کراچی میں ماہِ صیام کی آمد سے قبل پانی کا بحران دوبارہ نمودار ہو گیا ہے۔ گلشنِ اقبال شانتی نگر کے قریب واٹر کارپوریشن کی 84 انچ قطر کی مرکزی لائن کے لیک ہونے سے شہر کے بڑے حصے میں پانی کی فراہمی متاثر ہوئی۔
واٹر کارپوریشن حکام نے بتایا کہ متاثرہ لائن کی مرمت مکمل کر دی گئی ہے اور دھابیجی پمپنگ اسٹیشن سے پانی کی فراہمی بحال کر دی گئی ہے۔ تاہم، دھابیجی سے شہر تک پانی پہنچنے میں تقریباً 18 گھنٹے لگتے ہیں، جس کے باعث شہریوں کو مکمل فراہمی کل سے متوقع ہے۔
حکام کا کہنا ہے کہ رمضان سے قبل پیدا ہونے والے اس بحران سے شہریوں کو مشکلات کا سامنا کرنا پڑا، مگر صورتحال جلد معمول پر آ جائے گی۔
Author: Aqsa Younas Rana
ماہ رمضان سے قبل کراچی میں پانی کی شدید کمی
بانی پی ٹی آئی کی صحت پر کوئی سمجھوتہ نہیں ہوگا، فوری اسپتال منتقل کیا جائے: بیرسٹر گوہر
پاکستان تحریک انصاف کے چیئرمین بیرسٹر گوہر نے کہا ہے کہ بانی پی ٹی آئی کی صحت پر کسی قسم کا سمجھوتہ قبول نہیں کیا جائے گا اور انہیں فوری طور پر اسپتال منتقل کیا جانا چاہیے۔
میڈیا سے گفتگو کرتے ہوئے بیرسٹر گوہر کا کہنا تھا کہ حکومت 16 فروری کا انتظار نہ کرے بلکہ بانی پی ٹی آئی کو فوری طور پر الشفا اسپتال منتقل کیا جائے اور انہیں اپنے ذاتی معالج تک مکمل رسائی فراہم کی جائے۔
انہوں نے کہا کہ بانی پی ٹی آئی کا علاج پاکستان میں ہی ممکن ہے، اس لیے انہیں ملک کے اندر ہی مناسب طبی سہولیات دی جائیں۔
بیرسٹر گوہر نے مزید کہا کہ اپوزیشن کا دھرنا شروع ہو چکا ہے اور پارلیمنٹ لاجز کو سیل کرنے اور راستے بند کرنے کے اقدام کی مذمت کرتے ہیں۔
جنوبی کوریا کی بٹ تھم ایکسچینج کی داخلی خامیوں سے 40 ارب ڈالر سے زائد اثاثے غلطی سے منتقل
جنوبی کوریا کی بڑی کرپٹو کرنسی ایکسچینج بٹ تھم نے انکشاف کیا ہے کہ داخلی نظام میں سنگین خامیوں کی وجہ سے گذشتہ ہفتے 40 ارب ڈالر سے زائد کے اثاثے غلطی سے منتقل ہو گئے۔
کمپنی نے تسلیم کیا کہ ان خامیوں کی وجہ سے اس کا سسٹم ممکنہ تخریب کاری کا بھی نشانہ بن سکتا تھا۔ تشہیری تقریب کے دوران صارفین میں غلطی سے تقریباً چھ لاکھ 20 ہزار بٹ کوائن تقسیم کر دیے گئے، حالانکہ اصل میں چھ لاکھ 20 ہزار وان (تقریباً 426 ڈالر) دئیے جانے تھے۔
اس بڑی غلطی کے نتیجے میں بٹ کوائن کی مارکیٹ قیمت میں 17 فیصد کمی واقع ہوئی۔ پارلیمانی کمیٹی کے سامنے بٹ تھم کے چیف ایگزیکٹیو افسر لی جے وون نے بتایا کہ غلطی سے دی گئی رقم ایکسچینج کے کل 42,000 بٹ کوائن کے اثاثوں سے 15 گنا زیادہ تھی۔
انہوں نے بتایا کہ لین دین کے عمل میں تقریباً 24 گھنٹے کی تاخیر نے ورچوئل اثاثوں کے بیلنس کو بروقت اپ ڈیٹ ہونے سے روک دیا، اور کہا: "ہم داخلی نظام کے کنٹرول میں خامی سے بخوبی واقف ہیں۔”
پاکستان جنوبی ایشیا میں اہم شراکت دار، تجارتی و سکیورٹی تعلقات بڑھانے کا خواہاں
امریکی معاون وزیر خارجہ سمیر پال کپور نے بدھ کو کانگریس کی کمیٹی کو بتایا کہ پاکستان جنوبی ایشیا میں واشنگٹن کا ایک اہم شراکت دار ہے اور امریکہ اس کے ساتھ تجارتی، اقتصادی اور سکیورٹی تعلقات کو مضبوط کرنا چاہتا ہے۔
انہوں نے کمیٹی کو بتایا کہ امریکہ پاکستان کے ساتھ مل کر ملک کے اہم معدنی وسائل کی صلاحیت سے فائدہ اٹھانے اور نجی شعبے کے ساتھ مالی اعانت کو مربوط کرنے کی کوشش کر رہا ہے تاکہ دونوں ممالک کو اقتصادی فوائد حاصل ہوں۔
پال کپور نے توانائی اور زراعت میں دوطرفہ تجارت کے فروغ پر بھی روشنی ڈالی اور سکیورٹی تعاون کے حوالے سے کہا کہ انسداد دہشت گردی کے شعبے میں موجودہ تعاون پاکستان کو اندرونی اور بین الاقوامی سلامتی کے خطرات سے نمٹنے میں مدد دیتا ہے۔
بعد میں قانون سازوں نے سوالات کے دوران عسکریت پسندی، پاکستان کی سابقہ سیکیورٹی حکمت عملی اور علاقائی حرکیات پر بھی بات کی۔
اپوزیشن اتحاد کا عمران خان سے ملاقات ، علاج تک پارلیمنٹ ہاؤس کے باہر دھرنے کا اعلان
اپوزیشن اتحاد نے فیصلہ کیا ہے کہ بانی پی ٹی آئی عمران خان سے ملاقات اور ان کے مکمل علاج تک پارلیمنٹ ہاؤس کے باہر دھرنا دیا جائے گا۔
اپوزیشن اتحاد کے رہنماؤں کا وفاقی دارالحکومت اسلام آباد میں اجلاس ہوا جس میں فیصلہ کیا گیا کہ بانی پی ٹی آئی سے ملاقات اور مکمل علاج تک پارلیمنٹ ہاؤس کے باہر دھرنا دیا جائے گا، پارلیمنٹ ہاؤس کے مرکزی دروازے پر تحریک انصاف کی مرکزی قیادت دھرنا دے گی، اس سلسلے میں تمام اراکین قومی و صوبائی اسمبلی اور سینیٹرز کو پارلیمنٹ ہاؤس پہنچنےکی ہدایات جاری کردی گئی ہیں۔اجلاس کے بعد پی ٹی آئی چیئرمین بیرسٹر گوہر کے ہمراہ میڈیا سے گفتگو کرتے ہوئےعلامہ راجہ ناصر عباس کاکہنا تھا کہ ہماری میٹنگ ہوئی ہے،ہم نے فیصلہ کیا کہ کل نماز جمعہ کے بعد پارلیمنٹ کے باہر پرامن دھرنا دیں گے، سینیٹر، اراکین قومی اسمبلی، صوبائی اسمبلی شریک ہوں گے، ابھی تک عمران خان کے علاج کے لئے حکومت نے کوئی رابطہ نہیں کیا، آج تین دن ہو گئے،ہمارا مطالبہ ہے کہ ملاقات کروائی جائے، ڈاکٹروں کو دکھایا جائے،
یہ فیصلہ اس رپورٹ کے منظرِ عام پر آنے کے بعد کیا گیا جس میں اڈیالہ جیل میں قید عمران خان نے دعویٰ کیا ہے کہ ان کی دائیں آنکھ کی بینائی 15 فیصد تک محدود رہ گئی ہے۔
سپریم کورٹ میں جمع کرائی گئی رپورٹ کے مطابق عمران خان نے مطالبہ کیا ہے کہ ان کا معائنہ ان کے ذاتی معالج ڈاکٹر فیصل سلطان اور ڈاکٹر عاصم یوسف سے کرایا جائے یا کسی مستند ماہر امراض چشم سے مکمل طبی جانچ کروائی جائے۔ انہوں نے قید تنہائی اور ٹی وی تک رسائی نہ ہونے کی صورت میں کتابیں فراہم کرنے کی بھی درخواست کی ہے۔
رپورٹ میں کہا گیا ہے کہ اکتوبر 2025 تک ان کی دونوں آنکھوں کی بینائی 6×6 یعنی نارمل تھی، تاہم بعد میں مسلسل دھندلاہٹ اور نظر کم ہونے کی شکایات شروع ہوئیں۔ عمران خان کے مطابق انہوں نے متعدد بار اُس وقت کے سپرنٹنڈنٹ جیل کو آگاہ کیا مگر کوئی مؤثر اقدام نہیں کیا گیا۔ بعد ازاں دائیں آنکھ کی بینائی اچانک متاثر ہوئی، جس پر پمز اسپتال کے ماہر امراض چشم ڈاکٹر محمد عارف کو معائنے کے لیے بلایا گیا۔
رپورٹ کے مطابق آنکھ میں خون کا لوتھڑا بننے سے شدید نقصان ہوا اور علاج، بشمول انجیکشن، کے باوجود بینائی صرف 15 فیصد تک بحال ہو سکی۔
دوسری جانب پی ٹی آئی کے سیکرٹری جنرل سلمان اکرم راجہ نے سابق سپرنٹنڈنٹ اڈیالہ جیل کے خلاف مقدمہ دائر کرنے کا اعلان کیا ہے۔این سی سی آئی اے میں 77 کنٹریکٹ افسران فارغ
نیشنل سائبر کرائم انویسٹیگیشن ایجنسی (این سی سی آئی اے) نے 77 کنٹریکٹ افسران کو فارغ کر دیا ہے، جن میں ٹیکنیکل، فرانزک اور انویسٹیگیشن ونگ کے گریڈ 16 سے 18 کے افسران شامل ہیں۔ ایف پی ایس سی کی جانب سے دی گئی تین ماہ کی آخری توسیع بھی ختم کر دی گئی۔
فارغ کیے جانے والے افسران میں چار ڈپٹی ڈائریکٹرز، 47 اسسٹنٹ ڈائریکٹرز، ایک آفس سپریٹنڈنٹ، سات ٹیکنیکل افسران اور 18 انسپکٹرز شامل ہیں۔ کیسز اور عدالتوں میں زیر سماعت درخواستوں کے معاملات بھی متاثر ہونے کا خدشہ ظاہر کیا گیا ہے۔
این سی سی آئی اے کے ڈی جی نے 258 نئی بھرتیوں کے لیے پی سی ون بھیجوا دیا ہے، جس کے مطابق نئی بھرتیوں سے سائبر کرائم تحقیقات اور پراسیکیوشن مضبوط ہوں گی۔ اسسٹنٹ ڈائریکٹر انوسٹگیشن اسد فخرالدین کے خلاف انکوائری مکمل ہونے تک کنٹریکٹ میں توسیع دے دی گئی ہے۔
حکومت قانون سازی میں ملکی مفاد پر ذاتی مفاد کو ترجیح دے رہی ہے، پی پی ذرائع کا دعویٰ
پاکستان پیپلز پارٹی (پی پی پی) نے مسلم لیگ ن کی حکومت پر الزام لگایا ہے کہ وہ قانون سازی میں ملکی مفاد کے بجائے ذاتی مفاد کو ترجیح دے رہی ہے اور ورچوئل ایسٹس ریگولیٹری اتھارٹی کے چیئرمین کو بچانے کی کوشش کر رہی ہے۔
پی پی پی ذرائع کے مطابق حکومت نے پارٹی کے قانون سازی سے متعلق تحفظات دور کرنے میں ناکامی اختیار کی، جس کے باعث پارٹی نے فیصلہ کیا ہے کہ تحفظات ختم نہ ہونے تک وہ نیب اور ورچوئل ایسٹس سے متعلق بلوں کی حمایت نہیں کرے گی۔
حکومت نے پی پی پی کو دونوں بلوں کا مسودہ فراہم کیا ہے اور پارٹی نے غور کے لیے مہلت طلب کی ہے۔ ذرائع نے بتایا کہ پی پی پی دونوں بلوں پر اپنی سفارشات پیش کرے گی، جبکہ حکومت چاہتی ہے کہ ورچوئل ایسٹس بل 2 مارچ سے قبل منظور ہو جائے۔
ذرائع کا مزید کہنا ہے کہ حکومت نے ورچوئل ایسٹس آرڈینینس کی مدت دو بار پارلیمنٹ سے بڑھائی ہے، جو اب دو مارچ کو ختم ہونے والی ہے، اور اس اقدام کے ذریعے چیئرمین کو بچانے کی کوشش کی جا رہی ہے۔ پیپلز پارٹی کو نیب ترمیمی بل کی متعدد شقوں پر بھی اعتراضات ہیں۔
سعودی وزیر دفاع محمد بن سلمان کی آرمی چیف فیلڈ مارشل عاصم منیر سے ملاقات
سعودی عرب کے وزیر دفاع شہزادہ محمد بن سلمان نے پاکستان کے چیف آف آرمی اسٹاف اور چیف آف ڈیفنس فورسز فیلڈ مارشل عاصم منیر سے ملاقات کی۔
ملاقات میں دونوں رہنماؤں نے پاکستان اور سعودی عرب کے درمیان مضبوط تعلقات اور اسٹریٹجک دفاعی شراکت داری کی توثیق کی۔ اس موقع پر باہمی دفاعی تعاون، علاقائی سلامتی اور مشترکہ مفادات کے تحفظ پر تبادلہ خیال کیا گیا۔
دونوں جانب سے عالمی امن و استحکام کے فروغ کے لیے مشترکہ کوششوں کو جاری رکھنے کے عزم کا اظہار کیا گیا اور اس بات پر اتفاق کیا گیا کہ دوطرفہ تعاون کو مزید وسعت دی جائے گی تاکہ دونوں ممالک کے مشترکہ مفادات کو تقویت ملے۔
لاپتا شہری شاہ میر پولیس مقابلے میں مارا گیا، سندھ ہائیکورٹ کا اظہارِ حیرت
کراچی سے لاپتا ہونے والے شہری شاہ میر کے پولیس مقابلے میں مارے جانے کا انکشاف ہوا ہے۔ یہ بات جمعرات کو سندھ ہائی کورٹ میں سماعت کے دوران سامنے آئی، جہاں شہر کے مختلف علاقوں سے 20 سے زائد لاپتا افراد سے متعلق درخواستوں پر کارروائی کی گئی۔
پولیس کی جانب سے پیش کی گئی رپورٹ میں بتایا گیا کہ شاہ میر ایک مبینہ پولیس مقابلے میں ہلاک ہو چکا ہے، جس پر عدالت نے حیرت کا اظہار کیا۔
سچل تھانے کے تفتیشی افسر نے عدالت میں پیش ہو کر مؤقف اختیار کیا کہ شاہ میر مقابلے میں مارا گیا۔ درخواست گزار کے وکیل نے عدالت کو بتایا کہ شاہ میر کو مبینہ مقابلے سے دو روز قبل حراست میں لیا گیا تھا۔
عدالت نے زیر حراست شہری کی پولیس مقابلے میں ہلاکت پر تشویش کا اظہار کرتے ہوئے ایس ایس پی ایسٹ کو ذاتی حیثیت میں طلب کر لیا اور آئینی بینچ کو ہدایت کی کہ 19 فروری کو مکمل رپورٹ پیش کی جائے۔
عدالت نے دیگر لاپتا افراد سے متعلق بھی تفصیلی رپورٹس طلب کر لی ہیں۔2025 میں خلیجی ممالک سے 38 ہزار سے زائد پاکستانی ڈی پورٹ
وزارت اوورسیز پاکستانیز اینڈ ہیومن ریسورس ڈیولپمنٹ نے قومی اسمبلی میں سال 2025 کے دوران خلیجی ممالک سے ڈی پورٹ کیے گئے پاکستانیوں کی تفصیلات پیش کر دیں۔
دستاویزات کے مطابق رواں سال 38 ہزار 616 پاکستانی شہریوں کو مختلف خلیجی ممالک سے واپس بھیجا گیا۔ ان افراد کو غیر قانونی قیام، ویزہ خلاف ورزی، بھیک مانگنے اور دیگر جرائم میں ملوث پائے جانے پر ڈی پورٹ کیا گیا۔
اعداد و شمار کے مطابق سب سے زیادہ 27 ہزار 692 پاکستانی سعودی عرب سے واپس بھیجے گئے۔ متحدہ عرب امارات سے 6 ہزار 794، عمان سے 2 ہزار 537، بحرین سے 786، قطر سے 644 اور کویت سے 163 پاکستانی ڈی پورٹ ہوئے۔
ڈائریکٹر جنرل ایف آئی اے نے متعلقہ کمیٹی کو بتایا کہ 2025 میں 51 ہزار پاکستانی شہریوں کو بیرون ملک سفر کی کوشش کے دوران پاکستانی ہوائی اڈوں پر ہی روک لیا گیا۔
انہوں نے بتایا کہ سعودی عرب نے 24 ہزار پاکستانیوں کو بھیک مانگنے کے الزام میں ڈی پورٹ کیا، جبکہ دبئی سے 6 ہزار اور آذربائیجان سے تقریباً 2 ہزار افراد کو واپس بھیجا گیا۔
کمیٹی کو آگاہ کیا گیا کہ بیرون ملک بھیک مانگنے میں ملوث افراد کی واپسی سے پاکستان کی ساکھ متاثر ہوتی ہے۔ بعض افراد عمرہ ویزے پر بیرون ملک جا کر یورپ پہنچنے کی کوشش کرتے ہیں، تاہم سفری دستاویزات میں تضاد سامنے آنے پر انہیں پاکستانی ہوائی اڈوں سے ہی روک دیا جاتا ہے۔
