Author: Aqsa Younas Rana

‎چینی وزیر خارجہ وانگ یی نے صومالیہ کے ہم منصب سے ٹیلی فون پر رابطہ کیا ہے۔ رپورٹس کے مطابق اس موقع پر چینی وزیر خارجہ نے صومالی لینڈ کے مسئلے پر اپنی بھرپور حمایت کا اعادہ کیا۔
‎وانگ یی نے کہا کہ بیجنگ صومالیہ کی خودمختاری کے تحفظ میں ہمیشہ اس کے ساتھ کھڑا ہے اور صومالی لینڈ کے تائیوانی حکام کے ساتھ کسی بھی نوعیت کی ملی بھگت کو مسترد کرتا ہے۔
‎دو دن قبل چینی وزیر خارجہ نے سیکیورٹی صورتحال کے باعث صومالیہ کا دورہ منسوخ کر دیا تھا۔


مودی سرکار اپنے شہریوں کی جاسوسی کی کوششوں سے باز نہیں آئی۔ خبر رساں ایجنسی کے مطابق بھارتی حکومت نے موبائل ڈیوائسز پر مکمل حکومتی کنٹرول کے لیے قانون سازی پر غور شروع کر دیا ہے اور موبائل بنانے والی کمپنیوں سے سورس کوڈ تک رسائی کا مطالبہ کر رہی ہے۔
‎حکومت کا منصوبہ ہے کہ سافٹ ویئر اپڈیٹس بھی حکومتی منظوری کے بغیر جاری نہ ہوں۔
‎غیر ملکی کمپنیوں نے اس اقدام پر تحفظات کا اظہار کرتے ہوئے کہا ہے کہ مودی سرکار کی یہ خواہش دنیا میں کہیں بھی نہیں دیکھی گئی اور اس اقدام سے کمپنیوں کے تجارتی راز افشا ہونے کا خطرہ پیدا ہو جائے گا۔


ایران میں پرتشدد مظاہروں کا سلسلہ جاری ہے، جہاں شرپسند عناصر نے درجنوں گاڑیوں کو آگ لگا دی اور سرکاری عمارتوں پر پیٹرول بم پھینکے۔ غیر مصدقہ ذرائع کے مطابق ہلاکتوں کی تعداد 200 سے تجاوز کر گئی ہے۔
ایران میں حکومت اور مظاہرین کے درمیان کشیدگی برقرار ہے اور گزشتہ رات تہران میں بھی پُرتشدد مظاہرے ہوئے۔ ایرانی میڈیا کے مطابق مظاہروں میں 109 سیکیورٹی اہلکار ہلاک ہوئے، جبکہ غیر ملکی خبر ایجنسی کے مطابق پولیس کے ساتھ جھڑپوں میں 116 مظاہرین جان سے گئے۔
‎ایرانی پولیس نے اب تک 2600 سے زائد مظاہرین کو گرفتار کر لیا ہے۔ تہران میں صبح کے وقت صورتحال معمول پر آگئی، بازار کھل گئے اور ٹریفک بھی معمول کے مطابق رواں دواں ہے، تاہم شہر میں سیکیورٹی سخت کر دی گئی ہے۔


لندن میں کبوتروں کو دانہ ڈالنے پر ایک خاتون کو گرفتار کر کے ہتھکڑی لگا دی گئی، جس کی ویڈیو سوشل میڈیا پر وائرل ہو گئی اور واقعے نے شدید بحث چھیڑ دی۔ یہ واقعہ بدھ کے روز برطانوی دارالحکومت کے علاقے ہیرو میں پیش آیا۔
‎سوشل میڈیا پر گردش کرنے والی ویڈیو میں دیکھا جا سکتا ہے کہ کم از کم چھ پولیس اہلکار اور مقامی کونسل کے ورکرز ویلڈسٹون ہائی اسٹریٹ پر ایک 40 سال سے زائد عمر کی خاتون کو حراست میں لے رہے ہیں۔ فوٹیج کے مطابق دوپہر تقریباً ڈھائی بجے خاتون کو ہتھکڑی لگائی گئی، ان کی جیبوں کی تلاشی لی گئی اور بعد ازاں انہیں پولیس وین میں بٹھا کر لے جایا گیا۔
‎ویڈیو میں خاتون کو شدید پریشانی کی حالت میں دیکھا جا سکتا ہے، جبکہ موقع پر موجود راہگیر اس کارروائی پر حیرت اور غصے کا اظہار کرتے نظر آتے ہیں۔ ایک شخص کو بار بار یہ کہتے ہوئے سنا جا سکتا ہے کہ یہ اقدام مضحکہ خیز ہے، جبکہ دیگر افراد بھی پولیس سے سوال کرتے دکھائی دیتے ہیں۔
‎ہیرو کی مقامی کونسل کے ترجمان کے مطابق خاتون نے پرندوں کو دانہ ڈالنے سے متعلق پبلک اسپیسز پروٹیکشن آرڈر (PSPO) کی خلاف ورزی کی، جس پر انہیں 100 پاؤنڈ جرمانہ عائد کیا گیا۔ کونسل کا کہنا ہے کہ یہ قانون عوامی مقامات پر صفائی اور صحت عامہ کے تحفظ کے لیے نافذ کیا گیا ہے۔


امریکا میں امیگریشن اینڈ کسٹمز انفورسمنٹ (ICE) کے اہلکار کی فائرنگ سے ایک خاتون کے قتل کے بعد ملک بھر میں شدید عوامی ردعمل سامنے آیا ہے۔ ہزاروں افراد نے امیگریشن ڈپارٹمنٹ کے حراستی مراکز کے باہر مظاہرے کیے اور حکومتی کارروائی کے خلاف احتجاج کیا۔
کانگریس کی رکن الہان عمر سمیت تین ارکان احتجاج میں شرکت کے لیے آئے تو انہیں وہاں پہنچنے سے روک دیا گیا۔ الہان عمر نے اس موقع پر کہا کہ “امریکا میں جمہوریت مر رہی ہے۔”
‎لاس اینجلس میں بھی شہریوں نے احتجاج کیا اور پولیس نے درجنوں مظاہرین کو گرفتار کیا۔ بوسٹن میں مظاہرین نے اس قتل میں ملوث اہلکاروں کی فوری گرفتاری اور تارکین وطن پر جاری کریک ڈاؤن روکنے کا مطالبہ کیا۔
‎مظاہروں سے ظاہر ہوتا ہے کہ عوام اور قانون ساز دونوں ہی ICE کی کارروائیوں کے خلاف شدید ناراض ہیں اور ملک میں امیگریشن نظام کی شفافیت اور انسانی حقوق کے تحفظ کے لیے آواز بلند کر رہے ہیں۔


بھارت اور بنگلا دیش کے تعلقات میں دراڑ مزید گہری ہو گئی ہے، جسے نیویارک ٹائمز نے اپنی حالیہ رپورٹ میں بے نقاب کیا ہے۔ امریکی اخبار کے مطابق شیخ حسینہ واجد کی حکومت کے خاتمے کے بعد دونوں ملکوں کے تعلقات ٹوٹ پھوٹ کا شکار ہیں اور بھارت حسینہ واجد کو انصاف کے کٹہرے میں لانے کی راہ میں رکاوٹ بن رہا ہے۔
‎رپورٹ میں یہ بھی کہا گیا ہے کہ ہندو انتہا پسندوں کے دباؤ پر بنگلا دیشی کھلاڑی کو آئی پی ایل سے نکال دیا گیا، جس کے جواب میں بنگلا دیش نے ٹیم کو ورلڈ کپ کے لیے بھارت نہ بھیجنے کا اعلان کیا۔ بھارت اور بنگلا دیش کے درمیان یہ اختلافات دونوں ملکوں میں انتخابی نعرے کی شکل اختیار کر چکے ہیں۔
‎اخبار کے مطابق بھارت کی خود کو طاقت کے طور پر منوانے کی کوششیں ناکام ہو گئی ہیں اور 1971ء کے بعد پہلی بار بھارت نے ڈھاکا میں اپنی خصوصی حیثیت کھو دی ہے۔ رپورٹ میں مزید کہا گیا کہ بھارت محمد یونس کی عبوری حکومت کے خاتمے کا انتظار کر رہا ہے تاکہ اپنی اثر و رسوخ کی پوزیشن بحال کر سکے۔