Author: +9251

کراچی :اپنی مرضی سے مسلمان ہوکر نام علیزہ رکھا: مہک کماری نےعدالت میں بیان دیکرپراپیگنڈہ ناکام بنا دیا ،اطلاعات کےمطابق جیکب آباد سے 4 روز قبل لاپتا ہونے والی مہک کماری کو عدالت میں پیش کردیا گیا۔

4 روز قبل مہک کماری پراسرار طور پر اپنے گھر سے لاپتہ ہوگئی تھی جس کا اغواء کا مقدمہ اس کے والد وجے کمار نے سول لائن تھانے میں درج کرایا تھا۔

مقدمے کے اندراج کے بعد لڑکی کا ویڈیو بیان سامنے آیا تھا جس میں اس نے مرضی سے شادی کرنے اور اسلام قبول کرنے کا بیان دیا تھا اورکہا تھا کہ اس نے علی رضا نامی لڑکے سے پسند کی شادی کرلی ہے اوراب اس کا نام علیزہ رکھاگیاہے۔

بعدازاں پولیس نےگڑھی یاسین کے ایک مکان سے لڑکی کوحفاظتی تحویل میں لے لیا اور آج اسے جیکب آباد میں فرسٹ سول اینڈ جوڈیشل مجسٹریٹ امتیاز لاکھیر کی عدالت میں پیش کیا گیا۔

پیشی کے موقع پر سیکیورٹی کے سخت انتظامات کیے گئے جبکہ احاطہ عدالت میں لڑکی کے اہلخانہ بھی موجود تھے۔لڑکی نےعدالت کوبتایا کہ اُس نے مسلمان ہوکرنام علیزہ رکھا اورعلی رضا سے شادی کی ہے۔

عدالت نے علی رضا کے عدالت میں پیش نہ ہونے پر سماعت منگل تک کے لیے ملتوی کردی۔دوسری جانب لڑکی کے ورثاء نے جیکب آباد میں قومی شاہراہ پر احتجاج کیا اور مؤقف اختیار کیا کہ لڑکی نابالغ ہے، اس کی عمر 15 سال ہے لہٰذا لڑکی کو ان کے حوالے کیا جائے۔

خیال رہے کہ گزشتہ سال مارچ میں دو ہندو بہنیں سندھ کے شہر ڈہرکی سے لاپتہ ہوگئی تھیں جن کے حوالے سے پولیس کا دعویٰ تھا کہ 22 مارچ کو دونوں لڑکیوں نے منظر عام پر آکر نکاح کرلیا تھا اور دونوں نے میڈیا کے سامنے اپنی مرضی سے نکاح کا اعتراف بھی کیا تھا۔

پشاور: آٹا بحران ختم : نان بائیوں نے ہڑتا ل ختم کرنے کا اعلان کردیا،اطلاعات کے مطابق کمشنر ہزارہ ڈویژن کے نان بائی ایسوسی ایشن سے مذاکرات کامیاب ہوگئے جس کے بعد بان بائیوں نے ہڑتال ختم کرنے کا اعلان کردیا۔

تفصیلات کے مطابق نان بائی ایسوسی ایشن نے ہزارہ ڈویثزن میں ہڑتال ختم کرنے کا اعلان کیا۔ 100گرام کی روٹی 10 جبکہ 200 گرام کی روٹی 20 روپے میں فروخت کرنے پر اتفاق ہوگیا۔نان بائی ایسوسی ایشن نے کمشنر ہزارہ ڈویژن اور متعلقہ افسران سے اظہار تشکر بھی کیا۔

خیال رہے کہ آٹے کی قیمتوں میں اضافے سے نان بائیوں نے غریب عوام پر مہنگائی کا بم گرانے کی دھمکی دی تھی، خیبرپختونخواہ میں ایک روٹی کی قیمت 15روپے کرنے کا عندیہ سامنے آیا تھا۔

نان بائیوں کا کہنا تھا کہ آٹا مہنگا ہوگیا اب 10روپے کی روٹی نہیں بیچ سکتے، پنجاب نے آٹے کی سپلائی بند کی ہے، قیمتیں مزید بڑھیں گی، حکومت نے ہمارے مطالبات نہیں مانے تو پیر سے ہڑتال کریں گے۔

کوئٹہ: بلوچستان میں دہشت گردی کا بڑا منصوبہ ناکام ہوگیا، انسداد دہشت گردی فورسز(سی ٹی ڈی) سے مقابلے میں دو دہشت گرد ہلاک ہوگئے۔

تفصیلات کے مطابق کوئٹہ کے علاقے نواں کلی بائی پاس پر سی ٹی ڈی اور مبینہ دہشتگردوں میں مقابلہ ہوا، دہشتگردوں کی فائرنگ سے سی ٹی ڈی کی گاڑی کو نقصان بھی پہنچا البتہ جوابی کارروائی میں دہشت گرد مارے گئے۔

سی ٹی ڈی حکام کا کہناہے کہ دہشت گرد شہر میں دہشتگردی کرنے کا منصوبہ رکھتے تھے، نواں کلی بائی پاس آپریشن مکمل کرلیا گیا، دہشت گردوں سے برآمد موٹر سائیکل میں نصب بم بھی ناکارہ بنا دیا گیا ہے۔

6 سے 7کلو ریموٹ کنٹرول بم موٹر سائیکل میں نصب تھا، دھماکا خیز مواد میں بال بیرنگز اور نٹ بولٹ بھی شامل ہے، دہشت گردوں کی شناخت حکمت اور کفایت کے نام سے ہوگئی، مبینہ دہشت گرد شہر میں ہونے والے 3دھماکوں میں ملوث تھے۔

ترجمان سی ٹی ڈی کا مزید کہنا تھا کہ دہشت گردوں نے گزشتہ برس ڈبل روڈ پر آر آر جی کی گاڑی کو نشانہ بنایا تھا، دہشت گردوں کے خلاف کارروائی خفیہ اطلاع پر کی گئی۔