Author: +9251

درگاہ اجمیر شریف کے گدی نشین سیدسرورچشتی نے بھارتی مسلمانوں کی حالت زار کے بارے میں کہا ہے کہ بس بہت ہوگیا، بھارتی مسلمان ناانصافی کا شکار ہیں۔ یہ کیسا بھارت ہے؟ یہ کیا ہو رہا ہے مسلمانوں کے ساتھ؟ یہ کیسی 72ویں یوم آزادی ہے بھارتی مسلمانوں کے لیے؟
سید سرور چشتی نے راجستھان میں تشدد سے جاں بحق پہلو خان کیس کے فیصلہ کو قابل مذمت قرار دیتے ہوئے کہا کہ 6ملزموں کو تو بری کردیا گیا،کیا آسمان سے بھوتوں نے آکرپہلوخان کاقتل کیا؟
یاد رہے کہ بھارت میں اقلیتوں خصوصاً مسلمانوں سے ہر جگہ امتیازی سلوک کیا جاتا ہے۔ہجومی تشدد سے 100کے قریب شہری مارے جا چکے ہیں جن میںسے اکثریت مسلمانوں کی ہے۔

لیبیا میں جنرل خلیفہ حفتر کی وفادار فوج نے ہفتے کے روز مغربی شہر مصراتۃ میں متعدد اہداف پر بمباری کی۔ بمباری کا نشانہ بنائے جانے والے مقامات میں فضائیہ کا ملٹری کالج بھی شامل ہے جسے تباہ کردیا گیا ہے۔

خیال رہے کہ مغربی شہر مصراتۃ بھی لیبیا کی عالمی سطح پر تسلیم شدہ حکومت کی وفادار ملیشا کے زیرانتظام ہے۔ لیبی فوج طرابلس کےساتھ اس شہر میں بھی حکومت نواز ملیشیا کے خلاف آپریشن جاری رکھے ہوئے ہے۔

ادھر العربیہ اور الحدث چینلوں کے ایک دوسرے ذریعے کے مطابق جنوبی لیبیا میں مرزق شہر میں نیشنل آرمی اور مسلحہ گروپوں کے درمیان بھی گھمسام کی جنگ کی اطلاعات ہیں۔

ترکی میں سعودی عرب کے سفارت خانے نے استنبول میں نامعلوم مسلح افراد کے سعودی شہریوں کے ایک گروپ پر حملے کے بعد انتباہ جاری کیا ہے اور سعودی شہریوں کو خبردار کیا ہے کہ وہ اپنے تحفظ کے لیے حفاظتی احتیاطی تدابیر اختیار کریں۔

سعودی عرب کی وزارت خارجہ نے اتوار کو ایک بیان میں بتایا ہے کہ استنبول کے علاقے سسلی ( صقلیہ) میں واقع ایک کیفے میں سعودی سیاح بیٹھے ہوئے تھے۔اس دوران میں اچانک مسلح افراد نے ان پر حملہ کردیا اور ان میں سے ایک کو گولی مار دی۔ پھر ان کا سامان لُوٹ کر چلتے بنے۔

وزارت کے مطابق ایک سعودی شہری گولی لگنے سے زخمی ہوگیا تھا لیکن اس نے یہ نہیں بتایا ہے کہ اس کا زخمی کتنا گہرا یا شدید ہے۔

بھارتی وزیر دفاع راجناتھ سنگھ نے پاکستان کو ایک اور گیڈر بھبھکی لگاتے ہوئے کہا ہے کہ اگر نئی دہلی اور اسلام آباد کے مابین مذاکرات ہوئے تو یہ صرف آزاد کشمیرپر ہوں گے ۔

راجناتھ سنگھ نے ہریانہ میں ایک ریلی کے دوران کہا ،”اگر پاکستان کے ساتھ بات چیت ہوتی ہے تو ، اب یہ آزاد کشمیر پر ہوگی“۔

راجناتھ سنگھ نے مزید کہا کہ جموں وکشمیر کی ترقی کے لئے آرٹیکل 370 کو کالعدم قرار دیا گیا ہے۔ ہمارا پڑوسی عالمی برادری کے دروازے کھٹکھٹا رہا ہے کہ ہندوستان نے غلطی کی۔

یاد رہے کہ راجناتھ سنگھ نے اس سے پہلے بھی گیدڑ بھبھکی لگاتے ہوئے کہا تھا کہ انڈیا نیوکلیئر ہتھیاروں کا پہلے استعمال نہ کرنے سے متعلق اپنی حکمت عملی کوتبدیل بھی کرسکتا ہے۔