مذاکرات کا آغاز ہوگیا ہے، جس میں طالبان نے افغانستان کے بیرون ملک منجمد اثاثوں کو جاری کرنے کا مطالبہ کیا ہے۔

الجزیرہ کے مطابق دوحہ میں ہونے والے دو روزہ مذاکرات کے بارے میں طالبان کے وزیر خارجہ ملا امیر خان متقی نے کہا ہے کہ سینئر طالبان عہدے داروں اور امریکی نمائندوں کے درمیان ہونے والی ملاقات میں دونوں ممالک کے درمیان تعلقات کا ایک نیا دور شروع کرنے پر بات چیت کی گئی ہے۔

افغانستان سے 20 سال بعد امریکی افواج کے انخلا اور طالبان کے برسراقتدار آنے کے بعد یہ پہلی ملاقات ہے۔

افغانستان کے قائم مقام وزیر خارجہ ملا امیر خان متقی کا اس بارے میں کہنا ہے کہ ہم نے امریکی وفد سے انسانی ہمدردی کی بنیاد پر افغانستان کے بیرون ملک منجمد کیے گئے اثاثوں پر پابندی ہٹانے کا مطالبہ کرتے ہوئے دوحہ معاہدے کی پاس داری کرنے کا بھی کہا ہے۔ جب کہ امریکی حکومت کی جانب سے افغان عوام کو کورونا کے سدباب کے لیے ویکسیین بھی فراہم کی جائیں گی۔

واضح رہے کہ امریکی اسٹیٹ ڈیپارٹمنٹ کے ترجمان نے گزشتہ روز کہا تھا کہ دوحہ میں طالبان کے ساتھ ملاقات کا مقصد طالبان حکومت کو تسلیم کرنا نہیں، بلکہ امریکی مفادات سے متعلق مسائل پر سود مند گفتگو کرنا ہے۔

کوئٹہ:اگرمیری حکومت گرائی گئی توپھرکسی کی بھی نہیں بچ سکے گی:جام کمال کا کمال موقف ،اطلاعات کے مطابق بلوچستان میں سیاسی بحران برقرار ہے، ناراض اراکین نے دو ٹوک موقف اختیار کرتے ہوئے جام کمال کے ساتھ مزید نہ چلنے کا اعلان کر دیا۔ جبکہ وزیراعلیٰ بھی موقف پر قائم ہیں، تحریک عدم اعتماد کے مقابلے کا عزم ظاہر کر دیا اور کسی بھی صورت مستعفی نہ ہونے کا اعلان کر دیا۔

تفصیلات کے مطابق بلوچستان عوامی پارٹی (بی اے پی) کے ناراض اراکین کا اجلاس ہوا، اجلاس میں سپیکر عبدالقدوس بزنجو سمیت تمام ناراض ارکان شریک ہوئے۔
ناراض اراکین نے موقف اختیار کیا کہ وزیراعلی جام کمال کے ساتھ نہیں چل سکتے۔ جام کمال کو اب مزید وقت نہیں دیں گے، وہ اکثریت کھو چکے ہیں۔

دوسری طرف وزیراعلیٰ بلوچستان اپنے خلاف عدم اعتماد رکوانے کے لئے متحرک ہوگئے۔ جام کمال نے کسی صورت بھی استعفیٰ نہ دینے کا اعلان کر دیا۔ انہوں نے کہا کہ چند ناراض لوگوں کی وجہ سے صوبے کی ترقی و خوشحالی کا سفر نہیں روک سکتا۔

اُدھر ترجمان بلوچستان حکومت لیاقت شاہوانی نے کہا کہ بلوچستان میں اپوزیشن جماعتوں کی جانب سے وزیر اعلی کے استعفی کے مطالبہ کو یکسر مسترد کر تے ہیں، جام کمال خان منتخب وزیر اعلی ہیں وہ معمولات حکومت احسن انداز میں چلارہے ہیں، وزیر اعلی کیخلاف کوئی ایسے الزامات نہیں جن کی بنیاد پر اخلاقی گراونڈ پہ استعفی دیا جائے، وزیر اعلی استعفی نہیں دینگے۔

راولپنڈی : خیبرپختونخوا نے سندھ کو 7 وکٹوں سے شکست دے دی،اطلاعات کے مطابق نیشنل ٹی ٹوئنٹی کے 25 ویں میچ میں دفاعی چیمپئن خیبرپختونخوا نے سندھ کو 7 وکٹوں سے شکست دے دی۔

کرکٹ ذرائع کے مطابق سندھ نے پہلے بیٹنگ کرتے ہوئے شان مسعود کی نصف سنچری کی بدولت مقررہ 20 اوورز میں 6 وکٹوں کے نقصان پر 152 رنز بنائے۔

13 کے مجموعی اسکور پر پہلی وکٹ گنوانے کے بعد شان مسعود نے پہلے شرجیل خان اور پھر انور علی کے ہمراہ بالترتیب 51 اور 32 رنز کی شراکت قائم کی۔
شان مسعود نے 5 چوکوں اور ایک چھکے کی مدد سے 54 رنز کی اننگز کھیلی جبکہ شرجیل خان 26 رنز بناکر آؤ ٹ ہوئے۔

انور علی نے 3 چھکوں کی بدولت 34 رنز کی ناقابل شکست اننگز کھیلی۔ خیبرپختونخوا کی جانب سے افتخار احمد نے 2 جبکہ نیاز خان اور آصف آفریدی نے ایک ایک وکٹ حاصل کی۔

153 رنز کے ہدف کے تعاقب میں خیبرپختونخوا کا آغاز بھی زیادہ پراعتماد نہ تھا اور اس کی ابتدائی تین وکٹیں 54 رنز گر چکی تھیں۔ایسے میں افتخار احمد نے 34 گیندوں پر 5 چوکوں اور 3 چھکوں کی بدولت 55 رنز اور صاحبزادہ فرحان 49 رنز بناکر ناقابل شکست رہے۔

افتخار احمد اور صاحبزادہ فرحان کی 100 رنز کی ناقابل شکست شراکت داری نے کے پی کی جیت میں اہم کردار ادا کیا۔ خیبرپختونخوا نے 153 رنز کا ہدف 18 اوورز میں 3 وکٹوں کے نقصان پر حاصل کرلیا۔

سندھ کے زاہد محمود اور سہیل خان نے ایک ایک وکٹ حاصل کی۔ افتخار احمد کو شاندار کارکردگی پر پلیئر آف دی میچ قرار دیا گیا۔

لاہور:میں پھر کہتی ہوں کہ میرے خلاف کیسز کی وجہ سے غیرملکی سرمایہ کارپاکستان چھوڑرہےہیں:اداکارہ میرا کی اداکارہ میرا نے ان پر بنائے جانے والے کیسز کو پاکستان فلم انڈسٹری کے زوال کا ذمہ دار قرار دیتے ہوئے کہا ہے کہ مجھ پر کیسز کی وجہ سے غیر ملکی سرمایہ کار بھاگ گئے۔

اداکارہ میرا نے چند دن پہلے بھی یہی موقف اس وقت اپنا تھا تھا جب سیشن کورٹ لاہور کے باہر میڈیا سے گفتگو کرتے ہوئے کہا کہ ملک میں غیر ملکی سرمایہ کاری آنی تھی۔ لیکن مجھ پر کیسز کی وجہ سے غیرملکی سرمایہ کار بھاگ گئے۔

اداکارہ میرا نے کہا مجھ پر کیسز کی وجہ سے پاکستان فلم انڈسٹری کو اربوں روپے کا نقصان ہوا۔ اگر مجھ پر یہ کیسز نہ ہوتے تو بہت ساری فلمیں سیٹ پر ہوتیں اور انڈسٹری بھی شاید بند نہ ہوتی۔

اداکارہ میرا نے کہا فلم انڈسٹری کے لیے جو فنڈنگ پاکستان میں آنی تھی، جن سرمایہ کاروں نے یہاں پیسہ لگانا تھا اور جو بزنس کمیونٹی پاکستان فلم انڈسٹری کو سپورٹ کرتی تھی وہ سب پیچھے ہٹ گئے۔

صحافی نے اداکارہ میرا سے سوال پوچھا اس وقت عمران خان حکومت میں ہیں آپ ان سے کیا درخواست کریں گی۔ تاہم میرا نے حسب عادت اس سوال کا جواب دینے کے بجائے اپنی ہی باتیں کرنی شروع کردیں اور کہا فلم میں عکس بند ہونے والے سین صرف جھوٹ ہوتے ہیں۔

اداکارہ نے کہا فلم کی عکس بندی میں پیار محبت، لو اسٹوری یہ سب دکھایا جاتا ہے لیکن سب جھوٹ ہوتا ہے۔ ہم جب شوٹنگ کرتے ہیں تو ہم جھوٹ بول رہے ہوتے ہیں لہذا آپ شوٹنگ کو حقیقی زندگی کے ساتھ نہیں جوڑ سکتے۔