Author: Aqsa Younas Rana

‎ایران کے قومی سلامتی سے متعلق پارلیمانی کمیشن نے خبردار کیا ہے کہ سپریم لیڈر آیت اللہ سید علی خامنہ ای پر کسی بھی قسم کا حملہ پوری مسلم دنیا کے خلاف اعلانِ جنگ تصور کیا جائے گا۔
‎ایرانی پارلیمانی کمیشن کی جانب سے جاری بیان میں کہا گیا ہے کہ اگر آیت اللہ خامنہ ای کو نشانہ بنایا گیا تو علما کی جانب سے جہاد کا فتویٰ جاری کیا جائے گا، جس کے بعد دنیا بھر میں اسلام کے سپاہیوں کی جانب سے ردعمل سامنے آئے گا۔
‎بیان میں مزید کہا گیا کہ ایران اپنی قیادت اور خودمختاری پر کسی بھی حملے کا بھرپور جواب دینے کی صلاحیت رکھتا ہے۔
‎خیال رہے کہ گزشتہ ہفتے اسرائیل میں سابق امریکی سفیر نے دعویٰ کیا تھا کہ امریکی صدر ڈونلڈ ٹرمپ آیت اللہ خامنہ ای کو قتل کروانے کی کوشش کر سکتے ہیں۔ سابق سفیر کے مطابق ایرانی سپریم لیڈر 86 برس کے ہو چکے ہیں اور شدید علیل ہیں، اس لیے ایران کو نئی قیادت کی ضرورت ہے۔
‎ادھر ایرانی صدر نے بھی واضح کیا ہے کہ آیت اللہ خامنہ ای پر کوئی بھی حملہ مکمل جنگ کا سبب بنے گا۔
‎چند روز قبل امریکی صدر ڈونلڈ ٹرمپ نے بھی ایک بیان میں کہا تھا کہ ایران میں نئی قیادت کی تلاش کا وقت آ گیا ہے۔ اس سے قبل ایرانی سپریم لیڈر نے ایران میں بدامنی اور ہلاکتوں کا ذمہ دار ٹرمپ کو قرار دیا تھا۔
‎ایرانی قیادت کے اس بیان پر ردعمل دیتے ہوئے ٹرمپ کا کہنا تھا کہ تہران کے حکمران حکومت چلانے کے لیے جبر اور تشدد پر انحصار کرتے ہیں، جس کی مثال ماضی میں نہیں ملتی۔


امریکی فوج نے ایف 15 ای لڑاکا طیاروں کا ایک اسکواڈرن مشرق وسطیٰ کے ایک اڈے پر پہنچا دیا ہے۔
‎سوشل میڈیا پلیٹ فارم ایکس پر جاری بیان میں امریکی سینٹ کام نے بتایا کہ ایف 15 ای اسکواڈرن 18 جنوری کو خطے میں تعینات کیا گیا۔
‎امریکی سینٹ کام کے مطابق اس تعیناتی کا مقصد جنگی تیاریوں کو مضبوط بنانا اور مشرق وسطیٰ میں استحکام کو فروغ دینا ہے۔


سعودی عرب نے کراچی کے گل پلازہ میں ہونے والی ہولناک آتشزدگی پر گہرے دکھ اور افسوس کا اظہار کیا ہے، جس کے نتیجے میں قیمتی انسانی جانیں ضائع ہوئیں اور متعدد افراد زخمی ہوئے۔
سعودی وزارتِ خارجہ کی جانب سے جاری بیان میں کہا گیا ہے کہ پاکستان سعودی عرب کا برادر اور دوست اسلامی ملک ہے، اور اس المناک سانحے پر سعودی حکومت اور عوام پاکستان کے ساتھ مکمل یکجہتی اور ہمدردی کا اظہار کرتے ہیں۔
‎بیان میں واقعے میں جاں بحق افراد کے اہلِ خانہ سے تعزیت کی گئی جبکہ زخمیوں کی جلد صحتیابی کے لیے نیک تمناؤں کا اظہار بھی کیا گیا۔
‎واضح رہے کہ کراچی میں ایم اے جناح روڈ پر واقع گل پلازہ میں 17 جنوری کی رات خوفناک آگ بھڑک اٹھی تھی۔ حکام کے مطابق اب تک 27 افراد کی لاشیں نکالی جا چکی ہیں، جبکہ 81 کے قریب افراد تاحال لاپتہ ہیں۔
‎محکمہ فائر بریگیڈ نے اعلیٰ حکام کو بریفنگ میں بتایا کہ گل پلازہ کم و بیش پونے دو ایکڑ رقبے پر مشتمل شاپنگ سینٹر تھا، جس میں 1200 سے زائد دکانیں موجود تھیں اور آگ ایک ہی وقت میں متعدد حصوں میں پھیل گئی تھی۔


فرانسیسی صدر ایمانوئل میکرون نے کہا ہے کہ فرانس نے ڈنمارک سے اظہارِ یکجہتی کے لیے گرین لینڈ میں فوج بھیج دی ہے۔ بین الاقوامی میڈیا رپورٹس کے مطابق صدر میکرون نے میڈیا سے گفتگو میں کہا کہ یورپ کو بعض اہم شعبوں میں چین کی سرمایہ کاری کی ضرورت ہے، تاہم یورپ کو ’’یورپ ترجیح‘‘ کے اصول پر ثابت قدم رہنا ہوگا۔
‎صدر میکرون کا کہنا تھا کہ فرانس چاہتا ہے یورپ عالمی مالیاتی اداروں کے اسٹرکچر پر مضبوط مؤقف اختیار کرے۔ انہوں نے الزام عائد کیا کہ امریکا پابندیوں کے ذریعے دیگر ممالک کو اپنے تابع کرنے کی کوشش کر رہا ہے، جبکہ تجارتی مساوی مواقع کا مطالبہ بے جا تحفظ پسندی نہیں۔ ان کے بقول دنیا ایک ایسے مرحلے کی طرف بڑھ رہی ہے جہاں اصول کمزور ہوتے جا رہے ہیں۔
‎دوسری جانب امریکی ٹیرف کے اعلان کے بعد برلن اور پیرس نے صدر ڈونلڈ ٹرمپ کے ٹیرف کے خلاف مشترکہ حکمتِ عملی بنانے پر اتفاق کر لیا ہے۔ جرمن چانسلر فریڈرک مرز نے پیر کے روز کہا کہ برلن اور پیرس اس ہفتے برسلز میں ہونے والے یورپی یونین کے 27 رہنماؤں کے اجلاس سے قبل امریکی ٹیرف دھمکیوں کو ناکام بنانے کے لیے قریبی مشاورت کریں گے۔
‎اتوار کو فرانسیسی صدر کے دفتر نے یورپی یونین سے مطالبہ کیا کہ وہ بلاک کے انسدادِ جبر ضابطے کو فعال کرے، جسے ’’ٹریڈ بزوکا‘‘ کہا جاتا ہے۔ تاہم امریکا کے ساتھ تجارت پر زیادہ انحصار کے باعث جرمنی، فرانس کے مقابلے میں واشنگٹن کے خلاف سخت جوابی اقدامات پر اب تک محتاط رویہ اختیار کرتا رہا ہے۔
‎واضح رہے کہ امریکی ٹی وی کو دیے گئے ایک ٹیلی فونک انٹرویو میں صدر ڈونلڈ ٹرمپ نے کہا تھا کہ دنیا اس وقت تک محفوظ نہیں ہو سکتی جب تک گرین لینڈ امریکا کے کنٹرول میں نہ ہو۔ انہوں نے دعویٰ کیا کہ گرین لینڈ حاصل کرنا امریکا کی قومی سلامتی کے لیے ضروری ہے۔ طاقت کے استعمال سے متعلق سوال پر ٹرمپ نے تبصرہ کرنے سے گریز کیا۔
‎امریکی صدر نے یہ بھی اعلان کیا تھا کہ گرین لینڈ کے معاملے پر دباؤ ڈالنے کے لیے ڈنمارک سمیت آٹھ یورپی ممالک پر ٹیرف عائد کیے جائیں گے۔ ٹرمپ کا کہنا تھا کہ انہیں نوبل امن انعام کی کوئی پروا نہیں، کیونکہ یہ ناروے کے کنٹرول میں ہے، چاہے وہ اس کی تردید ہی کیوں نہ کریں۔


امریکی صدر ڈونلڈ ٹرمپ کی جانب سے نئے ٹیرف عائد کرنے کی دھمکیوں کے بعد جرمنی اور فرانس نے ان کے خلاف مشترکہ حکمتِ عملی اختیار کرنے پر اتفاق کر لیا ہے۔
‎جرمن چانسلر فریڈرک مرز نے پیر کے روز کہا کہ برلن اور پیرس اس ہفتے برسلز میں ہونے والے یورپی یونین کے 27 رہنماؤں کے اجلاس سے قبل امریکی ٹیرف دھمکیوں کا جواب دینے کے لیے باہمی مشاورت کریں گے۔ ان کے مطابق مقصد ایک ایسا مشترکہ مؤقف طے کرنا ہے جو یورپی یونین کی سطح پر اختیار کیا جا سکے۔
‎اتوار کے روز فرانسیسی صدر ایمانوئل میکرون کے دفتر نے یورپی یونین پر زور دیا تھا کہ وہ بلاک کے انسدادِ جبر ضابطے کو فعال کرے، جسے غیر رسمی طور پر ’’ٹریڈ بزوکا‘‘ کہا جاتا ہے۔ یہ ضابطہ یورپی یونین کو بیرونی تجارتی دباؤ کے خلاف سخت جوابی اقدامات کی اجازت دیتا ہے۔
‎تاہم جرمنی، جو امریکا کے ساتھ تجارت پر فرانس کے مقابلے میں زیادہ انحصار کرتا ہے، اب تک واشنگٹن کے خلاف فوری اور سخت ردِعمل سے گریز کرتا رہا ہے۔ پولیٹیکو یورپ کے مطابق فریڈرک مرز نے کہا کہ امریکی ٹیرف سے فرانس نسبتاً زیادہ متاثر ہوا ہے، اسی لیے فرانسیسی حکومت اس معاملے پر زیادہ سخت مؤقف اختیار کرنا چاہتی ہے، لیکن اس کے باوجود دونوں ممالک ایک مشترکہ حکمتِ عملی پر متفق ہونے کی کوشش کر رہے ہیں۔
‎مرز نے واضح کیا کہ جرمنی کشیدگی میں اضافہ نہیں چاہتا اور اسی تناظر میں وہ بدھ کے روز ڈیوس میں صدر ٹرمپ سے ملاقات کے خواہاں ہیں۔ تاہم ان کا کہنا تھا کہ اگر ضرورت پڑی تو یورپی یونین جوابی کارروائی کے لیے تیار ہے اور تمام آپشنز کھلے رکھے جائیں گے۔
‎دوسری جانب جرمن حکومت کے ترجمان نے کہا ہے کہ صدر ٹرمپ کی جانب سے ٹیرف سے متعلق دھمکیاں ناقابلِ قبول ہیں۔ فرانسیسی صدر نے بھی یورپی یونین پر زور دیا ہے کہ اگر امریکا اضافی محصولات عائد کرتا ہے تو بلاک کو متحد ہو کر جواب دینا چاہیے۔
‎یورپی کمیشن کے ترجمان کے مطابق امریکی ٹیرف دھمکیوں پر رکن ممالک کے ساتھ مشاورت جاری ہے، اور یورپی یونین اپنے تجارتی مفادات کے تحفظ کے لیے ہر ضروری قدم اٹھائے گی۔