Author: +9251

بھارتی نیوی نے اپنے دو بحری جہاز خلیج عمان میں بھیجنے کا فیصلہ کیا ہے.

باغی ٹی وی کی رپورٹ کے مطابق یہ فیصلہ آبنائے ہرمز میں‌ تیل بردار جہازوں پر ان حملوں کے بعد کیا گیا ہے جس کا الزام ایران پر لگایا تاہم ایران نے اس کی تردید کی ہے. بھارتی حکومت کی طرف سے کہا گیا ہے کہ اس نے بحری جہاز بھیجنے کا فیصلہ اپنے آپریشنز کو محفوظ بنانے کیلئے کیا ہے.

انڈیا نے بھارتی بحری جہازوں‌ کی سکیورٹی کیلئے وار ہیڈز بھی لگائے گئے ہیں. ایران امریکہ کشیدگی اور ایران کی طرف سے امریکہ کا ڈرون طیارہ گرائے جانے کی خبروں پر بھارتی حکومت کی طرف سے یہ فیصلہ کرنے کی اطلاعات ہیں.

بھارت میں‌ سابق آئی پی ایس افسر سنجیو بھٹ کو گجرات میں جام نگر سیشن کورٹ نے عمر قید کی سزا سنائی ہے۔ انہیں‌ سال 1990 کے دوران ایک شخص کے حراست میں موت کے معاملہ میں مجرم قرار دیا گیا ہے۔

باغی ٹی وی کی رپورٹ کے مطابق ہندوستانی مسلمانوں‌ اور اپوزیشن جماعتوں‌ نے اس فیصلہ پر سخت تنقید کرتے ہوئے کہا ہے کہ فسادات کے اصل ملزم اقتدار میں مودی کے ساتھ موجود ہیں‌اور بے گناہ لوگوں‌ کو سزائیں سنائی جارہی ہیں. گجرات فسادات کے وقت سنجیو بھٹ جام نگر میں اسسٹنٹ سپرنٹنڈنٹ آف پولیس تھے۔

نومبر 1990 میں پربھوداس مادھوجی ویشنانی نامی ایک شخص کی مبینہ طور پر حراست کے دوران ٹارچر کی وجہ سے موت ہو گئی تھی۔
سنجیو بھٹ گجرات فسادات کے وقت جام نگر میں اسسٹنٹ سپرنٹنڈنٹ آف پولیس تھے، جنہوں نے دوسرے افسروں کے ساتھ مل‌ کر فساد کرنے کے معاملے میں 133 لوگوں کو حراست میں لیا تھا۔ ان میں سے ایک شخص پربھوداس مادھوجی ویشنانی تھا جسے 9 دن تک پولیس حراست میں رکھا گیا تھا تاہم ضمانت پر رہا ہونے کے بعد دسویں دن اس کی موت ہو گئی تھی۔ میڈیکل ریکارڈ کے مطابق، گردہ فیل ہو جانے کی وجہ سے اسکی موت ہوئی تھی لیکن اب اسی کیس میں‌ سنجیو بھٹ کو عمر قید کی سز ا سنا دی گئی ہے.

پربھوداس کے مرنے کے بعد سنجیو بھٹ اور دیگر افسروں کے خلاف حراست میں ٹارچر کرنے کے الزام میں مقدمہ درج کیا گیا تھا۔ سال 2011 تک اس معاملے میں کوئی کارروائی نہیں ہوئی کیونکہ گجرات ہائی کورٹ نے اس پر روک لگا دی تھی۔بعد میں روک ہٹا دی گئی اور کارروائی آگے بڑھائی گئی۔ فی الحال سنجیو بھٹ سال 1996 میں مبینہ طور پر نشیلی اشیاء رکھنے کے الزامات کے تحت جیل میں ہیں۔ پچھلے مہینے سپریم کورٹ آف انڈیا نے اس معاملے میں دائر کی گئی ضمانت درخواست خارج کر دی تھی۔

واضح رہے کہ سنجیو بھٹ کو 2015 میں بھارتی حکومت نے ان کے عہدے سے برخواست کر دیا تھا. انہیں‌ بی جے پی مخالف افسر سمجھا جاتا تھا اور گودھرا فسادات سمیت کئی مواقع پر ان کا بی جے پی سے ٹکراؤ ہوا . حالیہ دنوں میں چونکہ بھارت میں‌ بی جے پی کی حکومت ہے اس لئے بھارتی مسلمانوں‌ اور انصاف پسند حلقوں‌ کا کہنا ہے کہ ان کے خلاف کاروئی کی جارہی ہے. سنجیو بھٹ ہندوستانی وزیر اعظم نریندر مودی کے بھی سخت مخالف سمجھے جاتے ہیں.

روس کے صدر ولادی میر پوٹن نے خبردار کیا ہے کہ امریکی کی طرف سے ایران کے خلاف طاقت کا استعمال تباہ کن ہوگا۔

باغی ٹی وی کی رپورٹ‌ کے مطابق یہ بات انہوں نے آج سرکاری ٹی وی پر روسی ناظرین کے سوالات کے جواب دیتے ہوئے کی ہے. ان کا کہنا تھا کہ امریکہ یہ کہتا ہے کہ اس نے طاقت کے استعمال کو مسترد نہیں کیا ہے مگر میں‌ سمجھتاہوں کہ اس سے پورے خطے میں تباہی آئے گی.

روسی صدر کی جانب سے یہ بیان ایران امریکہ جاری کشیدگی کے تناظر میں دیا گیا ہے. امریکہ نے ایران سے کسی ممکنہ جنگی خطرے کے پیش نظر پہلے اپنا ایک طیارہ بردار بحری جہاز مشرقِ اوسط میں بھیجا تھا اور ایک ہزار فوجی تعینات کیے تھے۔ اب اس نے حال ہی میں مزید ایک ہزار فوجی بھیجنے کا ا علان کیا ہے۔ امریکی وزیر خارجہ مائیک پومپیو نے دو روز قبل کہا تھا کہ امریکی فوجیوں کی تعیناتی سے ایران کو یہ پتا چل جانا چاہیے کہ ہم سنجیدہ ہیں اور اس کی خطے میں مزید جارحیت کا سدباب کریں گے۔

واضح رہے کہ ایران نے آبنائے ہرمز میں‌ امریکی ڈرون بھی مار گرایا ہے جس سے امریکہ ایران کشیدگی میں مزید اضافہ ہو گیا ہے جبکہ ٹرمپ نے دھمکی آمیز لہجے میں‌ یہ بھی کہا ہے کہ ایران نے ایسا کر کے بہت بڑی غلطی کی ہے.

اقوام متحدہ نے حکومت پاکستان کی سفارتی کوششوں‌ پر وطن عزیز پاکستان کو فیملی سٹیشن ڈکلیئر کر دیا ہے جسے حکومت کی سفارتی کامیابی قرار دیا جارہا ہے.

باغی ٹی وی کی رپورٹ کے مطابق اقوام متحدہ کی طرف سے پاکستان میں سکیورٹی کے حالات بہتر ہونے پر یہ فیصلہ کیا گیا ہے. کہا جارہا ہے کہ اس فیصلے کے اثرات دوسری عالمی تنظیموں پر بھی مرتب ہوں گے جس کے باعث نہ صرف پاکستان کی عالمی ریٹنگ میں بہتری آئے گی بلکہ غیر ملکی سرمایہ کاری کی راہ بھی ہموار ہوگی۔

یہ فیصلہ اقوام متحدہ کے ادارہ برائے سیفٹی و سیکیورٹی کی سفارشات کی روشنی میں کیا گیا ہے اور اسے پاکستان کی عالمی سطح‌پر بڑی سفارتی کامیابی کہاجارہا ہے.