Author: Aqsa Younas Rana


یوٹیوب نے اسمارٹ ٹی وی صارفین کے لیے ایک نیا اور مفید فیچر متعارف کرا دیا ہے جس کے ذریعے اب ویڈیوز دیکھتے ہوئے مصنوعی ذہانت کے اسسٹنٹ سے براہِ راست بات چیت کی جا سکے گی۔
رپورٹس کے مطابق ’آسک‘ نامی یہ فیچر پہلے موبائل ڈیوائسز پر دستیاب تھا، تاہم اب اسے اسمارٹ ٹی ویز کا بھی حصہ بنا دیا گیا ہے، جس سے صارفین کا ویونگ تجربہ مزید بہتر ہو جائے گا۔
‎اس فیچر کی مدد سے صارفین ویڈیو دیکھتے ہوئے سوال پوچھ سکتے ہیں اور اے آئی اسسٹنٹ سے متعلقہ معلومات یا وضاحت حاصل کر سکتے ہیں، جو ویڈیو کے مواد کے مطابق جواب فراہم کرے گا۔
‎اسے استعمال کرنے کے لیے صارفین یوٹیوب ایپ میں ویڈیو چلاتے ہوئے ریموٹ کے اپ یا ڈاؤن بٹن کو دبائیں، جس سے ویڈیو کی تفصیلات ظاہر ہوں گی، وہاں موجود فور پوائنٹ اسٹار آئیکن ’آسک‘ بٹن ہے، جس پر کلک کر کے مائیکروفون کے ذریعے سوال کیا جا سکتا ہے۔
‎اگر ٹی وی میں مائیکروفون دستیاب نہ ہو تو صارفین تجویز کردہ سوالات کے ذریعے بھی اس فیچر سے فائدہ اٹھا سکتے ہیں۔
‎یہ فیچر ابتدائی طور پر 2024 میں یوٹیوب پریمیئم صارفین کے لیے متعارف کرایا گیا تھا جبکہ 2025 میں اسے تمام صارفین کے لیے دستیاب کر دیا گیا، اور اب اسے اسمارٹ ٹی وی پلیٹ فارم پر بھی شامل کر لیا گیا ہے۔
‎کمپنی کے مطابق یہ فیچر فی الحال مخصوص زبانوں اور خطوں میں دستیاب ہے اور اسے مرحلہ وار دنیا بھر میں متعارف کرایا جا رہا ہے۔


ایرانی میزائل حملے کے نتیجے میں اسرائیل کے مرکزی علاقے میں قائم ایک اہم ڈرون فیکٹری مکمل طور پر تباہ ہو گئی ہے، جس کی تصدیق اسرائیلی حکام نے بھی کر دی ہے۔
رپورٹس کے مطابق اسرائیلی شہر بیتح تیکفا میں چند روز قبل ایرانی میزائل براہ راست فیکٹری پر آ گرا، جس کے نتیجے میں عمارت کو شدید نقصان پہنچا اور فیکٹری مکمل طور پر ناکارہ ہو گئی۔
‎اسرائیلی حکام کا کہنا ہے کہ متاثرہ فیکٹری دوبارہ کام کرنے کے قابل نہیں رہی اور اس کی بحالی ممکن نہیں دکھائی دیتی۔
‎حکام کے مطابق یہ فیکٹری اسرائیلی دفاعی صنعت کا اہم حصہ تھی، جہاں فوج کے لیے ڈرونز، پائلٹ ہیلمٹس اور بموں کے مختلف پرزے تیار کیے جاتے تھے۔
‎ماہرین کے مطابق اس حملے سے اسرائیل کی دفاعی پیداوار اور عسکری صلاحیت پر اثر پڑ سکتا ہے، خاص طور پر ایسے وقت میں جب خطے میں کشیدگی مسلسل بڑھ رہی ہے۔
‎یہ واقعہ ایران اور اسرائیل کے درمیان جاری کشیدگی میں ایک اہم پیش رفت کے طور پر دیکھا جا رہا ہے، جس کے مزید اثرات سامنے آنے کا امکان ہے۔


امریکی صدر ڈونلڈ ٹرمپ نے ایران کو سخت دھمکی دیتے ہوئے کہا ہے کہ اگر جلد معاہدہ نہ ہوا تو وہ ایران میں بڑے پیمانے پر تباہی اور تیل پر قبضے پر غور کر رہے ہیں۔
امریکی میڈیا سے ٹیلیفونک گفتگو میں ٹرمپ نے کہا کہ اگر معاملات حل نہ ہوئے تو ایران بھر میں پلوں اور پاور پلانٹس کو نشانہ بنایا جا سکتا ہے، اور دنیا ایسی صورتحال دیکھ سکتی ہے جو پہلے کبھی نہیں دیکھی گئی۔
‎انہوں نے کہا کہ اس بات کا قوی امکان ہے کہ پیر تک کوئی معاہدہ طے پا جائے، کیونکہ ایران کے کچھ عہدیدار بات چیت میں مصروف ہیں۔ ٹرمپ کے مطابق موجودہ ایرانی مذاکرات کاروں کو محدود وقت کے لیے مہلت دی گئی ہے۔
‎ٹرمپ نے ایک متنازع بیان میں یہ بھی کہا کہ امریکا نے رواں سال ایرانی مظاہرین کی مدد کے لیے کردوں کے ذریعے اسلحہ بھیجا تھا، تاہم ان کے بقول یہ ہتھیار ممکنہ طور پر کردوں نے خود رکھ لیے۔


ایرانی خبررساں ایجنسی کے مطابق امریکی صدر ڈونلڈ ٹرمپ کو نشانہ بنانے سے متعلق ایک متنازع کراؤڈ فنڈ مہم میں 5 کروڑ ڈالر سے زائد رقم جمع ہونے کا دعویٰ کیا گیا ہے، جس نے عالمی سطح پر تشویش پیدا کر دی ہے۔
رپورٹ کے مطابق اس مہم کی تشہیر ایران کی بڑی شاہراہوں پر نصب بل بورڈز اور ایک مخصوص ویب سائٹ کے ذریعے کی جا رہی ہے، جہاں ٹرمپ کی تصویر کو اسنائپر رائفل کی دوربین میں دکھایا گیا ہے۔
‎بینرز پر فارسی زبان میں لکھا گیا ہے کہ اب تک حامیوں کی جانب سے 50,541,000 ڈالر جمع کیے جا چکے ہیں، جبکہ ساتھ ہی اشتعال انگیز نعرے بھی درج ہیں۔
‎یہ مہم ایسے وقت میں سامنے آئی ہے جب ایران، امریکا اور اسرائیل کے درمیان کشیدگی عروج پر ہے۔ اس کشیدگی کا آغاز فروری 2026 کے آخر میں ہوا تھا، جب ابتدائی حملوں میں ایران کی اعلیٰ قیادت کو نشانہ بنایا گیا۔
‎ماہرین کے مطابق اس نوعیت کی مہمات نہ صرف خطے میں تناؤ کو بڑھا سکتی ہیں بلکہ عالمی سطح پر سلامتی کے خدشات میں بھی اضافہ کر سکتی ہیں۔


متحدہ عرب امارات کی وزارتِ دفاع نے دعویٰ کیا ہے کہ گزشتہ 24 گھنٹوں کے دوران 9 بیلسٹک اور ایک کروز میزائل کو کامیابی سے تباہ کیا گیا، جبکہ ایران کی جانب سے داغے گئے 50 ڈرونز کو بھی ناکارہ بنا دیا گیا۔
اماراتی حکام کے مطابق اب تک مجموعی طور پر 507 بیلسٹک میزائل، 24 کروز میزائل اور 2,191 ڈرونز کو تباہ کیا جا چکا ہے، جو خطے میں جاری کشیدگی کی شدت کو ظاہر کرتا ہے۔
‎وزارت دفاع کا کہنا ہے کہ ان حملوں کے نتیجے میں 2 اماراتی فوجی اور ایک مراکشی شہری جان کی بازی ہار گئے، جبکہ مجموعی طور پر 10 افراد شہید اور 217 زخمی ہوئے ہیں، جن میں 4 پاکستانی شہری بھی شامل ہیں۔
‎حکام کے مطابق دفاعی نظام نے بروقت کارروائی کرتے ہوئے بیشتر حملوں کو ناکام بنایا اور اہم تنصیبات کو بڑے نقصان سے بچایا۔
‎یہ پیش رفت ایسے وقت میں سامنے آئی ہے جب خلیجی خطے میں کشیدگی عروج پر ہے اور ایران کی جانب سے میزائل اور ڈرون حملوں کا سلسلہ جاری ہے، جس کے جواب میں دفاعی اقدامات بھی تیز کر دیے گئے ہیں۔
‎ماہرین کے مطابق موجودہ صورتحال خطے میں ایک بڑے تصادم کی طرف اشارہ کر رہی ہے، جس کے عالمی اثرات بھی مرتب ہو سکتے ہیں۔