کوئٹہ:باکمال لوگ ، لاجواب سروس ، کے کوئٹہ میں کمالات کی انوکھی کارروائی ،اطلاعات کےمطابق کوئٹہ میں سول ایوی ایشن حکام کی ناقص کارکردگی کےباعث قومی ائیرلائن پی آئی آے کا طیارہ رن ون سے پھسل گیا تاہم حادثے میں کوئی جانی نقصان نہیں ہوا۔
ترجمان پی آئی اے عبد اللہ خان نے بتایا کہ جدہ سے کوئٹہ آنے والی فلائٹ اتری تو برف باری شروع ہوگئی۔ ایسے موسم میں ڈی آئسنگ (جہاز اور انجن پر سے برف اتارنا) کی ضرورت پڑتی ہے جوکہ کوئٹہ ائیرپورٹ پر مہیا نہیں کی گئی جس کے سبب طیارہ برف میں پھنس گیا۔
کوئٹہ کے ائرپورٹ پرپھسلنے والے پی آئی اے کے طیارے کی مزید کہانی کے متعلق پی آئی اے حکام کاکہناہے کہ ڈی آئسنگ کی سہولت مہیا کرنا ائیرپورٹ یعنی سول ایوی ایشن کا کام ہے۔ طیارہ پھنسنے سے نقصان، مسافروں کو پریشانی اور پروازوں کا دیگر شیڈول شدید متاثر ہوتا ہے۔
ترجمان پی آئی اے نے بتایا کہ جدہ سے آنے والے مسافروں کو ہوٹل منتقل کر دیا گیا ہے۔ برف، ضروری سامان اور کیمیکلز کی کوئٹہ ائیرپورٹ پر غیر موجودگی کے باعث پی آئی اے نے دیگر پروازیں منسوخ کردی ہیں۔پی کے 325/326 اسلام آباد سے کوئٹہ، پی کے 310/311 کرچی سے کوئٹہ اور پی کے 8363 کوئٹہ سے کراچی بھی منسوخ کردی گئی ہے۔
پی آئی اے حکام کا کہنا ہے کہ موسم کی صورتحال بہتر ہوتے ہی پروازیں بحال کردی جائیں گی، قومی ائیرلائن مسافروں کو ہونے والی دشواری کے لئے معذرت خواہ ہیں تاہم موسم صورتحال ہمارے اختیار سے باہر ہیں۔ پی آئی اے کا عملہ اور کال سنٹر مستعد ہے۔ صارفین ہمارے مسافر رابطہ کرکے رہنمائی حاصل کرسکتے ہیں۔
