Author: Baaghi TV

وہ جب پیدا ہوا تو سارے خاندان میں خوشیاں منائی گئیں ،آخر کو دو بیٹیوں کے بعد دنیا میں آیا تھا خوشی تو بنتی ہی تھی۔
لاڈلا بیٹا ماں کی آنکھوں کا تارا اور بہنوں کا راج دلارا،
ابھی ساتویں دن سر کے بال بھی نہیں مونڈے گئے تھے کہ ماں نے لاڈلے کے سر پر سہرا سجانے کے خواب بننا شروع کر دئیے۔
ماں کا ایک ہی ارمان تھا کہ کب میرا لاڈلا اس قابل ہوگا کہ میں خوبصورت سی بہو لیکر آؤں گی،،،،
وقت کا پہیہ گھومتا رہا اور وہ وقت قریب آ ہی گیا جس کا لاڈلے کی ماں اور بہنوں کو انتظار تھا،
جی ہاں! آپ ٹھیک سمجھے
سر پر سہرا سجانےکی گھڑی بالآخر آن پہنچی تھی۔
ماں اور بہنوں کو نازک سی گورے رنگت والی بہو خوب بھائی تھی کہ چٹ منگنی پٹ بیاہ والا معاملہ ہوا۔
وہ بھی آنکھوں میں ڈھیروں خواب سجائے اپنے پیا دیس سدھار گئی اور دل میں خود یہ یہ عہد کئے کہ اپنی سیرت اور اخلاق سے سب کو جلد ہی اپنا گرویدا کر لے گی لیکن ہائے،،،،
ہائے یہ قسمت بھی عجیب کھیل کھیلتی ہے،
سسرال ایک ایسی جگہ ہے جہاں پر بعض اوقات اچھی شکل ،اچھا اخلاق، نیک سرت اور باکردار ہونا بھی آپکا بسنے میں ساتھ نہیں دیتا اور آپکی ہر ریاضت بے کار چلی جاتی ہے۔
اسکی چھوٹی چھوٹی بے ضرر سی نادانیاں اسکا عیب اور گناہ بنا دی گئی تھیں۔
اسکا ہنسنا، بولنا اور سب سے گھل مل جانے والی عادات اسکا گناہ بن گئی تھیں۔
لاڈلا تو اپنا بیٹا تھا نا اب اسکی نادانی کی سزا بھی بہو رانی بھگت رہی تھی کیونکہ دل اتنے تنگ تھے کہ یہ قبول ہی نہ کر پائے کہ لاڈلا پہلے بیٹا اور بھائی تھا تو اب ایک شوہر بھی بن چکا ہے۔
لاڈلا بیوی کے ساتھ بیٹھے تو بیوی بے حیا،،،
لاڈلا کبھی مسکرا کر بیوی کی طرف دیکھ لے تو "بہو کے لچھن ٹھیک نہیں بازاری کہیں کی مردوں کو رجھانا خوب جانتی یے”
لاڈلا بیوی کے ساتھ ایک پلیٹ میں کھانا کھائے تو ” گھر میں جوان بہنیں ہیں ان کے دل پر کیا گزرے گی یہ دیکھ کر”
لاڈلا بیوی کو موٹر سائیکل پر ساتھ بٹھا لے تو "کیسے چپک کر میاں کے ساتھ بیٹھی ہے کیا اپنے باپ کیساتھ بھی ایسے بیٹھتی تھی”
ارے یہ تو جھلکیاں ہیں مکمل داستان آپ کیلئے سننا دشوار ہو جائے گی۔
بہو رانی ماں سے ایک چپ سو سکھ کا سبق سیکھ کر آئی تھی سو ایک لمبا عرصہ خاموشی سے یہ سب دیکھتی رہی اور یہ سوچتی رہی کہ محبت تو فاتح عالم ہے ،دلوں کو مسخر لیتی ہے اور ایک دن وہ بھی سب کے دلوں کو جیت لے گی لیکن وہ یہاں بھی غلط تھی،،،،بدکرداری، چوری، ماں باپ کی گندی تربیت کے الزاموں سے لیکر شوہر کا اولاد نہ دینا تک سہ لیا اور اسکا ساتھ دیتی رہی لیکن،،،،
لیکن دل نہیں جیت پائی اور پھر ایک دن تھک ہار کر لاڈلے کو اسکی ماں کی آغوش کو
میں سونپ کر پھر سے اپنے کچے پکے آشیانے میں واپس آگئی ،،،،
یہ جو ٹوٹے پھوٹے بے ترتیب الفاظ میں کہانی لکھی گئی ہے یہ کسی بہت اپنے کی حرف حرف حقیقت داستان ہے،،،،یہ کسی کی آٹھ سالہ ذندگی کے وہ بہترین سال تھے جو چھوٹے دلوں کی کم ظرفی کی نظر ہو گئے،،،یہ اس آٹھ سالہ کہانی کا صرف دس فیصد حصہ ہے ۔
یہ ہمارے پاکستانی معاشرے کے ہر دوسرے گھر کی کہانی ہے جہاں بڑے ارمانوں سے کسی کی بیٹی کو لایا جاتا ہے اور پھر اسکو تھوڑ دلی، کم ظرفی اور شک و شبے کی ایسی آگ میں دھکیل دیا جاتا ہے جسکا اس نے کبھی تصور بھی نہ کیا ہو۔
خدارا 🙏
جب کسی کی بیٹی کو اپنے گھر کی عزت بنا کر لائیں تو اسکو عزت سمجھیں اور عزت دیں ، کوئی بھی انسان خامیوں سے پاک نہیں ہوتا اور اس رشتے کی یہی خوبصورتی ہے کہ فریقین اسکو ایکدوسرے کی خوبیوں اور خامیوں سمیت قبول کریں۔
جیسے اپنی بیٹی کو اسکی چھوٹی چھوٹی باتوں کیلئے معاف کردیتے ہیں ویسے ہی بہو کیلئے بھی دل بڑا کرنا سیکھیں۔
یہ ایک پہلو ہے جو میں نے سنا اور اسکو اپنے الفاظ میں لکھ دیا ،اور بہت سے واقعات اس سے الٹ بھی ہیں جہاں نئی نویلی دلہنیں گھروں کو توڑنے کا اور فتنہ و فساد کا سبب بن جاتی ہیں تو دونوں طرف ہی اصلاح کی شدید ضرورت ہے،،،
جو لڑکیاں بیاہ کر اگلے گھر جائیں وہ بھی شوہر کو اپنی ملکیت نہ بنائیں اور جو لوگ دوسروں کی بیٹیاں بیاہ کے لائیں وہ انکو اور کچھ نہ سہی تو انسان ضرور سمجھیں🙏
چونکہ ہمارے یہاں  پاکستان میں ذیادہ تر مڈل کلاس اور اس سے بھی نیچے کا طبقہ آباد ہے اور ایسے میں جوائینٹ فیملی سسٹم کا ہی رواج ہے تو دونوں طرف سے دل بڑا کر کے ایک دوسرے کو قبول کرنے کی ضرورت ہے، اعلی ظرفی سے گھر میں نئے اضافے کی صورت آئے فرد کو کھلے دل سے قبول کرنے کی ضرورت ہے،
سسرال والے نئی نویلی دلہن کو گھر میں جگہ بنانے کا موقع دیں اور بہو سب کے احترام کو ملحوظ خاطر رکھے۔
اپنے خاندانی نظام کو پرسکون طریقے سے چلانے کیلئے جیو اور جینے دو کے فلسفے کو اپنانے کی ضرورت ہے کیونکہ ایک دوسرے کی خواہشات کا احترام کر کے ہی ایک خوشحال گھرانہ تشکیل پا سکتا ہے کیونکہ ایک دوسرے کی عزت کے ساتھ جذبات کا احترام اور احساسات کا خیال کر کے ہی بہتر زندگی گزاری جاسکتی ہے۔

خواہش سے مراد کسی مادّی شے یا
مرتبہ و مقام جسے پانےکیلیے بندہ ( مومن) ہر قانونی، غیر قانونی آئینی و غیر آئینی اور شرعی و غیر شرعی ( یعنی قانون ، آئین و دین کے متعین کردہ حدود) کو پھلانگتا ہے۔
خواہشات کی تکمیل انسان کو خوشی اور تسکین دیتی ہے۔
عقل و منطق کے برعکس ، اپنی خواہشات سے والہانہ محبت کے نتیجے میں انسان معاشرے میں بھی خوار و ذلیل (ریاستی مجرم)ہوجاتا ہے۔ اور ایمان ( شرعی لحاظ سے )بھی خطرے میں پڑھ جاتا ہے۔
انسانی خواہشات انسانی ضروریات کی پیداوار ہیں۔
انسان فطرتاً خواہشات کے اگے ڈھیر ہوتا ہے۔
دراصل نفس ہی انسان میں خواہشات پیدا کرتا ہے اور اسی نفس ہی کے ذریعےانسان خواہشات کا غلام بنتا ہے ۔
دنیا کی رنگینیوں میں ایسی کشش و جاذبیت موجود ہے جو بنی نوع انسان کو زیر کرنے اور اسے اپنی طرف راغب کرنے کیلیے کافی ہے۔
اور فطرت انسانی میں بھی ایسے عناصر پائے جاتے ہیں جو دنیا کی کشش سے میل کھاتے ہیں۔
"” اسلام اور خواہشات "”
خواہش اور ضرورت دو الگ چیزیں ہیں۔
بھوک اگر ضرورت ہے تو ذائقہ خواہش۔
محبت اگر ضرورت ہے تو قربت تمنا۔
خواہشوں کا سفر دراصل خود شناسی سے
شروع ہوتا ہے۔اگر احتیاط سے کام نا لیا جائے اوراسلام کے وضع کردہ حدود و قیود سے تجاوز ہوتی ہے تویہ خود پرستی کی اس انتہا تک پہنچ جاتاہے جہاں انسان کی جھولی میں سوائے نقصان کے کچھ نہیں رہتا۔
پس۔۔۔! جس نے خود کو جانا اس نے ربّ کو جانا۔
اسلام کی بنیاد قرآن و سنت پر ہے- اسلام کے معنی تابع ہونا ہے یعنی خود کو خدا کا تابعدار و فرمانبردار بنانا ہے۔ الله کے احکامات سے دور ہو کر انسان گمراہ اور باغی بن جاتا ہے ۔ 
ہر مومن ، ہر وقت خدا کو حاضر سمجھتا ہے۔ لہٰذا ﷲ کے احکام کی پیروی کرنے والا مسلمان ہے اور نفس کی پیروی کرنے والا شیطان کے راستہ پر نکل پڑتا ہے۔
نفس کا تابع قیامت کی مطلق پروا نہیں کرتا۔
نبی پاک ﷺ فرماتے ہیں کہ دنیا مومن کیلیے قید خانہ ہے
 کبھی تم نے اُس شخص کے حال پر غور کیا ہے جس نے اپنی خواہش ِ نفس کو اپنا خدا بنا لیا ہو؟ 
کیا تم ایسے شخص کو راہِ راست پر لانے کا ذمّہ لے سکتے ہو؟
کیا تم سمجھتے ہو کہ ان میں سے اکثر لوگ سُنتے اور سمجھتے ہیں؟
یہ تو جانوروں کی طرح ہیں، بلکہ  اُن سے بھی گئے گُزرے۔ 
(القُرآن ، سورت الفرقان ایت نمبر 43 )
انسان کو اللہ تعالیٰ نے عقل و شعور کے ذریعے اشرف المخلوقات بنا کر ،فرشتوں اور تمام مخلوقات پرفوقیت دے کرافضل بنایا ِاِنسان کو
"”لَقَد خلقنا الا نسان فی احسن تقویم””
کہ ہم نے انسان کو بہترین ساخت پر پیدا کیا کسی بھی دوسری مخلوق کے لئے اللہ تعالیٰ نے یوں نہیں فرمایا۔
اب چونکہ نفس ہی دراصل انسانوں میں خواہشات پیدا کرتا ہے اور اِسی نفس ہی کے ذریعے ہم خواہشات کے غلام بنتے ہیں اور ہماری نفسی خواہشات ہی ہمیں تباہی کی طرف لے جاتی ہیں ۔ انسان کی سب سے بڑی دشمن اُس کی خواہشات ہوتی ہیں ۔ حضور اقدسﷺ کا فرمان مبارک ہے کہ جو کچھ سابق اُمتوں نے کیا ہو گا میری اُمت میں بھی وہ برائیاں ضرور ظاہر ہو نگی ۔
اللہ تبارک تعالیٰ قران میں فرماتے ہیں
بکثرت لوگوں کا حال یہ ہے کہ علم کے بغیر محض اپنی خواہشات کی بنا پر گمراہ کن باتیں کرتے ہیں، ان حد سے گزرنے والوں کو تمہارا رب خوب جانتا ہے ۔
 [قرآن ، سورت الانعام ، آیت نمبر 119​]
ہم مسلمان ہیں اور کلمہ پڑھنے کے بعد ہماری تمام خواہشات ایک خاص حدود میں آکر قید ہو جاتی ہیں۔نفس کی ہر خواہش کا اُلٹا کرنا ہی دراصل تقویٰ ہے۔
آج پوری دنیا میں سب سے زیاہ خواہشات کے شکار ہم مسلمان ہو رہے ہیں ۔ حالانکہ ہمارے لیے تو یہ دنیا قید خانہ ( جیل ) کی طرح ہے اور ہم نے زندگی رسول اللہؐ کی شریعت رسول اللہ ﷺکے مطابق گُزارنی ہے ۔
تقویٰ کے معنی ایک مومن مسلمان نے اپنی روح کو پاک رکھنے کے لیے تمام برائیوں اور خواہشات سے اپنے آپ کو بچانا ہے اُن سے پرہیز کرنا ہوتا ہے۔ نفس بڑا ہی ظالم ہوتا ہے ۔غصہ ، جھوٹ ، غیبت ،حسد یہ سب دراصل نفس کی اصل بیماریاں ہیں اور تمام خواہشات انہی کے کوکھ سے جنم لیتی ہیں ۔
اللہ تعالیٰ ہم سب کوعمل کرنے کی توفیق عطا فرمائے۔ امین

ٹویٹر ہینڈل : @chalakiyan

‏
ملک بھر کی طرح گلگت بلتستان میں بھی مہلک واٸریس کرونا کے وار اور تباہ کاریاں جاری ہیں گلگت بلتستان میں کرونا کیسسز کی شرح میں بہت اضافہ ہوچکا ہے خصوصا ضلع گلگت میں کرونا کے بڑھتے کیسسز اور شرح اموات نے لوگوں کی تشویش ,پریشانیوں اور تکلیفوں میں اضافہ کردیا ہے صورتحال اس نہج پر پہنچ چکی ہے کہ ہسپتالوں میں او پی ڈیز بند کردی گٸی ہیں اور کرونا سے متاثرہ مریضوں کے لیے مختص آٸیسولیشن سینٹر بھر چکے ہیں اور کچھ پراٸیوٹ ہسپتالوں نے نٸے مریضوں کو لینے سے معذرت کے اشتہار بھی چسپاں کردٸے ہیں طبی ماہرین کے مطابق کرونا کی نٸی لہر مہلک انڈین ڈیلٹا ورژن ہے جس کے مہلک اثرات زیادہ ہیں ماضی میں گلگت بلتستان میں سخت ایس او پیز اور لاک ڈاٶن سمیت دیگر حفاظتی اقدامات کی وجہ سے کرونا کی شرح اور صحت یابی کی شرح حوصلہ افزا رہی تھی مگر حالیہ لہر کے بعد صورتحال گھمبیر ہوچکی ہے سیاسی و سماجی حلقے بڑھتے ہوئے کیسیز اور شرح کے حساب سے مکمل لاک ڈاٶن اور سخت ایس او پیز کا مطالبہ کررہے ہیں گلگت بلتستان ایک پسماندہ اور دورافتادہ خطہ ہونے کی وجہ سے طبی سہوليات اور طب کے شعبے میں ملک کے دیگر صوبوں سے بہت پیچھے ہے خدانخواستہ اگر صورتحال مزید گھمبیر ہوٸی تو روک تھام اور تدارک سنگین چیلنج بن سکتا ہے حکومت گلگت بلتستان کی جانب سے جاری کردہ تازہ ترین اعداد وشمار کے مطابق صوبے میں878 کرونا سے متاثرہ مریض کرونا سینٹرز میں زیرعلاج ہیں اب تک اس موزی واٸیریس سے صوبے میں 147 افراد جاں بحق ہوئے ہیں سب سے زیادہ 67 اموات کے ساتھ ضلع گلگت سرفہرست ہے دوسرے نمبر پر46 اموات کے ساتھ ضلع سکردو اور تیسرے نمبر پر سات اموات کے ساتھ ضلع غذر نمایاں ہے کرونا کیسسز میں شرح کے حساب سے بلتستان 13.40 کی شرح سے پہلے نمبر پر اور ضلع گلگت 8.92 فیصد شرح کے حساب سے دوسرے نمبر پر موجود ہے ایکٹیو کیسسز کی شرح کے حساب سےضلع گلگت297 مریضوں کے ساتھ سرفہرست ہے ضلع سکردو185 کیسسز کے ساتھ دوسرے نمبر پر جکہ 151 کیسسز کے ساتھ ضلع غذر تیسرے نمبر پر موجود ہے صوبے میں کرونا کیسسز کی شرح %8.45سے بڑھ کر 9.77%تک پہنچ گٸی ہے جو کہ تشویش ناک صورتحال ہے یہاں یہ بات قابل زکر ہے کہ گلگت بلتستان میں سیاحت کا سیزن ہے اور اندرون و بیرون ملک سے سیاحوں کی بڑی تعداد گلگت بلتستان میں موجود ہے حالیہ بارشوں سے پیدا شدہ صورتحال کے ساتھ ساتھ بڑھتے ہوئے کرونا کیسسز نے بھی سیاحوں کی مشکلات میں اضافہ کردیا ہے حکومت نے کرونا کیسسز کی شرح کے حساب سے مختلف علاقوں میں سمارٹ لاک ڈاون نافذ کیا ہے اور سیاحوں کے لیے بھی پالیسی وضع کی گٸی ہے کہ کرونا ویکسینیشن سرٹیفکیٹ اور ٹیسٹ رپورٹ کے بغیر صوبے میں داخلے کی ایس اوپیز پر عملدرآمد یقینی بنایا جارہا ہے جو کہ خوش آٸند بات ہے دوسری طرف ہسپتالوں میں او پی ڈیز کی بندش کی وجہ سے عام مریضوں کو سخت پریشانیوں کا سامنا کرنا پڑ رہا ہے حکومت کو چاہیے کہ سخت ایس او پیز کے ساتھ عام عوام کے لیے او پی ڈی سروس یقینی بناٸی جاۓ تاکہ عام مریضوں کو درپيش مشکلات میں کمی آسکے ان حالات میں صوبائی حکومت کو چاہیے کہ کرونا کیسسز کی بڑھتی ہوٸی شرح کو مدنظر رکھتے ہوۓ جامع حکمت عملی اور ایس او پیز پر عملدرآمد کو سختی سے یقینی بنائے اور عوام الناس بھی طبی ماہرین اور حکومت کی جانب سے وضع کردہ پالیسسز و ایس او پیز پر بھرپور عملدرآمد کریں تاکہ کرونا کیسسز کی موجودہ لہر کے مضر اور مہلک اثرات کو کم سے کم کیا جاسکے ۔۔۔۔۔ Srufaq@

کو ویڈ ۱۹ نے دنیا تو بدل ہی دی، ہمیشہ کی طرح ہمیں ایک نیا عالمی سازش کا مرکز بھی بنا دیا ہے۔

دنیا بھر کے لوگ اس فکر میں ہیں کہ کس طرح سے اپنے آپ کو، اپنے اہل و عیال، پڑوسی محلہ دار، رشتہ دار، دوست احباب اور ہم وطنوں کو اس جان لیوا وائرس سے بچائیں۔
پچھلے ڈیڑھ سال سے دنیا بھر کی حکومتیں مختلف قسم کے لاک ڈاؤن کر کے ، حفاظتی طریقہ کار اور واءرس سے بچاؤ کے پیغامات کو ہر خاص و عام تک پہہچارہی ہیں تاکہ اس وائرس کی تباہ کاریوں کو کسی نہ کسی طریقے سے قابو میں لایا جا سکے۔ ان تمام تر حفاظتی اقدامات کے باوجود لاکھوں لوگ اپنی جان گنوا بیٹھے ہیں، کڑوڑوں لوگ اس وائرس کی وجہ سے جان لیوا بیماری میں مبتلا ہو چکے ہیں۔ اس موزی وائرس کے انسانی جسم پڑ پڑنے والے دور رس مضر صحت اثرات کے بارے میں ابھی مکمل معلومات ہی نہیں ہیں۔

معاشرتی طور پر اس وائرس کی وجہ سے میل ملاپ، درس و تدریس، غمی و خوشی، دکھ سکھ ، آنا جانا، ملنا ملانا ، غرض یہ کی زندگی کا ہر ایک پہلو اس کی زد میں آکر پاش پاش ہو گیا ہے۔ جو معاشرتی ضابطے دہایوں، صدیوں اور نسل در نسل ہماری زندگی کا حصہ بن چکے تھے، اب اچانک ہی خطرناک اور جان لیوا بن گئے ہیں۔
کسی بھی جگہ ، کسی بھی وقت، کسی سے بھی ملاقات کرنے کی آزادی فلحال ختم ہوگئی ہے۔ بچے اپنے ماں باپ سے ملنے سے قاصر ہو گۓ، میتیں بغیر عزیز و اقارب کے سپرد خاک کر دی گئیں، بیمار جانیں اپنی اقرباء کی عیادت سے محروم ہو گئیں، دفاتر، اسکول، اعلیُ تعلیمی ادارے، جیمخانہ وغیرہ بند ہو گۓ ۔ قصہ مختصر ، زندگی جو ہم جانتے تھے وہ مکمل طور پر بدل گئی ہے۔

معاشی طور پر کروڑوں لوگوں کے کاروبار تباہ و برباد ہو گۓ، نوکریاں ختم ہو گئیں، غریب ممالک میں مزید غربت پھیل گئی ہے، امیر ممالک بھی قرضوں کے بھوجھ میں دبیں ہیں۔ کساد بازاری کا ایک بڑھتا ہوا طوفان ہے جو دنیا بھر کی معاشیات کو اپنی ظالمانہ گرفت میں لے رہا ہے۔ غریب مزید غریب ہوا جارہا ہے اور اسے امید کی کرن شازونازر ہی نظر آ رہی ہے۔

یہ تو پھر بھی کافروں کی ایجادات بشمول انٹرنیٹ ، موبائل فون، اور کمپیوٹرز کی معجزہ کاری ہے کہ زندگی کا نظام جاری ہے اور ہم اپنی روز مرہ زندگی کی گذر بسر کر رہے ہیں۔ یہ وہی ایجادات جنہیں ہم مختلف حیلے بہانوں سے رد کرتے ہیں یا ان میں سازشوں کا عنصر تلاش کرتے رہتے ہیں۔ اور اگر کچھ نہیں بات سوجھتی تو ان ایجادات کے استعمال کو فحاشی پھیلانے کازریعہ اور اسلامی اقدار کے منافی قرار دیتے ہیں۔

اس کسمپرسی اور مایوسی میں امید کی واحد کرن وہ علاج ہے جوُ کہ جہنمی کافروں نے اپنی دنیاوی صلاحیتوں کو بروئے کار لاتے ہوۓ اور دن رات کی انتھک کا وشوں سے ایک ویکسین کی شکل میں ایجاد کیا۔ یہ ویکسین دنیا میں امید کی واحد کرن ہے جس کے استعمال سے ہم اپنی معمول کی زندگی گزارنے کا خواب دوبارہ دیکھنے لگے ہیں۔
جن معاشروں میں اس ویکسین کا استعمال وافر تعداد میں ہو رہا ہے وہاں زندگی کسی نہ کسی معنوں میں واپس آرہی ہے۔ روز مرہ کے معمولات میں توازن آرہا ہے۔

لیکن ہمارے معاشرے کی سوچ میں جو یہود و ہنود کی سازشوں کا جال بن دیا گیا ہے وہ اس ویکسین کو بھی اپنی لپیٹ میں لے چکا ہے۔ ہمیں مختلف طریقوں، تاویلوں، شرعی حوالہ جات اور فتاؤں کی مدد سے یہ باور کرایا جارہا ہے کہ یہ ویکسین ایک بینالاقوامی سازش ہے جس کے پیچھے کافروں (چین کی استثنی) کا ہاتھ ہے۔ کہ ہم جو دنیا جہان کے سب سے معزز، پاکیزہ، نیک سیرت، غریب پرور، عبادتگار، ہمدرد، اور ترقی یافتہ لوگ ہیں، یہ ویکسین ہماری ان تمام خوبیوں اور صفات کے خلاف ایک کافرانہ ہتھیار ہے۔ ہمارا مقتدر دینی طبقہ تو مزید آگے بڑھ کر یہ بیان فرمارہا ہے یہ ویکسین مسلمانوں کی بڑھتی ہوئی تعداد کو روکنے کے لۓ ایک عالمی کافرانہ سازش ہے۔ ان کے مطابق موجودہ اربوں مسلمانوں نے مل کر دنیا میں جو ایجادات، خوشحالی، امن، بھائ چارہ اور مثالی اسلامی معاشرے قائم کیا ہے ، ان کی معازاللہ روک تھام ہو جاۓ گی۔

ایک ایسی سازش جس کا تانہ بانہ ہر اس کافر ملک سے ملتا ہے، جس کی امیگریشن لینے کے لۓ مسلمان اپنا جان و مال قربان کرنے کے لۓ ہمہ وقت تیار ہیں۔ دنیا بھر کا جھوٹ اور فراڈ کر کے ہم مسلمان ان ہی کافر ممالک کی امیگریشین لیتے ہیں ، جو ہماری تعداد کو گھٹانے کے لۓ یہ ویکسین لے کر آئے ہیں۔ تو جناب اب یہ بات عیاں ہو رہی ہے کہ ان مقتدرہ حضرات کی نظر میں اسلام کا مفاد اتنا عزیز ہے کہ وہ اس کے لۓ ویکسین نہ لگا کر اپنی جان دے دیں گے ۔ چنانچہ اگر آپ کو بھی اسلام سے اتنی ہی محبت ہے تو پھر ان پہنچی ہوئی ہستیوں کی تقلید میں آپ بھی ویکسین نہ لگوا کر شہید ہو سکتے ہیں اور اگر آپ ایک مسلمان مرد ہیں تو فوراُ ہی جنت پہنچ کر بہتر حوروں، انگنت غلامان، اور اپنی دنیاوی بیگم کے ساتھ عیش و آرام کی ابدی زندگی گزار سکتے ہیں۔ وما علینہ اللالبلاغ۔