Author: +9251

امریکی صدر ڈونلڈ ٹرمپ کے مقبوضہ کشمیر پر ثالثی کے بیان پر بھارت کا غصہ کم نہ ہوا اور اس نے 30 جدید ترین ڈرونز خریدنے کے فیصلے پر نظرثانی کا فیصلہ کرلیا۔

تفصیلات کے مطابق بھارتی اخبار کی رپورٹ کے مطابق جدید ترین ڈرونز کی قیمت چھ ارب ڈالر تک ہے اور یہ فرانسیسی رافیل طیاروں سے بھی زیادہ مہنگے ہیں۔

رپورٹ میں بتایا گیا کہ اسی ڈرون کو 20 جون کو ایران نے خلیج فارس میں مار گرایا تھا جبکہ پاکستان ان سے نمٹنے کی مکمل صلاحیت رکھتا ہے۔رپورٹ میں مزید کہا گیا کہ مگ 21 کی تباہی کے بعد بھارتی فضائیہ کی توجہ لانگ رینج میزائل خریدنے پر ہے۔

یاد رہے کہ وزیراعظم کے دورہ امریکہ کے دوران صدر ڈونلڈ ٹرمپ نے مسئلہ کشمیر پر پاکستان اور بھارت کے درمیان ثالثی کی پیش کش کی تھی اور کہا تھا کہ بھارتی وزیراعظم مودی نے ان سے ثالثی کرنے کا کہا ہے۔

صدر ٹرمپ کے اس انکشاف پر بھارتی ایوانوں میں زلزلہ پیدا ہو گیا اور وزیرخارجہ نے کسی بھی قسم کی ثالثی کی بات کی تردید کر دی، تاہم بھارتی حکومت ابھی تک دباؤ میں ہے۔

امریکہ کے بعد چین کی جانب سے ثالثی کی پیشکش کی گئی جسے بھارت کے لیے ایک اور سفارتی دھچکہ قرار دیا جا رہا ہے۔

شمالی عراق کےخرقوک علاقے میں جاری پنجہ آپریشن میں بے بس کیے جانے والے دہشت گردوں کی تعداد 72 ہو گئی ہے۔

تفصیلات کے مطابق ترک وزارت دفاع کی جانب سے جاری کردہ اعلان میں واضح کیا گیا ہے کہ حالیہ کاروائیوں میں PKK کے 72 کارکنان کو ہلاک کر دیا گیا ہے۔

پنجہ آپریشن کے ما تحت شمالی عراق کا علاقے متینہ میں فضائی کاروائی میں 4 دہشت گرد ہلاک ہو گئے، اس دوران ان کی پناہ گاہوں اور اسلحہ کو بھی تباہ کر دیا گیا۔

دفتر داخلہ کی جانب سے جاری کردہ بیان میں بتایا گیا ہے کہ ترکی کے ضلع بطلس کی تحصیل تاتوان کے نواحی علاقوں میں فضائی تعاون کے حامل آپریشن میں تین مسلح دہشت گرد مارے گئے، جبکہ علاقے میں کاروائی جاری ہے۔

انسانی حقوق کی بین الاقوامی تنظیم ہیومن رائٹس واچ کے مطابق ترکی کے حکام شامی پناہ گزینوں کو حراست میں لے کر ان سے "رضاکارانہ واپسی” کے فارم پر دستخط کروا رہے ہیں۔ اس کے بعد انہیں جبری طور پر شمالی شام واپس بھیجا جا رہا جو اس وقت جنگ کا علاقہ ہے۔

تفصیلات کے مطابق استنبول کے گورنر کے دفتر نے شامی پناہ گزینوں کو 20 اگست بروز پیر تک کی مہلت دی ہے تا کہ وہ ترکی کے ان صوبوں میں واپس لوٹ جائیں جہاں ترکی آمد پر ان کی رجسٹریشن کی گئی تھی۔ بصورت دیگر ان پناہ گزینوں کو شام کے علاقوں میں جبری واپسی کا سامنا کرنا ہو گا۔

دوسری جانب استنبول میں شامی شہریوں اور پناہ گزینوں کا دفاع کرنے والوں نے باور کرایا ہے کہ شامی پناہ گزینوں کو نہ صرف ان کی رجسٹریشن کے صوبوں میں بھیجا گیا بلکہ ان میں بعض کو شام کے صوبے اِدلب کی سمت بے دخل کیا گیا ہے۔ یہ شام میں اپوزیشن کے زیر کنٹرول آخری مرکزی علاقہ ہے۔ یہاں کے لوگوں کو اس وقت بشار حکومت کی جانب سے حملوں کا نشانہ بنایا جا رہا ہے تا کہ وہاں مسلح اپوزیشن پر قابو پایا جا سکے۔

اقوام متحدہ نے جمعے کی شام بتایا کہ گذشتہ دس روز میں شامی حکومت اور اس کے حلیفوں کی جانب سے کیے جانے والے فضائی حملوں میں کم از کم 103 شہری جاں بحق ہوئے جن میں 26 بچے شامل ہیں۔

ایرانی جوہری معاہدے پر دستخط کرنے والے ممالک 2015 میں طے پانے والے اس سمجھوتے کو بچانے کی کوشش میں آج ویانا میں اکٹھا ہو رہے ہیں۔

تفصیلات کے مطابق آج کے اس اجلاس میں کسی پیش رفت کی توقع نہیں کی جا رہی ہے۔ یہ اجلاس آسٹریا کے دارالحکومت ویانا میں ہونے والے سابقہ اجلاس کے ایک ماہ بعد منعقد کیا جا رہا ہے جو ثمر آور ثابت نہیں ہوا تھا۔

تہران اور واشنگٹن کے درمیان کشیدگی کی شدت میں اضافہ مئی 2018 میں جوہری معاہدے سے امریکی علاحدگی کے نتیجے میں ہوا۔ اس اقدام کے بعد واشنگٹن نے ایران پر دوبارہ سے کڑی پابندیاں عائد کر دیں جنہوں نے ایرانی معیشت کی کمر توڑ دی۔

جوہری معاہدے میں شامل رہنے کے لیے ایران کا یورپی ممالک بالخصوص جوہری معاہدے پر دستخط کرنے والے ملکوں (برطانیہ، جرمنی اور فرانس) سے اصرار ہے کہ وہ ایسے اقدامات کریں، جن سے امریکی پابندیوں کو چکمہ دیا جا سکے۔

امریکی پابندیوں کا جواب دینے اور یورپی ممالک کو متحرک کرنے کے لیے ایران نے جوہری معاہدے کے حوالے سے اپنی بعض پاسداریوں کو تسلیم کرنے سے انکار کرنا شروع کر دیا ہے۔

ایران اب افزودہ یورینیم کی 300 کلو گرام کی مقررہ حد اور یورینیم کی افزودگی کے 3.67 % کے مقررہ تناسب سے تجاوز کر رہا ہے۔ اسی طرح تہران نے دھمکی دی ہے کہ اگر اس کے مطالبات پورے نہ کیے گئے تو وہ عدم پاسداری کے سلسلے میں ستمبر کے آغاز پر اضافی اقدامات کرے گا۔ تاہم جوہری معاہدے کے یورپی شراکت داروں کی جانب سے ایران پر مسلسل زور دیا جا رہا ہے کہ وہ سمجھوتے کا پابند رہے۔