Author: +9251

کوئٹہ:جام کمال کے خلاف تحریک عدم اعتماد اگلے 24 گھنٹے اہم ،اطلاعات کے مطابق وزیر اعلیٰ بلوچستان جام کمال کے خلاف تحریک عدم اعتماد اگلے 24 گھنٹوں میں متوقع ہے۔

تفصیلات کے مطابق بلوچستان عوامی پارٹی کے ناراض اراکین کے معاملے کوحل کرنے کے لیے اسپیکر عبدالقدوس بزنجو، جان محمد جمالی اور صالح بھوتانی اسلام آباد سے کوئٹہ کے لیے روانہ ہوگئے ہیں۔

ذرائع کا کہنا ہے کہ بلوچستان عوامی پارٹی کے ناراض اراکین آج اہم بیٹھک کریں گے، اجلاس میں تمام قانونی کارروائی اور تمام پہلوؤں پر آئندہ کا لائحہ عمل طے کیا جائے گا۔ذرائع نے بتایا کہ وزیر اعلیٰ جام کمال کے خلاف تحریک عدم اعتماد لانے کے لیے اگلے 24 گھنٹے اہم ہیں۔

واضح رہے کہ بلوچستان عوامی پارٹی کے ناراض اراکین ایک ہفتے قبل چیئرمین سینٹ کے ہمراہ اسلام آباد آئے تھے، ناراض اراکین کا کہنا ہے کہ وزیر اعلیٰ بلوچستان کے استعفے کے بغیر کوئی بات نہیں ہو سکتی۔

دوسری طرف آج گورنر بلوچستان نے 3 صوبائی وزرا کے استعفے منظور کر لیے ہیں، بلوچستان حکومت سے ناراض وزرا نے 2 روز قبل استعفے گورنر کو پیش کیے تھے۔

استعفے دینے والوں میں اسد بلوچ، ظہور بلیدی اور سردار عبدالرحمان کھیتران شامل ہیں، وزرا کے استعفوں کی منظوری کا نوٹیفکیشن محکمہ ایس اینڈ جی اے ڈی جاری کرے گا۔

ذرائع گورنر ہاؤس نے بتایا کہ 4 پارلیمانی سیکریٹریز کے استعفے واپس کر دیے گئے ہیں، کیوں کہ آئین کے تحت پارلیمانی سیکریٹری کا استعفیٰ گورنر کو نہیں دیا جاتا۔

کراچی: سزا یافتہ اور ضمانت پر رہا افسران کو عہدوں سے فوری ہٹانے کا حکم،اطلاعات کے مطابق سندھ ہائیکورٹ نے قومی احتساب بیورو (نیب) سے سزا یافتہ اور ضمانت پر رہا افسران کو عہدوں سے ہٹانے اور آئندہ پوسٹنگ نہ دینے کا حکم دے دیا۔

سندھ ہائیکورٹ میں سرکاری محکموں میں نیب زدہ افسران کی تعیناتی کے خلاف درخواست کی سماعت ہوئی۔

جسٹس صلاح الدین پہنور نے ریمارکس دیے کہ افسران کرپشن کرتے ہوئے پکڑے گئے پھر بھی عہدے انجوائے کررہے ہیں؟ سزا یافتہ افسران کو اہم عہدوں پر تعینات کرنا تشویش کی بات ہے، بڑے افسران بدعنوان ہوں گے تو نیچے کیا پیغام جائے گا؟

ایڈيشنل سیکرٹری نے عدالت کو بتایا کہ سندھ میں 17 مختلف محکموں میں کرپٹ افسران کی نشاندہی ہوئی ہے۔

جسٹس صلاح الدین پہنور نے ریمارکس دیے کہ بدعنوانی کا الزام لگا، گرفتار بھی ہوئے مگر ضمانت کراکے پھر بڑے سرکاری عہدے انجوائے کرنا شروع کردیے، عدالتی حکم اور پابندی کے باوجود ایسا ہونا بہت تشویشناک اور سنجیدہ معاملہ ہے۔

عدالت نے حکم دیاکہ ایسے تمام کرپٹ ملازمین وافسران جو نیب سے سزا یافتہ یا ضمانت پر رہا ہیں، فوری طور پر عہدوں سے ہٹائے جائیں اور انہیں پوسٹنگ نہ دی جائے۔

عدالت نے حکم میں کہا ہے کہ متعلقہ حکام سن لیں، اگر آئندہ ایسے ملازمین کو پوسٹنگ دی گئی تو چیف سیکرٹری اور دیگر کے خلاف توہین عدالت کی کارروائی ہوگی۔

عدالت نے برہمی کا اظہار کرتے ہوئے کہا کہ اگر کین کمشنر اور ویلفیئر بورڈ کے سربراہ سزایافتہ ہوں گے تو محنت کش اور آبادگاروں کا کیا ہوگا؟ادھر اس حوالے اسسٹنٹ ایڈووکیٹ جنرل نے بتایا کہ بورڈ آف ریونیو میں14 سزا یافتہ افسران تعینات تھے جنہیں ہٹا دیا گیا ہے۔

عدالت نے آئندہ سماعت پر تمام محکموں سے ایک بار پھر نیب زدہ افسران کی پوسٹنگ پر رپوٹ طلب کرلی۔

اسلام آباد :سینیارٹی کی بنیاد پر سپریم کورٹ میں ججز تعینات کرنے کی درخواست خارج:اہم وجہ بھی سامنے آگئی ،اطلاعات کےمطابق اسلام آباد ہائیکورٹ نے ہائیکورٹس سے سینیارٹی کی بنیاد پر سپریم کورٹ میں ججز تعینات کرنے کی درخواست ناقابل سماعت قرار دیتے ہوئے خارج کر دی۔

اسلام آباد ہائیکورٹ کے چیف جسٹس اطہر من اللہ نے معین الظفر خان ایڈووکیٹ کی درخواست پر سماعت کی جو ذاتی حیثیت میں عدالت کے سامنے پیش ہوئے۔

انہوں نے عدالت سے استدعا کی کہ سپریم کورٹ میں ہائیکورٹس سے چیف جسٹس اور ججز کی سینیارٹی کی بنیاد پر تعیناتیاں کرنے کی ہدایات جاری کی جائیں اور سیکرٹری اسٹیبلشمنٹ ڈویژن کو کہا جائے کہ وہ ججز تعیناتی کے سوال سے متعلق بھی وضاحت کریں۔

درخواست میں سیکرٹری اسٹیبلشمنٹ، سیکرٹری ٹو صدر پاکستان اور رجسٹرار جوڈیشل کمیشن کو فریق بنایا گیا تھا۔اس موقع پر چیف جسٹس اطہر من اللہ نے ریمارکس دیےکہ وکلا کی باڈیز موجود ہیں آپ ان کے پاس جائیں یہ فورم نہیں ہے۔

بعدازاں عدالت نے ابتدائی دلائل سننے کے بعد درخواست ناقابل سماعت قرار دیتے ہوئے خارج کر دی۔

لاہور:ورلڈ ٹی ٹوئنٹی کیلئے پاکستان کا نیا اسکواڈ:چیف سلیکٹر کا مؤقف سامنے آگیا ،اطلاعات کےمطابق ورلڈ ٹوئنٹی کے لیے پاکستان کے ابتدائی اسکواڈ میں آج تین تبدیلیاں کردی گئی ہیں اور وکٹ کیپر بیٹسمین اعظم خان اور فاسٹ بولر محمد حسنین کو ڈراپ کردیا گیا ہے۔

ورلڈ ٹی ٹوئنٹی کے حوالے سے قومی کرکٹ ٹیم کے چیف سلیکٹر محمد وسیم نے تازہ ترین صورت حال سے شائقین کو آگاہ کردیا ہے

محمد وسیم کا کہنا ہے کہ کھلاڑیوں کی کارکردگی کا جائزہ لینے کے بعد تبدیلیوں کا فیصلہ کیا،ٹیم منیجمنٹ کی مشاورت سے اسکواڈ میں 3 تبدیلیاں کیں۔

چیف سلیکٹر نے کہا کہ اعظم خان اور محمد حسنین کی جگہ حیدر علی اور سرفراز احمد کو اسکواڈ میں شامل کیا گیا جبکہ فخر زمان کو ریزرو کھلاڑیوں کی فہرست سے نکال کر 15 رکنی اسکواڈ کا احصہ بنایا۔

ریزرو کھلاڑیوں میں فخر زمان کی جگہ شاہنواز دھانی کو شامل کیا۔

محمد وسیم نے کہا کہ تینوں کھلاڑیوں کی شمولیت سے قومی اسکواڈ کو مزید توازن ملے گا، اعظم خان، محمد حسنین اور خوشدل شاہ کی مایوسی کا اندازہ ہے ۔

چیف سلیکٹر نے کہا کہ خوشدل شاہ کو فخر زمان کی جگہ ریزرو کھلاڑیوں میں شامل کیا گیا ہے۔

محمد وسیم نے کہا کہ انہیں اعظم خان، محمد حسنین اور خوشدل شاہ کی مایوسی کا اندازہ ہے مگر ان تینوں کھلاڑیوں کی جگہ سرفراز احمد، حیدر علی اور فخر زمان نے نیشنل ٹی ٹوئنٹی میں بہتر کھیل پیش کیا۔ تاہم ابتدائی تینوں کھلاڑی مستقبل کے پلانز کا حصہ رہیں گے۔

ورلڈ کپ میں پاکستان کے میچز
24 اکتوبر : پاکستان بمقابلہ بھارت ، دبئی انٹرنیشنل اسٹیڈیم 26 اکتوبر : پاکستان بمقابلہ نیوزی لینڈ ، شارجہ کرکٹ اسٹیڈیم

29 اکتوبر : پاکستان بمقابلہ افغانستان ، دبئی انٹرنیشنل اسٹیڈیم 2 نومبر : پاکستان بمقابلہ اے ٹو، شیخ زاید انٹرنیشنل کرکٹ اسٹیڈیم ، ابوظبی

7 نومبر : پاکستان بمقابلہ بی ون،شارجہ کرکٹ اسٹیڈیم 10 نومبر : پہلا سیمی فائنل بمقام شیخ زاید کرکٹ اسٹیڈیم ، ابوظہبی

11 نومبر : دوسرا سیمی فائنل بمقام دبئی انٹرنیشنل کرکٹ اسٹیڈیم 14 نومبر : فائنل بمقام دبئی انٹرنیشنل کرکٹ اسٹیڈیم

کوئٹہ :گورنربلوچستان نے 3 ناراض وزرا کے استعفے منظور کرکےجام کمال کے خلاف سازشیں ناکام بنادیں ،اطلاعات کے مطابق گورنربلوچستان سید ظہور آغا نے صوبائی کابینہ میں شامل 3 ناراض وزرا کے استعفے منظور کرلیے۔

6 اکتوبر کو بلوچستان کابینہ کے ناراض ارکان نے گورنر ہاؤس پہنچ کر استعفے دیے تھے جبکہ استعفے دینے والے افراد میں عبدالرحمٰن کھیتران، میر اسد بلوچ ، ظہور بلیدی، حاجی محمد خان لہڑی،اکبر آسکانی سکندر عمرانی،بشریٰ رند، ماہ جبین شیران اور لالہ رشید بلوچ شامل تھے۔

ذرائع کے مطابق گورنربلوچستان نے 3 ناراض وزرا کے استعفے منظور کرلیے ہیں، جن وزرا کے استعفے منظور ہوئے ہیں اُن میں ظہوربلیدی، سردارعبدالرحمان کھیتران اوراسد بلوچ شامل ہیں۔

دوسری جانب وزیراعلیٰ بلوچستان جام کمال نے استعفیٰ دینے سے انکار کردیا ہے اور کہا کہ 12 لوگوں کے کہنے پراستعفیٰ نہیں دوں گا۔

ان کا کہنا تھاکہ اتحادی جماعتوں اوربی اے پی کے اکثرارکان میری حمایت کررہے ہیں، کچھ ساتھی 4 بار پہلے بھی مجھے ہٹانے کی کوشش کر چکے ہیں۔

جام کمال کا کہنا تھاکہ ہماری کوشش ہے کہ وزرا اپنے استعفے واپس لیں تاہم وزرا نے استعفے واپس نہیں لیے تو ہم نئے وزیربنائیں گے۔

گورنرکی طرف سے استعفے منظور کرنے کے بعد اب جام کمال پردباو کم ہوگیا ہے اورجو دیگروزرا اپوزیشن کی لابنگ کی وجہ سے مجبور تھے انہوں نے اپنے استعفے منظور نہ کرنے کا پیغام بھی بھیجا تھا جس کے بعد اب زیادہ مخالفین کے جانے کے بعد تحریک دم توڑ گئی

لاہور: سانحہ اقبال پارک:ریمبومجھے آج اس نوبت تک لایا:بلیک میل کرکے اس نے مجھے ہیک کرلیا تھا:اطلاعات کےمطابق سانحہ گریٹر اقبال پارک کیس کے حوالے سے متاثرہ خاتون عائشہ اکرم نے ساتھی کو ذمہ دار قرار دے دیا، اپنے اہم بیان میں لڑکی نے تہلکہ خیز انکشافات کردیے۔

تفصیلات کے مطابق عائشہ اکرم نے اپنے ساتھ پیش آنے والے شرم ناک واقعے سے متعلق ڈی آئی جی انوسٹی گیشن کو تحریری بیان جمع کرا دیا جس میں ان کا کہنا ہے کہ گریٹر اقبال پارک جانے کا پلان ریمبو نے ہی بنایا تھا۔

متاثرہ خاتون نے بتایا کہ ریمبو نے اپنے ساتھیوں کے ہمراہ میری نازیبا ویڈیوز بنا رکھی ہیں، ویڈیوز کی وجہ سے ریمبو مجھے بلیک میل کرتا رہا۔

عائشہ نے دعویٰ کیا ہے کہ ریمبو بلیک میل کرکے 10لاکھ روپے لے چکا ہے، میں اپنی تنخواہ میں سے آدھے پیسے ریمبو کو دیتی تھی، ریمبو ساتھی بادشاہ کے ساتھ مل کر ٹک ٹاک گینگ چلاتا ہے۔ڈی آئی جی انوسٹی گیشن شارق جمال نے تاحال کیس پر بات کرنے سے انکار کردیا۔

یاد رہے کہ 14 اگست کے روز مینار پاکستان پر عائشہ اکرم کو وہاں موجود 400 افراد کی جانب سے تشدد اور جنسی حملے کا نشانہ بنایا گیا تھا۔