Author: +9251

کراچی :پاکستان میں یوم آزادی کے موقع پر دیگر اداروں کی طرح ملک بھر کے ایئر پورٹس پر پرچم کشائی کی تقاریب منعقد کی گئیں، عمارتوں پر قومی پرچم لہرائے گئے، پی آئی اے کی پروازوں میں مسافروں کو پرچم تقسیم کیے گئے۔تفصیلات کے مطابق سول ایوی ایشن اتھارٹی کی جانب سے ملک بھر کے تمام ایئرپورٹس پر یوم آزادی کے سلسلے میں پرچم کشائی کی تقاریب کا انعقاد کیا گیا، کراچی، لاہور، پشاور، اور کوئٹہ ایئرپورٹ پر تقریبات میں ایئرپورٹ منیجرز نے پرچم کشائی کی۔

ذرائع کے مطابق پاکستان کے ایئرپورٹس پر کشمیری عوام کے ساتھ بھرپور اظہار یکجہتی کیا گیا، مختلف ایئرپورٹس پر قومی اور کشمیری پرچم لہرائے گئے، لاہور ائر پورٹ پر فلائٹ سروس ڈپارٹمنٹ میں جشن آزادی کی تقریب کا کیک بھی کاٹا گیا۔دوسری جانب پی آئی اے ہیڈ آفس اور لاہور سیمت دیگر اسٹیشنز پر جشن آزادی اور یوم یکجہتی کشمیر کی تقریبات کا انعقاد کیا گیا اطہر اعوان مینیجر تعلقات عامہ اور ڈسٹرکٹ اسکاؤٹ عبدالرؤف پی آئی اے ٹاؤن آفس میں پرچم کشائی کی گئی۔

یاد رہےکہ اس مرتبہ جشن آزادی اور یوم یکجہتی کشمیر صرف زمین پر ہی نہیں فضاؤں میں بھی جوش و خروش سے منایا گیا، پی آئی اے کی جانب سے اندرون و بیرون ملک جانے والی پروازوں میں مسافروں میں جشن آزادی کے حوالے سے قومی پرچم تقسیم کیے گئے۔اسلام آباد سے کراچی آنے والی پی آئی کی پرواز میں مسافروں نے جشن آزادی کے ساتھ ساتھ کشمیریوں کے ساتھ یکجہتی بھی کی، فضا پاکستان زندہ آباد اور کشمیر بنے گا پاکستان کے نعروں سے گونج اٹھی۔

ننکانہ صاحب : پاکستان میں آباد اقلیتوں نے بھی بھرپور انداز سے آج یوم آزادی مناکر وطن عزیز سے اپنا پیار،محبت اور اس وطن کے لیے قربانیوں کا اعادہ کرکے بھارت کو پریشان کردیا ہے. اطلاعات کے مطابق آج ملک بھر میں سکھوں کی طرف سے چاروں صوبوں سمیت آزاد کشمیر میں بھی یوم آزادی کی رنگا رنگ تقریبات ہوئیں. سکھ کمیونٹی کی طرف سے سب سے بڑی تقریب ننکانہ صاحب میں ہوئی

ننکانہ صاحب میں ہونے والی یوم پاکستان کی اس تقریب میں سکھ کمیوٹنی کے تمام افراد نے شرکت کی ، اس موقع پر سکھ بچوں ، جوانوں اور بوڑھوں نے پاکستان کے سبز ہلالی پرچم سے بنے ہوئے لباس پہن کر ملک پاکستان سے اپنی والہانہ محبت کا اظہار کیا ہے. سکھ جوان پاکستان کے ملی ترانے پڑھ پڑھ کر اجتماع کو گرماتے رہے ، یہ بھی معلوم ہوا ہےکہ سکھوں نے بھارت کو یہ پیغام دیا ہے کہ وہ پاکستان کی طرف اٹھنے والی ہر انگلی کاٹ دیں گے اور بری نظر سے دیکھنے والوں کی آنکھیں پھوڑ دیں گے.

یاد رہے کہ حسب سابق ہر سال سکھ کمیونٹی پاکستان کے یوم آزادی کے موقع پر بڑے جوش وجزبے سے یہ دن مناتےہیں اور پاکستان سے اپنی محبت اور وفا کا اظہار کرتے ہیں. ننکانہ صاحب میں آج ہونے والی تقریب میں سکھوں نے یہ نعرے لگا کردلوں کو گرما دیا کہ پاکستان زندہ باد ، کشمیر بنے گا پاکستان .

پشاور:یوم آزادی کے موقع پر پاکستان بھر میں جہاں تمام پاکستانی بڑے جوش وخروش سے خوشیاں منا رہے ہیں وہاں خیبر پختون خوا کے ٹاؤن لنڈی کوتل میں دنیا کے سب سے بڑے اور طویل قومی پرچم کی رونمائی کی گئی ہے۔تفصیلات کے مطابق پاکستان کے یوم آزادی پر کے پی کے علاقے لنڈی کوتل میں طویل ترین قومی پرچم تیار کیا گیا، لوگوں کی ایک کثیر تعداد نے پرچم کو سروں پر بلند کر کے مارچ کیا۔

تفصیلات کے مطابق یہ قومی پرچم 3 ہزار 600 فٹ طویل ہے،جب کہ اس کی چوڑائی 34 فٹ اور وزن 24 من ہے۔اس طویل ترین قومی پرچم کی تیاری پر 9 لاکھ روپے لاگت آئی ہے، جھنڈے کو خیبر سے میچنی پوسٹ تک لے جانے کے لیے ایک ہزار رضاکاروں نے حصہ لیا۔رضا کاروں کا تعلق اسکولوں اور کالجز سے تھا، طلبہ کے ساتھ مقامی افراد نے بھی اس میں حصہ لیا، یہ پرچم مقامی شہری نے تیار کرایا۔