Author: +9251

جموں‌کشمیر لبریشن فرنٹ کے چیئرمین محمد یٰسین ملک کی اہلیہ مشعال ملک نے کہا ہے کہ ڈاکٹرز کا کہنا ہے یاسین ملک سے متعلق کوئی معلومات نہیں مل رہیں،

باغی ٹی وی کی رپورٹ کے مطابق انہوں نے کہاکہ یاسین ملک کےبارے میں بھی خطرناک قسم کی افواہیں سامنےآرہی ہیں، میرا دل کہتا ہے یاسین ملک زندہ ہیں، یاسین ملک کی بہن کاکہنا ہےکہ انکی طبیعت اتنی خراب ہےوہ کھڑےبھی نہیں ہوسکتے،

مشعال ملک نے کہاکہ مقبوضہ کشمیر کی صوتحال سے عالمی برادری کو آگاہ رکھنا چاہیے، میں پاکستان سے اپیل کرتی ہوں وہ یاسین ملک کے مسئلے کو اٹھائے، یاسین ملک کی زندگی اور موت کا مسئلہ ہے،ان کو اسپتال منتقل کیا جائے، واضح رہے کہ یٰسین ملک کی تہاڑ جیل میں‌ طبیعت سخت خراب ہے اور سوشل میڈیا پر ان کے حوالہ سے طرح طرح کی خبریں پھیل رہی ہیں‌ تاہم بھارتی حکومت ابھی تک اس حوالہ سے کچھ بھی نہیں‌ بتا رہی ہے،

بھارتی وزیر داخلہ امیت شاہ کی زیر صدارت اعلیٰ سطحی اجلاس ہوا ہے جس میں وزارت داخلہ کے اعلیٰ افسران، خفیہ ایجنسی کے عہدیداران سمیت دیگر اعلیٰ حکام نے شرکت کی، اس موقع پر بھارتی قومی سلامتی کے مشیر اجیت دوول بھی موجود تھے،

باغی ٹی وی کی رپورٹ کے مطابق اجلاس میں کشمیر کی تازہ ترین صورتحال پر تفصیل سے تبادلہ خیال کیا گیا، اجلاس میں یہ فیصلہ بھی کیا گیا ہے کہ امیت شاہ اگلے ہفتہ مقبوضہ کشمیر جائیں گے جہاں وہ پہلے جموں‌ جاکر ہندوانتہاپسند تنظیموں‌کے عہدیداران، فوجی کمانڈروں اور ریاستی گورنر سے ملیں گے، اسی طرح وہ وادی کشمیر بھی جائیں گے تاہم اس سے قبل بھارتی پارلیمنٹ کے سیشن میں جموں کشمیر کی خصوصی حیثیت والی دفعات ختم کرنے کا بل پیش کئے جانے کی بھی اطلاعات ہیں جس پر ہونے والے احتجاج کے پیش نظر کشمیر میں اضافی فوج پہنچائی گئی ہے اور کشمیری قیادت کو نظربند یا جیلوں میں ڈال دیا گیا ہے،

رپورٹ کے مطابق امیت شاہ کی زیر صدارت اجلاس میں کشمیریوں کے احتجاج سے نمٹنے پر بھی تفصیل سے غوروفکر کیا گیا، واضح رہے کہ دو دن پہلے ہی حکومت نے ایڈوائزری جاری کرکے امرناتھ یاتریوں اور سیاحوں کو جموں‌کشمیر سے نکل جانے کی ہدایات جاری کی ہیں، امرناتھ یاتریوں کے بیس کیمپ سے بھی یاتریوں کو جانے کیلئے کہہ دیا گیا ہے،

یاتریوں اور سیاحوں کو واپس بلانے سے متعلق حکومت کی ایڈوائزری سے جموں و کشمیر کے عوام میں‌ خوف و ہراس کی کیفیت ہے اور وہ اس بات کا اندیشہ ظاہر کررہے کہ مودی حکومت آرٹیکل 35 اے کو ختم کرنے کا منصوبہ بنارہی ہے ۔ آرٹیکل 35 اے سرکاری نوکریوں اور زمین کے معاملات میں ریاست کے باشندوں کے خصوصی اختیارات دیتا ہے،

حریت کانفرنس گ جموں‌ کشمیر کے چیئرمین اور بزرگ کشمیری قائد سید علی گیلانی نے ایک بار پھر مقبوضہ کشمیر میں جاری بھارتی سازشوں‌ کو بے نقاب کرتے ہوئے کہا ہے کہ مودی حکومت خصوصی حیثیت والی دفعات 370 اور 35 اے ختم کر کے یہاں‌ آبادی کا تناسب تبدیل کرنے کی گھناؤنی اور مکروہ سازشیں کر رہی ہے،

باغی ٹی وی کی رپورٹ کے مطابق بزرگ کشمیری قائد نے کہا کہ بھارت سرکار کی جانب سے ایسی کسی بھی مہم جوئی کی پوری طاقت سے مزاحمت کی جائے گی، خصوصی دفعات کو کھوکھلا اور بے اثر کرنے کے اصل ذمہ دار اور مجرم یہاں کے ہندنواز سیاستدان ہیں جنہوں نے جاہ وحشمت کی لالچ میں اِن کی روح کو ختم کرکے رکھ دیا تاکہ اُن کے آقاؤں کے خاکوں میں رنگ بھر کر وہ اپنی وفاؤں کا صلہ حاصل کرتے رہیں،

بزرگ کشمیری قائد نے کہاکہ لینڈ گرانٹس بل کے مطابق غیر ریاستی لوگوں کو 90سال کے لیے زمین دینے کا قانون انہی شعبدہ بازوں نے بنایا، اُن کی بکاؤ قیادت نے علی الاعلان کہہ دیا کہ 370کوئی قرآنی آیت تو نہیں جس کو تبدیل نہیں کیا جاسکتا اور اگر یہ رکاوٹ ختم ہوگی تو ریاست کی ترقی اور خوشحالی کے دروازے کھل جائیں گے، آج یہی لوگ خصوصی پوزیشن کے بچاؤ کے لیے مگرمچھ کے آنسو بہاتے ہیں،

سید علی گیلانی نے کہاکہ مرکزی حکومت کو سرزمین کشمیر پر للکارنے کا ڈرامہ رچانے والوں کی لگام تھوڑی سی کیا کَسی گئی کہ پوراخاندان بشمول قانونی ضمیر فروش دہلی کے ’’آستانہ‘‘ پر سجدہ ریز ہوگئے ہیں، واضح رہے کہ کشمیر میں حالات اس وقت انتہائی خراب ہیں اور سید علی گیلانی نے امت مسلمہ کو پیغام دیا ہے کہ بھارت کشمیر میں تاریخ کا سب سے بڑا قتل عام کرنے جارہا ہے اگر کشمیریوں‌ کا قتل جاری رہا اور آپ سوئے رہے تو کل قیامت کو اس کا حساب دینا پڑے گا،