کراچی کے علاقے فیڈرل بی ایریا میں مین ہول میں گرنے والے شخص کی لاش نکال لی گئی ہے۔
ریسکیو ڈبل ون ڈبل ٹو کے ترجمان کے مطابق دوپہر کے وقت ایک شخص کے مین ہول میں گرنے کی اطلاع موصول ہوئی، جس پر واٹر ریسکیو ٹیم، غوطہ خور اور ایمبولینس فوری طور پر موقع پر پہنچے۔
ریسکیو اہلکاروں نے کارروائی کرتے ہوئے مین ہول سے لاش نکال لی۔ متوفی کی شناخت 70 سالہ عنایت کے نام سے ہوئی ہے۔ مزید قانونی کارروائی جاری ہے۔
Author: Aqsa Younas Rana
کراچی مین ہول میں گرنے والا شخص جاں بحق، لاش نکال لی گئی
پنجاب میں تمام مارکیٹیں، عمارتیں اور اسکول فائر سیفٹی آڈٹ کے لیے ہائی الرٹ
پنجاب میں صوبائی حکومت نے فائر سیفٹی کے انتظامات کو بہتر بنانے کے لیے اہم فیصلہ کیا ہے۔ وزیراعلیٰ پنجاب مریم نواز نے حکم دیا ہے کہ صوبے کی تمام مارکیٹیں، عمارتیں اور اسکول فائر سیفٹی آڈٹ کروائیں اور ہر ادارے میں فائر ڈرل کا انعقاد کیا جائے۔
فائر سیفٹی کے ضوابط مکمل کرنے کے لیے دو ہفتے کی مہلت دی گئی ہے۔ مریم نواز نے بلڈنگ سیفٹی ایکٹ پر مکمل عملدرآمد یقینی بنانے کی ہدایت بھی دی۔
صوبے میں بلڈنگ سیفٹی ایکٹ کے نفاذ کے لیے پیرا فورس کو خصوصی اختیارات بھی دے دیے گئے ہیں تاکہ کسی بھی قسم کی خلاف ورزی کی صورت میں فوری کارروائی کی جا سکے۔
وزیراعلیٰ مریم نواز نے کہا کہ عوام کی جان و مال سے کھیلنے والوں کے لیے پنجاب میں کوئی جگہ نہیں، اور آتشزدگی سے نمٹنے کے لیے ہمت، حکمت اور جدید ٹیکنالوجی دونوں ضروری ہیں۔
گھوٹکی میں ڈاکوؤں کے خلاف آپریشن جاری، 60 ڈاکو, 50 سہولت کار گرفتار
گھوٹکی کے علاقے رونتی میں ڈاکوؤں کے خلاف پولیس کا مشترکہ آپریشن چھٹے روز بھی جاری ہے اور اب تک متعدد کامیابیاں حاصل ہو چکی ہیں۔
پولیس نے دو مزید مغویوں کو بازیاب کرا لیا ہے، جن کی شناخت سلطان اور محمد بشیر کے ناموں سے ہوئی۔ جنوبی پنجاب کے کچے علاقوں میں خوف کی علامت سمجھے جانے والے ڈاکوؤں کے خلاف سخت ایکشن جاری ہے، اور اب تک مجموعی طور پر 60 خطرناک ڈاکو اور 50 سے زائد سہولت کار گرفتار کیے جا چکے ہیں۔
ایک کروڑ سے زائد قیمت والے وہاب لنڈ اور میرا لٹھانی نے بھی خود کو پولیس کے حوالے کر دیا ہے، جبکہ لونڈ، کوش، لٹھانی اور سیکھانی گینگ کے دیگر ارکان نے بھی سرنڈر کر دیا۔
آپریشن میں دو ہزار سے زائد پولیس اہلکار، آٹھ ڈرون ٹیمیں اور درجنوں بکتر بند گاڑیاں حصہ لے رہی ہیں۔ حکام کے مطابق سندھ اور پنجاب کی پولیس اپنے اپنے علاقوں میں مشترکہ کارروائی کر رہی ہے تاکہ کچے علاقوں میں قانون و انتظام قائم رکھا جا سکے۔
نامعلوم افراد نے پیٹرول پمپ کو آگ لگا دی
ڈیرہ اسماعیل خان کے ٹانک روڈ پر نامعلوم افراد نے ایک پیٹرول پمپ کو آگ لگا دی۔
پولیس کے مطابق واقعے سے قبل ملزمان نے پمپ کے عملے کو رسیوں سے باندھ دیا۔ ابتدائی اطلاعات کے مطابق ملزمان کی تعداد 30 سے 40 کے درمیان تھی۔ پولیس نے موقع پر پہنچ کر تحقیقات شروع کر دی ہیں اور ملزمان کی تلاش جاری ہے۔
ڈیووس میں وزیراعظم شہبازشریف کی صدر ٹرمپ سے سرگوشیاں توجہ کا مرکز
سوئٹزرلینڈ کے شہر ڈیووس میں وزیر اعظم شہبازشریف کی امریکی صدر ڈونلڈ ٹرمپ کے ساتھ سرگوشیاں عالمی توجہ کا مرکز بن گئیں۔
جمعرات کو پاکستان سمیت مختلف ممالک نے ڈیووس میں غزہ بورڈ آف پیس کے معاہدے پر دستخط کیے۔ تقریب میں وزیر اعظم شہبازشریف کے علاوہ فیلڈ مارشل سید عاصم منیر نے بھی شرکت کی۔ وزیر اعظم نے پاکستان کی طرف سے معاہدے پر دستخط کیے۔
اس دوران وزیر اعظم شہبازشریف اور امریکی صدر ٹرمپ کے درمیان خوشگوار موڈ میں سرگوشیاں بھی دیکھنے میں آئیں، جو میڈیا اور حاضرین کی توجہ کا محور بن گئیں۔
برطانوی پارلیمنٹ میں ڈاکٹر عبدالقدیر خان کی خدمات پر بیٹی ڈاکٹر دینا خان کو اعزاز
برطانوی پارلیمنٹ میں ایک خصوصی تقریب کے دوران پاکستان کے نامور سائنسدان ڈاکٹر عبدالقدیر خان کی خدمات کو بین الاقوامی سطح پر سراہا گیا اور ان کی بیٹی، ڈاکٹر دینا خان کو اعزاز سے نوازا گیا۔ اس موقع پر والد کی خدمات پر خراج عقیدت پیش کیا گیا۔
ڈاکٹر دینا خان نے تقریب سے خطاب کرتے ہوئے کہا کہ برطانوی پارلیمنٹ میں والد کی خدمات کو سراہا جانا ان کے لیے باعث فخر ہے۔ انہوں نے پاکستان کی مسلح افواج کی بھارت کے خلاف مضبوط کارروائیوں اور بھرپور قوت کے مظاہرے کو بھی خراج تحسین پیش کیا اور کہا کہ "ہماری افواج نے بھارت سمیت دنیا کو یہ پیغام دیا کہ ہمیں ہلکا کوئی نہ لے۔”
تقریب میں برطانوی پارلیمنٹ کے اراکین افضل خان، یاسمین قریشی، محمد یاسین، لارڈ واجد کے علاوہ کمیونٹی رہنماؤں نے بھی شرکت کی۔ اس موقع پر والد کی علمی خدمات اور قومی ترقی میں کردار کو یاد کرتے ہوئے خصوصی تقریریں اور خراج عقیدت پیش کیا گیا۔
مری میں شدید برف باری کا الرٹ، 12 سے 20 انچ برف پڑنے کی پیشگوئی
ملکہ کوہسار مری میں شدید برف باری کی پیشگوئی کے بعد الرٹ جاری کر دیا گیا ہے۔ محکمہ موسمیات کے مطابق مری میں آج اور کل کے دوران 12 سے 20 انچ تک برف باری کا امکان ہے۔
وزیراعلیٰ پنجاب کی ہدایات پر صوبائی وزیر مواصلات ملک صہیب احمد بھرتھ مری پہنچ گئے جہاں انہوں نے انتظامات کا جائزہ لیا اور ضلعی انتظامیہ کو ہائی الرٹ کر دیا گیا۔
صوبائی وزیر نے مری میں ڈسٹرکٹ ایڈمنسٹریشن کے اہم اجلاس کی صدارت کی، جس میں برف باری اور ممکنہ لینڈ سلائیڈنگ سے نمٹنے کے لیے روڈ کلیئرنگ پلان پر تفصیلی بریفنگ دی گئی۔
ملک صہیب احمد بھرتھ نے ہائی وے میکنیکل ونگ کی مشینری اور سالٹ کیمپس کا بھی معائنہ کیا۔ ان کا کہنا تھا کہ مری میں 13 ٹورسٹ فیسلیٹیشن سینٹرز مکمل طور پر فعال ہیں جبکہ نمک کے بیگز کا وافر ذخیرہ موجود ہے تاکہ سڑکوں کو فوری طور پر بحال رکھا جا سکے۔
انہوں نے انتظامیہ کو ہدایت دی کہ مری میں داخل ہونے والی گاڑیوں کی مسلسل نگرانی کی جائے تاکہ کسی بھی ہنگامی صورتحال سے بروقت نمٹا جا سکے اور سیاحوں کو مشکلات سے بچایا جا سکے۔
ہائیکورٹ کے باہر جھگڑے کے کیس میں ایمان مزاری اور ہادی علی چٹھہ کی ضمانتیں خارج
انسدادِ دہشت گردی عدالت اسلام آباد نے ہائیکورٹ کے باہر لڑائی جھگڑے کے کیس میں ایمان مزاری اور ہادی علی چٹھہ کی ضمانت قبل از گرفتاری کی درخواستیں مسترد کر دیں۔
کیس کی سماعت ڈیوٹی جج طاہر عباس سپرا نے کی۔ عدالت کو بتایا گیا کہ ایمان مزاری اور ہادی علی چٹھہ نے پیشگی ضمانت کے لیے درخواستیں دائر کر رکھی تھیں، تاہم دونوں ملزمان سماعت کے موقع پر عدالت میں پیش نہیں ہوئے۔
عدالت نے فریقین کے دلائل سننے کے بعد درخواستیں خارج کرتے ہوئے حکم جاری کیا۔ کیس ہائیکورٹ کے باہر پیش آنے والے مبینہ جھگڑے سے متعلق ہے، جس پر انسدادِ دہشت گردی ایکٹ کے تحت کارروائی کی جا رہی ہے۔
غزہ بورڈ آف پیس کا اعلان، پاکستان سمیت کئی ممالک کے دستخط
امریکی صدر ڈونلڈ ٹرمپ نے غزہ بورڈ آف پیس کے قیام کا باضابطہ اعلان کر دیا ہے، جس کے معاہدے پر وزیراعظم پاکستان شہباز شریف سمیت مختلف ممالک کے رہنماؤں نے دستخط کیے۔
سوئٹزرلینڈ کے شہر ڈیووس میں ہونے والی تقریب میں غزہ بورڈ آف پیس کے معاہدے پر دستخط کیے گئے۔ اس موقع پر امریکی صدر ڈونلڈ ٹرمپ نے تقریب سے خطاب کرتے ہوئے کہا کہ وہ بورڈ آف پیس میں شمولیت اختیار کرنے والے تمام ممالک کے شکر گزار ہیں اور اقوام متحدہ سمیت دیگر عالمی شراکت داروں کے ساتھ مل کر اس پر کام جاری رکھا جائے گا۔صدر ٹرمپ نے دعویٰ کیا کہ انہوں نے اب تک آٹھ جنگیں رکوائیں، جن میں پاکستان اور بھارت کے درمیان ممکنہ تصادم بھی شامل تھا۔ ان کا کہنا تھا کہ دونوں ممالک ایٹمی طاقتیں ہیں اور ان کے درمیان کشیدگی کم کر کے دنیا کو مزید محفوظ بنایا گیا۔
بورڈ آف پیس میں شمولیت کا مقصد فلسطین میں پائیدار امن کا قیام
ورلڈ اکنامک فورم: بورڈ آف پیس معاہدے پر دستخط
پاکستان نے WEF 2026، ڈیووس میں امریکی صدر ڈونلڈ ٹرمپ کی دعوت پر بورڈ آف پیس میں شمولیت اختیار کی، جس کا مقصد فلسطین میں پائیدار امن کا قیام ہے۔بورڈ آف پیس کا بنیادی ہدف غزہ میں مستقل جنگ بندی، انسانی بحران کا خاتمہ اور فلسطین کی منظم اور جامع تعمیرِ نو ہے، جو اقوام متحدہ کی سلامتی کونسل کی قراردادوں کے مطابق ہوگی۔
تعمیرِ نو کے منصوبے میں گھروں، اسپتالوں، اسکولوں، پانی اور بجلی کے نظام کی بحالی، معاشی سرگرمیوں کی بحالی اور فلسطینی عوام کو باعزت زندگی کی فراہمی شامل ہے۔
پاکستان 🇵🇰 نے اس اقدام میں سعودی عرب 🇸🇦، ترکی 🇹🇷، مصر 🇪🇬، اردن 🇯🇴، قطر 🇶🇦، متحدہ عرب امارات 🇦🇪، انڈونیشیا 🇮🇩، بحرین 🇧🇭، مراکش 🇲🇦، ارجنٹائن 🇦🇷، ہنگری 🇭🇺 اور امریکہ 🇺🇸 کے ساتھ شمولیت اختیار کی۔
مسلم ممالک کی مؤثر موجودگی اس بات کو یقینی بناتی ہے کہ فلسطینی حقوق، حقِ خود ارادیت اور ریاستی تشخص کو مرکزی حیثیت حاصل رہے۔
پاکستان کا مؤقف بدستور واضح اور غیر متزلزل ہے: 1967 سے پہلے کی سرحدوں پر آزاد فلسطینی ریاست، القدس الشریف اس کا دارالحکومت، اور قبضے و اجتماعی سزا کی مخالفت۔
گزشتہ روز فلسطینی 🇵🇸 وزیرِاعظم محمد مصطفیٰ نے وزیرِاعظم شہباز شریف کو راستے میں چلتے ہوئے روک کر اُن سے مصافحہ کیا، اور غزہ میں امن کے لیے پاکستان کی مسلسل حمایت، نسل کشی کے خاتمے کی کوششوں اور فلسطینی عوام کے حق میں مضبوط مؤقف پر پاکستان کا شکریہ ادا کیا۔
بورڈ آف پیس کی دستخطی تقریب کے موقع پر وزیرِاعظم شہباز شریف اور امریکی صدر کے درمیان خوشگوار تبادلۂ خیال ہوا، جبکہ امریکی صدر نے فیلڈ مارشل سید عاصم منیر کی جانب اشارہ کرتے ہوئے اُنہیں انگوٹھے کے اشارے سے سراہا۔ یہ پاکستان کی قیادت کی ہم آہنگی کے باعث عالمی سطح پر حاصل ہونے والی پذیرائی کا ثبوت ہے۔
بورڈ آف پیس میں شمولیت کا مطلب کسی فوجی مشن یا اسٹیبلائزیشن فورس میں خودکار شمولیت نہیں۔ اس حوالے سے پاکستان کا مؤقف پہلے سے واضح اور مستقل ہے۔
پاکستان عالمی سیاست میں بلاک بندی سے اجتناب کرتے ہوئے توازن، اصول پسندی اور مؤثر سفارت کاری پر یقین رکھتا ہے، اور فلسطین کے معاملے پر خاموشی کے بجائے فعال کردار کو ترجیح دیتا ہے۔
پنجاب میں پہلے گرین پولیسنگ یونٹ کا افتتاح، مریم نواز
وزیراعلیٰ پنجاب مریم نواز نے پاکستان کی تاریخ کے پہلے گرین پولیسنگ یونٹ کا باقاعدہ افتتاح کردیا۔ اس موقع پر وزیراعلیٰ نے جدید الیکٹرک وہیکل خود ڈرائیو کی اور کہا کہ الیکٹرک گاڑیوں کا استعمال ایندھن کے اخراجات میں واضح کمی اور زیرو کاربن اخراج کا ذریعہ بنے گا۔
لاہور میں پہلی مرتبہ جدید بی وائی ڈی الیکٹرک وہیکل کے ذریعے پولیس پیٹرولنگ کا آغاز کیا جا رہا ہے۔ وزیراعلیٰ مریم نواز کا کہنا تھا کہ گرین پولیسنگ صاف فضا، ماحولیاتی تحفظ اور بہتر طرز حکمرانی کے وژن کی عملی عکاس ہے۔
افتتاح کے بعد وزیراعلیٰ نے گرین پولیسنگ یونٹ کی الیکٹرک پیٹرولنگ گاڑیوں کا معائنہ کیا، جبکہ انہیں یونٹ کے قیام، مقاصد اور الیکٹرک وہیکلز کی تکنیکی خصوصیات پر تفصیلی بریفنگ دی گئی۔
بریفنگ میں بتایا گیا کہ ماحول دوست الیکٹرک گاڑی ایک بار مکمل چارج ہونے پر 410 کلو میٹر تک سفر کی صلاحیت رکھتی ہے۔ گاڑی میں جدید سرویلنس پی اے سسٹم، پولیس لائٹس، 360 ڈگری کیمرہ اور اسپیڈ ڈیٹیکشن آلات نصب ہیں۔
حکام کے مطابق اس وقت پیٹرولنگ پر مامور 103 گاڑیاں ماہانہ تقریباً 28 ہزار لیٹر ایندھن استعمال کرتی ہیں، جس پر 7.42 ملین روپے خرچ ہوتے ہیں۔ گرین پولیسنگ یونٹ کے آغاز سے نہ صرف ماحولیاتی آلودگی میں کمی آئے گی بلکہ سرکاری اخراجات میں بھی نمایاں بچت متوقع ہے۔
