سپریم کورٹ آف پاکستان نے فرینڈ آف دی کورٹ کی رپورٹ اور اٹارنی جنرل کی جانب سے بانی پی ٹی آئی، عمران خان کے بچوں سے ٹیلی فونک رابطے اور علاج کی سہولیات کی یقین دہانی کے بعد جیل میں سہولیات پر اطمینان کا اظہار کیا اور عمران خان کی جانب سے دائر تین فوجداری درخواستوں کو غیر مؤثر قرار دیتے ہوئے نمٹا دیا۔
چیف جسٹس پاکستان جسٹس یحییٰ آفریدی اور جسٹس شاہد بلال پر مشتمل دو رکنی بینچ نے 12 فروری کی سماعت کا 7 صفحات پر مشتمل تفصیلی حکم نامہ جاری کیا۔ تحریری حکم نامے کے مطابق یہ درخواستیں الیکشن کمیشن آف پاکستان کی جانب سے دائر شکایت سے جنم لینے والے فوجداری مقدمے کے عبوری اور طریقہ کار سے متعلق احکامات کے خلاف تھیں۔
حکم نامے میں کہا گیا کہ ٹرائل کورٹ نے مقدمہ مکمل کر کے 5 اگست 2023 کو حتمی فیصلہ سنا دیا ہے، لہٰذا پہلی دو درخواستیں عبوری احکامات کے خلاف غیر مؤثر ہیں۔ عدالت نے گزشتہ رپورٹس کو مدنظر رکھتے ہوئے سنٹرل جیل راولپنڈی کے سپرنٹنڈنٹ کو تازہ رپورٹ جمع کروانے کی ہدایت کی اور بیرسٹر سلمان صفدر کو فرینڈ آف کورٹ مقرر کیا تاکہ وہ ذاتی طور پر ملاقات کر کے الگ رپورٹ پیش کریں۔
رپورٹس میں عدالت کو بتایا گیا کہ عمران خان کی رہائش، خوراک، سیل کی حالت، معمول کے طبی معائنے اور سکیورٹی کے انتظامات تسلی بخش اور ہم آہنگ ہیں۔ عدالتی معاون کی رپورٹ میں عمران خان نے سہولیات اور خوراک پر اطمینان کا اظہار کیا اور قید کی فطری حدود کو تسلیم کیا، تاہم ان کی بینائی کی بگڑتی ہوئی حالت پر سنگین تشویش ظاہر کی گئی۔
عدالت نے اٹارنی جنرل کی یقین دہانی بھی ریکارڈ کی کہ قانون کے مطابق فوری اقدامات کیے جائیں گے اور ماہر امراض چشم پر مشتمل ٹیم 16 فروری 2026 سے پہلے عمران خان کا طبی معائنہ کرے گی۔
حکم نامے کے بعد سپریم کورٹ نے عمران خان کی جانب سے دائر تمام فوجداری درخواستوں کو غیر مؤثر قرار دے کر غیر معینہ مدت تک ملتوی کر دیا۔
Author: Aqsa Younas Rana
-
سپریم کورٹ کا عمران خان کی جیل سہولیات پر اطمینان کا اظہار
-
کمپنی پارٹی میں آئی فون جیتنے والا ملازم ڈبہ کھول کر حیران، اندر سے ٹائلز نکل آئیں
تصور کریں کہ آپ کسی تقریب میں انعام کے طور پر آئی فون کا نیا ماڈل جیتیں، لیکن ڈبہ کھولنے پر فون کی جگہ ٹائلز نکل آئیں۔ چین میں ایک شخص کے ساتھ ایسا ہی حیران کن واقعہ پیش آیا۔
جیانگ جیانگ نامی شخص نے اپنی کمپنی کی سالانہ تقریب میں گرینڈ پرائز کے طور پر آئی فون 17 پرو میکس جیتا۔ تقریب کے دوران کمپنی سربراہ نے انعام کا اعلان کرتے ہوئے فون کی قیمت 9988 یوآن بھی بتائی، جس کے بعد تمام ملازمین کو یقین تھا کہ جیانگ واقعی مہنگا اسمارٹ فون جیت چکا ہے۔
صوبہ گوانگ ڈونگ سے تعلق رکھنے والے جیانگ اس کامیابی پر بے حد خوش تھے۔ انہوں نے فیصلہ کیا کہ وہ ڈبہ گھر پہنچ کر کھولیں گے تاکہ اپنی اہلیہ کو سرپرائز دے سکیں۔ ڈبہ بالکل اصلی آئی فون پیکنگ جیسا تھا اور اس کے ساتھ رسید بھی موجود تھی۔
تاہم جب انہوں نے گھر پہنچ کر ڈبہ کھولا تو اندر فون کے بجائے دو چاکلیٹس، تین لالی پاپس اور چند ٹائلز رکھے ہوئے تھے۔ جیانگ کے مطابق ابتدا میں انہیں لگا کہ وہ تقریب کے سب سے خوش قسمت فرد ہیں، مگر حقیقت سامنے آنے پر انہیں احساس ہوا کہ یہ ایک مذاق تھا۔
ابتدائی طور پر لوگوں نے سمجھا کہ پارٹی منتظمین نے خفیہ طور پر اصلی فون تبدیل کر دیا، لیکن بعد میں معلوم ہوا کہ یہ ٹیم منیجر کی جانب سے کیا گیا مذاق تھا کیونکہ کمپنی مالک نے فون خریدنے کی اجازت نہیں دی تھی۔
جیانگ نے بتایا کہ تقریب میں دوسرا انعام ایک تکیہ تھا۔ ان کے بقول انہیں لگا تھا کہ 2026 کا آغاز خوش قسمتی سے ہوا ہے، مگر بعد میں احساس ہوا کہ یہ تقریب کسی اپریل فول مذاق سے کم نہیں تھی۔
انہوں نے کہا کہ اب انہیں فون کی ضرورت بھی محسوس نہیں ہوتی۔ -
خیبرپختونخوا میں سڑکوں کی بندش سے سبزیوں کی قیمتیں آسمان کو چھونے لگیں
خیبرپختونخوا میں مختلف شاہراہوں کی بندش کی وجہ سے دوسرے صوبوں سے آنے والی سبزیوں کی ترسیل متاثر ہو گئی ہے، جس کے نتیجے میں منڈیوں میں قیمتیں بڑھی ہیں۔
پیاز کی فی کلو قیمت 60 روپے سے بڑھ کر 80 روپے ہو گئی، ٹماٹر 80 سے بڑھ کر 100 روپے فی کلو فروخت ہو رہا ہے۔ کھیرے کی قیمت 40 روپے سے بڑھ کر 70 روپے اور شملہ مرچ 160 روپے سے بڑھ کر 240 روپے فی کلو ہو گئی ہے۔
تجارتی حلقوں کا کہنا ہے کہ شاہراہوں کی بندش اور ترسیل میں تاخیر کی وجہ سے منڈی میں رسد کم ہو گئی، جس کا براہِ راست اثر صارفین پر پڑا ہے۔ -
کراچی میں ڈکیتی، 15 تولہ سونا اور نقدی لوٹ کر ملزمان فرار
شہر قائد کے علاقے گڈاپ تھانے کی حدود میں سپر ہائی وے کے قریب ایک نجی ہاؤسنگ سوسائٹی میں ڈکیتی کی سنگین واردات پیش آئی، جس میں مسلح ملزمان نے شہری کے گھر سے لاکھوں روپے مالیت کا سونا اور دیگر قیمتی سامان لوٹ کر فرار ہو گئے۔
پولیس کے مطابق یہ واردات ممتاز مولائی کے گھر میں ہوئی، جہاں دو موٹر سائیکل سوار ملزمان داخل ہوئے، جن میں سے ایک کے پاس پستول اور دوسرے کے پاس چھری تھی۔ ملزمان نے گھر والوں کو یرغمال بنا کر 15 تولہ سونا، نقدی اور موبائل فونز لوٹ لیے اور باآسانی فرار ہونے میں کامیاب ہو گئے۔
واقعے کی اطلاع ملتے ہی پولیس کی نفری موقع پر پہنچ گئی اور کرائم سین سے شواہد جمع کیے گئے۔ متاثرہ شہری کے بیان کی بنیاد پر ملزمان کی تلاش شروع کر دی گئی ہے جبکہ علاقے کی سی سی ٹی وی فوٹیجز کا بھی جائزہ لیا جا رہا ہے۔ -
بھارت سے شکست کے بعد ٹیم مینجمنٹ مایوس، تبدیلیاں متوقع
آئی سی سی مینز ٹی ٹوئنٹی ورلڈ کپ میں بھارت کے ہاتھوں شکست کے بعد پاکستان قومی کرکٹ ٹیم کی ٹیم مینجمنٹ سینئر کھلاڑیوں کی کارکردگی پر شدید مایوسی کا شکار ہے۔
ذرائع کے مطابق اگلے میچ کے لیے کپتان بابراعظم اور فاسٹ بولر شاہین شاہ آفریدی کو پلیئنگ الیون سے باہر بٹھانے کی تجویز زیر غور ہے، کیونکہ اہم مقابلوں میں توقعات کے مطابق کارکردگی سامنے نہیں آسکی۔
پلیئنگ الیون سے متعلق ذرائع کا کہنا ہے کہ نمیبیا کے خلاف میچ میں دو سے تین تبدیلیوں کا امکان ہے، جبکہ سینئر کھلاڑیوں کی جگہ بینچ اسٹرنتھ کو موقع دینے پر سنجیدگی سے غور کیا جا رہا ہے۔
واضح رہے کہ پاکستان اپنا آخری گروپ میچ نمیبیا قومی کرکٹ ٹیم کے خلاف 18 فروری کو کھیلے گا، جو ٹیم کے لیے ڈو اینڈ ڈائی حیثیت اختیار کر چکا ہے۔ سپر ایٹ مرحلے تک رسائی کے لیے پاکستان کو یہ میچ جیتنا ضروری ہے۔
ذرائع کے مطابق اگر بارش کے باعث میچ منسوخ ہو جاتا ہے تو بھی پاکستان سپر ایٹ مرحلے میں جگہ بنا سکتا ہے۔ -
جہلم میں مذہبی اسکالر انجینئر محمد علی مرزا پرحملہ، ملزم گرفتار
انجینئر محمد علی مرزا پر گزشتہ رات جہلم میں واقع ان کی اکیڈمی کے اندر حملہ کیا گیا، تاہم وہ اس واقعے میں محفوظ رہے جبکہ حملہ آور کو موقع پر ہی گرفتار کر لیا گیا۔
پولیس کے مطابق حملے کے وقت انجینئر محمد علی مرزا درس مکمل کرنے کے بعد شرکاء کے ساتھ فوٹو سیشن میں مصروف تھے کہ ایک نوجوان نعرہ لگاتے ہوئے خالی ہاتھ ان پر جھپٹ پڑا۔
پولیس حکام کا کہنا ہے کہ ملزم نے دونوں ہاتھوں سے ان کا گلا دبانے کی کوشش کی، تاہم وہاں موجود افراد نے فوری طور پر اسے قابو کر کے پولیس کے حوالے کر دیا۔
ابتدائی تحقیقات کے مطابق گرفتار ملزم ایبٹ آباد کا رہائشی ہے اور اس کا تعلق ایک کالعدم جماعت سے بتایا جا رہا ہے۔
واقعے کا مقدمہ تھانہ سٹی جہلم میں درج کر لیا گیا ہے، جبکہ پولیس مزید تفتیش جاری رکھے ہوئے ہے تاکہ حملے کے محرکات اور ممکنہ پس منظر کا تعین کیا جا سکے۔ -
رجب بٹ اور ندیم مبارک کی عبوری ضمانت میں 6 مارچ تک توسیع
لاہور کی سیشن کورٹ میں جوئے کی ایپ کی پروموشن کے مقدمے میں ٹک ٹاکرز رجب بٹ اور ندیم مبارک کی عبوری ضمانت کی درخواستوں پر سماعت ہوئی۔
ایڈیشنل سیشن جج منصور احمد قریشی نے عبوری ضمانت کی سماعت کے بعد دونوں ملزمان کی ضمانت میں 6 مارچ تک توسیع کر دی۔ عدالت نے این سی سی آئی اے کے تفتیشی افسر کو ہدایت کی کہ وہ جلد از جلد مقدمے کی تفتیش مکمل کریں اور آئندہ سماعت پر مکمل ریکارڈ پیش کریں تاکہ کیس کی کارروائی آگے بڑھ سکے۔
واضح رہے کہ رجب بٹ اور ندیم مبارک کے خلاف این سی سی آئی اے نے جوئے کی ایپلی کیشن کی تشہیر کے الزام میں مقدمہ درج کیا ہے۔ سماعت کے دوران دونوں ملزمان نے عدالت میں مکمل حاضری دی۔ -
ٹی 20 ورلڈ کپ: افغانستان کی یو اے ای کو 5 وکٹوں سے شکست
آئی سی سی ٹی 20 ورلڈ کپ کے میچ میں افغانستان نے متحدہ عرب امارات کو 5 وکٹوں سے شکست دے دی۔
بھارت کے شہر دہلی میں کھیلے گئے میچ میں افغانستان نے ٹاس جیت کر پہلے فیلڈنگ کا فیصلہ کیا۔ یو اے ای نے مقررہ 20 اوورز میں 9 وکٹوں کے نقصان پر 160 رنز بنائے۔
یو اے ای کی جانب سے شعیب خان 68 رنز کے ساتھ نمایاں رہے جبکہ علیشان شرفو نے 40 رنز اسکور کیے۔ افغانستان کی طرف سے عظمت اللہ عمرزئی نے شاندار بولنگ کرتے ہوئے 4 وکٹیں حاصل کیں جبکہ مجیب الرحمان نے 2 کھلاڑیوں کو آؤٹ کیا۔
161 رنز کے ہدف کے تعاقب میں افغانستان نے پراعتماد بیٹنگ کا مظاہرہ کیا اور مطلوبہ اسکور بیسویں اوور کی دوسری گیند پر 5 وکٹوں کے نقصان پر حاصل کرلیا۔
افغانستان کے ابراہیم زدران نے 53 رنز کی اہم اننگز کھیلی جبکہ عظمت اللہ عمرزئی نے 40 رنز بنا کر ٹیم کو فتح دلائی۔ عمدہ آل راؤنڈ کارکردگی پر انہیں میچ کا بہترین کھلاڑی قرار دیا گیا۔ -
19 سالہ نوجوان ذوہیب شاہ کے قتل کا معمہ حل، مقتول کے 3 دوست گرفتار
تھانہ صدر کی حدود سے ملنے والی 19 سالہ نوجوان ذوہیب شاہ کی لاش کے کیس میں پولیس نے بڑی کامیابی حاصل کرتے ہوئے قتل میں ملوث تین مرکزی ملزمان کو گرفتار کر لیا ہے۔
پولیس کے مطابق گرفتار ملزمان مقتول کے دوست ہیں، جنہوں نے ذوہیب شاہ کو چائے پینے کے بہانے اپنے ساتھ لے جا کر بے دردی سے قتل کیا۔ ملزمان نے مقتول کی لاش کو ٹکڑوں میں تقسیم کیا اور زمین میں چھپا دیا۔ 10 فروری کو علاقے کے مکینوں نے لاش کے ٹکڑے دیکھ کر پولیس کو اطلاع دی، جس پر تحقیقات کا آغاز کیا گیا۔
ترجمان پولیس نے بتایا کہ نوجوان کے قتل کا مقدمہ کل 9 افراد کے خلاف درج کیا گیا، جن میں 7 نامزد ملزمان شامل ہیں۔ گرفتار افراد کے قبضے سے آلہ قتل برآمد ہوا ہے، جس میں دو کلہاڑیاں اور ایک ڈنڈا شامل ہیں۔ پولیس ملوث دیگر ملزمان کی گرفتاری کے لیے چھاپے جاری رکھے ہوئے ہے۔ -
بھارت میں آئی ٹی ملازمین میں خوف کی بجائے اطمینان
مصنوعی ذہانت (AI) کی بڑھتی ہوئی مقبولیت کے باوجود بھارت میں حالیہ سروے نے یہ ظاہر کیا ہے کہ آئی ٹی شعبے میں ملازمین کو نوکریوں کے خطرے کی زیادہ فکر کرنے کی ضرورت نہیں ہے۔ رپورٹ کے مطابق، اے آئی نے ملازمین کی جگہ لینے کے بجائے کام کے طریقوں اور مہارتوں کی نوعیت بدل دی ہے۔
یہ تحقیق انڈین کونسل آف ریسرچ آن انٹرنیشنل اکنامک ریلیشنز (ICRIER) نے اوپن اے آئی کے تعاون سے تیار کی ہے، جس کا عنوان ہے: ’’اے آئی اور نوکریاں: یہ وقت مختلف نہیں ہے‘‘۔ رپورٹ میں کہا گیا ہے کہ حالیہ برطرفیوں کو براہِ راست اے آئی سے جوڑنا درست نہیں۔
سروے نومبر 2025 سے جنوری 2026 کے درمیان ہوا، جس میں بھارت کے 10 شہروں کی 650 آئی ٹی کمپنیوں کا جائزہ لیا گیا۔ محققین نے بھرتیوں، کاروباری طلب، پیداواری صلاحیت اور مہارتوں کے تقاضوں کا تجزیہ کیا۔
رپورٹ کے مطابق، اے آئی نے کام کو زیادہ منظم اور تیز بنایا ہے، پیداواری صلاحیت میں اضافہ ہوا ہے اور انسانی ملازمین کی بڑی تعداد بے روزگار نہیں ہوئی۔ البتہ انٹری لیول کی بھرتیوں میں کچھ کمی دیکھی گئی ہے، جبکہ درمیانی اور سینئر سطح کی بھرتیاں معمول کے مطابق جاری ہیں۔
تحقیق میں یہ بھی بتایا گیا کہ زیادہ آٹومیشن والے عہدے نسبتاً زیادہ خطرے میں ہیں، لیکن سافٹ ویئر ڈویلپرز، ڈیٹا انجینئرز اور ڈیٹا بیس ایڈمنسٹریٹرز کی مانگ میں اضافہ ہوا ہے۔ محققین کے مطابق مجموعی رجحانات کووڈ سے پہلے کے دور کے مترادف ہیں اور اے آئی نے شعبے کا بنیادی ڈھانچہ تبدیل نہیں کیا۔