Author: Aqsa Younas Rana

‎لندن کے قریب بیڈفورڈ کے جنوب میں دو ٹرینوں کے درمیان تصادم کا واقعہ پیش آیا، جس کے بعد امدادی اداروں نے فوری کارروائی کرتے ہوئے جائے حادثہ پر ریسکیو آپریشن شروع کر دیا۔
‎برطانوی ٹرانسپورٹ پولیس کے مطابق حادثے کی اطلاع ملتے ہی فائربریگیڈ، ایمبولینس سروس، ریسکیو ٹیموں اور پولیس کی بھاری نفری موقع پر پہنچ گئی۔ حکام نے علاقے کو گھیرے میں لے کر امدادی سرگرمیاں شروع کر دیں جبکہ حادثے کی وجوہات جاننے کے لیے تحقیقات کا آغاز بھی کر دیا گیا ہے۔
‎حادثے کے بعد احتیاطی تدابیر کے طور پر لوٹن اور بیڈفورڈ کے درمیان تمام ریلوے لائنیں بند کر دی گئی ہیں، جس کے باعث مسافروں کو شدید مشکلات کا سامنا ہے۔
‎بیڈفورڈ شائر پولیس نے سوشل میڈیا پر جاری بیان میں تصدیق کی کہ اضافی پولیس افسران بھی جائے حادثہ پر موجود ہیں اور صورتحال کا جائزہ لے رہے ہیں۔ پولیس نے شہریوں کو ہدایت کی ہے کہ سفر سے پہلے اپنی ٹرین کی صورتحال ضرور چیک کریں کیونکہ متعدد سروسز متاثر ہوئی ہیں۔
‎ریلوے آپریٹر ایسٹ مڈلینڈز ریلوے نے بھی تصدیق کی ہے کہ حادثے کے باعث اس کی سروسز شدید متاثر ہوئی ہیں۔ کمپنی کے مطابق لندن سینٹ پینکراس اور لیسٹر کے درمیان چلنے والی ٹرینوں میں خلل پیدا ہو گیا ہے اور امکان ہے کہ شام بھر سفر میں تاخیر اور منسوخی کا سلسلہ جاری رہے گا۔
‎تاحال حکام کی جانب سے کسی جانی نقصان یا زخمیوں کی حتمی تعداد جاری نہیں کی گئی، جبکہ حادثے کی مکمل تحقیقات جاری ہیں۔

‎امریکا کے نائب صدر جے ڈی وینس نے اسرائیلی حکومت پر سخت تنقید کرتے ہوئے کہا ہے کہ ایران کے ساتھ طے پانے والے معاہدے پر اسرائیلی وزیراعظم بنیامین نیتن یاہو شدید ناراض ہیں۔
‎تازہ علاقائی صورتحال پر گفتگو کرتے ہوئے جے ڈی وینس نے کہا کہ بیروت میں شہری آبادی پر حملے کسی صورت قابل قبول نہیںہیں۔ انہوں نے زور دیا کہ موجودہ کشیدہ حالات میں بے گناہ شہریوں کے جان و مال کا تحفظ ہر صورت یقینی بنایا جانا چاہیے اور ایسے اقدامات سے گریز کیا جانا چاہیے جو خطے میں مزید عدم استحکام پیدا کریں۔
‎امریکی نائب صدر نے کہا کہ امریکا اسرائیل کی سلامتی کا حامی ہے، تاہم شہریوں کے تحفظ اور بین الاقوامی قوانین کی پاسداری بھی یکساں اہم ہے۔ انہوں نے اس بات پر زور دیا کہ تمام فریقوں کو تحمل کا مظاہرہ کرتے ہوئے کشیدگی میں اضافے سے بچنے کی کوشش کرنی چاہیے۔
‎جے ڈی وینس نے مزید کہا کہ اسرائیل کی سلامتی اور دفاعی صلاحیتوں میں امریکا کا کردار بنیادی اہمیت رکھتا ہے۔ ان کے مطابق واشنگٹن کئی برسوں سے اسرائیل کو مالی اور عسکری معاونت فراہم کر رہا ہے، جس پر اسرائیل کی سیکیورٹی کا بڑا انحصار ہے۔
‎ان کا کہنا تھا کہ خطے میں دیرپا امن کے لیے سفارتی کوششوں کو کامیاب بنانا ضروری ہے اور تمام متعلقہ فریقوں کو مذاکرات کے ذریعے مسائل کے حل کو ترجیح دینی چاہیے۔

‎امریکا کی سابق وزیر خارجہ ہلیری کلنٹن نے انکشاف کیا ہے کہ اسرائیلی وزیراعظم بنیامین نیتن یاہو 2009 سے مسلسل ایران کے خلاف فوجی کارروائی کے لیے امریکا کی حمایت حاصل کرنے کی کوشش کرتے رہے۔
‎ایک انٹرویو میں ہلیری کلنٹن نے بتایا کہ ان کے دورِ وزارتِ خارجہ کے دوران نیتن یاہو، اُس وقت کے اسرائیلی وزیر دفاع ایہود باراک اور دیگر اسرائیلی حکام بارہا واشنگٹن پر زور دیتے تھے کہ وہ ایران کے خلاف ممکنہ فوجی کارروائی کی حمایت کرے۔
‎انہوں نے کہا کہ یہ دباؤ مسلسل جاری رہتا تھا اور اسرائیلی قیادت بار بار یہی مؤقف اختیار کرتی تھی کہ امریکا کو ایران پر حملے میں اسرائیل کا ساتھ دینا چاہیے۔ ہلیری کلنٹن کے مطابق یہ معاملہ دونوں ممالک کے درمیان اہم سفارتی موضوعات میں شامل رہا۔
‎سابق امریکی وزیر خارجہ نے بتایا کہ 2009 سے 2012 کے درمیان امریکا کے پاس ایران کے خلاف کارروائی کے لیے زیادہ عسکری صلاحیت موجود تھی، جس کے باعث اس معاملے پر واشنگٹن اور تل ابیب کے درمیان مسلسل مشاورت اور اختلافِ رائے بھی دیکھنے میں آیا۔
‎ہلیری کلنٹن نے مزید کہا کہ اسرائیلی حکام اکثر یہ کہتے تھے کہ ان کے جنگی طیارے رن وے پر تیار کھڑے ہیں اور وہ کسی بھی وقت کارروائی کے لیے تیار ہیں۔ ان کے بقول، اسرائیل کی جانب سے امریکی حکومت پر ہر وقت اس حوالے سے دباؤ برقرار رکھنے کی کوشش کی جاتی تھی۔
‎ان کے اس بیان نے ایک بار پھر امریکا اور اسرائیل کے درمیان ایران سے متعلق ماضی کی سفارتی اور دفاعی حکمت عملی پر بحث کو تازہ کر دیا ہے۔

‎اسلام آباد: وزیراعظم شہباز شریف اور سعودی عرب کے ولی عہد و وزیراعظم شہزادہ محمد بن سلمان کے درمیان ٹیلیفونک رابطہ ہوا، جس میں خطے کی صورتحال، ایران اور امریکا کے درمیان ہونے والے امن معاہدے اور باہمی دلچسپی کے امور پر تبادلہ خیال کیا گیا۔
‎وزیراعظم آفس کی جانب سے جاری اعلامیے کے مطابق وزیراعظم شہباز شریف نے سعودی ولی عہد کو تاریخی اسلام آباد امن معاہدے پر دستخط ہونے پر مبارک باد پیش کی۔ دونوں رہنماؤں نے خطے میں امن، استحکام اور سفارتی تعاون کے فروغ پر بھی گفتگو کی۔
‎اعلامیے کے مطابق وزیراعظم اور سعودی ولی عہد نے اس بات پر اتفاق کیا کہ امن عمل کو نقصان پہنچانے یا مذاکراتی عمل کو سبوتاژ کرنے کی کسی بھی کوشش کے خلاف مکمل چوکنا رہنا ضروری ہے۔ دونوں رہنماؤں نے اس عزم کا اظہار کیا کہ امن اور استحکام کے لیے مشترکہ کوششیں جاری رکھی جائیں گی۔
‎سعودی ولی عہد محمد بن سلمان نے بھی وزیراعظم شہباز شریف کو ایران اور امریکا کے درمیان طے پانے والے معاہدے پر مبارک باد دیتے ہوئے کہا کہ وزیراعظم شہباز شریف اور فیلڈ مارشل سید عاصم منیر کی انتھک سفارتی کوششوں کے باعث یہ اہم پیش رفت ممکن ہوئی۔
‎دونوں رہنماؤں نے اس بات پر بھی اتفاق کیا کہ ایران اور امریکا کے درمیان معاہدے کے اگلے مرحلے کو کامیابی سے آگے بڑھانا انتہائی ضروری ہے تاکہ خطے میں پائیدار امن اور استحکام کو یقینی بنایا جا سکے۔
‎گفتگو کے دوران پاکستان اور سعودی عرب کے درمیان قریبی برادرانہ تعلقات کو مزید مضبوط بنانے اور مختلف شعبوں میں تعاون بڑھانے کے عزم کا بھی اعادہ کیا گیا۔

‎متحدہ عرب امارات نے ویزا مسائل کا سامنا کرنے والے افراد، خصوصاً حالیہ علاقائی کشیدگی اور ایران جنگ کے باعث متاثر ہونے والے مسافروں کے لیے خصوصی رعایتوں کا اعلان کر دیا ہے۔ حکام کے مطابق اس اقدام کا مقصد ان افراد کو قانونی مشکلات سے بچانا ہے جو غیر معمولی حالات کے باعث مقررہ وقت پر ملک سے روانہ یا اپنے ویزا کی تجدید نہیں کر سکے۔
‎اماراتی حکام نے اعلان کیا ہے کہ ایسے افراد جن کے ویزے کی مدت ختم ہو چکی ہے، انہیں مقررہ مدت کے دوران اپنے ویزا اسٹیٹس کو درست کرانے پر اوور اسٹے جرمانے سے استثنا حاصل ہوگا۔ اس سہولت کے تحت متاثرہ افراد 9 جولائی تک بغیر کسی جرمانے کے اپنی امیگریشن حیثیت کو قانونی بنا سکیں گے۔
‎حکام کے مطابق یہ خصوصی رعایت مکمل طور پر انسانی ہمدردی کی بنیاد پر دی جا رہی ہے اور اس کا مقصد ان مسافروں کی مشکلات کم کرنا ہے جو جنگی حالات اور سفری رکاوٹوں کے باعث امارات میں پھنس گئے تھے۔
‎اعلامیے میں بتایا گیا ہے کہ اس پیکج کے تحت متاثرہ افراد کو 30 روزہ ویزا رعایت بھی دی جائے گی تاکہ وہ اپنے سفری معاملات منظم کر سکیں یا اپنی واپسی اور دیگر قانونی کارروائیاں مکمل کر سکیں۔
‎یہ سہولت صرف رہائشی ویزا رکھنے والوں تک محدود نہیں بلکہ سیاحتی اور وزٹ ویزا پر موجود افراد بھی اس سے فائدہ اٹھا سکیں گے، بشرطیکہ وہ مقررہ شرائط پر پورا اتریں۔
‎اماراتی حکام نے واضح کیا ہے کہ اس خصوصی استثنا کا اطلاق 10 جون سے 9 جولائی تک ہوگا۔ اس عرصے کے دوران متاثرہ افراد متعلقہ امیگریشن حکام سے رجوع کرکے بغیر جرمانے اپنے ویزا سے متعلق معاملات نمٹا سکتے ہیں۔
‎اس فیصلے کو خطے میں حالیہ غیر معمولی حالات کے تناظر میں ایک اہم ریلیف قرار دیا جا رہا ہے، جس سے ہزاروں ایسے مسافروں کو فائدہ پہنچنے کی توقع ہے جو سفری پابندیوں اور پروازوں میں تعطل کے باعث مشکلات کا شکار ہوئے۔