نئی دہلی : آر ایس ایس نظریہ مسلمانوں اور اقلیتوں سے نفرت کی بنیاد پر قائم ہے، اطلاعات کے مطابق وزیر اعظم عمران خان کا کہنا ہے کہ آر ایس ایس نظریہ نسلی برتری، مسلمانوں اور اقلیتوں سے نفرت کی بنیاد پر قائم ہے۔
ذرائع کےمطابق سماجی رابطے کی ویب سائٹ ٹوئیٹر پر جاری بیان میں وزیر اعظم عمران خان کا کہنا تھا کہ آر ایس ایس کے انتہاپسند نظریے نے جوہری ملک کے ایک ارب لوگوں کو یرغمال بنا لیا ہے۔انہوں نے کہا کہ جب بھی یہ جن بوتل سے باہر آئے گا تو اس سے بہت خون خرابہ ہوگا۔
سخت گیر ہندو نظریاتی تنظیم راشٹریہ سویم سیوک سنگھ (آر ایس ایس) نامی تنظیم ابتدا سے ہی ہندوتوا کی جانب مائل جماعتوں اور تنظیموں سے وابستہ رہی ہے۔ بی جے پی اس کی سیاسی شاخ ہے۔ بجرنگ دل، وشو ہندو پریشد، بن واسی کلیان سمیتی، اور اکھل بھارتیہ ودیارتھی پریشد جیسی متعدد تنظیمیں اس کی محاذی شاخیں ہیں جو الک الگ علاقوں میں الگ الگ طریقے سے اپنا کردار ادا کرتی ہیں۔ ان سبھی تنظیموں کا نصب العین ہندوتوا کا فروغ ہے۔
ان میں بجرنگ دل اور وشو ہندو پریشد جیسی تنظیمیں اب اپنے ارکان کو لڑائی اور مسلح ٹکراؤ کی تربیت بھی دیتی ہیں۔ بجرنگ دل جیسی تنظیموں کی نوعیت ملیشیا جیسی ہے جن کا کردار انتخابات میں سماجی ٹکراؤ اور سیاسی مفاد کے حصول کے لیے دنگے فساد میں اکثر نظر آتا ہے۔
ان میں سے بعض تنظیموں نے اب خود کو سینا یعنی فوج کہنا شروع کر دیا ہے۔ ان تنظیموں کے حکمراں جماعت بی جے پی سے گہرے تعلقات ہیں۔ گائے کے تحفظ کے لیے بنائی گئی ’گؤ رکشا‘ سمیتیوں اور ‘اینٹی رومیو’ سکواڈ جیسے پرتشدد گروپوں میں انھی ملیشیا کے نوجوان شامل ہوتے ہیں۔
بی جے پی کے اقتدار میں آنے کے بعد آر ایس ایس کے ارکان کی تعداد میں زبردست اضافہ ہوا ہے۔ اس کے ارکان کی تعداد اب لاکھوں میں ہے جو تنظیم کے سربراہ کی ایک آواز پر منظم طریقے سے فوجی ڈسپلن کے ساتھ کھڑے ہوں گے۔
دوسری جانب وزیر اعظم نے عمان کے سلطان قابوس کے انتقال پر عمانی عوام سے اظہار تعزیت بھی کیا ۔وزیر اعظم نے کہاسلطان قابوس ایک دانا شخصیت تھے جنہوں نے عمان کو ایک جدیدریاست کی صورت میں ڈھالا۔
عمران خان کا مزید کہنا تھا کہ سلطابن قابوس کی رحلت سے جہاں عمان نے اپنا عزیز قائد کھویا ہے وہیں پاکستان بھی ایک با اعتماد قریبی دوست سے محروم ہوگیا ہے ۔اللہ کریم ان پر ابدی سکون نچھاور کریں۔
واضح رہے کہ اس سے قبل وزیراعظم عمران خان نے گذشتہ روز کوئٹہ میں مسجد میں ہونے والے دھماکے کی رپورٹ طلب کرتے ہوئے حکام کو بزدل دہشت گردوں کوجلد کیفر کردار تک پہنچا نے کا حکم دیاہے۔
اپنے پیغام میں وزیراعظم کا کہناتھا کہ میں نے کوئٹہ کی مسجد میں بارگاہِ الہٰی میں سجدہ ریز نمازیوں پر بزدلانہ دہشت گرد حملے کی فوری رپورٹ طلب کی ہے۔
انہوں نے واقعے میں شہید پولیس افسرکو خراج تحسین پیش کرتے ہوئے کہاکہ حملے میں جام شہادت نوش کرنے والے ڈی ایس پی حاجی امان اللہ ایک جرات مند اور مثالی افسر تھے۔
خیال رہے کہ کوئٹہ کے علاقے سیٹلائٹ ٹاؤن میں گذشتہ روز دھماکے کی ایف آئی آر درج کر لی گئی ہے جس میں اقدام قتل، دہشت گردی اور دیگر دفعات شامل کی گئی ہیں۔
ڈی آئی جی کوئٹہ عبدالرزاق چیمہ کاکہناہے کہ واقعے کا مقدمہ سی ٹی ڈی کی جانب سے ایس ایچ او کی مدعیت میں سیٹلائٹ ٹاون تھانہ میں درج کیا گیا ہے۔
