حکومت نے ایتھلیٹس کی حوصلہ افزائی اور کھیلوں میں کارکردگی کو فروغ دینے کے لیے "ایتھلیٹ آف دی ایئر ایوارڈ” متعارف کرانے کا فیصلہ کیا ہے۔ اے آر وائی نیوز کے مطابق یہ ایوارڈ ہر سال بہترین کارکردگی دکھانے والے مرد اور خاتون ایتھلیٹس کو علیحدہ علیحدہ دیا جائے گا تاکہ قومی کھلاڑیوں میں کھیلوں کے معیار کو بلند کرنے کی ترغیب ملے۔
ایوارڈ کے ساتھ ہر فاتح کو 25 لاکھ روپے کا کیش انعام بھی دیا جائے گا، جس کا مقصد کھلاڑیوں کی مالی حوصلہ افزائی اور کھیلوں کے شعبے میں مستقل محنت کو سراہنا ہے۔
وزارت بین الصوبائی رابطہ نے پاکستان اسپورٹس بورڈ (پی ایس بی) سے منظوری حاصل کر لی ہے اور ایوارڈ کی تقریب ہر سال کے اختتام پر منعقد کی جائے گی۔ اس تقریب میں قومی ایتھلیٹس کو ان کی کارکردگی، کامیابیوں اور کھیل کے شعبے میں نمایاں خدمات کے لیے اعزاز دیا جائے گا۔
حکام کا کہنا ہے کہ اس اقدام سے نہ صرف کھلاڑیوں کی حوصلہ افزائی ہوگی بلکہ پاکستان میں کھیلوں کے معیار کو بین الاقوامی سطح پر بہتر بنانے میں بھی مدد ملے گی۔ یہ ایوارڈ ملک میں کھیلوں کے فروغ اور نوجوان کھلاڑیوں میں حوصلہ پیدا کرنے کے لیے ایک اہم قدم قرار دیا جا رہا ہے۔
حکومت کا بہترین ایتھلیٹس کے لیے "ایتھلیٹ آف دی ایئر” ایوارڈ متعارف
