Author: +9251

کوئٹہ: کوئٹہ:پھردہشت گردوں کے نشانے پر،شہرمیں زور دار دھماکہ ،اطلاعات کے مطابق بلوچستان کے دارالحکومت کوئٹہ میں زور دار دھماکہ ہوا ہے اورابتدائی اطلاعات کےمطابق شہرجانی نقصان سے بچ گیا ۔

تفصیلات کے مطابق دہشت گردوں کی جانب سے بلوچستان کے دارالحکومت کوئٹہ کا امن ایک مرتبہ پھر خراب کرنے کی کوشش کی گئی، میڈیا رپورٹس کے مطابق صوبائی دارالحکومت میں بدھ کی شام کو زور دار دھماکہ ہوا۔

پولیس کے مطابق سریاب روڈ پرکیچی بیگ کے قریب سڑک کنارے دھماکہ اس وقت ہوا جب ایگل سکواڈ کے اہلکار معمول کے گشت پرتھے،

دھماکے سے ایگل سکواڈ پولیس کے 2 اہلکارزخمی ہوئے جن کوفوری طبی امداد کے لئے سول ہسپتال منتقل کر دیا ہے جہاں انکی حالت تشویش ناک ہے۔

دھماکے کے ذریعے سریاب روڈ پر گشت میں مصروف پولیس کے ایگل اسکواڈ کو نشانہ بنانے کی کوشش کی گئی، تاہم آخری اطلاعات تک دھماکے کے نتیجے میں کوئی جانی نقصان نہیں ہوا۔

کابل : پریشان نہ ہوں‌ :افغان کرکٹ بورڈ پاکستان کی میزبانی میں ون ڈے سیریز کا خواہش مند ،اطلاعات کے مطابق افغانستان کرکٹ بورڈ کے چیئرمین نے پاکستان کی میزبانی میں ون ڈے سیریز کی خواہش کا اظہار کیا ہے۔

خبر رساں ادارے اے ایف پی کے مطابق افغان کرکٹ بورڈ کے چیئرمین عزیز اللہ فاضلی نے کہا کہ وہ رواں ہفتے کے آخر میں پاکستان کا دورہ کریں گے جس میں پاکستان ٹیم کو ون ڈے سیریز کے لیے میزبانی کی پیشکش کریں گے۔

اے ایف پی کے مطابق عزیز اللہ فاضلی نے خواتین کے کھیلوں میں حصہ لینے سے متعلق سوال پر واضح جواب دینے سے گریز کیاانہوں نے کہا کہ ان کا خطے میں کرکٹ کے حوالے سے اہم ممالک کے دورے کا بھی ارادہ ہے۔

افغان کرکٹ بورڈ کے چیئرمین کا کہنا تھا کہ وہ 25 ستمبر سے پاکستان کا دورہ کریں گے جس کے بعد وہ بھارت، بنگلادیش اور متحدہ عرب امارات جائیں گے جہاں وہ کرکٹ بورڈ کے حکام سے ملاقاتیں کریں گے۔

انہوں نے مزید کہا کہ وہ پاکستان کرکٹ بورڈ کے نئے چیئرمین رمیز راجہ سے ملاقات کریں گے جس میں وہ پاکستان کو اس سیریز کی میزبانی کی پیشکش کریں گے جو ستمبر میں سری لنکا میں کھیل جانی تھی۔

افغان کرکٹ بورڈ کے چیئرمین نے کہا کہ ہم افغانستان میں مستحکم کرکٹ دیکھنا چاہتے ہیں جو دیگر ممالک کے تعاون سے ممکن ہے۔

دوسری جانب اے ایف پی کا کہنا ہےکہ پاکستان کرکٹ بورڈ کے چیئرمین رمیز راجہ نے بھی عزیز اللہ فاضلی کے دورے کی تصدیق کی ہے۔

واضح رہے کہ سری لنکا مں کورونا وبا اور لاجسٹک مسائل کی بنا پر پاکستان اور افغانستان کے درمیان ستمبر میں تین میچوں کی ون ڈے سیریز منسوخ کردی گئی تھی، دونوں ممالک کے درمیان یہ سیریز 2023 کے ورلڈکپ میں کوالیفائی کے لیے ون ڈے لیگ کا حصہ تھی۔

اسلام آباد:نیوزی لینڈ ٹیم کے دورہ پاکستان کی منسوخی کا ملبہ دوسروں پر نہ ڈالا جائے، اطلاعات کے مطابق سابق وزیر داخلہ اور چیئرمین انسٹی ٹیوٹ آف ریسرچ اینڈ ریفارمز (آئی آر آر) سینیٹر رحمان ملک نے کہا ہے کہ انہیں نیوزی لینڈ کرکٹ کے دورہ پاکستان کی منسوخی پر اپنی آرا پیش کرنے کے لیے متعدد پیغامات موصول ہو رہے ہیں کہ کیوں میچ کو آخری لمحات میں منسوخ کر دیا گیا۔

انہوں نے کہا کہ یہ ہمارے اندرونی نظام کی ناکامی اور ریاست کی رازداری کا احترام نہ کرنے کا نتیجہ ہے کہ اسطرح الرٹس کو محفوظ کرنے کے لیے ایس او پی کی فقدان کی وجہ بھی ہے۔انہوں نے کہا کہ الرٹ احسان اللہ احسان کی بنیاد پر جاری کیا گیا جس نے ترکی میں بیٹھ کر ہمارے سیکورٹی سسٹم کو بیوقوف بنایا اور یہ وہی احسان اللہ احسان ہے جس سے ملالہ یوسف زئی اور آرمی پبلک سکول پشاور پر حملے کے حقائق معلوم کرنا درکار ہے۔

سابق وزیرِداخلہ نے کہا کہ متوقع حملے کا الرٹ احسان اللہ احسان نے تیار کیا تھا اور یہ ہمارے پولیس سسٹم چینلز کے ذریعے گیا جو کہ مکمل طور پر غیر محفوظ ہیں اور یہاں تک کہ مجرموں نے بھی مواصلاتی سیٹ چوری کیے ہیں اور وہ پولیس کی سرگرمیوں کی نگرانی کے لیے ان کا استعمال کرتے ہیں۔انہوں نے کہا کہ کیا ہم نے کبھی سوچا ہے کہ ان میں کتنے انڈین ایجنٹ ہوں گے جو ہماری غیر محفوظ مواصلاتی نظام کی نگرانی کر رہے ہونگے۔

رحمان ملک نے کہا کہ آئی جی پنجاب پولیس اس غیر محفوظ مواصلاتی نظام کے ذریعے اس اہم الرٹ کو آر پی او راولپنڈی کو بھیجتا ہے تاکہ پولیس خفیہ کارروائی کے ذریعے ٹیم کی حفاظت کو یقینی بنائے۔انہوں نے کہا کہ وہ محسوس کرتے ہیں کہ احسان اللہ احسان نے چالاکی سے کھیل کھیلا اور پاکستان مخالف عناصر کی خدمت کرتے یہ الرٹ نیوزی لینڈ سفارت خانے کو پہنچایا اور احسان اللہ کی طرف سے تیار کردہ الرٹ کی سنگین خدشات کا بخوبی اندازہ لگایا جا سکتا ہے۔

رحمان ملک نے کہا کہ یہ ہمارے پولیس کے دقیانوسی مواصلاتی نظام کی سراسر ناکامی ہے اور ہمیں دوسروں کو مورد الزام نہیں ٹھہرانا چاہیے۔ انہوں نے وزیراعظم پاکستان سے پرزور مطالبہ کیا ہے کہ فوری طور پر اعلٰی سطح انکوائری کمیشن کا تشکیل دیا جائے جو ایک ایجنٹ کی طرف سے تیار اور جاری کردہ الرٹ کی تفتیش کرے۔ انہوں نے کہا کہ پاکستان آنے والی تمام ٹیموں کی حفاظت کے لیے ایک خصوصی فورس تشکیل دی جائے۔

کراچی :حراست میں لیےگئےسینئر صحافی وارث رضا:خود ہی گھرپہنچ گئے،اطلاعات کے مطابق کراچی میں رات گئے حراست میں لیےگئے سینئر صحافی وارث رضا گلشن اقبال میں اپنےگھر پہنچ گئے۔

اس حوالے سے کراچی یونین آف جرنلسٹس (کے یوجے) کے جنرل سیکرٹری سےگفتگو کرتے ہوئے وارث رضا نے بتایا کہ وہ گھر پہنچ گئے ہیں اور خیریت سے ہیں۔وارث رضا کے مطابق انہیں لے جانے والوں نے ان سے صحافتی ذمہ داریوں کا پوچھا اور ان کے کالم سے متعلق پوچھتے رہے۔

وارث رضا نے بتایا ہے کہ انہیں لےجانے والوں نے ان کی آنکھوں پر پٹی باندھی اور نامعلوم مقام پر لے گئے، کچھ دیر پہلے مبینہ ٹاون تھانے کے پاس چھوڑگئے۔

خیال رہے کہ سینئر صحافی کے اہلخانہ کا کہنا تھا کہ وارث رضا کو رات گئے یونیفارم میں ملبوس افراد اپنے ساتھ لے گئے، وارث رضا کو لے جانے والے افراد نےکہاتھا کہ تھوڑی دیر میں چھوڑ دیا جائے گا۔

کراچی یونین آف جرنلسٹس نے سینئر صحافی وارث رضا کو حراست میں لیے جانے کی مذمت کرتے ہوئےکہا کہ پاکستان یونین آف جرنلسٹس (پی ایف یو جے) کی تاریخ پر مبنی کتاب کے مدیر کو حراست میں لینا آزادی صحافت پر حملہ ہے۔

یاد رہےکہ پچھلے کئی ماہ سے ایسے واقعات رونما ہورہےہیں جن میں کچھ صحافیوں کے دوست احباب یہ دعویٰ کرتے ہیں کہ ان کو اداروں کےلوگوں نے اٹھا لیا ہے اورپھرخود ہی ایک دودن بعد واپس لوٹ آتے ہیں

کراچی:برٹش ایئرویز کی اسلام آباد سے والی پرواز میں خاتون وفات پاگئیں، تاشقند میں ہنگامی لینڈنگ ،اطلاعات کے مطابق اسلام آباد سے لندن جانے والی ایک پرواز میں خاتون مسافر انتقال کر گئیں۔

تفصیلات کے مطابق اسلام آباد سے لندن جانے والی برٹش ایئر ویز کی پرواز میں ایک پاکستانی نژاد خاتون مسافر کی اچانک طبیعت خراب ہونے پر موت واقع ہو گئی۔سول ایویشن حکام کے مطابق اس پرواز بی اے 260 اسلام آباد سے لندن کے لیے روانہ ہوئی تھی، طیارہ تاشقند کے قریب تھا، کہ اچانک خاتون مسافر کو دل کا دورہ پڑا، جو جان لیوا ثابت ہوا۔

جہاز کے کپتان نے تاشقند کے کنٹرول ٹاور سے رابطہ کر کے تاشقند ایئر پورٹ پر میڈیکل ایمرجنسی لینڈنگ کی اجازت طلب کی، اجازت ملنے پر طیارے کو تاشقند ایئر پورٹ پر اتار لیا گیا۔طیارے کے عملے نے خاتون کی طبیعت اچانک بگڑنے پر تاشقند ایئر پورٹ پر ڈاکٹر اور ایمبولینس طلب کی، تاہم خاتون دل کے دورے کو سہہ نہیں پائیں اور انتقال کر گئیں۔

یاد رہے کہ رواں برس 2 مارچ کو بھارتی ایئر لائن کے ایک طیارے کو بھی دوران پرواز مسافر کے انتقال کے باعث کراچی ایئر پورٹ پر ہنگامی لینڈنگ کرنا پڑی تھی، شارجہ سے بھارتی شہر لکھنؤ جانے والی پرواز میں مسافر کی طبیعت اچانک خراب ہوئی، اور وہ انتقال کر گیا۔

ویلنگٹن:پاکستان کے ساتھ کرکٹ سیریزمنسوخ کرنےکے فیصلے سے شرمساری ہوئی:پاکستان اورپاکستانی بہت اچھےہیں:اطلاعات کےمطابق نیوزی لینڈ کی کرکٹ ٹیم کے کپتان کین ولیمسن کا کہنا ہے کہ دورہ پاکستان کی منسوخی شرمناک تھی، اندازہ ہے کہ پاکستان کے لوگوں کو دورہ منسوخی سے مایوسی ہوئی ہوگی۔

الاقوامی میڈیا کے مطابق نیوزی لینڈ کرکٹ ٹیم کے کپتان کین ولیمسن نے دورہ پاکستان کی منسوخی کو شرمناک قرار دے دیا۔
کین ولیمسن کا کہنا ہے کہ مجھے زیادہ تفصیلات کا علم نہیں لیکن یہ اچانک ہوا، پاکستان میں کرکٹ کو بہت پسند اور سپورٹ کیا جاتا ہے۔ اندازہ ہے کہ پاکستان کے لوگوں کو دورہ منسوخی سے مایوسی ہوئی ہوگی۔

انہوں نے کہا کہ مجھے امید ہے تمام ملک اپنی کرکٹ اپنے ہی ملک میں کھیلیں گے، نیوزی لینڈ ٹیم کا وہاں جانا اچھا قدم تھا سب کرکٹ کھیلنے کے لیے تیار تھے۔ حکومت کا فیصلہ کھلاڑیوں کے لیے ہی کیا گیا ہے۔

کین ولیمسن کا مزید کہنا تھا کہ پاکستان کرکٹ کھیلنے کے لیے ایک خاص جگہ ہے، انٹرنیشنل کرکٹ کی واپسی کے لیے پاکستان نے بے پناہ اقدامات کیے۔ امید کرتا ہوں کہ پاکستان میں مزید کرکٹ ہوگی۔

کین ولیمسن کا مزید کہنا تھا کہ میرے پاس تمام تفصیلات نہیں ہیں مگرجب تفصیلات آگئیں تو پھرشیئرکروں گا ، ان کایہ بھی کہنا تھا کہ انہیں اس دورے کی منسوخی کا شدید غم ہے اورشاید یہ دل سے نہ نکل سکے

کین ولیمسن کا مزید کہنا تھا کہ وہ پاکستانیوں سے اپنی محبت کو نہیں بھول پائیں گے

یاد رہےکہ کیوی کپتان کین ولیمسن کا یہ دودنوں میں دوسری بارموقف آیا ہے پرسوں بھی ان کا کہنا تھا کہ بورڈ نے سیریزمنسوخ کرنے کا فیصلہ اچھا نہیں کیا