Author: Aqsa Younas Rana

‎المقدس میں اسرائیلی حکام نے اعلان کیا ہے کہ رمضان المبارک کے دوران مسجد اقصیٰ کے اطراف اضافی سکیورٹی فورس تعینات کی جائے گی، جبکہ فلسطینی حکام نے اسرائیل پر عبادت گاہ تک رسائی محدود کرنے کے الزامات عائد کیے ہیں۔
‎عرب خبر رساں اداروں کے مطابق رمضان کے دوران لاکھوں مسلمان نماز کی ادائیگی کے لیے مسجد اقصیٰ کا رخ کرتے ہیں، جس کے باعث ہر سال سکیورٹی انتظامات سخت کر دیے جاتے ہیں۔
‎رپورٹس کے مطابق مسجد اقصیٰ مقبوضہ مشرقی بیت المقدس میں واقع ہے، جس پر اسرائیل نے 1967 کی جنگ کے بعد قبضہ کر لیا تھا اور بعد میں اسے اپنے ساتھ ضم کر لیا، تاہم بین الاقوامی برادری اس الحاق کو تسلیم نہیں کرتی۔
‎مقبوضہ بیت المقدس پولیس کے سینئر افسر اریڈ بریومین نے بتایا کہ سکیورٹی اہلکار کمپاؤنڈ کے اندر دن رات تعینات رہیں گے، جبکہ نماز کے اوقات میں ہزاروں اضافی پولیس اہلکار بھی تعینات کیے جائیں گے۔
‎ان کے مطابق مغربی کنارے سے آنے والے فلسطینیوں کے لیے 10 ہزار خصوصی اجازت نامے جاری کرنے کی سفارش کی گئی ہے، کیونکہ انہیں المقدس میں داخلے کے لیے پیشگی اجازت درکار ہوتی ہے۔ تاہم اجازت ناموں کی حتمی تعداد اور شرائط کا فیصلہ اسرائیلی حکومت کرے گی۔
‎دوسری جانب فلسطینی مقبوضہ بیت المقدس گورنریٹ کا کہنا ہے کہ انہیں بتایا گیا ہے کہ اجازت نامے ممکنہ طور پر 55 سال سے زائد عمر کے مردوں اور 50 سال سے زائد عمر کی خواتین تک محدود ہوں گے، جیسا کہ گزشتہ سال بھی کیا گیا تھا۔
‎فلسطینی حکام نے الزام عائد کیا ہے کہ اسرائیلی انتظامیہ نے مسجد اقصیٰ کے امور کی نگرانی کرنے والے اردن کے اسلامی وقف کو معمول کی رمضان تیاریاں کرنے سے روک دیا، جن میں سایہ دار ڈھانچوں کی تنصیب اور طبی کلینکس کا قیام شامل تھا۔

‎سعودی عرب اور دیگر خلیجی ممالک میں آج رمضان المبارک کے چاند دیکھنے کے لیے اجلاس منعقد کیے جائیں گے۔
‎سعودی سپریم کورٹ نے شہریوں سے اپیل کی ہے کہ وہ چاند دیکھنے کے لیے تعاون کریں۔ سعودی میڈیا کے مطابق ملک کے مختلف شہروں میں کمیٹیاں چاند نظر آنے کے معاملے پر اجلاس کریں گی۔
‎اگر آج چاند نظر آ گیا تو سعودی عرب میں پہلا روزہ بدھ، 18 فروری سے شروع ہوگا، جبکہ چاند نہ نظر آنے کی صورت میں پہلا روزہ جمعرات، 19 فروری سے ہوگا۔

‎بھارتی فوج کے ایک اسپیشل فورسز افسر کی جانب سے یورپ میں سیاسی پناہ کی درخواست دینے کی اطلاعات نے عسکری نظام اور حکومتی پالیسیوں سے متعلق نئی بحث چھیڑ دی ہے۔
‎باخبر ذرائع کے مطابق بھارتی فوج کے میجر شیرف بھونسلے سرکاری اجلاس میں شرکت کے لیے بیرونِ ملک روانہ ہوئے تھے، تاہم بعد ازاں انہوں نے یورپ میں سیاسی پناہ (اسائلم) کے لیے درخواست دے دی۔ رپورٹس کے مطابق افسر مبینہ طور پر حکومتی پالیسیوں، فوج میں بڑھتی سیاسی مداخلت اور داخلی ماحول سے ناخوش تھے۔
‎ذرائع کا کہنا ہے کہ میجر بھونسلے اگست 2014 میں سالانہ رخصت پر بیرونِ ملک گئے تھے لیکن اس کے بعد وہ واپس بھارت نہیں لوٹے۔ یہ وہی عرصہ تھا جب ملک میں سیاسی تبدیلیوں کے بعد سکیورٹی اور قومی پالیسیوں کے حوالے سے نئی حکمتِ عملی اپنائی جا رہی تھی۔
‎بھارتی فوج کی اندرونی تحقیقات میں مبینہ طور پر یہ بات بھی سامنے آئی کہ افسر نے ملٹری انٹیلیجنس کی لازمی کلیئرنس کے بغیر پیرا جمپنگ سرگرمی کے لیے اسپین کا سفر کیا۔ عسکری حلقوں کے مطابق اس اقدام کو ضابطہ کار کی خلاف ورزی تصور کیا گیا۔
‎بعد ازاں سوشل میڈیا سرگرمیوں کی بنیاد پر انہیں ناروے میں موجود ہونے سے متعلق اطلاعات سامنے آئیں، تاہم دستیاب معلومات کے مطابق گزشتہ ایک دہائی کے دوران بھارتی حکام ان کے حتمی مقام کی باضابطہ تصدیق نہیں کر سکے۔