فیصل آباد(نمائندہ باغی ٹی وی )ڈویژنل کمشنر محمود جاوید بھٹی نے نیشنل انٹر ڈویژنل بوائز باسکٹ بال چیمپئن شپ جیتنے پر فیصل آباد ڈویژن کی ٹیم،ڈویژنل سپورٹس ڈیپارٹمنٹ اورآفیشلز کو مبارکباد دی اورتوقع کی ہے کہ ٹیم آئندہ بھی اس محنت سے کامیابی حاصل کرکے ڈویژن کانام روشن کرے گی۔ڈویژنل سپورٹس آفیسرطارق نذیراورڈویژنل صدر باسکٹ بال ایسوسی ایشن منوراحمدنے ڈویژنل کمشنر کو ونرٹرافی پیش کی۔ڈویژنل کمشنر نے سرگودھا میں کھیلی جانے والی چیمپئن شپ میں کھلاڑیوں کی عمدہ پروفارمنس اور ان کی بہترین تربیت پر کوچز ودیگر آفیشلز کی کاوشوں کی بھی تعریف کی۔انہوں نے کہا کہ ڈویژن بھر میں کھیلوں کے مقابلے تسلسل سے منعقد کرائے جارہے ہیں تاکہ کھلاڑی بھرپور تیاری سے قومی مقابلوں میں حصہ لے کر اپنی صلاحیتوں کا لوہا منواسکیں۔ڈویژنل سپورٹس آفیسر نے بھرپور سرپرستی پر ڈویژنل کمشنر محمود جاوید بھٹی کا شکریہ ادا کیا اور بتایا کہ فائنل مقابلہ میں فیصل آباد نے لاہور کو سنسنی خیز مقابلے کے بعد 76-80پوائنٹ سے شکست دی۔فیصل آباد ڈویژن کی ٹیم میں محمد اسرار،حسن خضر،عثمان طالب،حافظ عمر اور حسن طارق نے چیمپئن شپ میں عمدہ کھیل پیش کیا۔

فیصل آباد( )فیصل آباد انسٹیٹیوٹ آف کارڈیالوجی میں ہارٹ سیور فاؤنڈیشن کے زیراہتمام بریسٹ کینسر سے آگاہی کے لئے خواتین میں پمفلٹس تقسیم کئے گئے۔میڈیکل سوشل آفیسر آسیہ فقیر حسین اور جنرل سیکرٹری ہارٹ سیور فاؤنڈیشن کاشف فاروق نے ہسپتال کے مختلف ویٹنگ ایریازمیں مریضوں کے ساتھ آئی ہوئیں خواتین میں احتیاطی تدابیر پر مشتمل پمفلٹس تقسیم کئے۔میڈم عاصمہ مزمل اور دیگر بھی موجود تھے۔میڈیکل سوشل آفیسر نے کہا کہ بریسٹ کینسر(چھاتی کا سرطان)خواتین میں پائی جانے والی سب سے عام کینسر کی بیماری ہے جس سے بچاؤ کے لئے احتیاط ناگزیر ہے۔انہوں نے کہا کہ خواتین علامات کی صورت میں اپنا فوری طبی معائنہ اور بالخصوص 40سال سے زائد عمر خواتین فوراً میموگرافی کرائیں۔جنرل سیکرٹری نے کہا کہ چھاتی کے سرطان سے بچاؤ کے لئے احتیاط لازم ہے اور بروقت علاج سے اس بیماری سے محفوظ رہا جاسکتا ہے۔انہوں نے کہا کہ ہارٹ سیور فاؤنڈیشن کی طرف سے مختلف بیماریوں کے علاج معالجہ کے لئے طبی وسائل فراہم کئے جارہے ہیں جس کا تسلسل برقرار رکھا جائے گا۔اس موقع پر بتایا گیا کہ چھاتی میں درد،چھاتی میں گلٹی یارسولی،سوجن اور چھاتی کسی حصے سے خون یا رطوبت آنے کی صورت میں فورا متعلقہ ڈاکٹر سے رجوع کیا جائے۔