Author: Aqsa Younas Rana

پاکستان اور بنگلادیش کے تعلقات میں ایک اہم پیش رفت سامنے آئی ہے، جہاں 14 سال کے طویل وقفے کے بعد دونوں ممالک کے درمیان براہ راست فضائی رابطہ بحال کر دیا گیا ہے۔
‎بنگلادیش ایئرلائن کی پہلی پرواز آج ڈھاکا سے کراچی کے جناح انٹرنیشنل ایئرپورٹ پر لینڈ کرے گی۔ ایئرلائن کی پرواز بی جی 341 رات 11 بجے کراچی پہنچے گی، جس کے لیے ایئرپورٹ انتظامیہ کی جانب سے خصوصی انتظامات مکمل کر لیے گئے ہیں۔
‎حکام کے مطابق کراچی اور ڈھاکا کے درمیان ہفتہ وار دو براہ راست پروازیں چلائی جائیں گی، جس سے دونوں ممالک کے درمیان سفری سہولت کے ساتھ ساتھ تجارتی اور عوامی روابط کو بھی فروغ ملے گا۔
‎براہ راست فضائی رابطے کی بحالی کو پاکستان اور بنگلادیش کے درمیان تعلقات میں ایک مثبت اور تاریخی پیش رفت قرار دیا جا رہا ہے۔

‎اسنوکر ایک ایسا کھیل ہے جو بیشتر بالغ افراد کے لیے بھی کھیلنا مشکل سمجھا جاتا ہے، مگر دو سالہ بچے نے اس کھیل میں غیر معمولی کارنامہ انجام دے دیا۔
‎برطانوی شہر مانچسٹر سے تعلق رکھنے والے جوڈی اوئنز نے اسنوکر سے جڑے دو گنیز ورلڈ ریکارڈ اپنے نام کر لیے ہیں اور مشکل شاٹس کھیلنے والے کم عمر ترین فرد بن گئے ہیں۔
‎گنیز ورلڈ ریکارڈز کے مطابق جوڈی اوئنز نے 12 اکتوبر 2025 کو پول بینک شاٹ کامیابی سے کھیلا، اس وقت ان کی عمر 2 سال اور 302 دن تھی۔ اس سے قبل انہوں نے 2 سال اور 261 دن کی عمر میں اسنوکر ڈبل پوٹ مکمل کر کے ایک اور ریکارڈ قائم کیا تھا۔
‎ان کامیابیوں کے بعد جوڈی اوئنز کا نام باضابطہ طور پر گنیز ورلڈ ریکارڈز میں شامل کر لیا گیا ہے۔

‎برطانوی وزیراعظم کیئر اسٹارمر تین روزہ سرکاری دورے پر چین پہنچ گئے ہیں۔
‎غیر ملکی خبر ایجنسی کے مطابق یہ 2018 کے بعد کسی بھی برطانوی وزیراعظم کا پہلا دورۂ چین ہے۔ کیئر اسٹارمر کی چین کے صدر شی جن پنگ سے جمعرات کو ملاقات متوقع ہے۔
‎رپورٹ کے مطابق برطانوی وزیراعظم کے ہمراہ 60 کاروباری اور ثقافتی شخصیات بھی چین پہنچی ہیں۔
‎برطانوی حکومت کا کہنا ہے کہ دورے کے دوران چین کے ساتھ معاشی تعلقات پر بات چیت کی جائے گی، جبکہ انسانی حقوق اور سائبر سکیورٹی سے متعلق امور بھی مذاکرات کا حصہ ہوں گے۔

‎دبئی حکومت نے دنیا کی پہلی گولڈ اسٹریٹ کے قیام کا اعلان کرتے ہوئے نئے گولڈ ڈسٹرکٹ کا باقاعدہ افتتاح کر دیا ہے۔ حکام کے مطابق اس نئی سڑک پر تجارتی سرگرمیاں جلد شروع ہو جائیں گی۔
‎دبئی کے گولڈ ڈسٹرکٹ میں ایک نیا سیاحتی مقام بھی قائم کیا جائے گا، جہاں منصوبے اور ڈیزائن مرحلہ وار پیش کیے جائیں گے۔ یہاں ہزار سے زائد گولڈ ریٹیلرز کے ساتھ ایک جدید مرکز تعمیر کیا جائے گا۔
‎دبئی حکومت کے مطابق اس نئے مرکز میں ریٹیل، ہول سیل اور سرمایہ کاری کے تمام شعبے ایک جگہ جمع ہوں گے اور مکمل سونے اور زیورات کی ویلیو چین یہاں دستیاب ہوگی۔
‎اماراتی حکام کا کہنا ہے کہ سونا دبئی کی شان اور تجارتی ورثے کی علامت ہے اور یہ منصوبہ شہر کی عالمی تجارتی حیثیت کو مزید مضبوط کرے گا۔

‎آئی سی سی ٹی ٹوئنٹی ورلڈ کپ میں بنگلا دیش کے ایونٹ سے باہر ہونے اور پاکستان کے بھارت کے خلاف میچ بائیکاٹ کے امکان پر بھارتی صحافی شاردا اگرا نے بھارتی کرکٹ بورڈ اور آئی سی سی پر شدید تنقید کی ہے۔
‎شاردا اگرا کا کہنا ہے کہ آئی سی سی کا دفتر اب بی سی سی آئی کا دبئی آفس بن چکا ہے اور آئی سی سی وہی کرتا ہے جو بی سی سی آئی چاہتا ہے۔ انہوں نے کہا کہ یہ رویہ آئی سی سی کے ایگزیکٹو بورڈ کے اجلاس میں بھی واضح تھا۔
‎بھارتی صحافی نے کہا کہ ورلڈ کپ کے موجودہ مسائل نہایت بھونڈے انداز میں ہینڈل کیے گئے ہیں اور اس سے آئی سی سی کی ساکھ متاثر ہوئی ہے۔ ان کے مطابق یہ صورتحال اس وقت پیدا ہوئی جب بنگلا دیشی کھلاڑی مستفیض الرحمان کو آئی پی ایل سے نکالا گیا، اور پاکستان کا رویہ ماضی میں بھارت کے رویے کا ردعمل ہو سکتا ہے۔
‎شاردا اگرا نے مزید کہا کہ مستفیض الرحمان کو آئی پی ایل سے نکالنا سیاسی فیصلہ تھا اور بی سی سی آئی بھارت کے حکمرانوں کے ساتھ جڑی ہوئی ہے۔ انہوں نے سوال اٹھایا کہ بھارتی ٹیم کو پاکستانی کھلاڑیوں سے ہاتھ ملانے سے کس نے روکا، اور یہ آج تک واضح نہیں ہوا۔

‎سعودی عرب اور قطر نے عالمی بینک کو شام کے بقایاجات کی ادائیگی کرتے ہوئے تقریباً 15 ملین (ڈیڑھ کروڑ) ڈالر ادا کیے ہیں، جس کا مقصد شام کی معیشت کی بحالی اور تیز رفتار ترقی میں مدد فراہم کرنا ہے۔
‎سعودی پریس ایجنسی (SPA) کی مشترکہ رپورٹ کے مطابق، سعودی عرب اور قطر نے اعلان کیا کہ انہوں نے شام کے عالمی بینک کے بقایاجات کی ادائیگی مکمل کر دی ہے۔ خلیجی ممالک کی وزارت خزانہ نے بیان میں کہا کہ یہ اقدام شامی عرب جمہوریہ کی معیشت کی بحالی میں تعاون اور تیزی لانے کے سلسلے میں کیا گیا ہے۔
‎ذرائع کے مطابق، ریاض نے عالمی بینک کو یہ رقم ادا کر کے شام کے پبلک سیکٹر کی بحالی اور تعمیر نو کے منصوبوں کے لیے لاکھوں ڈالر کی فنڈنگ گرانٹس کی منظوری کا راستہ ہموار کیا ہے۔ اس اقدام سے شام کی معیشت کو استحکام اور ترقی کی جانب مزید گامزن کرنے میں مدد ملے گی۔

‎اقوامِ متحدہ میں ایران کے مشن نے خبردار کیا ہے کہ اگر امریکا نے ایران پر حملہ کیا تو تہران ایسا جواب دے گا جو پہلے کبھی نہیں دیا گیا۔
‎نیویارک میں بدھ کو جاری بیان میں ایرانی مشن نے کہا کہ ایران مذاکرات کے لیے باہمی احترام اور مفادات کی بنیاد پر تیار ہے، لیکن اگر دباؤ ڈالا گیا تو ملک اپنا دفاع کرے گا۔
‎بیان میں مزید کہا گیا کہ جب امریکا نے پہلے عراق اور افغانستان میں جنگ کی، تو اسے سات کھرب ڈالر کا نقصان برداشت کرنا پڑا اور سات ہزار سے زیادہ فوجی ہلاک ہوئے۔
‎ایرانی مشن نے یہ پیغام سماجی رابطے کی ویب سائٹ ایکس پر پوسٹ کیا، جس کے ساتھ سابق امریکی صدر ڈونلڈ ٹرمپ کی پوسٹ کا اسکرین شاٹ بھی شامل تھا۔