Author: Aqsa Younas Rana


انسانی حقوق کے اداروں کے اتحاد حریہ نے عالمی برادری اور اقوام متحدہ سے مطالبہ کیا ہے کہ وہ غزہ میں دو ملین سے زائد فلسطینی شہریوں کے خلاف قابض اسرائیل کی جاری نسل کشی کو روکنے کے لیے فوری اور عملی اقدامات کریں۔
‎حریہ نے اپنے بیان میں زور دیا کہ اقوام متحدہ اور اس کے ذیلی ادارے، بالخصوص انروا، فوری طور پر مستقل اور محفوظ انسانی امدادی راستے کھولیں تاکہ خوراک، ادویات اور بنیادی ضروریات بغیر کسی شرط اور رکاوٹ کے متاثرہ شہریوں تک پہنچ سکیں۔
‎بیان میں کہا گیا کہ دنیا کے وزرائے خارجہ اور اقوام متحدہ کو قابض اسرائیل اور اس کے اتحادیوں پر دباؤ ڈالنا ہوگا تاکہ غزہ پر عائد سخت محاصرہ ختم کرایا جا سکے۔ حریہ نے سیاسی مفادات کے تحت معابر کھولنے کے عمل کی مذمت کرتے ہوئے امدادی سامان پر قابض اسرائیل کے مکمل کنٹرول کے خاتمے کا مطالبہ بھی کیا۔
‎حریہ نے خبردار کیا کہ غزہ اس وقت ایک سنگین انسانی بحران سے دوچار ہے، جہاں خوراک کی قلت، طبی سہولیات کی شدید کمی اور بیرون ملک علاج پر پابندی کے باعث اموات میں خطرناک حد تک اضافہ ہو رہا ہے۔ بیان کے مطابق اکتوبر 2023 سے غزہ پر مکمل لاک ڈاؤن نافذ ہے جس نے شہریوں کی زندگیوں کو شدید خطرے میں ڈال دیا ہے۔
‎بیان میں مزید کہا گیا کہ خوراک اور ادویات کو جنگی ہتھیار کے طور پر استعمال کیا جا رہا ہے، جس کا مقصد فلسطینی عوام کو جسمانی اور نفسیاتی نقصان پہنچانا ہے۔ حقوقی اداروں کے مطابق یہ اقدامات بین الاقوامی قوانین کے تحت نسل کشی کے زمرے میں آتے ہیں۔
‎حریہ نے عالمی برادری سے مطالبہ کیا کہ فوری اور مؤثر اقدامات کے ذریعے غزہ کے مظلوم عوام کی جانیں بچائی جائیں اور ان کے بنیادی انسانی حقوق کی ضمانت دی جائے۔


اگر آپ کسی کمپنی کے لیے ورک فرام ہوم کر رہے ہیں اور کسی اور ملک میں منتقل ہونے کا سوچ رہے ہیں، تو بلغاریہ آپ کو خوش آمدید کہنے کے لیے تیار ہے۔
‎بلغاریہ نے حال ہی میں یورو کرنسی اپنائی اور Schengen زون کا حصہ بنا، جو 29 ایسے ممالک پر مشتمل ہے جن کی سرحدیں ایک دوسرے کے لیے کھلی ہیں۔ اس یورپی ملک نے غیر یورپی شہریوں کے لیے ڈیجیٹل نوماڈ ویزا پروگرام متعارف کرایا ہے۔
‎ورک فرام ہوم اب بیشتر افراد کی زندگی کا معمول بنتا جا رہا ہے، جس میں دفتر جانے کی ضرورت نہیں رہتی، اور لوگ اپنے کام کے ساتھ دنیا کو دیکھنے کا موقع حاصل کر رہے ہیں۔ ایسے افراد کو ڈیجیٹل نوماڈ کہا جاتا ہے۔
‎بلغاریہ کا نیا ڈیجیٹل نوماڈ پروگرام ان افراد کے لیے ہے جو کسی کمپنی کے لیے ورک فرام ہوم کر رہے ہوں یا فری لانسر کے طور پر سرگرم ہوں۔ اس پروگرام کے لیے درخواست دینے والے افراد کی سالانہ آمدنی کم از کم 31 ہزار یورو ہونی چاہیے۔
‎اپلائی کرنے والے افراد کو اپنے ملک میں بلغاریہ کے سفارتخانے سے ڈی لونگ اسٹے ویزا کے لیے رابطہ کرنا ہوگا۔ ویزا کے تحت غیرملکی بلغاریہ میں جا کر رہائش کے لیے اپلائی کر سکتے ہیں۔ بلغاریہ پہنچنے کے 14 دن کے اندر رہائشی پرمٹ کے لیے درخواست دینا ضروری ہے۔
‎پرمٹ کے لیے درخواست گزار کو بلغاریہ میں قیام کا ثبوت، جرائم سے پاک ریکارڈ، دستاویزات کا بلغارین ترجمہ، سالانہ آمدنی اور ہیلتھ انشورنس کا ثبوت فراہم کرنا ہوگا۔
‎ڈیجیٹل نوماڈ ویزا کی مدت ایک سال ہوگی، جس میں مزید ایک سال کے اضافے کا امکان موجود ہے۔


آئی سی سی ٹی ٹوئنٹی ورلڈ کپ میں بنگلادیش کرکٹ ٹیم کے بھارت میں شیڈول میچز غیر یقینی صورتحال کا شکار ہوگئے ہیں۔ بنگلادیش کرکٹ بورڈ کی جانب سے آئی سی سی کو بھیجی گئی ای میل کے جواب کا تاحال انتظار کیا جا رہا ہے، تاہم اس سے قبل ہی بھارتی میڈیا نے قیاس آرائیوں اور منفی پروپیگنڈے کا آغاز کر دیا ہے۔
‎بھارتی کرکٹ ویب سائٹس کا دعویٰ ہے کہ بنگلادیش کے میچز بھارت سے سری لنکا منتقل کیے جانے کے امکانات کم ہیں اور اب میچز کے وینیوز تبدیل کرنے کا آپشن زیر غور ہے۔ بھارتی میڈیا رپورٹس کے مطابق بنگلادیش کے میچز کے لیے چنئی اور تھیرو وننتھاپورم کو متبادل مقامات کے طور پر پیش کیا جا رہا ہے۔
‎ویب سائٹس میں یہ بھی کہا گیا ہے کہ آئی سی سی اور بنگلادیش کرکٹ بورڈ کے درمیان مؤقف پر اختلافات برقرار ہیں۔ دوسری جانب سکیورٹی خدشات کے باعث بنگلادیش کرکٹ بورڈ نے آئی سی سی سے باضابطہ طور پر مطالبہ کیا ہے کہ اس کے تمام میچز سری لنکا منتقل کیے جائیں۔
‎اس معاملے پر آئی سی سی کی جانب سے تاحال کوئی حتمی اعلان سامنے نہیں آیا۔

‎امریکی صدر ڈونلڈ ٹرمپ نے سوشل میڈیا پلیٹ فارم ٹرتھ سوشل پر ایک تصویر شیئر کی ہے جس میں انہوں نے خود کو وینزویلا کا قائم مقام صدر ظاہر کیا ہے۔
‎ٹرمپ کی جانب سے پوسٹ کی گئی تصویر میں یہ دعویٰ کیا گیا ہے کہ وہ جنوری 2026 سے جنوبی امریکی ملک وینزویلا کے عبوری رہنما کے طور پر فرائض انجام دے رہے ہیں، جبکہ جے ڈی وینس کو وینزویلا کا قائم مقام نائب صدر دکھایا گیا ہے۔
‎واضح رہے کہ 3 جنوری کو امریکا نے وینزویلا میں فوجی کارروائی کی تھی، جس کے دوران صدر نکولس مادورو اور ان کی اہلیہ سیلیا فلوریس کو گرفتار کر کے امریکی عدالت میں پیش کیا گیا تھا۔
‎ٹرمپ کی اس متنازع پوسٹ پر عالمی سطح پر شدید ردعمل کا امکان ظاہر کیا جا رہا ہے، تاہم وائٹ ہاؤس کی جانب سے اس معاملے پر تاحال کوئی باضابطہ وضاحت سامنے نہیں آئی۔


ایران کے سپریم لیڈر آیت اللہ خامنہ ای نے کہا ہے کہ غرور میں ڈوبا ہوا ایک شخص پوری دنیا کے فیصلے کر رہا ہے اور اسے یہ سمجھنا چاہیے کہ اقتدار کے عروج پر طاقتور حکمرانوں کے ساتھ کیا ہوا۔
‎انہوں نے کہا کہ فرعون، نمرود اور رضا شاہ کے ساتھ جو انجام ہوا، وہی ٹرمپ کے ساتھ بھی ہوگا۔ یہ بیان آیت اللہ خامنہ ای نے سوشل میڈیا پر جاری کیا۔
‎واضح رہے کہ ایرانی صدر مسعود پزشکیان نے بھی امریکا اور اسرائیل کو ایران میں جاری فسادات کا ذمہ دار قرار دیا ہے۔ ایرانی میڈیا کو دیے گئے ایک انٹرویو میں مسعود پزشکیان نے کہا کہ امریکا اور اسرائیل ایرانی عوام کو ہدایات دے رہے ہیں کہ وہ تخریب کاری کریں، اور یہ وہی لوگ ہیں جنہوں نے ماضی میں ایران پر حملے کیے۔
‎ایرانی صدر نے مزید کہا کہ کسی غیر ملکی کو ایرانی قوم میں انتشار پھیلانے کی اجازت نہیں دی جائے گی۔
‎دوسری جانب امریکی صدر ڈونلڈ ٹرمپ کا کہنا ہے کہ ایران مذاکرات کرنے کا خواہاں ہے اور ملاقات کا انتظام کیا جا رہا ہے، جبکہ ایران کے خلاف طاقتور آپشنز پر غور جاری ہے۔


ایرانی وزیر خارجہ عباس عراقچی نے کہا ہے کہ ایران جنگ اور مذاکرات دونوں کے لیے تیار ہے۔ انہوں نے اپنے بیان میں کہا کہ ہفتے کے آخر میں تشدد میں اضافہ ہوا اور دہشتگردوں نے مظاہرین اور سکیورٹی فورسز کو نشانہ بنایا، تاہم اب صورتحال مکمل کنٹرول میں ہے۔
‎عراقچی نے بتایا کہ گزشتہ چند دنوں میں ایران میں پرامن مظاہرے پرتشدد مظاہروں میں تبدیل ہوگئے، اور دو ہفتوں کے دوران مظاہروں کے دوران 350 مساجد کو آگ لگا دی گئی، لیکن ایرانی فورسز نے زیادہ سے زیادہ تحمل کا مظاہرہ کیا۔ انہوں نے کہا کہ مظاہرین کے مطالبات جائز تھے اور حکومت انہیں سن رہی تھی۔
‎ایرانی وزیر خارجہ نے یہ بھی کہا کہ امریکی صدر ٹرمپ کی مداخلت کی بات کے بعد احتجاج خونریز ہوگیا تاکہ مداخلت کا بہانہ بنایا جا سکے۔ عراقچی نے واضح کیا کہ ایران جنگ کے لیے بھی تیار ہے اور مذاکرات کے لیے بھی۔
‎واضح رہے کہ امریکی صدر ڈونلڈ ٹرمپ نے حال ہی میں کہا تھا کہ ایران نے مذاکرات کے لیے رابطہ کیا ہے اور بات چیت کے انتظامات کیے جا رہے ہیں۔ ساتھ ہی انہوں نے دھمکی بھی دی کہ امریکا ایران میں فوجی کارروائی کے آپشنز پر غور کر رہا ہے جو بات چیت سے پہلے اختیار کیے جا سکتے ہیں۔