Author: Aqsa Younas Rana


مشرق وسطیٰ میں کشیدگی ایک بار پھر شدت اختیار کر گئی ہے جہاں اسرائیل کی جانب سے ایران میں مختلف مقامات پر حملوں کی اطلاعات سامنے آئی ہیں۔ رپورٹس کے مطابق تہران اور بوشہر میں شدید دھماکے سنے گئے جبکہ توانائی کے اہم انفراسٹرکچر کو نشانہ بنایا گیا۔
ذرائع کے مطابق خرمشہر میں گیس پائپ لائن اور اصفہان میں گیس پریشر ریڈکشن اسٹیشن کو نشانہ بنایا گیا۔ تبریز میں ہونے والی بمباری کے نتیجے میں چھ شہری جاں بحق جبکہ 122 افراد زخمی ہوئے۔ ایک یونیورسٹی پر حملے میں باپ اور بیٹا بھی جان کی بازی ہار گئے۔
‎رپورٹس میں یہ بھی بتایا گیا ہے کہ حالیہ حملوں کے دوران بڑے پیمانے پر نقصان ہوا، جس میں سینکڑوں تعلیمی ادارے اور طبی مراکز متاثر ہوئے جبکہ ہزاروں رہائشی یونٹس کو بھی نقصان پہنچا۔
‎دوسری جانب لبنان میں بھی کارروائیوں کی اطلاعات ہیں جہاں بیروت میں حملے کے نتیجے میں پانچ افراد جاں بحق اور نو زخمی ہوئے جبکہ متعدد عمارتیں متاثر ہوئیں۔
‎خطے میں بڑھتی ہوئی کشیدگی کے باعث انسانی بحران کے خدشات بھی بڑھ گئے ہیں اور عالمی سطح پر تشویش کا اظہار کیا جا رہا ہے۔


مشرقِ وسطیٰ میں بڑھتی کشیدگی کے باعث عراق کی فضائی حدود 9 رمضان سے بند ہیں، جس کے نتیجے میں سینکڑوں پاکستانی زائرین نجف اور کربلا میں پھنس گئے ہیں اور وطن واپسی کے منتظر ہیں۔
رپورٹس کے مطابق ان زائرین میں خواتین، بچے اور بزرگ افراد بھی شامل ہیں، جو طویل قیام کے باعث شدید مشکلات کا شکار ہیں۔ زائرین کا کہنا ہے کہ ان کے مالی وسائل ختم ہو چکے ہیں اور بنیادی ضروریات پوری کرنا مشکل ہوتا جا رہا ہے۔
‎مزید بتایا گیا ہے کہ متعدد زائرین بیمار اور ضعیف ہیں، جبکہ ادویات کی کمی نے صورتحال کو مزید تشویشناک بنا دیا ہے۔
‎متاثرہ زائرین نے حکومت پاکستان سے فوری مدد کی اپیل کرتے ہوئے مطالبہ کیا ہے کہ ان کی واپسی کے لیے ہنگامی بنیادوں پر اقدامات کیے جائیں تاکہ انہیں اس مشکل صورتحال سے نکالا جا سکے۔


جنگ زدہ ایران میں بڑھتی مشکلات کے درمیان انسانیت کی ایک خوبصورت مثال سامنے آئی ہے، جہاں ایک دکاندار نے اپنی دکان پر بغیر ادائیگی سامان لینے کی اجازت دے دی ہے۔
‎رپورٹس کے مطابق ایران میں جاری جنگ چوتھے ہفتے میں داخل ہو چکی ہے، جس کے باعث مختلف شہروں میں اشیائے خورونوش کی قلت اور مہنگائی میں اضافہ ہو گیا ہے، جبکہ مسلسل حملوں کے سبب عوام شدید مشکلات کا سامنا کر رہے ہیں۔
‎اسی صورتحال میں ایک ایرانی دکاندار نے اپنی سپر مارکیٹ کے باہر ایک ہاتھ سے لکھا ہوا بورڈ آویزاں کیا، جس پر درج تھا کہ شہری اپنی ضرورت کے مطابق سامان لے جائیں اور ادائیگی جنگ کے بعد کر دیں۔
‎یہ منفرد اقدام سوشل میڈیا پر تیزی سے وائرل ہو گیا ہے اور دنیا بھر میں اس دکاندار کی انسان دوستی کو سراہا جا رہا ہے۔
‎ماہرین کا کہنا ہے کہ مشکل حالات میں ایسے اقدامات نہ صرف معاشرتی یکجہتی کو مضبوط کرتے ہیں بلکہ امید اور ہمدردی کا پیغام بھی دیتے ہیں۔


لبنان کی مزاحمتی تنظیم حزب اللہ نے دعویٰ کیا ہے کہ اس نے حالیہ میزائل حملوں میں اسرائیلی فوج کو شدید نقصان پہنچایا ہے۔
حزب اللہ کے بیان کے مطابق شمالی اسرائیل میں آج صبح کیے گئے دو حملوں میں اسرائیلی فوج کو نشانہ بنایا گیا، جبکہ جنوبی لبنان میں ایک فوجی چوکی پر گائیڈڈ میزائل کے ذریعے حملہ کیا گیا۔
‎مزید بتایا گیا کہ سرحدی قصبے کوزہ میں بھی اسرائیلی فوجیوں کو سوپ ڈاؤن میزائل سے نشانہ بنایا گیا، جس کے نتیجے میں بھاری نقصان ہونے کا دعویٰ کیا جا رہا ہے۔
‎تاہم اسرائیلی حکام کی جانب سے ان دعوؤں کی تاحال کوئی باضابطہ تصدیق سامنے نہیں آئی ہے۔
‎ماہرین کے مطابق اس طرح کے حملے خطے میں کشیدگی کو مزید بڑھا سکتے ہیں اور صورتحال کو مزید پیچیدہ بنا سکتے ہیں۔


پاکستان ریلوے نے عیدالفطر کے تین روزہ دورانیے میں شاندار کارکردگی دکھاتے ہوئے مجموعی طور پر 48 کروڑ روپے کی آمدن حاصل کی ہے۔
ذرائع کے مطابق عید کے پہلے دن 11 کروڑ روپے، دوسرے دن 17 کروڑ اور تیسرے دن 20 کروڑ روپے آمدن ہوئی، جبکہ تمام ٹرینوں کی ریزرویشن مکمل طور پر بک رہی۔
‎مسافروں کی بڑھتی ہوئی تعداد کے پیش نظر پاکستان ریلوے کی جانب سے چار خصوصی ٹرینیں بھی چلائی گئیں تاکہ اضافی رش کو بہتر انداز میں سنبھالا جا سکے۔
‎ریلوے حکام کے مطابق یہ مدت مسافر سہولیات اور ریونیو کے حوالے سے انتہائی کامیاب رہی، اور عید کے دوران عوام نے بڑی تعداد میں ٹرین سفر کو ترجیح دی۔


اسرائیلی حکام کے مطابق امریکی صدر ڈونلڈ ٹرمپ ایران کے ساتھ معاہدہ کرنے کے لیے پُرعزم دکھائی دے رہے ہیں، تاہم اس بات کا امکان کم ظاہر کیا جا رہا ہے کہ ایران امریکی مطالبات کو قبول کرے گا۔
ذرائع کا کہنا ہے کہ امریکا سفارتی راستہ اختیار کرتے ہوئے تنازع کے حل کی کوشش کر رہا ہے، مگر دونوں ممالک کے مؤقف میں واضح اختلافات موجود ہیں۔
‎دوسری جانب اسرائیلی وزیر صحت کے مطابق 28 فروری سے جاری جنگ کے دوران اب تک 4 ہزار 829 زخمیوں کو اسپتال منتقل کیا جا چکا ہے۔
‎حکام کے مطابق 111 افراد اب بھی زیر علاج ہیں، جن میں سے 12 کی حالت تشویشناک بتائی جا رہی ہے۔
‎ماہرین کے مطابق اگر سفارتی کوششیں ناکام ہوئیں تو خطے میں کشیدگی مزید بڑھ سکتی ہے۔


برطانوی خبر رساں ادارے رائٹرز کے مطابق ایران نے جنگ بندی کیلئے اپنی چند اہم شرائط پیش کر دی ہیں۔ ان شرائط میں سرفہرست یہ مطالبہ شامل ہے کہ ایران پر دوبارہ کسی بھی قسم کا حملہ نہ کیا جائے اور اس کی واضح ضمانت دی جائے۔
رپورٹ میں بتایا گیا ہے کہ ایران نے جنگ کے دوران ہونے والے نقصانات کے ازالے کیلئے معاوضہ دینے کا بھی مطالبہ کیا ہے۔ اس کے علاوہ ایران نے آبنائے ہرمز پر مکمل کنٹرول کی اجازت دینے کی شرط بھی رکھی ہے۔ ایران نے اپنے میزائل پروگرام کو محدود کرنے سے بھی صاف انکار کر دیا ہے۔
‎دوسری جانب ایرانی سپریم لیڈر کے مشیر محسن رضائی کا کہنا ہے کہ امریکا اور اس کے اتحادیوں کو جنگی تباہی کا حساب دینا ہوگا۔ انہوں نے کہا کہ امریکا کو ایران کے اندرونی معاملات میں مداخلت نہ کرنے کی ضمانت دینا ہوگی، بصورت دیگر صورتحال مزید کشیدہ ہو سکتی ہے۔ ان کا یہ بھی کہنا تھا کہ اگر ایران کی توانائی تنصیبات کو نشانہ بنایا گیا تو اس کے اثرات امریکا تک پہنچ سکتے ہیں۔
‎ادھر ایرانی ریڈ کریسنٹ سوسائٹی نے دعویٰ کیا ہے کہ حالیہ حملوں میں ملک کے 498 اسکول اور 281 طبی مراکز تباہ ہو چکے ہیں، جبکہ 62 ہزار رہائشی یونٹس کو نقصان پہنچا ہے۔ مزید بتایا گیا کہ 17 ریسکیو پوائنٹس اور 12 ایمبولینسز بھی متاثر ہوئی ہیں۔