Author: +9251

کراچی:پاکستان نے کویتی فضائی کمپنیوں پر مشروط پابندی عائد کردی،اطلاعات کے مطابق سول ایوی ایشن اتھارٹی (سی اے اے) نے کویتی فضائی کمپنیوں کی پروازوں کی تعداد کم کردی۔

ذرائع کے مطابق کویت کی جانب سے پی آئی اے کو پروازوں کی اجازت نے دینے پر سول ایوی ایشن اتھارٹی نے کویت کی دو ائیر لائن کی پروازوں کی تعداد کم کرنے کا فیصلہ کرلیا۔

سول ایوی ایشن کے ترجمان کا کنہا ہے کہ پی آئی اے کو کویت کی جانب سے اجازت نہ دینا دونوں ریاستوں کے درمیان دو طرفہ فضائی خدمات کے معاہدے کی کھلی خلاف ورزی ہے۔

سول ایوی ایشن کے ترجمان نے بتایا کہ کویت ایئرویز اور جزیرہ ایئر ویز کی ہفتہ وار فلائیٹس میں سے ایک ایک فلائٹ کو یکم اکتوبر 2021 سے منسوخ کیا جارہا ہے، یہ سلسلہ اُس وقت تک رہے گا جب تک پی آئی اے پر عائد پابندی ختم نہیں کردی جاتی۔

سول ایوی ایشن کے مطابق پاکستان اور کویت کے درمیان فضائی خدمات کے معاہدے میں طے شدہ شرائط کے مطابق کویت سے پی آئی اے سی کے فلائٹ آپریشن کی منظوری مشروط ہے۔

ترجمان کا مزید کہنا تھا کہ پی آئی اے کی پروازوں کو کویت کی جانب سے عدم اجازت پر پاکستان سی اے اے مزید ریگولیٹری کارروائی شروع کرنے پر مجبور ہوگا۔

اسلام آباد :ڈاکٹرفیصل سلطان سے طلبا کے وفد کی ملاقات،تمام جائزشکایات پرعمل درآمد کی یقین دہانی ،اطلاعات کے مطابق آج ڈاکٹر فیصل سلطان ، نیشنل ہیلتھ سروسز کے ایس اے پی ایم نے طلباء کے ایک وفد سے ملاقات کی جنہوں نے اس سال ایم ڈی سی اے ٹی کی کوشش کرنے والے طلباء کے خدشات اور شکایات بیان کیں۔

ڈاکٹر فیصل نے ان کے خدشات کوبڑی تسلی سے سنا اور پیش کیے گئے مسائل کا جواب دیا۔ انہوں نے اس بات پر روشنی ڈالی کہ ایم ڈی سی اے ٹی کا مقصد اس بات کو یقینی بنانا ہے کہ سخت اور زندگی بھر سیکھنے کے اس مسابقتی میدان میں داخل ہونے والے طلباء تعلیمی کامیابی ، علم اور تجزیاتی سوچ کے لحاظ سے ضروری صلاحیت رکھتے ہیں۔

یہ سب بالآخر عوام کو محفوظ اور قابل پیشہ ور افراد کو مستقبل میں ان کی خدمت کرنے کے قابل بنانے اور طبی تعلیم کے نظام اور طبی پیشہ ور افراد پر عوامی اعتماد کو تقویت دینے کے لیے ہے۔

میٹنگ کا اختتام ایس اے پی ایم نے پاکستان میڈیکل کمیشن کے ساتھ تبادلہ خیال کرنے پر اتفاق کرتے ہوئے کیا تاکہ طلباء کو اپنی شکایات کے اندراج کے لیے ایک منظم شکایت کے حل کا طریقہ کار تیار کیا جائے اور اس کا اشتراک کیا جائے۔

انہوں نے کسی بھی بنیادی مسائل کے لیے شکایات کے نمونے کا جائزہ لینے کی پیشکش کی۔ مزید برآں ، انہوں نے طلباء کو یقین دلایا کہ امتحان کے بعد کا تجزیہ پہلے ہی پی ایم سی کی طرف سے منصوبہ بند ہے اور ایم ڈی سی اے ٹی کی تکمیل کے بعد ریگولیٹری باڈی کی طرف سے مکمل کیا جائے گا جو طلباء کے بہت سے خدشات کو دور کرے گا۔

راولپنڈی : حیدر علی کی دھواں دھار اننگز نے سینٹرل پنجاب سے فتح چھین لی ،اطلاعات کے مطابق نیشنل ٹی ٹوئنٹی کپ میں حیدر علی کی دھواں دھار اننگز کی بدولت ناردرن نے سینٹرل پنجاب کو 6 وکٹوں سے شکست دے دی۔

راولپنڈی میں کھیلے جارہے نیشنل ٹی ٹوئنٹی کپ میں سینٹرل پنجاب نے ناردرن کے خلاف ٹاس جیت کر پہلے بیٹنگ کی اور مقررہ 20 اوررز میں 2 وکٹوں کے نقصان پر 200 رنز اسکور کیے۔

کپتان بابراعظم نے شاندار بیٹنگ کرتے ہوئے ناقابل شکست 105 رنز کی برق رفتار اننگز کھیلی، 63 گیندوں پر مشتمل ان کی اننگز میں 11 چوکے اور 3 چھکے شامل تھے۔ یہ ان کے ٹی ٹوئنٹی کیرئیر کی چھٹی سنچری ہے،کیرئیر کی چھ میں سے چار سنچریوں میں بابراعظم ناٹ آؤٹ رہے۔

بابراعظم نے احمد شہزاد اور محمد اخلاق کے ہمراہ بالترتیب 67 اور 41 رنز کی شراکت قائم کی، احمد شہزاد 37 اور محمد اخلاق 21 رنز بناکر آؤٹ ہوئے۔

سینٹرل پنجاب کے کپتان نے سب سے لمبی پارٹنرشپ شعیب ملک کے ہمراہ قائم کی۔ شعیب ملک 4 چوکوں کی مدد سے 31 ر نز بناکر ناٹ آؤٹ رہے۔ناردرن کے محمد نواز اور شاداب خان نے ایک ایک وکٹ حاصل کی۔

مطلوبہ ہدف کے تعاقب میں نوجوان کھلاڑی حیدر علی نے 53 گیندوں پر 91 رنز کی برق رفتار اننگز کھیل کر ہوم سٹی سینٹرل پنجاب سے فتح چھین لی۔ ناردرن نے 201 رنز کا ہدف دو گیندیں قبل چار وکٹوں کے نقصان پر حاصل کرلیا۔

ناردرن کے دونوں اوپنرز 56 کے مجموعی اسکور پر پویلین واپس لوٹ گئے، سرمد حمید 19 اور ناصر نواز 6 رنز بناکر آؤٹ ہوئے تو حیدر علی نے ناردرن کی کمان سنبھالی اور کریز پر پہنچتے ہی اپنے مخصوص انداز میں وکٹ کے چاروں اطراف دلکش اسٹروک کھیل کر سینٹرل پنجاب کے باؤلرز کو دباؤ میں لے آئے۔

اس دوران محمد نواز نے بھی ان کا بھرپور ساتھ دیا اور محض21 گیندوں پر 4 چھکوں اور 2 چوکوں کی بدولت 41 رنز کی برق رفتار اننگز کھیلی۔ دونوں کھلاڑیوں نے تیسری وکٹ کے لیے 45 گیندوں پر 84 رنز کی شراکت قائم کرکے ناردرن کی پوزیشن مستحکم کردی۔

محمد نواز کے آؤٹ ہونے کے بعد بھی حیدر علی نے رنز بنانے کی رفتار کم نہ کی اور جارحانہ انداز اپنائے رکھا۔ انہیں6 چھکوں اور 6 چوکوں کی بدولت 91 رنز کی ناقابل شکست اننگز کھیلنے پر پلیئر آف دی میچ قرار دیا گیا۔

سینٹرل پنجاب کے وہاب ریاض، حسین طلعت، احسان عادل اور حسن علی نے ایک ایک وکٹ حاصل کی۔

اسلام آباد: پٹرولیم مصنوعات میں اضافہ : پاکستان میں پہلی بار پٹرول 127 روپےفی لیٹرہوگیا ،اطلاعات کے مطابق پیٹرولیم مصنوعات کی قیمتوں میں اضافے کا نوٹیفکیشن جاری کردیا گیا جس کے مطابق پیٹرول کی قیمت میں 4 روپے فی لیٹر اضافہ کیا گیا ہے۔

نوٹیفکیشن کے مطابق پٹرول کے علاوہ ہائی اسپیڈ ڈیزل کی قیمت میں 2 روپے فی لیٹر اور لائٹ ڈیزل کی قیمت میں 8 روپے 82 پیسے فی لیٹر کا اضافہ کیا گیا ہے۔

نوٹیفکیشن کے مطابق مٹی کے تیل کی قیمت میں 7 روپے 5 پیسے فی لیٹر اضافہ کیا گیا ہے۔نوٹیفکیشن کے مطابق پیٹرولیم مصنوعات کی نئی قیمتوں کا اطلاق آج رات 12 بجے سے ہوگا۔

پیٹرولیم مصنوعات کی قیمتوں میں اضافے کے بعد پیٹرول کی نئی قیمت 127.30 روپے فی لیٹر ہوگئی ہے جب کہ ہائی اسپیڈ ڈیزل 122.4، مٹی کا تیل 99.31 اور لائٹ ڈیزل 99.51 روپے فی لیٹر ہوگیا۔

کراچی : آل سندھ پرائیویٹ اسکولز اینڈ کالجز ایسوسی ایشن نے غیریقینی موسم کی صورت حال کے باعث کل (جمعہ) پرائیویٹ اسکول اور کالج بند رکھنے کا اعلان کردیا۔

آل سندھ پرائیویٹ اسکولز اینڈ کالجز ایسوسی ایشن کےچیئرمین حیدر علی کا کہنا ہےکہ بارشوں سے متاثرہ اضلاع میں اسکولز بندکرنےکا فیصلہ کیا گیا ہے۔

حیدر علی کا کہنا ہےکہ تعلیمی ادارے بندکرنےکا فیصلہ والدین کی پریشانی کے سبب کیا ہے، سندھ کے جن اضلاع میں موسم ٹھیک ہے وہاں نجی تعلیمی ادارے کھلے رہیں گے۔دوسری جانب سندھ حکومت نے ابھی تک سرکاری اسکول بندکرنےکے حوالے سےکوئی فیصلہ نہیں کیا ہے۔

خیال رہےکہ شمال مشرقی بحیرہ عرب میں ٹراپیکل سمندری طوفان تشکیل پا رہا ہے جس کے نتیجے میں سندھ اور مکران کے ساحلی علاقوں میں تیز ہواؤں کے ساتھ طوفانی بارشوں کا امکان ہے۔

محکمہ موسمیات کے مطابق سائیکلون کراچی سے 300 کلومیٹر دور ہے جوکہ کراچی سمیت سندھ اور مکران کے ساحلی علاقوں میں موسلا دھار بارشوں اور تیز ہواؤں کا باعث بن سکتا ہے۔

لاہور: ٹی ٹوئنٹی میں سب سے زیادہ سینچریاں بنانے والے پاکستانی کا نام سامنے آگیا ،اطلاعات کے مطابق پاکستان کا ایک اورقومی کھلاڑی اب قومی نہیں بلکہ عالمی اعزاز کے ساتھ سامنے آیا ہے ،

ذرائع کے مطابق اس حوالے سے معلوم ہوا ہے کہ قومی کرکٹ ٹیم کے کپتان بابراعظم ٹی ٹوئنٹی کرکٹ میں سب سے زیادہ سینچریاں بنانے والے پاکستانی بن گئے اور انہوں نے یہ سنگ میل نیشنل ٹی ٹوئنٹی میں ناردرن کے خلاف سینٹرل پنجاب کی جانب سے سینچری بناکر عبور کیا۔

راولپنڈی میں جاری قومی ٹی ٹوئنٹی میں جمعرات کو سینٹرل پنجاب کی قیادت کرتے ہوئے بابراعظم نے 63 گیندوں پر 105 رنز کی ناقابل شکست اننگز کھیلی، یہ بابراعظم کے کیرئیر کی چھٹی سینچری ہے جس کے ساتھ وہ ٹی ٹوئنٹی میچز میں سب سے زیادہ سینچری بنانے والے پاکستانی بن گئے ہیں۔

بابراعظم نے 185 اننگز میں 6 سینچریاں اسکور کی ہیں جب کہ پاکستان کے احمد شہزاد اور کامران اکمل نے پانچ ،پانچ، خرم منظور نے چار ، مختار احمد اور شرجیل خان نے تین، تین سینچریاں اسکور کی ہیں۔

بابر اعظم 6 یا اس سے زائد سینچریاں بنانے والے دنیا کے نویں بیٹسمین ہیں، اس فہرست میں کرس گیل 22 سنچریوں کے ساتھ سب سے پہلے نمبر پر ہیں۔

بابراعظم 105 رنز کی اننگز کے بعد ایک اور عالمی ریکارڈ کے قریب آگئے ہیں اور امید کی جارہی ہے کہ وہ اگلی اننگز میں تیز ترین 7 ہزار ٹی ٹوئنٹی رنز بنانے والے بیٹسمین بن جائیں گے۔

بابر اعظم نے 185 اننگز میں 6984 رنز بنائے ہیں، انہیں کرس گیل کا ریکارڈ توڑنے کیلئے 6 اننگز میں 16 رنز درکار ہیں جس کے بعد وہ یہ ریکارڈ بھی اپنے نام کرلیں گے۔

بابراعظم کا فی اننگز ففٹی پلس ریٹ دنیا میں تمام بیٹسمینوں میں سب سے بہتر ہے، ان کے کیرئیر میں 6 سنچریوں سمیت 64 ففٹی پلس اننگز ہیں، ان کا فی اننگز، ففٹی پلس اوسط 2.89 ہے یعنی ہر تیسری اننگز میں بابر نے کم از کم ففٹی اسکور ضرور کی ہے۔