امریکا کے قدامت پسند تجزیہ کار اور معروف ایکٹیوسٹ ٹکر کارلسن نے دعویٰ کیا ہے کہ قطر اور سعودی عرب میں حکام نے مبینہ طور پر اسرائیلی خفیہ ایجنسی موساد سے تعلق رکھنے والے افراد کو گرفتار کیا ہے۔
ٹکر کارلسن کے مطابق یہ گرفتاریاں گزشتہ رات عمل میں آئیں اور زیر حراست افراد دونوں ممالک میں بم دھماکوں کی منصوبہ بندی کر رہے تھے۔ انہوں نے کہا کہ ان مبینہ ایجنٹس کی سرگرمیوں کا مقصد خطے میں عدم استحکام پیدا کرنا تھا۔
کارلسن نے مزید الزام عائد کیا کہ اسرائیل صرف ایران ہی نہیں بلکہ قطر، متحدہ عرب امارات، سعودی عرب، بحرین، عمان اور کویت کو بھی نقصان پہنچانا چاہتا ہے۔ ان کا کہنا تھا کہ اسرائیل اپنے اس مقصد میں کسی حد تک کامیابی حاصل کر چکا ہے۔
تاہم ان دعوؤں پر متعلقہ ممالک یا اسرائیل کی جانب سے تاحال کوئی باضابطہ ردعمل سامنے نہیں آیا۔
Author: Aqsa Younas Rana
سعودی عرب اور قطر میں مبینہ موساد ایجنٹس کی گرفتاری کا دعویٰ، ٹکر کارلسن کا بڑا بیان
پاکستانی فضائی حدود مکمل طور پر کھلی اور محفوظ ہے، پی اے اے کی وضاحت
پاکستان ائیر پورٹ اتھارٹی نے حالیہ نوٹم کے حوالے سے گردش کرنے والی خبروں کی تردید کرتے ہوئے واضح کیا ہے کہ پاکستان کی فضائی حدود جزوی طور پر بند نہیں کی گئی۔
ادارے کے مطابق کچھ میڈیا اور سوشل میڈیا اکاؤنٹس کی جانب سے یہ تاثر دیا جا رہا تھا کہ کمرشل پروازوں کے لیے فضائی حدود محدود کر دی گئی ہے، جو درست نہیں۔ جاری کردہ نوٹم A0134/26 ایک معمول کی ایڈوائزری ہے جس میں کراچی اور لاہور ایف آئی آر کے چند مخصوص اے ٹی ایس روٹس کی عارضی عدم دستیابی سے آگاہ کیا گیا ہے۔
پی اے اے کے مطابق یہ عارضی انتظام 3 سے 31 مارچ تک روزانہ صبح 9 بجے سے دوپہر 3 بجے تک نافذ رہے گا اور اس کا مقصد آپریشنل امور کو منظم رکھنا ہے۔ اس دوران متبادل فضائی راستے دستیاب ہیں جو معمول کے مطابق استعمال کیے جا رہے ہیں۔
ادارے نے مزید واضح کیا کہ کمرشل پروازوں، آمد و رفت یا اوور فلائٹس پر کسی قسم کی کوئی پابندی نہیں ہے۔ ایئر ٹریفک کنٹرول اور ایئرپورٹ ٹیمیں مکمل طور پر فعال ہیں اور فضائی ٹریفک کو معمول کے مطابق سنبھال رہی ہیں۔
ایران کے پاس موجود یورینیم سے 11 ایٹم بم بن سکتے ہیں، اسٹیو وٹکوف
امریکی صدر ڈونلڈ ٹرمپ کے خصوصی ایلچی اسٹیو وٹکوف نے دعویٰ کیا ہے کہ ایران کے پاس موجود افزودہ یورینیم سے 11 ایٹم بم تیار کیے جا سکتے ہیں۔
امریکی ٹی وی کو دیے گئے انٹرویو میں وٹکوف نے کہا کہ مذاکرات کے دوران ایرانی حکام نے بتایا کہ ان کے پاس 60 فیصد تک افزودہ کیا گیا تقریباً 460 کلوگرام یورینیم موجود ہے۔ ان کے مطابق اگر اس مواد کو ایک ماہ کے اندر 90 فیصد تک افزودہ کیا جائے تو اس سے 11 ایٹم بم تیار ہو سکتے ہیں۔
وٹکوف کا کہنا تھا کہ یہی وہ تشویش ہے جس کے باعث امریکا ایران کے جوہری پروگرام کو خطے اور عالمی سلامتی کے لیے خطرہ قرار دیتا ہے۔ دوسری جانب ایران مسلسل مؤقف اختیار کرتا آیا ہے کہ اس کا جوہری پروگرام پرامن مقاصد کے لیے ہے اور وہ جوہری ہتھیار بنانے کا ارادہ نہیں رکھتا۔
پاکستان خطے میں کشیدگی کم کرنے کیلئے متحرک، ایران کے معاملے پر ہر فورم پر آواز اٹھائی: اسحاق ڈار
سینیٹ اجلاس سے خطاب کرتے ہوئے نائب وزیراعظم و وزیر خارجہ اسحاق ڈار نے کہا کہ پاکستان خطے میں کشیدگی کم کرنے اور مذاکرات کے فروغ کے لیے مسلسل سفارتی کوششیں کر رہا ہے اور ایران کے معاملے پر ہر عالمی فورم پر مؤقف پیش کیا گیا۔
انہوں نے بتایا کہ ان کا ایرانی وزیر خارجہ عباس عراقچی سے مسلسل رابطہ رہا، جبکہ سعودی وزیر خارجہ سے بھی متعدد بار بات چیت ہوئی۔ وہ جدہ میں ہونے والے او آئی سی کے ہنگامی اجلاس میں شریک ہوئے جہاں خطے کی صورتحال پر تفصیلی تبادلہ خیال کیا گیا۔
اسحاق ڈار نے کہا کہ 12 جون کو ان کی اور فیلڈ مارشل کی عباس عراقچی سے ملاقات ہوئی جس میں علاقائی کشیدگی پر گفتگو کی گئی۔ ان کے مطابق پاکستان کو امید تھی کہ مسئلہ مذاکرات کے ذریعے حل ہو جائے گا کیونکہ تصادم کسی کے مفاد میں نہیں۔
انہوں نے بتایا کہ امریکی سینیٹر مارکو روبیو کے سامنے بھی ایران کا معاملہ اٹھایا گیا۔ ان کا کہنا تھا کہ ایران نے یقین دہانی کرائی تھی کہ وہ جوہری ہتھیار نہیں بنائے گا اور پاکستان کا مؤقف واضح ہے کہ پرامن جوہری توانائی کا استعمال ایران کا حق ہے۔
نائب وزیراعظم نے کہا کہ پاکستان دل و جان سے ایران کے ساتھ کھڑا ہے اور اسے برادر ملک سمجھتا ہے۔ انہوں نے بتایا کہ ایران نے امریکی اڈوں پر حملے کا ارادہ ظاہر کیا تھا، تاہم پاکستان نے ایران پر ہونے والے حملوں کی مذمت کی اور سفارتی سطح پر پسِ پردہ کوششیں جاری رکھیں۔
اسحاق ڈار کے مطابق وزیراعظم نے 14 جون 2025 کو ایرانی قیادت سے رابطہ کیا، جبکہ ایران پر پابندیاں ختم کرنے سے متعلق قرارداد چین اور روس کے ساتھ مل کر پیش کی گئی۔ اقوام متحدہ کی سلامتی کونسل میں پاکستان کے مستقل مندوب عاصم افتخار نے بھی پاکستان کا مؤقف پیش کیا۔
انہوں نے کہا کہ عرب ممالک کے ساتھ مل کر ایران سے اظہار یکجہتی کیا گیا اور پاکستان امریکا اور ایران کے درمیان ثالثی کے لیے بھی تیار تھا۔ یورپی یونین سمیت 13 ممالک کی قیادت سے بھی رابطے کیے گئے۔
سعودی عرب کے ساتھ دفاعی معاہدے کے بارے میں انہوں نے کہا کہ پاکستان اس کا پابند ہے اور ایران کو بھی اس سے آگاہ کیا گیا۔ ان کے مطابق بعض معاملات پر ایران نے ضمانت طلب کی جو پاکستان نے فراہم کی۔
آخر میں انہوں نے کہا کہ اس حساس معاملے کو ملک کے اندر سیاسی رنگ دینا مناسب نہیں اور اپوزیشن سمیت تمام پارلیمانی رہنماؤں کو ان کیمرہ بریفنگ دی جائے گی تاکہ قومی مفاد کو مقدم رکھا جا سکے۔
اسرائیلی فوج کی لبنان میں زمینی کارروائی، سرحد عبور کرلی
اسرائیلی فوج نے لبنان میں زمینی کارروائی کا آغاز کرتے ہوئے متعدد مقامات پر سرحد عبور کر لی ہے۔
غیر ملکی خبر ایجنسی کے مطابق اسرائیلی فوجی دستے مختلف علاقوں سے لبنانی حدود میں داخل ہوئے۔ رپورٹ میں بتایا گیا ہے کہ کارروائی کے دوران کئی سرحدی مقامات پر پیش قدمی کی گئی۔
اطلاعات کے مطابق لبنانی فوج نے سرحد پر قائم سات چوکیاں خالی کر کے پسپائی اختیار کی۔ تاہم اس پیش رفت پر لبنانی حکام کی جانب سے باضابطہ تفصیلات تاحال سامنے نہیں آئیں۔
خطے میں بڑھتی ہوئی کشیدگی کے باعث صورتحال نہایت حساس ہو چکی ہے اور عالمی برادری کی نظریں اس پیش رفت پر مرکوز ہیں۔
چین کا ایران پر امریکی و اسرائیلی حملوں کی مذمت، ایک چینی شہری ہلاک، ہزاروں افراد کا انخلا مکمل
چینی وزارت خارجہ نے تصدیق کی ہے کہ ایران پر امریکی اور اسرائیلی حملوں میں ایک چینی شہری ہلاک ہوگیا ہے، جبکہ چین نے حملوں کو بین الاقوامی قانون کی خلاف ورزی قرار دیا ہے۔
چینی وزارت خارجہ کے مطابق ایران سے تین ہزار سے زائد چینی شہریوں کا انخلا مکمل کر لیا گیا ہے اور باقی شہریوں کو بھی فوری طور پر محفوظ مقامات پر منتقل ہونے کی ہدایت جاری کی گئی ہے۔
وزارت خارجہ کی ترجمان ماو ننگ نے پیر کو پریس بریفنگ کے دوران کہا کہ فوجی کارروائیاں فوری طور پر روکی جائیں اور تمام فریق سفارتی مذاکرات کی جانب واپس آئیں۔ ان کا کہنا تھا کہ چین عالمی تعلقات میں طاقت کے استعمال کی ہمیشہ مخالفت کرتا آیا ہے۔
بیان میں کہا گیا کہ ان حملوں کے اثرات صرف ایران تک محدود نہیں رہیں گے بلکہ پورے خطے اور ہمسایہ ممالک کے استحکام پر بھی منفی اثر ڈال سکتے ہیں، جس پر بیجنگ کو شدید تشویش ہے۔
چین نے عالمی برادری کے ساتھ مل کر بات چیت کے ذریعے بحران کے حل کے لیے کردار ادا کرنے کی آمادگی بھی ظاہر کی ہے۔
چینی حکومت نے ایرانی سپریم لیڈر علی خامنہ ای کے قتل کی بھی مذمت کرتے ہوئے اسے ایران کی خودمختاری اور سلامتی کی سنگین خلاف ورزی قرار دیا ہے۔
شاہد آفریدی کی شاہین آفریدی پر کڑی تنقید، آخری اوور مہنگا ثابت ہونے پر سوالات
سابق کپتان شاہد آفریدی نے سری لنکا کے خلاف میچ میں آخری اوور مہنگا ثابت ہونے پر اپنے داماد اور فاسٹ بولر شاہین آفریدی کو تنقید کا نشانہ بنایا ہے۔
نجی ٹی وی کی اسپورٹس نشریات میں گفتگو کرتے ہوئے شاہد آفریدی نے کہا کہ شاہین کافی عرصے سے بین الاقوامی کرکٹ کھیل رہا ہے اور اسے یہ معلوم ہونا چاہیے کہ آخری اوور کس اینڈ سے کرنا بہتر ہوتا ہے۔ ان کا کہنا تھا کہ یہ بات اسے کئی بار سمجھائی جا چکی ہے۔
انہوں نے کہا کہ بار بار توجہ دلانے کے باوجود وہ وہی غلطیاں دہرا رہا ہے۔ شاہد آفریدی کے مطابق جب دائیں ہاتھ کا بلے باز کریز پر موجود ہو تو راؤنڈ دی وکٹ گیند نہیں کرنی چاہیے، اور اگر ایسی صورت حال ہو بھی جائے تو گیند وکٹوں کے باہر کے بجائے اندر کی جانب کرنی چاہیے۔
سابق کپتان نے افسوس کا اظہار کرتے ہوئے کہا کہ معلوم نہیں ہمارے بولرز کو یہ بنیادی باتیں کب سمجھ آئیں گی۔ ان کا کہنا تھا کہ کھلاڑی سیکھنے کے بجائے صرف رنز بنانے پر توجہ دے رہے ہیں اور یہ سمجھتے ہیں کہ میچ کی ذمہ داری صرف ایک یا دو افراد پر ہوتی ہے۔
شاہد آفریدی نے مزید کہا کہ ہماری کرکٹ پیچھے رہ گئی ہے جبکہ دنیا کی کرکٹ بہت آگے بڑھ چکی ہے۔
ایران نے معقول معاہدے سے انکار کیا، تہران وقت ضائع کر رہا تھا، امریکی وزیرِ دفاع
معقول معاہدے کے لیے مذاکرات سے انکار کیا اور تہران مذاکرات کے نام پر وقت حاصل کر کے اپنے ایٹمی پروگرام کو دوبارہ فعال کرنا چاہتا تھا۔ ان کا کہنا تھا کہ امریکی صدر ڈونلڈ ٹرمپ ایسی چالوں کا حصہ نہیں بنتے۔
واشنگٹن میں گفتگو کرتے ہوئے انہوں نے کہا کہ ایٹمی عزائم کی آڑ میں وقت حاصل کرنے کی ایرانی حکمت عملی ناکام بنا دی گئی ہے اور ایران میں جاری فوجی کارروائی طویل جنگ میں تبدیل نہیں ہوگی۔
وزیرِ دفاع کا کہنا تھا کہ ایران ایٹمی بم کے معاملے پر گمراہ کن مؤقف اختیار کر رہا تھا۔ انہوں نے دعویٰ کیا کہ ماضی میں بھی ایران کی یہی حکمت عملی کامیاب رہی، تاہم اب صورت حال مختلف ہے۔
انہوں نے بتایا کہ موجودہ آپریشن کا مقصد تہران کے میزائل پروگرام اور سیکیورٹی ڈھانچے کو نشانہ بنانا ہے۔ ان کے مطابق ایران جیسے نظام کو ایٹمی ہتھیار حاصل کرنے کی اجازت نہیں دی جا سکتی اور امریکا اپنے مفادات کے تحفظ کے لیے بغیر ہچکچاہٹ کارروائی جاری رکھے گا۔
پیٹ ہیگسیتھ نے مزید کہا کہ جنگ کا اختتام صدر ٹرمپ کی شرائط کے مطابق ہوگا اور آغاز سے انجام تک تمام ضابطے امریکا نے طے کیے ہیں۔ انہوں نے ایرانی عوام اور سیکیورٹی فورسز سے کہا کہ وہ دانشمندی کا راستہ اختیار کریں، ایران میں جاری مشن فیصلہ کن اور حتمی نوعیت کا ہے۔افغان عوام پاکستان کے حق میں سڑکوں پر، کشیدگی میں کمی اور ٹی ٹی پی کی سرپرستی ختم کرنے کا مطالبہ
سوشل میڈیا پر سامنے آنے والی ویڈیوز اور رپورٹس کے مطابق افغانستان کے مختلف علاقوں میں شہری پاکستان کے حق میں سڑکوں پر نکل آئے۔ مظاہرین نے دونوں ممالک کے درمیان کشیدگی کم کرنے اور تعلقات بہتر بنانے کا مطالبہ کیا۔
مظاہرین کا کہنا تھا کہ افغان سرزمین کو پاکستان کے خلاف استعمال نہیں ہونا چاہیے اور کالعدم تنظیم کی مبینہ سرپرستی ختم کی جائے۔ انہوں نے زور دیا کہ حکومت کو بیرونی تنازعات کے بجائے افغان شہریوں کی فلاح اور داخلی استحکام پر توجہ دینی چاہیے۔
شرکا نے مطالبہ کیا کہ خطے میں امن و استحکام کے لیے باہمی احترام اور تعاون کی پالیسی اپنائی جائے تاکہ دونوں ممالک کے عوام کو فائدہ پہنچ سکے۔
ایران کے سپریم لیڈر آیت اللہ علی خامنہ ای کی اہلیہ حملے میں شہید
امریکا اور اسرائیل کی جانب سے کیے گئے حملوں کے بعد ایرانی سپریم لیڈر کی اہلیہ کے شہید ہونے کی اطلاعات سامنے آئی ہیں۔
امریکی جریدے دا وال سٹریٹ جرنل نے ایرانی میڈیا کے حوالے سے رپورٹ کیا ہے کہ منصورہ خجستہ باقرزادہ گزشتہ روز ہونے والے حملے میں شدید زخمی ہو گئی تھیں۔
رپورٹ کے مطابق وہ زخموں کی تاب نہ لاتے ہوئے آج دم توڑ گئیں۔ واقعے کے بعد خطے میں کشیدگی میں مزید اضافہ ہونے کا خدشہ ظاہر کیا جا رہا ہے۔
