وزیراعلیٰ پنجاب سردار عثمان بزدار نے صوبے میں صنعتکاری اورسرمایہ کاری کو فروغ دینے کیلئے احسن اقدام کیا اورفیکٹریوں کی لیبراورسوشل سکیورٹی انسپکشن ختم کرنے کا بڑا فیصلہ کیا ہے،

باغی ٹی وی کی رپورٹ‌ کے مطابق وزیراعلیٰ پنجاب سردار عثمان بزدار نے فیکٹریوں کی انسپکشن ختم کرنے کے فیصلے کی منظوری دے دی ہے، فیکٹریاں سیلف اسسمنٹ کے تحت خود گوشوارے جمع کرانے کی پابند ہوں گی، انسپکٹر فیکٹریوں میں جاکر انسپکشن نہیں کرسکیں گے، وزیراعلیٰ نے کہا کہ فیکٹریوں کیلئے آن لائن رجسٹریشن کی سہولت مہیا کی جائے گی اورہدایت کی کہ آن لائن رجسٹریشن کو جلد حتمی شکل دیں، انہوں نے کہا کہ صوبے میں صنعتوں کی زوننگ کی جائے گی،

وزیراعلیٰ نے صنعتوں کی زوننگ کے لئے عملدرآمد کمیٹی تشکیل دے دی ہے، کمیٹی صنعتوں کی زوننگ کے حوالے سے جامع سفارشات پیش کرے گی، وزیراعلیٰ نے کہا کہ انسپکشن کا خا تمہ صوبے میں کاروبار میں آسانیاں پیدا کرنے میں مددگار ثابت ہوگا اور اس اقدام سے صنعتکاری کا عمل تیز ہوگا، روزگار کے نئے مواقع پیدا ہوں گے، انہوں نے کہا کہ صوبے میں سرمایہ کاری کو فروغ ملے گا،

وزیراعلیٰ پنجاب سردار عثمان بزدار سے وزیر ریلویز شیخ رشید احمد نے ملاقات کی ہے، اس موقع پر صوبائی وزیر قانون راجہ بشارت بھی موجود تھے،

باغی ٹی وی کی رپورٹ کے مطابق ملاقات میں نہتے کشمیری عوام پر بھارتی فوج کے ظلم و ستم کی پرزورمذمت کرتے ہوئے مقبوضہ کشمیر کے مظلوم عوام کے ساتھ مکمل یکجہتی کا اظہارکیا گیا، وزیراعلیٰ عثمان بزدار نے کہا کہ مودی سرکار کی تاریخی غلطی نے کشمیر کی جدوجہد آزادی میں نئی روح پھونک دی ہے، مقبوضہ کشمیر کا بچہ بچہ آزادی مانگ رہا ہے، انہوں نے کہا کہ بھارت کی ہٹ دھرمی کے باعث مقبوضہ کشمیر میں بہت بڑا انسانی المیہ جنم لے رہا ہے، پیلٹ گنز کی گولیاں، کرفیو اور لاک ڈاؤن بھی بہادر کشمیریوں کے جذبہ آزادی کو نہیں کچل سکے، انہوں نے کہا کہ نریندر مودی نے ظلم و ستم کی تاریخ دہرا کر ہٹلر کو بھی پیچھے چھوڑ دیا ہے، عالمی میڈیا نے بھی کشمیر ی عوام پر ہونے والے بھارتی مظالم کو بے نقاب کیا ہے – اقوام عالم کو مظلوم اور نہتے کشمیریوں کا ہاتھ تھامنا پڑے گا،

انہوں نے کہا کہ مقبوضہ کشمیر کے عوام کے ساتھ بے حسی اور بے رخی کی پالیسی نہیں چل سکتی، زبانی جمع خرچ کا وقت گزرچکا ہے، ظالم کا ہاتھ روکنے اور مظلوموں کی مدد کیلئے اقوام عالم کو فی الفور عملی اقدامات کرنا ہوں گے، انہوں نے کہا کہ وزیر اعظم عمران خان کشمیر کا مقدمہ جرأت اور مدلل انداز میں لڑرہے ہیں، کشمیرکے ساتھ دل اور روح کا رشتہ ہے جو ہمیشہ قائم رہے گا، وزیر ریلویز شیخ رشید احمد نے کہا کہ پاکستان اور کشمیر ایک ہی لڑی میں پروئے ہوئے ہیں، مودی کو اپنے غیر آئینی اور غیر قانونی اقدام پر منہ کی کھانا پڑے گی، انہوں نے کہا کہ ہمارا جینا مرنا کشمیری عوام کے ساتھ ہے، معصوم کشمیریوں پر بھارتی فوج کے وحشیانہ مظالم کی پرزور مذمت کرتے ہیں، انہوں نے کہا کہ پاکستان کشمیر کے بغیر نامکمل ہے اورکشمیریوں کے ساتھ یکجہتی کا سلسلہ مستقبل میں بھی جاری رہے گا،

پرنسپل پوسٹ گریجویٹ میڈیکل انسٹی ٹیوٹ نے لاہور جنرل ہسپتال کے ڈاکٹر مبشر فاروق کے اندوھناک قتل پر گہرے دکھ اور افسوس کا اظہار کیا ہے،

باغی ٹی وی کی رپورٹ کے مطابق انہوں نے قتل ہونے والے ڈاکٹر کے اہل خانہ سے تعزیت کرتے ہوئے دعا کی کہ اللہ تعالیٰ ڈاکٹر مبشر فاروق کے جسد خاکی کو جوار رحمت میں جگہ دے اور متاثرہ خاندان کو یہ صدمہ جانکاہ ہمت اور حوصلے سے برداشت کرنے کی توفیق دے، پروفیسر ڈاکٹر سردار محمد الفرید ظفر نے اس سانحہ پر گہری تشویش کا اظہار کرتے ہوئے توقع ظاہر کی ہے کہ اعلیٰ پولیس حکام اس معاملے میں اپنی پیشہ وارانہ ذمہ داریاں پوری کریں گے اور جدید وسائل کو برؤئے کار لاتے ہوئے ڈاکٹر مبشر فاروق کے قاتلوں کو جلد از جلد قانون کے شکنجے میں لائیں گے،

پرنسپل پی جی ایم آئی نے ادارے کی طرف سے بھی قتل ہونے والے ڈاکٹر کے اہل خانہ کو ہر ممکن تعاون کا یقین دلاتے ہوئے کہا کہ گو انسانی جان کا کوئی نعم البدل نہیں ہوتا لیکن ڈاکٹر مبشر فاروق مرحوم کے غمزدہ خاندان سے ہر ممکن تعاون کیا جائے گا،لاہور جنرل ہسپتال کی ڈاکٹرز کمیونٹی،نرسز اور پیرا میڈیکل سٹاف نے بھی ڈاکٹر مبشر فاروق کے قتل پر گہرے دکھ اور افسوس کا اظہار کیا ہے اور مجرموں کو جلد ازجلد کیفر کردار تک پہنچانے کا مطالبہ کیا ہے، یاد رہے کہ ڈاکٹر مبشر فاروق کو جنرل ہسپتا ل سے واپس گھر جاتے ہوئے تھانہ صدر پھول نگر کے علاقہ میں قتل کر دیا گیا تھا اور اُن کی لاش قبرستان میں پھینک دی گئی تھی،