پاک فوج کے شعبہ تعلقاتِ عامہ آئی ایس پی آر نے کہا ہے کہ سکیورٹی فورسز نے خفیہ اطلاعات کی بنیاد پر شمالی وزیرستان کے علاقے دتہ خیل میں دہشت گردوں کے خلاف متعدد کارروائیاں کی ہیں۔
آئی ایس پی آر کے مطابق گزشتہ 48 گھنٹوں کے دوران کیے گئے ان آپریشنز میں 11 دہشت گرد ہلاک ہوئے جبکہ ان کے کئی ٹھکانوں کو بھی تباہ کر دیا گیا۔
بیان میں کہا گیا ہے کہ کارروائیوں کے دوران دہشت گردوں کے زیرِ استعمال مقامات سے بھاری مقدار میں اسلحہ اور گولہ بارود بھی برآمد کیا گیا۔
فوج کے مطابق ہلاک ہونے والے شدت پسند علاقے میں مختلف پرتشدد کارروائیوں میں ملوث تھے اور قانون نافذ کرنے والے اداروں کو مطلوب تھے۔
آئی ایس پی آر نے بتایا کہ علاقے میں چھپے ہوئے دیگر دہشت گردوں کے خاتمے کے لیے کلیئرنس آپریشنز تاحال جاری ہیں، جبکہ سکیورٹی فورسز اور دیگر ادارے دہشت گردی کے مکمل خاتمے کے لیے سرگرم عمل ہیں۔
بیان کے مطابق یہ کارروائیاں قومی ایکشن پلان کی وفاقی ایپکس کمیٹی سے منظور شدہ وژن “عزمِ استحکام” کے تحت کی جا رہی ہیں، جس کا مقصد غیر ملکی سرپرستی میں ہونے والی دہشت گردی کا مکمل خاتمہ ہے۔
سکیورٹی ذرائع کا کہنا ہے کہ خیبرپختونخوا کے مختلف اضلاع میں شدت پسندوں کے خلاف انٹیلی جنس بیسڈ آپریشنز میں تیزی لائی گئی ہے تاکہ علاقے میں امن و امان کی صورتحال کو مزید بہتر بنایا جا سکے۔
Author: Aqsa Younas Rana
-
شمالی وزیرستان میں آپریشن، 11 دہشت گرد ہلاک
-
شدید گرمی سے قربانی کے جانور مختلف بیماریوں کا شکار
شدید گرمی اور شہریوں کی لاپرواہی کے باعث لاہور میں قربانی کے جانور مختلف بیماریوں کا شکار ہونے لگے ہیں، جس کے بعد ویٹرنری اسپتالوں میں بیمار مویشیوں کی تعداد میں نمایاں اضافہ دیکھا جا رہا ہے۔
رپورٹس کے مطابق گزشتہ دو ہفتوں کے دوران ساڑھے 3 ہزار سے زائد جانور بخار، کھانسی، نزلہ، زکام، ڈائریا اور چچڑ جیسی بیماریوں میں مبتلا ہو کر ویٹرنری اسپتال پہنچائے گئے۔
لاہور کے سرکاری ویٹرنری اسپتال کی ایمرجنسی میں روزانہ تقریباً ڈھائی سو چھوٹے اور بڑے مویشی علاج کے لیے لائے جا رہے ہیں، جہاں انہیں مفت طبی سہولیات اور ادویات فراہم کی جا رہی ہیں۔
شہریوں کا کہنا ہے کہ قربانی کے جانور اچانک بیمار پڑ رہے ہیں جس کے باعث انہیں فوری طور پر اسپتال منتقل کرنا پڑ رہا ہے۔
ویٹرنری ماہرین کے مطابق شدید گرمی میں جانوروں کو تنگ جگہوں پر رکھنا اور بیمار مویشیوں کے ساتھ باندھنا بیماریوں کے پھیلاؤ کی بڑی وجہ بن رہا ہے۔
ماہرین نے خبردار کیا ہے کہ جانوروں کو غیر مناسب خوراک دینا بھی ان کی صحت کے لیے نقصان دہ ثابت ہو رہا ہے۔ ان کے مطابق چارے کے بجائے روٹیاں، برگر، پیزا، تربوز اور دیگر غیر متوازن غذائیں کھلانے سے مویشی بیمار ہو رہے ہیں۔
طبی ماہرین کا کہنا ہے کہ جانوروں میں چچڑ کی بیماری بھی تیزی سے پھیل رہی ہے، اس لیے منڈی سے جانور خریدتے وقت ان کے جسم اور کانوں کا اچھی طرح معائنہ کرنا چاہیے۔
ویٹرنری اسپتال انتظامیہ کے مطابق جانوروں کے لیے 24 گھنٹے مفت علاج، ادویات اور ایمبولینس سروس کی سہولت بھی فراہم کی جا رہی ہے تاکہ عید الاضحیٰ کے موقع پر شہریوں کو مشکلات کا سامنا نہ کرنا پڑے۔
ماہرین نے شہریوں کو ہدایت کی ہے کہ جانوروں کو سایہ دار جگہ پر رکھیں، صاف پانی فراہم کریں اور مناسب خوراک کا خاص خیال رکھیں تاکہ انہیں بیماریوں سے محفوظ رکھا جا سکے۔ -
ڈی آئی خان میں امن کمیٹی کے 4 ارکان قتل
ڈیرہ اسماعیل خان کے علاقے کلاچی کے گاؤں اٹل شریف میں نامعلوم مسلح افراد کی فائرنگ سے امن کمیٹی کے چار ارکان جاں بحق ہو گئے۔
پولیس کے مطابق حملہ آوروں نے اچانک فائرنگ کر دی جس کے نتیجے میں چار افراد موقع پر ہی جان سے گئے۔ جاں بحق افراد کا تعلق مقامی امن کمیٹی سے تھا، جو علاقے میں امن و امان برقرار رکھنے کے لیے سرگرم تھی۔
پولیس حکام کا کہنا ہے کہ حملہ آور ایک امن کمیٹی کے رکن کو اغوا کر کے اپنے ساتھ لے گئے، جبکہ واقعے کے بعد علاقے میں خوف و ہراس پھیل گیا۔
واقعے کے فوراً بعد پولیس اور سکیورٹی اہلکاروں نے علاقے کو گھیرے میں لے کر سرچ آپریشن شروع کر دیا۔ حکام کے مطابق ملزمان کی تلاش کے لیے مختلف مقامات پر کارروائیاں جاری ہیں۔
ذرائع کے مطابق اٹل شریف اور گردونواح کے علاقوں میں اضافی نفری بھی تعینات کر دی گئی ہے تاکہ صورتحال کو قابو میں رکھا جا سکے۔
مقامی افراد نے واقعے پر شدید افسوس اور تشویش کا اظہار کرتے ہوئے مطالبہ کیا ہے کہ حملہ آوروں کو فوری گرفتار کر کے سخت کارروائی کی جائے۔
خیبرپختونخوا کے مختلف اضلاع میں حالیہ مہینوں کے دوران امن کمیٹیوں اور سکیورٹی اہلکاروں پر حملوں میں اضافہ دیکھا گیا ہے، جس کے بعد سکیورٹی اداروں نے مختلف علاقوں میں انٹیلی جنس بیسڈ آپریشنز تیز کر دیے ہیں۔ -
ہیٹ اسٹروک کی خاموش علامات، جنہیں اکثر لوگ نظرانداز کر دیتے ہیں
دنیا بھر میں بڑھتے ہوئے درجہ حرارت اور شدید گرمی کی لہروں کے باعث ہیٹ اسٹروک کے کیسز میں اضافہ دیکھنے میں آ رہا ہے، تاہم ماہرین صحت کا کہنا ہے کہ اس بیماری کی کئی خطرناک علامات ایسی ہیں جنہیں لوگ عام تھکاوٹ سمجھ کر نظر انداز کر دیتے ہیں۔
ماہرین کے مطابق ہیٹ اسٹروک اس وقت ہوتا ہے جب جسم اپنے درجہ حرارت کو کنٹرول کرنے کی صلاحیت کھو دیتا ہے اور اندرونی حرارت خطرناک حد تک بڑھ جاتی ہے۔
ورلڈ ہیلتھ آرگنائزیشن کے مطابق شدید گرمی دنیا بھر میں موسم سے متعلق اموات کی سب سے بڑی وجوہات میں شامل ہے۔ گرمی نہ صرف جسمانی تھکن پیدا کرتی ہے بلکہ دمہ، دل کے امراض، ذیابیطس اور ذہنی صحت کے مسائل کو بھی مزید سنگین بنا سکتی ہے۔
طبی ماہرین کا کہنا ہے کہ ہیٹ اسٹروک کی ابتدائی علامات اکثر عام بیماریوں جیسی محسوس ہوتی ہیں، اسی لیے لوگ انہیں سنجیدگی سے نہیں لیتے۔ مسلسل تھکاوٹ، سر درد، جسم میں کمزوری، چکر آنا اور پانی کی کمی کو معمولی سمجھنا خطرناک ثابت ہو سکتا ہے۔
ماہرین نے خبردار کیا ہے کہ اگر ان علامات کے ساتھ بخار، قے، پٹھوں میں درد، دل کی دھڑکن تیز ہونا، جلد کا غیر معمولی طور پر گرم اور خشک ہو جانا یا بے ہوشی جیسا احساس پیدا ہو تو فوری طبی امداد حاصل کرنا ضروری ہے۔
صحت کے ماہرین کے مطابق جسم کا درجہ حرارت اگر 40 ڈگری سینٹی گریڈ سے تجاوز کر جائے تو یہ خطرناک صورتحال کی علامت ہو سکتی ہے۔
ڈاکٹروں کا کہنا ہے کہ بچے، بزرگ، دل اور ذیابیطس کے مریض، اور کھلے آسمان تلے کام کرنے والے افراد ہیٹ اسٹروک سے زیادہ متاثر ہو سکتے ہیں کیونکہ ان کا جسم درجہ حرارت کو مؤثر انداز میں کنٹرول نہیں کر پاتا۔
ماہرین نے شہریوں کو ہدایت کی ہے کہ شدید گرمی میں غیر ضروری طور پر دھوپ میں نکلنے سے گریز کریں، زیادہ پانی پئیں، ہلکے کپڑے استعمال کریں اور جسم میں پانی کی کمی نہ ہونے دیں۔ -
ایران جوہری ہتھیار نہیں چاہتا، دنیا کو یقین دلانے کو تیار ہیں: پزشکیان
ایرانی صدر مسعود پزشکیان نے کہا ہے کہ ایران دنیا کو یہ یقین دلانے کے لیے تیار ہے کہ وہ جوہری ہتھیار حاصل کرنے کا خواہاں نہیں۔
ایرانی خبر رساں ادارے ارنا کے مطابق صدر پزشکیان نے ٹیلیگرام پر جاری بیان میں کہا کہ ایران پہلے بھی واضح کر چکا ہے اور آج دوبارہ اس مؤقف کا اعادہ کرتا ہے کہ وہ جوہری ہتھیار نہیں چاہتا۔
انہوں نے کہا کہ آیت اللہ خامنہ ای کی ہلاکت سے قبل بھی ایران نے یہی مؤقف اختیار کیا تھا اور اب بھی دنیا کو اعتماد میں لینے کے لیے تیار ہے۔
ایرانی صدر نے اپنے بیان میں کہا کہ ایران خطے میں عدم استحکام نہیں چاہتا بلکہ اسرائیلی حکومت خطے کو غیر مستحکم کرنے کی کوشش کر رہی ہے۔
تاہم انہوں نے اس بات پر زور دیا کہ ایرانی مذاکرات کار قومی عزت، خودمختاری اور وقار پر کسی قسم کا سمجھوتہ نہیں کریں گے۔
یہ بیان ایسے وقت میں سامنے آیا ہے جب امریکا اور ایران کے درمیان جاری مذاکرات میں اہم پیش رفت کی اطلاعات سامنے آ رہی ہیں، جبکہ امریکی وزیر خارجہ مارکو روبیو نے عندیہ دیا ہے کہ صدر ڈونلڈ ٹرمپ جلد مذاکرات سے متعلق اہم اعلان کر سکتے ہیں۔
تجزیہ کاروں کے مطابق ایرانی صدر کا حالیہ بیان عالمی برادری کو اعتماد میں لینے اور جاری سفارتی کوششوں کو آگے بڑھانے کی کوشش قرار دیا جا رہا ہے، خاص طور پر ایسے وقت میں جب آبنائے ہرمز، اقتصادی پابندیوں اور جوہری پروگرام کے معاملات پر حساس مذاکرات جاری ہیں۔ -
کراچی میں پولیس نفری کی کمی، جرائم پر قابو پانا مشکل
کراچی میں بڑھتے ہوئے جرائم کی ایک بڑی وجہ پولیس نفری کی شدید کمی قرار دی جا رہی ہے، جہاں عالمی معیار کے مقابلے میں شہر میں پولیس اہلکاروں کی تعداد انتہائی کم ہے۔
سرکاری اعداد و شمار کے مطابق کراچی کی آبادی 2 کروڑ 3 لاکھ سے تجاوز کر چکی ہے، جبکہ ماہرین کے مطابق روزگار اور دیگر وجوہات کی بنا پر دوسرے شہروں سے آنے والے لاکھوں افراد بھی شہر میں مقیم ہیں، جو سرکاری اعداد و شمار میں شامل نہیں۔
ماہرینِ سماجیات کا کہنا ہے کہ بغیر منصوبہ بندی کے قائم ہونے والی آبادیوں، بڑھتی مہنگائی، بے روزگاری اور محدود معاشی مواقع نے جرائم میں اضافے کی راہ ہموار کی ہے۔
کراچی پولیس کے تین زونز اور 8 اضلاع میں مجموعی طور پر 110 تھانے قائم ہیں۔ ایسٹ زون میں ضلع ایسٹ، کورنگی اور ملیر شامل ہیں جہاں تقریباً 11 ہزار 500 افسران و اہلکار تعینات ہیں۔
ویسٹ زون میں ضلع ویسٹ اور سینٹرل شامل ہیں جہاں مجموعی طور پر 6750 اہلکار فرائض انجام دے رہے ہیں، جبکہ ساوتھ زون میں ضلع ساؤتھ، سٹی اور کیماڑی شامل ہیں جہاں 8100 پولیس اہلکار تعینات ہیں۔
اعداد و شمار کے مطابق کراچی میں جرائم کی روک تھام کے لیے مجموعی طور پر 26 ہزار 350 اہلکار تعینات ہیں، جن میں آپریشنل پولیس اور تفتیشی افسران شامل ہیں۔
اس کے علاوہ 16 ہزار 152 افسران و اہلکار دفتری امور اور دیگر انتظامی شعبوں میں خدمات انجام دے رہے ہیں، جبکہ وی وی آئی پی اور وی آئی پی سیکیورٹی پر 5461 اہلکار تعینات ہیں۔
عالمی معیار کے مطابق ہر 300 سے 400 شہریوں کے لیے ایک پولیس اہلکار ہونا چاہیے، تاہم کراچی میں صورتحال اس کے برعکس ہے جہاں 774 شہریوں پر صرف ایک پولیس اہلکار موجود ہے۔
ماہرین کے مطابق پولیس نفری کی کمی، وسائل کا فقدان اور آبادی میں تیزی سے اضافہ کراچی میں جرائم پر قابو پانے کی کوششوں کو متاثر کر رہا ہے، جس کے باعث شہری عدم تحفظ کا شکار ہیں۔ -
ایران نے ہرمزگان میں اسرائیلی جاسوس ڈرون مار گرایا
ایرانی خبر رساں ایجنسی کے مطابق ایرانی فوج نے صوبہ ہرمزگان میں ایک اسرائیلی جاسوس اور نگرانی کرنے والا ڈرون مار گرایا ہے۔
رپورٹ میں بتایا گیا ہے کہ تباہ ہونے والا ڈرون اسرائیلی ساختہ “آربیٹر” ڈرون تھا جو مبینہ طور پر نگرانی اور جاسوسی مقاصد کے لیے استعمال کیا جا رہا تھا۔
ایرانی حکام کے مطابق ڈرون کو صوبہ ہرمزگان کی فضائی حدود میں نشانہ بنایا گیا، جس کے بعد اس کا ملبہ ایرانی بحریہ کے تعاون سے تلاش کر لیا گیا۔
ایرانی میڈیا کا کہنا ہے کہ سیکیورٹی فورسز نے فوری کارروائی کرتے ہوئے ڈرون کی نقل و حرکت کو مانیٹر کیا اور مناسب وقت پر اسے تباہ کر دیا۔
رپورٹس کے مطابق ہرمزگان صوبہ جغرافیائی اور عسکری اعتبار سے انتہائی اہم سمجھا جاتا ہے کیونکہ یہ آبنائے ہرمز کے قریب واقع ہے، جہاں حالیہ مہینوں میں کشیدگی میں نمایاں اضافہ دیکھا گیا ہے۔
تجزیہ کاروں کے مطابق ایران اور اسرائیل کے درمیان بڑھتی ہوئی کشیدگی کے تناظر میں ایسے واقعات خطے میں مزید تناؤ پیدا کر سکتے ہیں، خاص طور پر ایسے وقت میں جب امریکا، ایران اور خطے کے دیگر ممالک کے درمیان سفارتی سرگرمیاں بھی جاری ہیں۔
ایرانی حکام نے اس واقعے کو ملکی سلامتی کے خلاف کارروائی قرار دیتے ہوئے کہا ہے کہ ایران اپنی فضائی اور بحری حدود کے دفاع کے لیے مکمل طور پر تیار ہے۔ -
وزیراعظم شہباز شریف بیجنگ پہنچ گئے
وزیراعظم شہباز شریف چین کے سرکاری دورے کے دوران ہانگژو میں اپنی مصروفیات مکمل کرنے کے بعد بیجنگ پہنچ گئے ہیں۔
چینی دارالحکومت پہنچنے پر وزیراعظم کا استقبال چین کے وزیر ماحولیات ہوانگ رون کیو نے کیا۔
وزیراعظم شہباز شریف اپنے دورۂ چین کے دوران اعلیٰ چینی قیادت سے اہم ملاقاتیں کریں گے، جن میں دوطرفہ تعلقات، اقتصادی تعاون، سرمایہ کاری، سی پیک اور خطے کی صورتحال پر تبادلہ خیال متوقع ہے۔
ذرائع کے مطابق وزیراعظم بیجنگ میں پاکستان اور چین کے درمیان سفارتی تعلقات کے 75 سال مکمل ہونے کی تقریبات میں بھی شرکت کریں گے۔
اس سے قبل ہانگژو میں وزیراعظم نے پاکستان چین بزنس ٹو بزنس انویسٹمنٹ کانفرنس میں شرکت کی جہاں دونوں ممالک کے سرمایہ کاروں اور کاروباری شخصیات نے اقتصادی تعاون بڑھانے پر زور دیا۔
سیاسی مبصرین کے مطابق وزیراعظم کا یہ دورہ پاکستان اور چین کے درمیان اسٹریٹجک شراکت داری کو مزید مضبوط بنانے میں اہم کردار ادا کرے گا، جبکہ خطے کی بدلتی صورتحال میں دونوں ممالک کی سفارتی ہم آہنگی بھی زیرِ بحث آئے گی۔ -
لاہور سے کراچی جانے والی ٹرینوں میں فنی خرابیاں، مسافروں کو شدید مشکلات
لاہور سے کراچی سفر کرنے والے مسافروں کو اس وقت شدید مشکلات کا سامنا کرنا پڑا جب دو اہم ٹرینوں میں فنی خرابیاں سامنے آ گئیں۔
رپورٹس کے مطابق کراچی ایکسپریس کو مہراب پور اور پڈی دان کے درمیان انجن میں خرابی کا سامنا کرنا پڑا، جس کے باعث ٹرین کو ٹریک پر روکنا پڑا۔
صورتحال اس وقت مزید خراب ہو گئی جب ٹرین کی پاور وین بھی خراب ہو گئی، جس کے نتیجے میں ایئر کنڈیشننگ سسٹم بند ہو گیا اور شدید گرمی میں مسافر سخت اذیت کا شکار ہو گئے۔
مسافروں نے شکایت کی کہ کئی گھنٹوں تک نہ مناسب معلومات فراہم کی گئیں اور نہ ہی متبادل انتظامات کیے گئے، جس سے خواتین، بچوں اور بزرگوں کو خاص طور پر مشکلات کا سامنا کرنا پڑا۔
دوسری جانب کراچی جانے والی گرین لائن ٹرین میں بھی ایک تشویشناک واقعہ پیش آیا جہاں دو بوگیوں کو جوڑنے والی اسٹیل پلیٹ سفر کے دوران ٹوٹ گئی۔
رپورٹس کے مطابق خرابی کے باوجود ریلوے عملے نے متاثرہ حصے کو کپڑے کی پٹی سے باندھ کر ٹرین کو دوبارہ روانہ کر دیا، جس پر مسافروں نے شدید تحفظات کا اظہار کیا ہے۔
اس واقعے نے ریلوے کے حفاظتی انتظامات اور مینٹیننس کے معیار پر سنگین سوالات کھڑے کر دیے ہیں، جبکہ سوشل میڈیا پر بھی صارفین نے ریلوے حکام کو سخت تنقید کا نشانہ بنایا۔
شہریوں نے مطالبہ کیا ہے کہ ٹرینوں کی بروقت مرمت اور مسافروں کی حفاظت کو یقینی بنانے کے لیے فوری اقدامات کیے جائیں تاکہ مستقبل میں ایسے خطرناک واقعات سے بچا جا سکے۔ -
روس کا یوکرین پر ہائپرسونک میزائلوں اور 600 ڈرونز سے بڑا حملہ
روس نے یوکرین پر ایک بار پھر بڑے پیمانے پر فضائی حملہ کرتے ہوئے ہائپرسونک اور بیلسٹک میزائلوں سمیت سیکڑوں ڈرونز استعمال کیے، جس کے نتیجے میں دارالحکومت کیف اور ساحلی شہر اوڈیسا میں شدید تباہی اور خوف و ہراس پھیل گیا۔
رپورٹس کے مطابق روس نے یوکرینی حدود میں تقریباً 600 ڈرونز اور 90 میزائل داغے، جن میں جدید ہائپرسونک اور بیلسٹک میزائل بھی شامل تھے۔ حملوں کے دوران مختلف علاقوں میں دھماکوں اور آگ کے بڑے شعلے دیکھے گئے جبکہ آسمان پر دھوئیں کے بادل چھا گئے۔
یوکرینی حکام کے مطابق کیف میں فضائی حملے کے سائرن مسلسل بجتے رہے اور شہری اپنی جانیں بچانے کے لیے انڈر گراؤنڈ میٹرو اسٹیشنز اور محفوظ پناہ گاہوں میں منتقل ہوتے رہے۔
حکام کا کہنا ہے کہ حملوں کے نتیجے میں متعدد رہائشی اور تجارتی عمارتوں کو شدید نقصان پہنچا، تاہم ہلاکتوں اور زخمیوں کی حتمی تعداد فوری طور پر جاری نہیں کی گئی۔
دوسری جانب روسی میڈیا نے دعویٰ کیا ہے کہ یہ حملے لوہانسک ریجن میں ایک اسکول ہاسٹل پر یوکرینی کارروائی کے جواب میں کیے گئے، جہاں روس کے مطابق 21 افراد ہلاک اور 63 زخمی ہوئے تھے۔
یوکرین نے روسی دعوؤں کو مسترد کرتے ہوئے کہا ہے کہ ماسکو بے بنیاد الزامات کو جواز بنا کر یوکرینی شہروں اور عام شہریوں کو مسلسل نشانہ بنا رہا ہے۔
یوکرینی حکومت نے عالمی برادری سے فوری مداخلت اور شہریوں کے تحفظ کے لیے ہنگامی اقدامات کا مطالبہ کیا ہے، جبکہ تجزیہ کاروں کا کہنا ہے کہ حالیہ حملے جنگ میں مزید شدت آنے کا اشارہ ہیں۔