Author: +9251

ہانگ کانگ کے لوگوں نے ٹرمپ سے مدد مانگ لی

تفصیلات کے مطابق بیجنگ حکومت ہانگ کانگ میں احتجاج سے متعلق واشنگٹن کے موقف کے سبب امریکی سفارتی پاسپورٹس کے حامل افراد کو چین میں داخل ہونے سے روک سکتا ہے۔ اس کے علاوہ امریکی ذمے داران اور قانون ساز ارکان کے لیے ویزوں کے اجرا پر بھی قیود لگائی جا سکتی ہیں۔ رائٹرز خبر رساں ایجنسی نے یہ بات منگل کے روز چینی اخبار گلوبل ٹائمز کے چیف ایڈیٹر "ھو زیکین” کے حوالے سے بتائی۔

امریکی وزارت خارجہ نے پیر کے روز اعلان کیا تھا کہ اس نے امریکی فوج کے بحری جہازوں اور طیاروں کی جانب سے پیش کردہ ہانگ کانگ کے دوروں کی درخواستوں کا جائزہ معلق کر دیا ہے۔ یہ اقدام امریکی ایوان نمائندگان کی جانب سے بیجنگ کے زیر انتظام شہر (ہانگ کانگ) میں مظاہرین کی سپورٹ کے واسطے قانون سازی منظور ہونے کے جواب میں کیا گیا۔

چینی حکومت نے انسانی حقوق کی غیر سرکاری تنظیم "ہیومن رائٹس واچ” پر بھی پابندیاں عائد کر دی ہیں۔ چینی وزارت خارجہ کی ترجمان نے بیجنگ میں ایک مختصر پریس بریفنگ کے دوران تنظیم پر الزام لگایا کہ وہ ہانگ کانگ میں انتہا پسندوں کی پرتشدد سرگرمیوں کی سپورٹ کر رہی ہے۔

چین گذشتہ ہفتے یہ باور کرا چکا ہے کہ اگر امریکا نے ہانگ کانگ میں مداخلت کا سلسلہ جاری رکھا تو "بھرپور اور سخت اقدامات” کیے جائیں گے۔

یاد رہے کہ جمہوریت کی حمایت میں 6 ماہ سے جاری مظاہروں نے نیم خود مختاری رکھنے والے چینی شہر ہانگ کانگ کو ہلا کر رکھ دیا ہے۔

اتوار کے روز ہانگ کانگ میں سیکڑوں افراد نے امریکی قونصل خانے کی جانب مارچ کیا۔ اس مارچ کا مقصد چینی حکومت کے مخالف مظاہروں کے لیے امریکا کی سپورٹ پر تشکر کا اظہار تھا۔ مارچ میں شریک افراد نے امریکی پرچم لہرایا۔ بعض شرکاء کے لباس پر امریکی صدر ڈونلڈ ٹرمپ کی حمایت میں عبارتیں تحریر تھیں۔ مارچ کے بعض شرکاء نے بینر اٹھا رکھے تھے جن پر یہ تحریر تھا کہ "صدر ٹرمپ .. براہ مہربانی آپ ہانگ کانگ کو آزاد کرائیں”

یاد رہے کہ چین نے ہانگ کانگ میں مظاہرے کی وجہ بننے والا متنازعہ قانون واپس لے لیا گیا ہے، تاہم اس کے باوجود شہریوں نے احتجاج ختم نہیں کیا۔ ہانگ کانگ میں مجرموں کی چین حوالگی سے متعلق متنازع بل کے خلاف لاکھوں افراد نے احتجاج کیا تھا جس کے باعث چیف ایگزیکٹو کیری لام نے عوام سے معافی مانگ لی تھی۔لیکن عوامی غصہ ابھی ٹھنڈا نہیں ہورہا

سابق شاہ ایرن کے بیٹے نے کہہ دیا کہ "اسلامی جمہوریہ کے حتمی سقوط” کی تیاری کی جائے

تفصیلات کے مطابق ایران کے سابق رہنما کے بیٹے نے ایران کی موجودہ حکومت اور اس نظام کے جلد سقوط کی پیش گوئی کردی ہے.سابق شاہ ایران کے بیٹے رضا پہلوی نے زور دیا ہے کہ "اسلامی جمہوریہ کے حتمی سقوط” کی تیاری کی جائے۔ انہوں نے مزید کہا کہ "عبوری عرصے کے دوران قیادت” اب ایرانیوں کے لیے انتہائی اہمیت کا معاملہ بن چکا ہے۔ انہوں نے ایک عبوری حکومت کی تشکیل کا مطالبہ کیا۔

ایرانی ریڈیو فردا کے مطابق 59 سالہ پہلوی کا یہ موقف ان کے ایک تازہ بیان میں سامنے آیا ہے۔ انہوں نے کہا کہ "دو سال سے بھی کم عرصہ گزرا ہے جب میں نے باور کرایا تھا کہ اسلامی جہوریہ ایران کا سقوط قریب ہے اور اس سے فرار ممکن نہیں۔ سیاسی نظام کا سقوط مستعد رہنے کا تقاضا کرتا ہے”۔

سابق شاہ ایران کے بیٹے کا کہنا ہے کہ "عبوری مرحلے کے دوران ملک کی قیادت کے لیے سیاسی اتھارٹی کی تشکیل کا آغاز اب کر دیا جانا چاہیے.. یہ سیاسی قیادت آخر کار ملک کو اس امر کے لیے تیار کرے گی کہ بیلٹ بکس کے ذریعے اقتدار ایک اسلامی حکومت سے قانونی، سیاسی اور اقتصادی طور پر ایک ایرانی حکومت کو منتقل کیا جائے”۔

رضا پہلوی نے اپنے بیان میں خاص طور پر سیاست دانوں، اساتذہ، فن کاروں، وکلاء، ایرانی فوجیوں اور مسلح افواج کی قیادت کو مخاطب کرتے ہوئے زور دیا کہ سیاسی اداروں کو اہلیت کے حامل سیاست دانوں کے حوالے کیے جانے کی ضرورت ہے۔

سال 2017-2018 اور نومبر 2019 میں ہونے والے عوامی مظاہروں کے دوران پہلوی خاندان اور اس کے اہم سرخیل رضا شاہ کو سراہے جانے کے حوالے سے نعرے سامنے آئے۔ ان نعروں سے ظاہر ہوا کہ لوگوں کی بڑی تعداد مذہبی عقیدے کے تسلط اور سماجی آزادی پر روک ٹوک کے بغیر ایک فعال حکومت اور ملک کی معیشت کو مستحکم دیکھنے کے خواہش مند ہیں۔

نیتن یاہو کےگرد گھیرا تنگ

اسرائیلی استغاثہ کی جانب سے وزیراعظم بنیامین نیتن یاہو کے خلاف بدعنوانی سے متعلق تین کیسوں کی تفصیلات پیر کے روز پارلیمنٹ میں پیش کی گئیں۔ اس حوالے سے 333 گواہوں کے نام موجود ہیں۔ ان میں نیتن یاہو کے دولت مند دوست احباب اور سابق معاونین شامل ہیں۔

اسرائیلی وزیراعظم کے خلاف بدعنوانی کے تین مختلف کیسوں میں رشوت خوری ، فراڈ اور اعتماد کو ٹھیس پہنچانے کے الزامات سے متعلق فردِ جرم سرکاری طور پر پارلیمنٹ کو ارسال کر دی گئی ہے۔ اس کے خلاف اپیل اور مقدمے سے استثنا کے لیے اسرائیلی وزیراعظم کے پاس 30 دن کا وقت ہے۔

نیتن یاہو جو اسرائیل پر تقریبا ایک دہائی سے حکومت کر رہے ہیں، انہوں نے کسی بھی غلط کام کے ارتکاب کی تردید کر دی ہے۔ ان کا کہنا ہے کہ وہ عدلیہ کی جانب سے "انقلاب” کی کوشش کا شکار ہوئے ہیں اور عدلیہ مقبولیت کے حامل دائیں بازو کے سربراہ کو معزول کرنے کے لیے کوشاں ہے۔ وزیراعظم ہونے کی حیثیت سے ملکی قانون نیتن یاہو کو اس بات کا پابند نہیں بناتا کہ وہ فرد جرم عائد کیے جانے پر اپنے عہدے سے مستعفی ہو جائیں۔ نیتن یاہو کے خلاف مقبوضہ بیت المقدس کی ایک عدالت میں تین رکنی بینچ کی نگرانی میں مقدمہ چلایا جائے گا۔ تاہم مقدمے کے آغاز کی تاریخ مقرر نہیں کی گئی ہے۔

زخمی نیتن یاہو کتنا پریشان…….سابق اسرائیلی وزیرا عظم کو کس نے کیا کہہ دیا

قانونی ماہرین کے مطابق فرد جرم میں تین سو سے زیادہ گواہوں کے ہونے کا مطلب ہے کہ مقدمہ کئی برس جاری رہے گا۔ ادھر نیتن یاہو نے گواہوں کی طویل فہرست کا تمسخر اڑاتے ہوئے ٹویٹر پر کہا ہے کہ "اگر الزام درست ہو تو 333 گواہوں کی ضرورت نہیں رہتی ،،، اور اگر الزام غلط ہو تو 333 گواہان بھی کوئی فائدہ نہیں دیتے”
اس سے پہلے نیتن یاہونے اپنے ان مقدمات سے بچنے کے لیے متنازعہ بیان دیا تھا .واضح رہے کہ بین الاقوامی قانون کے تحت اسرائیل کی طرف سے مقبوضہ فلسطینی علاقوں میں قائم تمام یہودی بستیاں غیر قانونی ہیں۔ اسرائیل اپنی ہٹ دھرمی سے ان کو قانونی قراردیتا ہے جن کی اس نے منظوری دی تھی۔

ایران میں احتجاج کاخونی رنگ، مزید کتنی ہلاکتیں ہو گئیں.

تفصیلات کے مطابق : ایران میں احتجاج مزید تشدد آمیز ہوتا جا رہا ہے انسانی حقوق کی عالمی تنظیم ایمنسٹی انٹرنیشنل کی طرف سےجاری ایک بیان میں بتایا گیا ہے کہ حالیہ ایام میں ایران میں ہونےوالےاحتجاجی مظاہروں کے دوران پولیس اور سیکیورٹی فورسز کےحملوں میں کم سے کم 208 افراد ہلاک ہوئے ہیں۔ دوسری طرف ایران نے سرکاری سطح پر ہلاکتوں کی تعداد 143 بتائی ہے جب کہ ایرانی اپوزیشن کی طرف سے یہ تعداد ساڑھے چار سو سے زاید بتائی جا رہی ہے۔

لندن میں قائم ایمنسٹی انٹرنیشنل کے دفتر سے جاری بیان میں کہا گیا ہے کہ وسط نومبر کے دوران ایران میں ہونے والےپرتشدد مظاہروں میں ہلاکتوں کی تعداد 208 تک پہنچ گئی ہے۔ انسانی حقوق گروپ کا کہنا ہے کہ اس کے مندوبین ایران میں ہلاکتوں کی اصل تعداد کا کھوج لگانے کے لیے معتبر معلومات جمع کررہےہیں۔

ایمنسٹی نے گذشتہ جمعہ کو ٹویٹر پر کہا تھا کہ ایران میں مظاہروں میں ہلاکتوں کی تعداد 161 تک پہنچ گئی ہے۔ اس سے پہلے ہونے والے تخمینے کے مطابق ہلاکتوں کی تعداد 143 بتائی گئی تھی۔
واضح رہے کہ ایران میں مظاہرین کے احتجاج میں کافی تشدد بڑھ رہا ہے، اور پچھلے چند دنوں سے اس میں بہت تیزی آئی ہے ، اس سے قبل پیر کے روز ایمنسٹی انٹرنیشنل نے اطلاع دی تھی کہ 15 نومبر کو ایندھن کی قیمتوں میں اضافے کے بعد ہونے والے مظاہروں میں ایران بھر میں کم از کم 143 مظاہرین ہلاک ہوگئے تھے۔

جس میں‌کہا گیا تھا کہ ہلاکتوں کی تعداد کم از کم 143 ہے۔ تقریبا تمام اموات آتشیں اسلحہ کے استعمال کی وجہ سے ہوئی ہیں۔ لندن میں قائم انسانی حقوق کی تنظیم کا کہنا تھا کہ ایک شخص آنسو گیس کی شیلنگ سے ہلاک ہوا تھا اور ایک کی موت تشدد کے نتیجے میں واقع ہوئی۔