Author: +9251

بغداد:تمباکو نوشی سے ہر بیس منٹ بعد ایک شہری ہلاک ہونے لگا. صورت حال کا مزید بگڑنے کا اندیشہ عراق میں وزارت صحت کے زیر انتظام انسداد تمباکو نوشی پروگرام کے رکن وسیم کیلان نے کہا ہے کہ ملک میں تمباکو نوشی کے نتیجے میں ہر 20 منٹ میں ایک شخص کی موت واقع ہو رہی ہے۔ عراق بیرون ملک سے تمباکو مصنوعات کی خریداری پر یومیہ دو ارب دینار یعنی 16 لاکھ 50 ہزار ڈالر کی رقم صرف کر رہا ہے۔ان کا کہنا ہے کہ طبی معائنے کے عمل سے گزارے جانے والےافراد میں بچے بھی شامل ہیں جو سانس کی بیماریوں کا شکار ہیں۔ ان میں بعض پانچ سال کے بچے ہیں۔

عراقی سیکرٹری صحت جاسم الفلاحی کا کہنا ہے کہ ملک میں تمباکو نوشی کے حوالے سے سامنے آنے والے اعداد و شمارکے مطابق بچوں‌ کے تمباکو نوشی میں‌ ملوث ہونے کی تحقیقات کی جا رہی ہیں۔الفلاحی کا کہنا ہے کہ وہ عراق میں تمباکو نوشی کی کاشت روکنے کی سفارش کریں‌ گے۔ تمباکو کے بجائے کھیتوں میں متبادل فصلیں کاشت کی جا سکتی ہیں۔ اس کے علاوہ تمباکو کی تیاری، اس کی خریدو فروخت اور ترویج کرنے والوں کی حوصلہ شکنی کی جاسکتی ہے۔عالمی ادارہ صحت کے مطابق تمباکو نوشی سے ہر سال 60 لاکھ سے زاید افراد لقمہ اجل بن جاتے ہیں۔

مقبوضہ بیت القدس:اسرائیلی فوج نشے میں لت پت،نشئی فوجیوں کی تعداد میں غیر معمولی اضافہ .اسرائیلی حکومت پریشان .اسرائیل میں عبرانی ذرائع ابلاغ کے مطابق صہیونی فوج میں نشے کی عادت کے شکار افراد کی تعداد میں مسلسل اور غیر معمولی اضافہ ہو رہا ہے۔

عبرانی ٹی وی چینل 24 کے مطابق فوج میں‌ نشے کے بڑھتے رحجان کے بعد آرمی چیف جنرل آویف کوحاوی نے نشے کی لت کی روک تھام کے لیے ایک کمیشن قائم کیا ہے جو فوج میں نشے کے بڑھتے رحجان کے اسباب کے تعین کے ساتھ ساتھ اس کی روک تھام کے لیے بھی لائحہ عمل طے کرے گی۔

ٹی وی چینل کی رپورٹ کے مطابق تحقیقاتی کمیٹی نے فوج میں منشیات کے پھیلائو کی روک تھام کے لیے تادیبی کارروائی کی سفارش کی ہے۔رپورٹ کے مطابق اسرائیلی حکومت اور دفاعی حکام یہودی فوجیوں کے بڑی تعداد میں نشئی ہونے پر بہت پریشان ہے اور اس بات کا خدشہ ظاہر کیا ہے کہ اگر فوجیوں کو منشیات کے استعمال سے نہ روکا گیا تو اس سے اسرائیل کی دفاعی صلاحیت کو بہت نقصان ہو سکتا ہے .

مقبوضہ بیت المقدس :امریکہ اور اسرائیل کی فلسطینیوں اور عربوں کے خلاف مشترکہ جدوجہد ڈونلڈ کو نیتن یاہو کا خراج عقیدت .ڈونلڈ ٹرمپ کے نام کی کالونی قائم کردی .اسرائیلی وزیراعظم بنیامین نیتن یاہو نے مقبوضہ گولان کی چوٹیوں پر یہودی آباد کاروں کو بسانے کے لیے ایک نئی بستی کی تعمیر کا افتتاح کر دیا ہے۔ اسرائیل کے زیر قبضہ شام کے اس علاقے میں امریکی صدر ڈونلڈ ٹرمپ کے نام پر یہ ’سیٹلمنٹ‘ تعمیر کی جارہی ہے اس کا نام ان ہی کے نام پر ٹرمپ ہائٹس ( ٹرمپ رامات) رکھا گیا ہے۔

اسرائیلی وزیراعظم نیتن یاہو نے اتوار کو "ٹرمپ ہائٹس” کے منصوبے کی تختی کی نقاب کشائی کی ہے۔ واضح رہے کہ امریکی صدر ڈونلڈ ٹرمپ نے مارچ کے آخر میں گولان کی چوٹیوں پر اسرائیل کی خود مختاری تسلیم کرنے کا اعلان کیا تھا اور اس سے متعلق ایک حکم پر دستخط کیے تھے ۔اس موقع پر وائٹ ہاؤس میں منعقدہ تقریب میں اسرائیلی وزیراعظم بنیامین نیتن یاہو اور دوسرے اعلیٰ امریکی اور اسرائیلی عہدے دار بھی موجود تھے۔اس موقع پر صدر ٹرمپ نے کہا تھا کہ "گولان پر اسرائیلی خود مختاری کو مکمل طور پر تسلیم کرنے کا اب وقت آگیا ہے۔” نیتن یاہو گذشتہ کئی ماہ سے امریکی صدر پر گولان کی چوٹیوں پر اسرائیل کی خود مختاری تسلیم کرنے کے لیے زور دے رہے تھے۔ صدر ٹرمپ نے اس سے پہلے ایک ٹویٹ میں کہا تھا کہ گولان کی چوٹیوں پر اسرائیل کے باون سال سے کنٹرول کے بعد اب امریکا کو کوئی اقدام کرنا چاہیے اوراس کی اس علاقے پر خود مختاری تسلیم کر لینی چاہیے۔

یاد رہے کہ اسرائیل نے شام کے اس علاقے پر 1967ء کی مشرقِ اوسط کی چھے روزہ جنگ کے دوران میں قبضہ کیا تھا اور 1980ء کے اوائل میں اس کو غاصبانہ طور پر صہیونی ریاست میں ضم کر لیا تھا مگر اقوام متحدہ سمیت عالمی برادری نے اس کے اس اقدام کو کبھی تسلیم نہیں کیا اور امریکا کے سوا دنیا کے تمام ممالک گولان کو ایک مقبوضہ علاقہ ہی سمجھتے ہیں۔