Author: Baaghi TV

قارئین کرام، آج ہم بات کریں گے کہ تمباکو نوشی کینسر کے خطرے کو کیسے بڑھاتی ہے،جیسا کہ آپ سب جانتے ہیں کہ سگریٹ نوشی ایک انتہائی مہلک آلودگی پیدا کرتی ہےاور اسی آلودگی کی وجہ سے بہت سے امراض جنم لیتے ہیں۔ان امراض میں سے ایک مہلک مرض کینسر ہے۔عوام الناس میں بہت سے افراد ایسے ہوں گے جو آلودگی کے بارے میں اس حد تک نہیں جانتے ہوں گے کہ وہ اس چیز کا تعین کر سکیں کہ کونسی چیز آلودگی کے زمرے میں آتی ہے۔آئیے! پہلے یہ جاننے کی کوشش کرتے ہیں کہ درحقیقت آلودگی کیا ہے؟اگر سادہ الفاظ میں آلودگی کو بیان کیا جائے تو اس کا تعارف کچھ یوں ہوگا کہ آلودگی ماحول میں نقصان دہ مواد کا دوسرا نام ہے یہ اور یہی نقصان دہ مواد آلودگی کہلاتا ہے۔اگر سگریٹ نوشی کی بات کی جائے تو سگریٹ کے دھوئیں میں ہزاروں کیمیائی مادے ہوتے ہیں ان میں سے سینکڑوں نقصان دے ٹاکسن کے طور پر جانے جاتے ہیں اورحالیہ تحقیق کے مطابق ان سیکڑوں کیمیائی مادوں میں سے 65 فیصد سے زیادہ کینسر کا سبب بنتے ہیں۔ سگریٹ کے دھوئیں سے بہت سارے زہریلے اور کینسر پیدا کرنے والے کیمیکلز کی وجہ سے سگریٹ نوشی ماضی قریب میں کئی قسم کے کینسر کی قلیدی وجہ کے طور پر پہچانی جائے گی۔ اس کے علاوہ سگریٹ نوشی جسم کے اندر اہم افعال کو بھی متاثر کرتی ہے جو کینسر کے خلاف جسم کی قوت مدافعت کو برقرار رکھنے میں اہم کردار ادا کرتے ہیں۔مثال کے طور سگریٹ نوشی کرنے والے شخص کے جسم میں کسی بھی قسم کی سوزش ہونے کی صورت میں یہ سوزش بڑھتی چلی جاتی ہے جو کہ کینسر اور بہت سی دیگر بیماریوں کے خطرات کو جنم دیتی ہے۔حالیہ تحقیق کے مطابق عوامل کے اس امتزاج پر غور کرتے ہوئے یہ اخذ کیا جاسکتا ہے کہ سگریٹ نوشی سرطان کے ابتدائی مرحلے سے کینسر کے بڑھنے میں اہم کردار ادا کرتی ہے۔کیا سگریٹ پینے سے کینسر کا خطرہ بڑھ جاتا ہے؟ اور کتنا آئیے جانتے ہیں۔ کینسر پر ریسرچ کرنے والے ادارے کینسر ڈاٹ نیٹ کے ایک معتبر پروفیسر اینتھونے جے ایل برگ نے اپنے ایک حالیہ مضمون میں لکھا ہے کے زیادہ تر لوگ جانتے ہیں کہ سگریٹ نوشی پھیپھڑوں کے کینسر کی بنیادی وجہ ہے لیکن جو بات کم مشہور اور عوام الناس میں کم لوگ جانتے ہیں وہ یہ کہ سگریٹ نوشی کئ دیگر اقسام کے کینسر کی وجہ بھی بنتی ہے، دیگر کینسر کی اقسام میں سرفہرست یہ ہیں: مثانے کا کینسر، گریوا کا کینسر، کولور کٹل کینسر، غذائی نالی کا کینسر، گردے کا کینسر، لاریجیل اور ہائپو فریجنل کینسر، جگر کا کینسر، لبلبے کا کینسر شامل ہیں۔مختصرا مندرجہ بالا تحقیق اور وجوہات کی بنا پر یہ کہنا غلط ہرگز نہ ہوگا کہ تمباکو نوشی صحت کے لیے بہت ہی مہلک ہے،حکومت کو چاہیے کہ وہ اس کو روکنے کے لیے موثر اقدامات کرے اور ہماری جو نوجوان نسل اس لت میں مبتلا ہو چکی ہے اسے جلد سے جلد ریہیبلیٹیشن سنٹرز میں منتقل کرے اور ان کی کاؤنسلنگ کرے تاکہ وہ معاشرے کی تعمیر و ترقی میں کاربن ثابت ہوں۔اس کے علاوہ حکومت وقت کو چاہیے کہ وہ ایسے ادارے قائم کرے جو نچلی سطح پر رہتے ہوئے روزمرہ کی روٹین میں اس چیز کو مانیٹر کرے اور ساتھ ہی حکومت کو چاہیے کہ وہ ایسی کمپنیوں پر پابندیاں عائد کرے جو انسانوں کی زندگی کے لئے موت کا سامان تیار کر رہے ہیں۔آخر میں اللہ تعالی سے دعا ہے کہ وہ ہمیں تمام دنیاوی آفات و امراض سے محفوظ رکھے (آمین)

@adibaarain

متحدہ ہندوستان یا اکھنڈ بھارت کے ناپاک عزائم لئے بھارتی فوج اندھیرے میں چوروں کی طرح مغربی پاکستان فتح کرنے واہگہ بارڈر کے راستے لاہور میں گھسنا چاہتی تھی. بھارتی کمانڈر انچیف جنرل چودھری نے اپنے ساتھیوں کو جمخانہ میں محفل شراب و شباب منانے کی نوید بھی سنا دی. بھارتیوں کا خیال تھا کہ ہم 72 گھنٹوں میں سارے مغربی پاکستان پر قبضہ کر لیں گے. مگر ابتداء سے ہی بھارتی فوج کی ذلت آمیز شکست شروع ہو گئی جب ستلج رینجرز، گشتی پولیس اور چرواہوں نے 60 ہزار بھارتی فوجیوں کو گھنٹوں پیش قدمی سے روکے رکھا.

ستمبر 1965 میں پاکستانی فوج نے بہادری اور جوانمردی کے ناقابل فراموش اور ناقابل یقین کارنامے سرانجام دیتے ہوئے دشمن فوج جو کہ تعداد اور وسائل کے لحاظ سے پاکستان سے بڑی فوج تھی کو عبرت ناک شکست دی. اقوام متحدہ اور سلامتی کونسل کی قرارداد کی مداخلت سے 23 ستمبر 1965 کو جنگ بندی کا اعلان کیا گیا.

کانگریس اور ہندو برصغیر کی تقسیم اور قیام پاکستان کے خلاف تھے. جب ان کی کوششوں اور سازشوں کے باوجود پاکستان کا قیام عمل میں آ چکا تھا تو انہوں نے ہر طریقے سے پاکستان کو نقصان پہنچانے کی کوشش کی. آگے بڑھنے سے پہلے قیام پاکستان کے دوران ہندوستانی اور کانگریسی راہنما پاکستان کے خلاف اپنے مکرو عزائم کا اظہار کرتے رہے.

17 مئی 1947 لندن کے اخبار اکانومسٹ نے لکھا

"کانگریس برصغیر کی تقسیم کو اس امید پر تسلیم کرے گی کہ یہ تقسیم بعد ازاں برصغیر کو اتحاد کی طرف لے جائے گی. کانگریس اب بھی برصغیر کی تقسیم کے خلاف ہے”

3 جولائی 1947 کو ڈاکٹر شیام پرشاد مکھرجی نے کہا

"ہمارا نصب العین یہ ہونا چاہئے کہ پاکستان کو دوبارہ ہندوستان میں ضم کر لینا چاہئے اور یہ ہر قیمت پر ہو کر رہے گا”

(دیوان چمن لعل 3 جولائی 1947)

"اتحاد کا خواب دیکھنے والوں کو رنج پہنچا ہے، ہمیں امید ہے جلد یا بدیر دونوں ملکوں کا اتحاد ہو جائے گا” سردار پٹیل

امرت بازار امر پتریکا. 16 اگست 1947

15 اگست 1947 کو کلکتہ میں کانگریس کے صدر اچاریہ کا کہنا تھا کہ

"کانگریس اور قوم متحدہ ہندوستان کے دعوے سے دستبردار نہیں ہوئے”

نیشنل ہیرالڈ لکھنو کے 6 نومبر 1950 کے مطابق وی جی دیش پانڈے نے کہا کہ

"ہمارا مقصد اکھنڈ بھارت میں ہندو راج قائم کرنا ہے”

6 ستمبر کو جب اہل لاہور سو رہے تھے، چوروں کی طرح اندھیرے میں بھارتی فوج نے لاہور پر حملے کرنے کے لئے پاکستان میں داخل ہوئی اور واہگہ پر ایک فوجی چوکی پر قبضہ کر لیا. اس وقت گشتی پولیس، ستلج رینجرز اور ایک سرحدی دستہ معمول کی نگرانی اور گشت پر مامور تھا. 60 ہزار بھارتی فوجیوں کو ان مختصر نیم فوجی دستوں نے گھنٹوں تگنی کا ناچ نچوایا. بھارت کا خیال تھا کہ چوری چپکے لاہور پر قبضہ کر لے گا.

بھارتی فوج کا خیال تھا کہ پاکستان اچانک اور چوری حملے کی تاب نہ لا سکے گا اور یوں مغربی پاکستان کو 72 گھنٹوں میں فتح کر لیں گے مگر پاک فضائیہ نے ان کے سارے ناپاک عزائم چند گھنٹوں میں خاک میں ملا دیئے. بھارتی کمانڈر انچیف جنرل چودھری نے اپنے سپاہیوں کو لاہور جم خانہ میں ناشتہ کرنے اور محفل رقص برپا کرنے کی نوید بھی سنا دی تھی.

صدر پاکستان جنرل ایوب خان نے ولولہ انگیز تقریر کرتے ہوئے قوم اور جوانوں کے خون کو گرمایا اور کہا کہ”

10 کروڑ عوام تیار ہو جائے، جس بلا نے تمہارے سروں پر سایہ ڈالا ہے اس کی موت اور تباہی یقینی ہے”

پاک جوانوں کے پہلے ہی وار میں 800 بھارتی ہلاک ہوئے اور 10 ٹینک اور 50 گاڑیوں پر پاک فوج نے قبضہ کر لیا. پہلے ہی دن پاک شاہینوں نے 22 بھارتی فضائیہ کے طیاروں کو مار گرایا. شدید خطرے کے باوجود پٹھان کوٹ کے ہوائی اڈے پر انتہائی نچلی پرواز کرتے ہوئے 13 طیاروں کو تباہ کیا گیا. اسی روز سکواڈرن لیڈر سرفراز احمد رفیقی اور فلائیٹ یونس حسن نے ہلواڑہ ہوائی اڈے پر زبردست حملہ کرتے ہوئے 5 طیاروں کو تباہ کیا مگر یہ دونوں شیر دل شاہین حملے میں شہید ہو گئے.

1965 کی جنگ کے پہلے ہی روز بھارت بے تحاشا جانی، مالی اور فضائیہ کا نقصان کروا چکا تھا. بھارت کے تمام ناپاک عزائم خاک میں مل چکے تھے. اقوام متحدہ میں بھارتی لابی شروع سے ہی موجود اور مضبوط تھی. اقوام متحدہ کے سیکرٹری جنرل اوتھان نے ہنگامی دورہ کرتے ہوئے 7 ستمبر 1965 کو راولپنڈی میں جنرل ایوب خان سے ملاقات کی اور جنگ بندی کے لئے قائل کرنے کی کوشش کی. جناب صدر نے اوتھان کو مقبوضہ کشمیر میں جاری بھارتی مظالم کا گہرائی، سختی اور تفصیل سے ذکر کرتے ہوئے بھارت کو ذمہ دار قرار دیا.

7 ستمبر کو انڈونیشیا کے صدر سوئیکارنو ایوان صدر جکارتہ میں کہا کہ انڈونیشیائی حکومت اور عوام پاکستان اور کشمیریوں کے ساتھ کھڑے ہیں. انڈونیشی طلبہ نے جکارتہ میں بھارتی سفارتخانے کے باہر بھرپور احتجاج کیا. صدر سوئکارنو نے پاکستان اور کشمیر پر 24 گھنٹوں میں کابینہ کے 3 ہنگامی اجلاس بلائے.

بھارتی فضائیہ نے مغربی پاکستان کے پانچ شہروں، چاٹگام، جیسور، کریم ٹولا، لال منیر ہاٹ اور رنگ پور اور مغربی پاکستان کے 3 شہروں کراچی، سرگودھا اور راولپنڈی پر بمباری کی. مشرقی پاکستان کی فضائیہ نے بھی دشمن کو ذلیل کرتے ہوئے مجموعی طور پر اس کے 15 طیاروں کو تباہ کر دیا. 7 ستمبر کو مجموعی طور پر 31 بھارتی فضائیہ کے طیاروں کو تباہ کیا گیا یوں 1 ستمبر سے 7 ستمبر کے دوران بھارتی فضائیہ کے تباہ ہونے والے طیاروں کی تعداد 60 ہو گئی تھی. اسی روز سرگودھا میں بھارتیوں نے پاک فضائیہ کے اڈوں پر ناکام حملے کی کوشش میں اپنا طیارہ بھی تباہ کروا بیٹھے.

7 ستمبر 1965 کو شام 6 بجکر 5 منٹ پر دشمن کے 4 ایف6 ہنٹر اور ایک ایف104 طیارے سرگودھا کو نشانہ بنانے کے لئے آئے. پاکستان کے ایف86 طیاروں کی فارمیشن کے قائد سکواڈرن لیڈر ایم ایم عالم تھے. ایم ایم عالم کا پہلا نشانہ خطا گیا مگر فوراً ہی دوسرے نشانے سے ایک ہنٹر طیارے کو مار گرایا اور ایم ایم عالم نے اگلا وار کرتے ہوئے چند لمحات میں دشمن کے 4 ہنٹر طیاروں کو تباہ کر دیا.

21 ستمبر کو بھارتی وزیر اعظم نے جنگ بندی کے لئے کہا کہ اگر پاکستان جنگ بندی کے لئے تیار ہو تو ہم بھی جنگ بندی کے لئے تیار ہیں.

22 ستمبر کو سلامتی کونسل کے ہنگامی اجلاس بلایا گیا جس میں پاکستان کو جنگ بندی کے لئے راضی کیا گیا. سلامتی کونسل نے جنگ بندی کے لئے ایک قرارداد پیش کی. وزیر خارجہ ذوالفقار علی نے اقوام متحدہ سے علیحدہ ہونے کی دھمکی دی. کہا کہ 18 سالوں سے تم لوگوں نے کشمیر اور مسئلہ کشمیر کو کھلونا سمجھا ہوا ہے.

سلامتی کونسل کی قرارداد کی روشنی میں صدر ایوب خان نے 22 ستمبر کو اعلان کیا کہ 23 ستمبر صبح 3 بجے تک جنگ بندی ہو جائے گی اور اپنے جوانوں کو کہا کہ اپنی اپنی جگہوں پر ڈٹے رہیں. اس وقت تک گولی نہ چلائیں جب تک دشمن پہل نہ کرے.

بھارت کے خلاف جنگ کی فتح پر 24 ستمبر کو ملک بھر میں یوم تشکر کے طور پر منایا گیا. ڈھاکہ، راولپنڈی، لاہور اور کراچی سمیت تمام بڑے اور چھوٹے شہروں میں نماز شکرانہ ادا کی گئی.

غیر جانبدارانہ ذرائع اور اعداد وشمار کے مطابق بھارت کو فوجیوں کی تعداد، جنگی طیاروں، ٹینکرز کے علاوہ تمام جنگی سازو سامان میں برتری حاصل تھی.

بھارتی فوج 700،000

جنگی طیارے 700 سے زیادہ

ٹینکرز 720 

جبکہ پاکستان کی نمبرز کافی کم تھے

فوج 260،000

طیارے 280

ٹینکرز 756

جنگ کے اختتام پر بھارتی فوج کے 8200 فوجی ہلاک، 500 ٹینکس تباہ یا پاکستان کے قبضہ میں آ گئے. 110 سے 113 طیارے مارے گئے اور جبکہ پاکستان کے محض 19 طیاروں کا نقصان ہوا.

@mian_ihsaan

28 جنوری 1987 کی سہ پہر پاکستان کے ایٹمی سائنسدان ڈاکٹر عبدالقدیر خان اسلام آباد کے علاقے E-7 میں واقع اپنی رہائش گاہ پر اپنی اہلیہ کے ہمراہ اکیلے موجود تھے کہ جب سکیورٹی افسر نے چند مہمانوں کی آمد کی اطلاع دی۔

سکیورٹی افسر نے ڈاکٹر عبد القدیر خان کو بتایا کہ مہمانوں میں سے ایک کو وہ پہچانتے ہیں کیونکہ وہ پاکستان کے معروف صحافی مشاہد حسین سید ہیں۔ جو اب سینیٹ میں پاکستان مسلم لیگ ن کی طرف سے ممبر ہیں۔  ڈاکٹر خان نے سکیورٹی افسر سے کہا کہ مہمانوں کو اندر لے آئیں اور انھیں ڈرائنگ روم میں بٹھائیں۔

ڈاکٹر عبد القدیر خان مہمانوں سے ملنے آئے تو مشاہد حسین سید نے دوسرے مہمان کا تعارف کلدیپ نیئر کے طور پر کرایا جو انڈین پنجاب سے تعلق رکھنے والے مشہور صحافی تھے۔

مشاہد حسین سید نے ڈاکٹر عبد القدیر خان کو بتایا کہ کلدیپ نیئر میری شادی کی تقریب میں شرکت کے لیے پاکستان تشریف لائے ہیں۔ یہ تقریب اس ملاقات سے ایک ہفتے بعد ہونا تھی۔ چائے پیتے ہوئے ڈرائنگ روم میں موجود تینوں افراد کے درمیان انڈیا، پاکستان تعلقات، انڈین تاریخ اور ہندو مسلم تعلقات اور پاکستان کے ایٹمی پروگرام تک کے موضوعات پر طویل بات ہوئی۔ پاکستان کا جوہری پروگرام حال ہی میں ڈاکٹر عبد القدیر خان کی زیر نگرانی شروع ہو چکا تھا۔

کلدیپ نیئر نے اپنا تعارف کرواتے ہوئے کہا کہ ‘میں سیالکوٹ سے ہوں اور اب نئی دہلی میں رہتا ہوں۔جوابا ڈاکٹر عبد القدیر خان نے کہا کہ میں بھوپال سے ہوں اور اب اسلام آباد میں رہتا ہوں۔’

جب ان تینوں مہمانوں کی پاکستان کے جوہری پروگرام پر گفتگو شروع ہوئی تو کلدیپ نیئر کا کہنا تھا کہ ‘اگر پاکستان دس بم بنائے گا تو انڈیا ایک سو بم بنائے گا۔’ اس بات کے جواب میں ڈاکٹر عبد القدیر خان نے کہا کہ ‘اتنی بڑی تعداد میں بم بنانے کی ضرورت نہیں۔ تین یا چار ہی دونوں اطراف کے لیے کافی ہوں گے۔’

ڈاکٹر عبد القدیر خان بتاتے ہیں کہ ‘میں نے اپنی بات جاری رکھتے ہوئے کہا  کہ ہم اس قابل ہیں کہ مختصر ترین مدت میں بم بنا لیں۔’

کلدیپ نیئر نے غیر ذمہ داری کا مظاہرہ کرتے ہوئے ڈاکٹر عبد القدیر خان کے ساتھ ہونے والی اس غیر رسمی گفتگو کو انٹرویو بنا کر ‘لندن آبزور’ کو 20 ہزار پاونڈز میں بیچ دیا۔ یہ انٹرویو  نہیں تھا۔ یہ تو چائے پر ہونے والی محض ایک گپ شپ تھی۔’

یہ ملاقات ایسے وقت ہوئی تھی جب پاکستان اور انڈیا کی فوجیں آنکھوں میں آنکھیں ڈالے راجستھان اور پنجاب سیکٹرز میں عالمی سرحد پر ایک دوسرے کے آمنے سامنے صف آرا تھیں۔

سرحد کے دونوں جانب حملہ کرنے والی بری افواج کے دستے جمے ہوئے تھے، فضائیہ ہائی الرٹ پر تھی جبکہ توپ خانے بھی سرحد کے قریب پہنچا دیاگیا تھا۔ اس بحران کو براس ٹیک (انڈین فوج کی جنگی مشق) کے نام سے یاد کیا جاتا ہے۔

پاکستان کو یہ خطرہ لاحق ہوا کہ ان انڈین جنگی مشقوں کا رُخ اور پیش قدمی پاکستان کی طرف ہے جو پاکستان کے سیاسی خلفشار کا شکار صوبہ سندھ پر بڑے حملے میں بدل سکتی ہے۔ یہ وہ وقت تھا جب پاکستان کا جوہری پروگرام اپنے ابتدائی مراحل میں تھا اور پاکستان باقاعدہ جوہری حیثیت حاصل کرنے سے 12 سال دور تھا۔

اس زمانے میں ‘براس ٹیک’ کو پاکستان کی سالمیت کے لیے سٹرٹیجک خطرے کے طور پر دیکھا گیا۔

کلدیپ نیئر کے نام سے لندن آبزرور میں شائع ہونے انٹرویو میں ڈاکٹر عبد القدیر خان کے نام سے منسوب کرکے لکھا گیا کہ ‘کوئی ملک پاکستان کو ختم نہیں کر سکتا اور نا ہی ہم تر نوالہ ہیں۔ ہم قائم رہنے کے لیے بنے ہیں اور کوئی شک میں نہ رہے کہ اگر ہماری بقا کو خطرہ ہوا تو ہم ایٹم بم چلا دیں گے۔’

یہ بات بھی کلدیپ نئیر نے ڈاکٹر عبد القدیر خان سے منسوب کر کے لکھی کہ پاکستان نے ہتھیاروں میں استعمال کی سطح تک یورینیم کو افزودہ کر لیا ہے اور یہ کہ لیبارٹری میں اس کا تجربہ کیا جا سکتا ہے۔

اس انٹرویو کی اشاعت کے بعد سے پاکستان میں عوام اور میڈیا نے عام طور پر یہ سمجھنا شروع کر دیا کہ کلدیپ نئیر کی خبر میں مخفی اس ‘جوہری دھمکی’ نے انڈیا کو پاکستان پر کوئی بڑا حملہ کرنے سے روکا تھا۔

بی بی سی نے اپنے انٹرویو میں جب ڈاکٹر اے کیو خان سے استفسار کیا کہ کیا کلدیپ نئیر سے ان کی گفتگو سے متعلق اخباری خبر نے کشیدگی کو ختم کرنے میں کردار ادا کیا تھا؟ ان کا جواب تھا کہ ‘بالکل۔ ایسا ہوا۔ اس کشیدگی کے خاتمے کے پیچھے ایک اور وجہ بھی تھی۔’

‘زیادہ کردار ضیاء کی دھمکی نے ادا کیا جب وہ جے پور میں راجیو گاندھی سے ملے تھے جہاں وہ کرکٹ میچ دیکھنے گئے تھے۔ ضیاء نے راجیو سے کہا کہ اگر بھارتی فوج فوری واپس نہ ہوئی تو وہ جوہری حملے کا حکم دے دیں گے۔ راجیو اس پر گھبرا گئے اور نتیجہ یہ نکلا کہ انھوں نے بھارتی فوج کی فوری واپسی کا حکم دے دیا۔’

ڈاکٹر عبد القدیر خان بتاتے ہیں کہ براس ٹیک سے چند ہفتے قبل انھوں نے جنرل ضیاء کو ایک تحریری پیغام بھجوایا تھا کہ پاکستان دس دن کے نوٹس پر جوہری بم بنانے کے قابل ہے۔ انھوں نے کہا کہ ‘اس سے ضیاء کو راجیو گاندھی سے بات کرنے اور دھمکی دینے کا اعتماد ملا تھا۔’

آج وہی ڈاکٹر عبد القدیر خان پاکستان میں بڑی دشواری کے ساتھ اپنی زندگی بسر کر رہے ہیں، سرکاری سطح پر بھی انکو عوامی مقامات پر جانے کی اجازت نہیں ہے اور حالیہ دنوں میں وہ کورونا وائرس کا شکار ہوگئے ہیں جن کو ملٹری ہسپتال راولپنڈی میں داخل کر دیا گیا ہے۔ ہماری نیک تمنائیں اور دعائیں ڈاکٹر عبد القدیر خان کے ساتھ ہیں کہ الله تعالٰی انکو جلد صحتیابی عطاء فرمائے تاکہ وہ مزید پاکستان کے لیے اچھے کام کر جائیں، جن سے آنے والی نئی نسلیں انکے کام سے استفادہ حاصل کر سکیں۔

ٹیلی ویژن دیکھیں یا اخبارات سوشل میڈیا کھولیں تو سامنے ایک جیسی خبریں گردش کرتی ہوئی نظر آتی ہیں۔جنسی تشدد ،جسمانی تشدد ،قتل اور ایسی بہت سی خبر رونگٹے کھڑے کرنے کے لیے کافی ہیں۔۔ایسا کیوں ہے؟ کون سی چیز ہے جس نے انسان کو انسان کے مرتبے سے گرا دیا اور حیوان بننے پر مجبور کر دیا ہے؟بہت سی وجوہات ہو سکتی ہیں لیکن ان میں سے ایک وجہ ہمارا خودساختہ معیار ہے۔جس کے ذمہ دار بھی ہم خود ہیں اور اس چیز کا شکار بھی ہو خود ہیں۔ہم ایک ایسا معاشرہ بن چکے ہیں جہاں انسانوں کا رہنا مشکل ہے۔جہاں لوگ روٹی کپڑے سے تنگ اور پریشان تھے اب اس بات سے پریشان ہیں کہ باہر جائیں گے تو باعزت زندہ واپس آئیں گے بھی کہ نہیں۔۔جہاں بچے ماؤں کے ساتھ محفوظ محسوس کرتے تھے اب ماٸیں ہی قومی شاہراہ پر محفوظ نہیں ہیں۔یہ اتنی شرم ناک بات ہے کہ لکھتے ہوئے قلم بھی لرز جاۓ۔۔ان سب کی وجہ ہمارا خودساختہ معیار ہے ہم نے خود کو brandsاورstandard میں اس قدر الجھا لیا ہے کہ اب ہم اس کے شکنجے میں جکڑے جاچکے ہیں۔ نکاح سنت رسول صلی اللہ علیہ وسلم ہیں اور ہم نے اس سنت کو خود سے گلے کا پھندا بنا لیا ہے۔آج کے دور میں سب سے آسان چیز زنا اور سب سے مشکل چیز نکاح ہے اور اس حقیقت سے جتنی بھی نظریں چرائی جائیں حقیقت تو یہی ہے اور نکاح کو مشکل بنانے والے بھی ہم خود ہیں ہم نے نکاح کے نام سے اتنے لوازمات جوڑ لئے ہیں کہ جب تک لاکھوں جمع نہ ہوں تو سنت پوری نہیں کر سکتے۔اور دوسری وجہ تربیت ہے والدین زمانے کی بھاگ دوڑ میں اس قدر مصروف ہو چکے ہیں کہ انہیں اولاد کی پرواہ ہی نہیں ہے۔ایسے گھروں سے نکلے ہوئے بچے جنہیں اچھے برے کی تمیز نہ سکھائی جائے حلال اور حرام میں فرق نہ سکھایا جائے تو ان کے لئے کوئی بھی گناہ ، گناہ ہی نہیں ہوتا۔انہیں رشتوں کے تقدس کا پتہ ہی نہیں ہوتا بچے کی سب سے پہلی درسگاہ ماں کی گود ہوتی ہے جب درسگاہ میں وہ گرم جوشی ہی نہیں اور وقت کی قلت ہوگئی تو بچے بھی معاشرے کے لیے ناسور ہوں گے۔۔اور تیسری وجہ ہماری بے وجہ کی خواہشات ہیں ہم نے اپنی خواہشات کو بے لگام کیا ہوا ہے کہ خواہشات کے سامنے حلال اور حرام کا فرق نہیں کر پاتے۔کہاوت ہے کہ” چادر دیکھ کر پاؤں پھیلانے چاہئیں“لیکن اب ہمیں چادر کے چھوٹے اور بڑے ہونے سے کوئی سروکار ہی نہیں ہے اس کی سب سے بڑی وجہ ہیں گھر کی خواتین۔جنہیں پتہ ہونے کے باوجود کے گھر کے سربراہ کی کمائ اتنی نہیں ہے کہ وہ بے جا خواہشات پوری کرسکیں لیکن پھر بھی وہ سب چاہیے جو امیر لوگ بآسانی خرید سکتے ہیں۔مڈل کلاس طبقے نے خود کو brandsاورstandard کی دوڑ میں خود شامل کیا ہے سارا دن کام کرکے شام کو تھکا ہارا گھر آنے والا مزدور جب حالات کا رونا روتی اور غربت کو کوستی عورت کو دیکھے گا تو دماغی بے سکونی کا مریض بنے گا۔جس کے نتیجے میں پھر ان کی درندگی کی خبریں ہم روز سنتے ہیں۔ہمیں بحیثیت مسلمان رب کی رضا پر راضی رہنا چاہیے۔بہتری کی کوشش کرتے رہنا چاہیے لیکن حلال اور حرام کی تمیز کے ساتھ۔اور دوسری طرف بچوں کی تربیت پر توجہ کی ضرورت ہے خدارا اپنے بچوں کو انسان بنائیں۔انہیں انسان کی مکمل تعریف عملی طور پر کرکے بتائیں۔انہیں عورت کا مرتبہ سمجھاٸیں۔انہیں مردکا وقار بتائیں۔اچھا انسان بنائیں۔اور والدین سے گزارش ہے کہ ذات پات امیری غریبی کے دوہرے معیار سے نکل آئیں۔دوسری ذات میں یا غریب گھر میں شادی کرنا زنا سے بہت افضل ہے۔۔ذات پات کے چکر میں بچوں کو پنکھے سے لٹکنےاور حرام موت مرنے سے بچائیں۔نکاح کو عام کریں رزق کا وعدہ میرے رب کا ہے۔اس بات پر یقین رکھیں وہ بھوکا نہیں سونے دے گاہم لوگ ہی اب اس معاشرے کو پھر سے انسانی معاشرہ بنا سکتے ہیں ورنہ رب کی پکڑ بہت سخت ہے۔

(سٹی: صادق آباد)