Author: Aqsa Younas Rana

‎امریکی وزیر خارجہ نے کہا ہے کہ آبنائے ہرمز میں ٹول سسٹم نافذ کرنے کا نظام ایران کے ساتھ ممکنہ سفارتی معاہدے کو ناقابلِ عمل بنا سکتا ہے۔
‎سوئیڈن روانگی سے قبل میڈیا سے گفتگو کرتے ہوئے امریکی وزیر خارجہ نے کہا کہ وہ نیٹو اجلاس میں فوجی تعیناتی اور خطے کی سیکیورٹی صورتحال پر اتحادی ممالک سے اہم بات چیت کریں گے۔ انہوں نے کہا کہ آبنائے ہرمز میں مجوزہ ٹول سسٹم عالمی تجارت اور سفارتی کوششوں کے لیے مشکلات پیدا کر سکتا ہے۔
‎امریکی وزیر خارجہ کا کہنا تھا کہ ایران کے ساتھ جاری مذاکرات میں کچھ مثبت پیش رفت دیکھنے میں آئی ہے اور بعض معاملات پر حوصلہ افزا اشارے مل رہے ہیں، تاہم ابھی یہ کہنا قبل از وقت ہوگا کہ حتمی معاہدہ ہو پائے گا یا نہیں۔
‎انہوں نے واضح کیا کہ امریکا اور اس کے اتحادی اس بات پر متفق ہیں کہ ایران کو جوہری ہتھیار رکھنے کی اجازت نہیں دی جا سکتی۔ ان کا کہنا تھا کہ خطے کے استحکام اور عالمی سلامتی کے لیے ایران کے جوہری پروگرام پر قابو پانا ضروری ہے۔
‎امریکی وزیر خارجہ نے مزید کہا کہ ایران کے معاملے پر بعض نیٹو اتحادیوں کے مؤقف پر امریکا کو شدید تحفظات ہیں۔ ان کے مطابق واشنگٹن چاہتا ہے کہ تمام اتحادی ایک واضح اور مشترکہ حکمت عملی اختیار کریں۔
‎یاد رہے کہ حالیہ دنوں میں ایران کی جانب سے آبنائے ہرمز کے بعض حصوں میں نگرانی اور اجازت نامے کے نئے نظام کے اعلان کے بعد عالمی سطح پر تشویش میں اضافہ ہوا ہے۔ ماہرین کے مطابق آبنائے ہرمز دنیا کی اہم ترین بحری گزرگاہوں میں شامل ہے جہاں سے بڑی مقدار میں عالمی تیل کی ترسیل ہوتی ہے۔

‎فرانس نے آبنائے ہرمز میں جہاز رانی کی آزادی کے لیے نیٹو کے کردار ادا کرنے کے تصور کو مسترد کر دیا ہے۔
‎عرب میڈیا کے مطابق فرانسیسی وزارت خارجہ کے ترجمان نے اپنے بیان میں کہا کہ فرانس کا مؤقف اس معاملے پر واضح اور مستقل ہے۔ ان کا کہنا تھا کہ شمالی بحر اوقیانوس معاہدہ صرف شمالی بحر اوقیانوس کے علاقوں تک محدود ہے اور مشرقِ وسطیٰ یا آبنائے ہرمز میں مداخلت نیٹو کے دائرہ کار میں نہیں آتی۔
‎فرانسیسی ترجمان نے کہا کہ آبنائے ہرمز اور مشرقِ وسطیٰ کی صورتحال پر توجہ مرکوز کرنا نہ تو نیٹو کا بنیادی مقصد ہے اور نہ ہی یہ اتحاد اس کردار کے لیے موزوں سمجھا جاتا ہے۔
‎بیان ایسے وقت میں سامنے آیا ہے جب امریکا کی جانب سے آبنائے ہرمز میں عالمی بحری تجارت کے تحفظ اور جہاز رانی کی آزادی برقرار رکھنے کے لیے اتحادی کردار پر زور دیا جا رہا ہے۔ حالیہ دنوں میں ایران کی جانب سے آبنائے ہرمز میں نگرانی اور اجازت ناموں کے نئے نظام کے اعلان کے بعد عالمی سطح پر تشویش میں اضافہ ہوا ہے۔
‎ماہرین کے مطابق آبنائے ہرمز دنیا کی اہم ترین بحری گزرگاہوں میں شامل ہے جہاں سے روزانہ بڑی مقدار میں تیل اور تجارتی سامان عالمی منڈیوں تک پہنچایا جاتا ہے۔ خطے میں کشیدگی بڑھنے کے باعث عالمی تجارت اور توانائی مارکیٹ پر اثرات کے خدشات بھی بڑھ گئے ہیں۔
‎فرانسیسی حکومت کا مؤقف سامنے آنے کے بعد یہ واضح ہو گیا ہے کہ یورپی اتحادی اس معاملے پر یکساں رائے نہیں رکھتے اور خطے میں عسکری کردار کے حوالے سے مختلف آراء پائی جاتی ہیں۔

‎ایرانی پاسداران انقلاب بحریہ نے کہا ہے کہ گزشتہ 24 گھنٹوں کے دوران 31 بحری جہازوں نے آبنائے ہرمز کو کامیابی سے عبور کیا۔
‎ایرانی میڈیا کے مطابق پاسداران انقلاب بحریہ نے اپنے بیان میں کہا کہ جہازوں کی آمد و رفت ایرانی بحری حکام کے تعاون اور نگرانی میں جاری رہی۔ ان بحری جہازوں میں آئل ٹینکرز، کنٹینر بردار جہاز اور دیگر تجارتی بحری جہاز شامل تھے۔
‎بیان میں کہا گیا کہ آبنائے ہرمز سے گزرنے والے جہازوں کے لیے مقررہ طریقہ کار اور اجازت ناموں پر عمل کیا جا رہا ہے تاکہ خطے میں بحری ٹریفک کو محفوظ اور منظم رکھا جا سکے۔
‎ایرانی حکام کے مطابق موجودہ صورتحال کے باوجود بحری راستے مکمل طور پر فعال ہیں اور تجارتی سرگرمیوں کا سلسلہ جاری ہے۔ پاسداران انقلاب نے دعویٰ کیا کہ بحری جہازوں کو ایرانی بحریہ کی معاونت فراہم کی جا رہی ہے تاکہ کسی بھی ممکنہ خطرے سے بچا جا سکے۔
‎یاد رہے کہ حالیہ دنوں میں ایران، امریکا اور اسرائیل کے درمیان بڑھتی کشیدگی کے باعث آبنائے ہرمز عالمی توجہ کا مرکز بنی ہوئی ہے۔ دنیا کی اہم ترین بحری گزرگاہوں میں شمار ہونے والی اس آبنائے سے روزانہ بڑی مقدار میں عالمی تیل اور تجارتی سامان کی ترسیل ہوتی ہے۔
‎ماہرین کا کہنا ہے کہ آبنائے ہرمز میں کسی بھی قسم کی کشیدگی یا رکاوٹ عالمی توانائی منڈی اور عالمی تجارت پر براہ راست اثر ڈال سکتی ہے، اسی لیے دنیا بھر کی نظریں اس خطے کی صورتحال پر مرکوز ہیں۔

‎بھارت کے وزیرِ تجارت پیوش گوئل نے اعلان کیا ہے کہ انڈین روپے کی مسلسل گرتی ہوئی قدر کے اثرات کو کم کرنے کے لیے حکومت مختلف اقدامات پر غور کر رہی ہے جبکہ مالیاتی منڈیوں کی صورتحال پر مسلسل نظر رکھی جا رہی ہے۔
‎پیوش گوئل نے اپنے بیان میں کہا کہ حکومت موجودہ معاشی صورتحال کا بغور جائزہ لے رہی ہے اور متعدد تجاویز زیر غور ہیں۔ ان کے مطابق عالمی حالات اس وقت انتہائی پیچیدہ اور چیلنجنگ ہو چکے ہیں، جس کے اثرات بھارتی معیشت پر بھی پڑ رہے ہیں۔
‎بھارتی میڈیا رپورٹس کے مطابق حالیہ دنوں میں انڈین روپیہ کئی بار اپنی تاریخ کی کم ترین سطح تک گر چکا ہے۔ ماہرین کے مطابق ایران کے خلاف امریکا اور اسرائیل کی جنگ شروع ہونے کے بعد سے بھارتی کرنسی کی قدر میں چھ فیصد سے زیادہ کمی ریکارڈ کی گئی ہے۔
‎معاشی تجزیہ کاروں کا کہنا ہے کہ روپے پر دباؤ کی بڑی وجہ عالمی منڈی میں خام تیل کی قیمتوں میں اضافہ ہے، کیونکہ بھارت اپنی توانائی ضروریات کے لیے بڑی حد تک درآمدی تیل پر انحصار کرتا ہے۔ تیل مہنگا ہونے سے درآمدی بل میں اضافہ اور زرمبادلہ پر دباؤ بڑھ رہا ہے۔
‎رپورٹس کے مطابق بھارتی حکومت روپے کی قدر کو مستحکم رکھنے اور سرمایہ کاروں کے اعتماد کو بحال کرنے کے لیے مختلف مالیاتی اور اقتصادی آپشنز پر غور کر رہی ہے۔ مرکزی بینک کی ممکنہ مداخلت، درآمدی پالیسی میں تبدیلی اور مارکیٹ استحکام کے دیگر اقدامات بھی زیر بحث ہیں۔
‎معاشی ماہرین کا کہنا ہے کہ اگر مشرقِ وسطیٰ میں کشیدگی مزید بڑھی تو اس کے اثرات نہ صرف بھارت بلکہ خطے کی دیگر معیشتوں پر بھی پڑ سکتے ہیں، خاص طور پر ان ممالک پر جو توانائی درآمد کرتے ہیں۔

‎اسرائیلی اخبار “اسرائیل ہیوم” نے دعویٰ کیا ہے کہ ایران کے معاملے پر امریکی صدر ڈونلڈ ٹرمپ کی انتظامیہ دو مختلف دھڑوں میں تقسیم ہو گئی ہے اور وائٹ ہاؤس میں ایران کے ساتھ ممکنہ معاہدے کے حوالے سے شدید اختلافات پائے جا رہے ہیں۔
‎رپورٹ کے مطابق وائٹ ہاؤس میں ہونے والے ایک اہم اجلاس کے دوران ایران کے ساتھ مذاکرات جاری رکھنے یا سخت مؤقف اپنانے پر سینئر امریکی حکام کے درمیان سخت بحث ہوئی۔ اخبار نے دعویٰ کیا کہ صدر ٹرمپ نے بعض اعلیٰ حکام کی مخالفت کے باوجود ایران کے ساتھ سفارتی مذاکرات جاری رکھنے کی منظوری دے دی۔
‎اسرائیلی میڈیا کے مطابق اجلاس میں امریکی نائب صدر جے ڈی وینس اور وزیر خارجہ مارکو روبیو کے درمیان تلخ جملوں کا تبادلہ بھی ہوا، جبکہ وزیر جنگ پیٹ ہیگستھ نے بھی ایران کے خلاف سخت پالیسی کی حمایت کی۔
‎رپورٹ میں کہا گیا ہے کہ نائب صدر جے ڈی وینس نے مذاکرات کے حق میں مؤقف اختیار کرتے ہوئے کہا کہ ایران کی حالیہ تجاویز میں لچک موجود ہے اور اس بنیاد پر ابتدائی معاہدے کی جانب پیش رفت ممکن ہو سکتی ہے۔
‎دوسری جانب امریکی وزیر خارجہ مارکو روبیو اور وزیر جنگ پیٹ ہیگستھ کا کہنا تھا کہ ایران سے کسی بھی قسم کی رعایت صرف دباؤ اور سخت پالیسی کے ذریعے ہی حاصل کی جا سکتی ہے، جبکہ سفارتی مذاکرات سے خاطر خواہ نتائج کی توقع کم ہے۔
‎اسرائیلی اخبار نے مزید دعویٰ کیا کہ اجلاس میں اسٹیو وٹکوف اور جیرڈ کشنر بھی موجود تھے، جنہوں نے نائب صدر جے ڈی وینس کے مؤقف کی حمایت کی۔ ان مباحث کے بعد صدر ٹرمپ ایران کو ایک اور موقع دینے پر آمادہ ہوئے۔
‎ادھر امریکی اور ایرانی مذاکرات سے متعلق نئی تجاویز سامنے آنے کے بعد اسرائیلی وزیراعظم بنیامین نیتن یاہو کی تشویش میں بھی اضافہ دیکھا جا رہا ہے۔ بعض امریکی اور اسرائیلی ذرائع کے مطابق اسرائیل کو خدشہ ہے کہ ممکنہ معاہدہ ایران کو مزید سفارتی اور اقتصادی ریلیف دے سکتا ہے۔

‎ایران سے متعلق جاری کشیدگی اور خطے میں جنگی صورتحال کے باعث اس سال حج کے اخراجات میں نمایاں اضافہ ریکارڈ کیا گیا ہے، جبکہ بعض سفری پیکجز کی قیمتیں تین سے چار گنا تک بڑھ گئی ہیں۔
‎بین الاقوامی نیوز ویب سائٹ کی رپورٹ کے مطابق خلیجی خطے میں فضائی آپریشن متاثر ہونے، پروازوں کی محدود دستیابی اور سپلائی چین میں رکاوٹوں کے باعث عازمینِ حج کو غیر معمولی مالی دباؤ کا سامنا ہے۔ رپورٹ میں کہا گیا ہے کہ روانگی سے قبل ٹریول پیکجز کی قیمتوں میں اچانک بڑا اضافہ دیکھنے میں آیا، جس سے دنیا بھر کے لاکھوں مسلمان متاثر ہو رہے ہیں۔
‎رپورٹ کے مطابق پاکستان، انڈونیشیا اور ملائیشیا سمیت کئی مسلم ممالک نے اپنے شہریوں کو ریلیف دینے کے لیے خصوصی سبسڈی فراہم کی ہے تاکہ بڑھتے ہوئے اخراجات کے باوجود زیادہ سے زیادہ افراد حج کی سعادت حاصل کر سکیں۔
‎انڈونیشیا نے اپنے دو لاکھ سے زائد عازمین کے لیے فضائی اخراجات میں اضافی 10 کروڑ ڈالر سے زیادہ رقم برداشت کی، جبکہ پاکستان اور ملائیشیا نے بھی حج پیکجز پر سبسڈی دینے کے اقدامات کیے ہیں۔ دوسری جانب بھارت نے فضائی ایندھن کی قیمتوں میں اضافے کو جواز بناتے ہوئے عازمین پر اضافی سرچارج عائد کر دیا ہے۔
‎آئندہ ہفتے مکہ مکرمہ میں حج کے مرکزی مناسک کا آغاز ہوگا۔ گزشتہ برس تقریباً 16 لاکھ مسلمان دنیا بھر سے حج کے لیے سعودی عرب پہنچے تھے، جن میں پاکستان، بھارت اور انڈونیشیا سے تعلق رکھنے والے عازمین کی تعداد سب سے زیادہ تھی۔
‎سعودی عرب کی جانب سے بھی حج اور عمرہ کے شعبے کو وژن 2030 کا اہم حصہ قرار دیا جا رہا ہے۔ مملکت ہوائی اڈوں، ٹرانسپورٹ، میٹرو سروس اور ہوٹلنگ کے شعبوں میں بڑے پیمانے پر سرمایہ کاری کر رہی ہے تاکہ مذہبی سیاحت کو مزید بہتر بنایا جا سکے۔