آئی ایم ایف کے ساتھ اجلاس ، مشیرخزانہ کیوں ہوئے غائب
باغی ٹی وی : عالمی مالیاتی ادارے (آئی ایم ایف) سے ہونے والی ملاقات میں مشیر خزانہ اور سیکرٹری خزانہ ہی موجود نہیں تھے۔
خزانہ کمیٹی کی رکن اور پیپلز پارٹی کی رہنما سینیٹر شیری رحمان نے میڈیا سے بات کرتے ہوئے کہا کہ پاکستان کی غریب عوام کے مسائل ابھی تک حکومت کے ایجنڈا پر نہیں آئے ہیں۔ ہمیں معلوم ہے کہ ملکی معاشی صورتحال انتہائی گھمبیر ہے۔
انہوں نے کہا کہ آئی ایم ایف کے وفد سے مہنگائی پر بات چیت کی گئی، کرنٹ اکاؤنٹ خسارہ میں کمی اور معاشی بحران پر قابو پانا ہے تاہم ہمارا کام یہ بھی ہے کہ غریب عوام کا مقدمہ لڑیں اور حکومت کو چاہیے کہ مہنگائی سے عوام کو نکالنے کے لیے تجاویز لائیں۔شیری رحمان نے کہا کہ آئی ایم ایف نے مہنگائی کم کرنے کی تجاویز نہیں دینی۔ یہ انتہائی اہم اجلاس تھا لیکن بدقسمتی سے مشیر خزانہ اور سیکرٹری خزانہ دونوں ہی موجود نہیں تھے۔
ادھر مشیر خزانہ عبدالحفیظ شیخ نے قومی اسمبلی میں اظہار خیال کرتے ہوئے کہا 72 سال میں کوئی وزیراعظم مدت پوری نہ کرسکا، اس دوران ہم ٹیکس کولیکشن اور سرمایہ کاروں کو راضی کرنے میں بھی کامیاب نہ ہوسکے، سوچنا ہوگا ایسا کیا ہے کہ گروتھ ریٹ برقرار نہیں رہ سکتا ؟ معیشت کے اثرات براہ راست لوگوں پر پڑ رہے ہیں۔
حفیظ شیخ کا کہنا تھا ترقی کرنی ہے تو اپنے لوگوں پر دھیان دینا ہوگا، ہمیں طے کرنا ہے ملک کو آگے لے کر جانا ہے یا نہیں، معاشی استحکام کیلئے حکومت کام کر رہی ہے، کوشش کروں گا سیاسی بحث اور پوائنٹ سکورنگ نہ کروں، ترقی یافتہ ممالک نے تجارت کیلئے ماحول پیدا کیا، 1960 کے دوران معیشت میں بہتری آئی جو 4 سال میں ختم ہوگئی۔
مشیر خزانہ نے مزید کہا کہ فیصلہ ہوا تھا ایکس چینج ریٹ کو فکس رکھنا ہے، وزیراعظم کتنا بھی طاقتور ہو کرنسی کی قدر کو حکم سے نہیں روک سکتا، کرنسی کی قدر میں کمی روکنے کیلئے ڈالر پھونکے گئے، 2 ہزار 300 ارب روپے آمدن سے زیادہ خرچ کیے گئے، بحران کی وجہ یہ ہے کہ ملک میں ڈالر نہیں، ہم نے قرض بھی ڈالرز میں لیے۔
احفیظ شیخ کا کہنا تھا سابق حکومت میں ایکسپورٹ کی گروتھ زیرو تھی، 95 ارب ڈالر کا غیر ملکی قرض اور سالانہ 20 ارب کا بوجھ تھا، جاری کھاتوں کا خسارہ ڈالر اور زرمبادلہ کے ذخائر بتاتا ہے، اقدامات نہ اٹھائے تو ہم بھی ناکام ہو جائیں گے، ملکی زراعت نے بھی اس انداز میں ترقی نہیں کی، زراعت کا گروتھ ریٹ بھی زیرو ہے۔
مشیر خزانہ نے کہا توانائی کا شعبہ تباہی کا باعث بن سکتا ہے، ادارے بل اکٹھے کرنے میں کامیاب نہیں ہو رہے، ہم بحران میں داخل ہو چکے تھے، ملک دیوالیہ نظر آرہا تھا، ہمیں کوئی قرض دینے کو تیار نہیں تھا، پہلی ترجیح تھی کہ پاکستان کو دیوالیہ ہونے سے بچائیں، سعودی عرب سے قسطوں میں تیل خریدا، 2008 اور 2013 میں آنیوالی حکومتیں آئی ایم ایف کے پاس گئیں، کوئی بھی خوشی سے آئی ایم ایف کے پاس نہیں جاتا۔
