Author: +9251

ماسکو (اے پی پی) روس میں راکٹ تجربے کے دوران پراسرار دھماکے سے 5 ملازمین ہلاک ہوگئے.

تفصیلات کے مطابق روس کی جوہری ایجنسی روس ایٹم نے تصدیق کی ہے کہ اس کے5 ملازمین ایک راکٹ تجربے کے دوران ہونے والے پراسرار دھماکے میں حادثاتی طور پر ہلاک ہو گئے ہیں۔ ایجنسی کے مطابق اس کے تین دیگر ملازمین کو جھلسنے سمیت مختلف نوعیت کے زخم آئے ہیں۔ یہ دھماکا شمالی روس میں واقع ایک فوجی تنصیبات کے علاقے آرچان گیلسک کے مقام پر ہوا۔ روسی نیوز ایجنسی ریا نے جوہری ایجنسی کے توسط سے بتایا کہ دھماکا ایک راکٹ انجن میں رکھے سیال مادے میں ہوا۔ روسی حکام نے اس دھماکے میں ہونے والی ہلاکتوں کی تعداد ابتدا میں صرف 2 بتائی تھی۔

غزہ (اے پی پی) اسرائیلی فوج کی بربریت سےچار فلسطینی شہید ہوگئے.

تفصیلات کے مطابق اسرائیلی فوج نے غزہ پٹی کی سرحد کے نزدیک ایک فوجی کارروائی میں 4 فلسطینی شہید کر دیے ۔ غزہ پٹی اور اسرائیل کی سرحد پر اسرائیلی فورسز اور فلسطینی مظاہرین کے درمیان تصادم اور اسرائیلی جارحیت اب معمول ہے۔ یہ پہلا موقع نہیں جب اسرائیلی فوج نے فلسطینیوں‌ پر قیامت ڈھائی ہو، بلکہ تاریخ ایسے واقعات سے بڑھی ہوئی ہے. لیکن فلسطین کے لوگ اپنی آزادی کی جنگ لڑ رہے ہیں. وہ اسرائیلی فوج کے سامنے کبھی نہیں جھکے. دوسری جانب دنیا کا کوئی ایسا مہزب ملک نہیں جو فلسطین کیلئے آواز اٹھاتا ہو.

بیجنگ (اے پی پی) چین کی کمپنی ہواوے نے صوبہ گوانگ دونگ کے شہر دونگ گوان میں خودتخلیق کردہ آپریٹنگ سسٹم ہونگ منگ ( ہارمونی آپریٹنگ سسٹم )کو باقاعدہ طور پر لانچ کر دیا ہے۔

تفصیلات کے مطابق مذکورہ اعلان ہوا وے کمپنی نے اپنی ڈیویلپر کانفرنس کے موقع پر کیا۔ ہوا وے کے صارفین کے امور کے نگران سی ای او یو چنگ دونگ نے کہا کہ ہونگ منگ سسٹم کو اپنی ضروریات کے مطابق وسعت دی جا سکتی ہے جو مزید محفوظ ہوگا. یہ زیادہ تر انٹرنیٹ آف تھنگز ( آئی او ٹی) کے لیے استعمال کیا جائے گا۔ اس آپریٹنگ سسٹم کی اہم خوبی یہ ہے کہ یہ زیادہ تیز رفتار ہے۔ یہ آپریٹنگ سسٹم ردعمل کے اظہار میں خرچ ہونے والے وقت کو کم کردے گا۔

تین روزہ کانفرنس ہوا وے کمپنی کی تاریخ میں سب سے بڑی کانفرنس ہے جس میں پانچ ہزار ٹیکنالوجی ڈیولپرز شرکت کر رہے ہیں۔ اس تین روزہ کانفرنس میں ٹرمینل کی صنعت اور فائیو جی ٹیکنالوجی پر بحث کی جا ئے گی۔

اقوام متحدہ (اے پی پی) اقوام متحدہ کے ایک پینل نے کہا ہے کہ موسمیاتی تبدیلیوں کے باعث خوراک کی فراہمی متاثرہو سکتی ہے جس کی وجہ سے غذائی اشیا کی قیمتوں میں اضافے کا امکان ہے۔

تفصیلات کے مطابق موسمیاتی تبدیلیوں پر اقوام متحدہ کے بین الحکومتی پینل آئی پی سی سی کے عمومی اجلاس میں منظور کردہ رپورٹ میں یہ انتباہ کیا گیا ہے۔ جنیوا میں تین روز جاری رہنے والے اس اجلاس میں 52 ملکوں سے ایک سو سے زائد سائنسدانوں نے شرکت کی۔ عالمی حدت زمینی علاقوں کو متاثر کرے گی، اس حوالے سے آئی پی سی سی نے پہلی جامع رپورٹ پیش کی ہے۔ رپورٹ میں نشاندہی کی گئی ہے کہ صنعتی دور سے پہلے کا سطح زمین کا درجہ حرارت اوسط عالمی درجہ حرارت سے تقریباً دو گنا تک بڑھا ہے۔عالمی حدت کی وجہ سے بیشتر خطوں میں گرمی کی لہر سمیت گرمی سے متعلقہ مظاہر کی تعداد، شدت اور دورانیہ بڑھا ہے۔ انہوں نے اس حوالے سے درمیانے درجے کے یقین کا اظہار کیا کہ بحیرہ روم، مغربی افریقا اور جنوبی امریکا کے بیشتر حصوں اور دیگر علاقوں میں خشک سالی کے واقعات اور ان کی شدت بڑھی ہے۔ عالمی پیمانے پر موسلا دھار بارشوں کی شدت بڑھنے کے حوالے سے بھی انہوں نے درمیانے درجے کے اعتماد کا اظہار کیا ہے۔

آئی پی سی سی کا تخمینہ ہے کہ شدید موسمی حالات کے باعث خوراک کی مستحکم فراہمی کم ہو جائے گی۔ ادارے کا کہنا ہے کہ اگر 21 ویں صدی کے اختتام تک عالمی آبادی 9 بلین ہو گئی تو 2050ء میں اناج کی قیمت 23 فیصد تک بڑھ جائے گی۔