Author: Aqsa Younas Rana

غیر ملکی میڈیا کے مطابق تھائی لینڈ کے صوبہ ناخون رتچاسیما میں ایک مسافر ٹرین پر ریل نیٹ ورک بنانے کے لیے استعمال ہونے والی کرین گر گئی۔
‎حادثے کے نتیجے میں ٹرین پٹڑی سے اتر گئی اور کئی بوگیوں میں آگ بھڑک اٹھی، جس سے جانی و مالی نقصان ہوا۔ غیر ملکی میڈیا کے مطابق اب تک 22 افراد ہلاک اور 50 سے زائد زخمی ہو چکے ہیں۔

ترکی نے غیرقانونی طور پر مقیم مزید 18 افغان شہریوں کو گرفتار کرکے ملک بدر کر دیا ہے۔ حکام کے مطابق یہ افراد رہائشی دستاویزات نہ رکھنے کی وجہ سے ڈی پورٹیشن سینٹر منتقل کیے گئے۔
‎پاکستان، ایران، امریکا، برطانیہ اور دیگر یورپی ممالک میں غیر قانونی افغان باشندوں کی ملک بدری کا سلسلہ جاری ہے۔ گزشتہ سال ترکی نے 42 ہزار سے زائد غیر قانونی افغان شہریوں کو گرفتار کیا تھا۔
‎واضح رہے کہ امریکا سمیت دیگر ممالک نے افغان شہریوں پر ویزے اور رہائشی پابندیاں عائد کر رکھی ہیں۔

نوبیل انعام یافتہ سماجی رہنما ملالہ یوسفزئی نے ایران میں جاری احتجاجات کی حمایت کرتے ہوئے کہا ہے کہ وہ اس جدوجہد میں ایرانی لڑکیوں کے ساتھ کھڑی ہیں اور ہر لڑکی کو اپنے مستقبل کا فیصلہ کرنے کا حق حاصل ہے۔
‎ملالہ یوسفزئی کا کہنا ہے کہ ایران میں ہونے والے احتجاجات کو لڑکیوں اور خواتین کی خودمختاری پر ریاست کی جانب سے عائد کی گئی دہائیوں پرانی پابندیوں سے الگ نہیں کیا جا سکتا۔ انہوں نے کہا کہ تعلیم سمیت عوامی زندگی کے ہر شعبے میں ایرانی لڑکیوں کو سخت پابندیوں کا سامنا ہے، جبکہ وہ بھی دنیا بھر کی لڑکیوں کی طرح باوقار اور محفوظ زندگی کا مطالبہ کر رہی ہیں۔
‎دریں اثنا، ملالہ یوسفزئی نے نئے سال کے آغاز پر جنگ سے متاثرہ علاقوں میں لڑکیوں کی تعلیم کے فروغ کے لیے تین لاکھ ڈالر کی ہنگامی امداد کا اعلان بھی کیا ہے۔ ملالہ فنڈ کے مطابق یہ امداد غزہ، سوڈان اور کانگو میں تعلیمی سہولیات کی بحالی اور لڑکیوں کو تعلیم کے مواقع فراہم کرنے کے لیے استعمال کی جائے گی۔

بھارت رواں ہفتے فرانس کے ساتھ 36 ارب ڈالر مالیت کے دفاعی معاہدے کی منظوری دینے جا رہا ہے، جس کے تحت بھارتی فضائیہ کے لیے 114 ڈسالٹ رافیل جنگی طیارے خریدے جائیں گے۔ رپورٹس کے مطابق یہ طیارے بھارت کو ان کے سورس کوڈ تک رسائی کے بغیر فروخت کیے جائیں گے، جبکہ ان میں تقریباً 30 فیصد مقامی طور پر تیار کردہ بھارتی پرزہ جات شامل ہوں گے۔
‎بھارت اور فرانس کے درمیان اس بڑے معاہدے پر مذاکرات آخری مراحل میں داخل ہو چکے ہیں۔ اکنامک ٹائمز کے مطابق یہ بات چیت فرانسیسی صدر ایمانوئل میکرون کے فروری میں متوقع دورۂ بھارت سے قبل تیز ہو گئی ہے۔ معاہدہ بھارت کے ملٹی رول فائٹر ایئرکرافٹ پروگرام سے جڑا ہوا ہے، جس کے تحت فضائیہ کے لیے 4.5 جنریشن کے 114 نئے لڑاکا طیارے حاصل کیے جائیں گے۔
‎یہ طیارے بھارتی فضائیہ کے پرانے بیڑے، جن میں مگ 21، مگ 27، جیگوار اور میراج 2000 شامل ہیں، کی جگہ لیں گے۔ بھارتی فضائیہ نے رافیل طیاروں کی خریداری کے لیے حکومت سے حکومت کی سطح پر باضابطہ تجویز پیش کر رکھی ہے۔
‎بھارتی میڈیا کے مطابق اس معاہدے کی ایک اہم شرط مقامی سطح پر تیاری ہے۔ بھارتی کمپنی ٹاٹا ایڈوانسڈ سسٹمز لمیٹڈ پہلے ہی ڈسالٹ ایوی ایشن کے ساتھ معاہدے کر چکی ہے، جس کے تحت بھارت میں رافیل طیاروں کے فیوزلاج کے حصے تیار کیے جائیں گے۔ اس مقصد کے لیے حیدرآباد میں ایک خصوصی پیداواری یونٹ تعمیر کیا جا رہا ہے۔
‎یہ فیکٹری رافیل طیارے کے چار بڑے فیوزلاج حصے تیار کرے گی، جو نہ صرف بھارت بلکہ عالمی آرڈرز کے لیے بھی سپلائی ہوں گے۔ پیداواری یونٹ سے 2028 تک ڈیلیوری شروع ہونے کی توقع ہے، جبکہ سالانہ پیداواری صلاحیت 24 طیاروں تک پہنچائی جائے گی۔
‎ڈسالٹ رافیل کو پہلی بار 1980 کی دہائی میں فرانس نے متعارف کرایا تھا۔ یہ طیارہ میر اج ایف ون، جیگوار اور سپر ایٹینڈارڈ کی جگہ لینے کے لیے تیار کیا گیا تھا۔ رافیل مکمل طور پر فرانس کے کنٹرول میں ڈیزائن اور تیار کیا گیا، جس کی وجہ سے فرانس کو اس کے سافٹ ویئر، ہتھیاروں کے انضمام اور اپ گریڈز پر مکمل خودمختاری حاصل ہے اور اس پر کسی بین الاقوامی برآمدی پابندی کا اطلاق نہیں ہوتا۔