Author: ڈاکٹرغلام مصطفی بڈانی

کراچی ،باغی ٹی وی (ویب نیوز)گورنر سندھ نے گذشتہ روز پولیس کانسٹیبل کی خودکشی اور اس کے بھائی کی ویڈیو کا نوٹس لیتے ہوئے ایڈیشنل آئی جی کراچی جاوید عالم اوڈھو سے رپورٹ طلب کرلی۔
بدھ کو کراچی کے علاقے سچل صفورا میں چانڈیو چوک پر پولیس اہلکار نے خود کو گولی مار کر خود کشی کرلی تھی۔
پولیس کے مطابق کانسٹیبل نعمت اللہ فیروزآباد تھانے میں تعینات تھا، اہلکار کا مختلف تھانوں میں ٹرانسفر کیا جاتا تھا جس سے تنگ آکر اس نے خودکشی کی۔
اہلِ خانہ کا کہنا ہے کہ نعمت اللہ شہید کوٹے پر پولیس میں بھرتی ہوا تھا۔جاں بحق اہلکار کے بھائی کا کہنا ہے کہ ملیر شعبہ تفتیش کے منشی مافیا کی رشوت ستانیوں سے تنگ آکر نعمت اللہ نے اپنی جان لی۔خودکشی کا یہ واقعہ صفورا عبداللہ شاہ غازی گوٹھ کے قریب پیش آیا، خودکشی کرنے والا اہل کار نعمت شہید پولیس اہل کار کا بیٹا تھا۔متوفی کے بھائی سیف اللہ نے اس سلسلے میں کئی انکشافات کئے ہیں، انہوں نے اپنے ویڈیو بیان میں کہا کہ ان کے بھائی نعمت نے ملیر شعبہ تفتیش میں تعینات دو منشیوں ارسلان اور عدنان کی وجہ سے تنگ آکر یہ قدم اٹھایا۔
خود کشی کرنے والے اہل کار کے بھائی نے دعویٰ کیا ہے کہ مذکورہ منشی نعمت سے رشوت طلب کر رہے تھے، اور رشوت نہ دینے پر بھائی کا ٹرانسفر پر ٹرانسفر کرتے رہے، ایس ایس پی بھی ان منشیوں کے بغیر کچھ نہیں کرسکتے۔
متوفی اہل کار نعمت نے اپنے پیچھے دو سال کا بیٹا اور تین ماہ کی ایک بیٹی چھوڑی ہے، وہ پہلے گلشن حدید تھانے میں تعینات تھے، جہاں سے گڈاپ تھانے ان کا ٹرانسفر کر دیا گیا، بھائی کے بیان کے مطابق نعمت کی تنخواہ 35 ہزار تھی۔
ٹرانسفر پوسٹنگز کے حوالے سے بتاتے ہوئے سیف اللہ نے کہا کہ ’بھائی کو سائٹ سپر ہائی وے سے سی پیک ٹرانسفر کیا گیا، پھر وہاں سے سکھر ٹرانسفر کر رہے تھے تو بھائی نے مجھ سے کہا کہ اتنی تنخواہ میں کیسے سکھر جاؤں، سکھر جانے سے انکار پر بھائی کو فیروز آباد تھانے ٹرانسفر کر دیا گیا۔‘
سیف اللہ کے مطابق ان کے بھائی کو بار بار ٹرانسفر کیا جاتا رہا، اور ٹرانسفر رکوانے کے لیے ان سے رشوت مانگی جا رہی تھی، جس سے تنگ آکر آج صبح انہوں نے خود کشی کرلی۔واضح رہے کہ خود کشی کرنے والے اہل کار کا بھائی سیف اللہ بھی پولیس کانسٹیبل ہے، ان کا کہنا تھا کہ ان کے ساتھ بھی یہی رویہ اپنایا جاتا رہا ہے، اور انہیں بھی لنک روڈ پر ٹرانسفر کیا گیا۔اب گورنر سندھ نے اے آئی جی کراچی کو نے ہدایت دی ہے کہ خود کشی کے اصل محرکات کی فوری تحقیقات کریں، کانسٹیبل کے بھائی کے الزامات پر بھی تحقیقات کی جائیں اور واقعہ میں ملوث عناصر کے خلاف سخت ایکشن کیا جائے۔

ڈیرہ اسماعیل خان،باغی ٹی وی(احمدنواز مغل)ڈیرہ پولیس نے جانفشانی سے کام کرتے ہوئے کم سن بچے کی اغوائیگی کامعمہ چند گھنٹوں میں حل کرلیا،ضلعی پولیس نے بچہ بازیاب کرکے والدین کے حوالے کردیا،والدین اور اہلیان علاقہ کا ڈی پی او ڈیرہ عبدالرئوف بابرقیصرانی بلوچ اور پولیس فورسز کو زبردست الفاظ میں خراج تحسین،ریجنل پولیس آفیسرڈیرہ عبدالغفورآفریدی اورڈسٹرکٹ پولیس آفیسر ڈیرہ عبدالرئوف بابر قیصرانی بلوچ کا پولیس ٹیم کو بہترین کارکردگی کا مظاہرہ کرنے پر انعام اور تعریفی اسناد دینے کا اعلان۔تفصیلات کے مطابق ڈسٹرکٹ پولیس آفیسر ڈیرہ عبدالرئوف بابر قیصرانی کی ہدایت پر زیر قیادت اے ایس پی علی عبداللہ خالد ہمراہ ایس ایچ او سٹی ملک ساجد،ایس ایچ او کینٹ ارسلان خان گنڈہ پور معہ ڈی ایس بی سٹاف ونفری پولیس نے انتہائی محنت سے کام کرتے ہوئے فری آٹے کی تقسیم کے دوران کم سن بچے کی اغوائیگی کیس کا معمہ چند گھنٹوں میں حل کرتے ہوئے بچے کو بازیاب کراکے والدین کے حوالے کردیا ۔آڑہ روڈ کی رہائشی خاتون مسماة(س)بی بی زوجہ محمد زبیر بیساکھی گراونڈ میں مفت آٹے کے حصول کے لیے آئی ہوئی تھی۔ جب وہ آٹا لینے گئی تو اپنے بچے کو اپنی قریبی رشتہ دار لڑکی کو پکڑا دیاخاتون کے جانے کے بعد لڑکی سے2نامعلوم خواتین بچے کو چھین کر فرارہوگئیں ۔ واقعہ کی اطلاع ملنے پرڈی پی او ڈیرہ عبدالرئوف بابرقیصرانی بلوچ نے فوری نوٹس لیتے ہوئے ایک سپیشل پولیس ٹیم تشکیل دے کر بچے کی بازیابی کا ٹاسک دیا جس پر پولیس ٹیم نے جدید ترین سائنسی اور تکنیکی بنیادوں پر تفتیش کا آغاز کیا اوربہترین حکمت عملی سے6گھنٹے کے اندر بچے کو بازیاب کراکے والدین کے حوالے کر دیا ۔ بچے کے ملنے پر والدین اور اہلیان علاقہ نے پولیس کو زبردست الفاظ خراج تحسین پیش کیا ہے۔ ریجنل پولیس آفیسر عبدالغفور آفریدی اور ڈسٹرکٹ پولیس آفیسر ڈیرہ عبدالرئوف بابر قیصرانی نے بچی کو بازیاب کرانے والی پولیس ٹیم کو نقد انعام کے ساتھ ساتھ تعریفی اسناد دینے کا بھی اعلان کیاہے ۔کم سن بچے کے ورثاء نے پولیس افسران کا شکریہ ادا کرتے ہوئے انہیں پھولوں کے ہار پہنائے ۔

ڈیرہ اسماعیل خان،باغی ٹی وی(احمدنواز مغل)مختلف مقدمات میں ملوث سابق وفاقی وزیرسردارعلی امین گنڈہ پور کی گرفتاری کیلئے ڈی پی او ڈیرہ عبدالرئوف بابران ایکشن ، ڈی پی او ڈیرہ عبدالرئوف بابرکی پولیس نفری کے ہمراہ ہائی کورٹ ڈیرہ بنچ پیشی پر آنے والے سابق وفاقی وزیرسردارعلی امین گنڈہ پور کوگرفتارکرنے کی کوشش ناکام، میں نے تمام مقدمات میں ضمانت کرائی ہوئی ہے اورپولیس کے پاس کسی قسم کاوارنٹ موجودنہیں ہے ‘سابق وفاقی وزیرسردارعلی امین گنڈہ پور کا موقف ۔ تفصیلات کے مطابق ڈسٹرکٹ پولیس آفیسر ڈیرہ عبدالرئوف بابرپولیس نفری کے ہمراہ مختلف مقدمات میں ملوث سابق وفاقی وزیرسردارعلی امین گنڈہ پور کوگرفتارکرنے کیلئے ان کی پیشی کے موقع پر ہائی کورٹ ڈیرہ بنچ کے باہر پہنچ گئی مگرکوئی گرفتاری عمل میں نہ آسکی ۔اس موقع پر سابق وفاقی وزیرنے کہاکہ میں نے تمام مقدمات میں ضمانت کرائی ہوئی ہے اورپولیس کے پاس میری گرفتاری کاکوئی وارنٹ بھی نہیں ہے ۔انہوں نے کہاکہ پولیس مجھے گرفتارکرنے کیلئے میرے اورمیرے دوستوں کے گھر چھاپے مارتی رہی جو شرمناک فعل ہے اورمیں اس کی مذمت کرتاہوں ۔انہوںنے کہاکہ پولیس نے مجھے نامعلوم جھوٹے مقدمات میںنامزدکیاہواہے مگرمجھے عدالتوں پر اعتماد ہے اسی لیے عدالتوں میں پیش ہوتاہوں ۔سابق وفاقی وزیرسردارعلی امین گنڈہ پور نے کہاکہ یہ کیسی آزادی ہے جس میں شہری کوحق بات کہنے کا بھی اختیارنہیں ہے۔انہوں نے کہاکہ میں عمران خان کاسپاہی ہوں اوراس کے ساتھ کھڑاہوں اوررہوں گا ۔انہوں نے کہاکہ ہم نے امپورٹیڈحکومت کا آخری دم تک مقابلہ کرناہے جبکہ اس حوالے سے ضلعی پولیس آفیسرعبدالرئوف بابر کاکہناتھا کہ مجھے اوپر سے ٹاسک دیاگیاہے کہ سردارعلی امین گنڈہ پور کی ہر صورت گرفتاری یقینی بنانی ہے۔

کوٹ ہیبت باغی ٹی وی (شاہد خان )چوک چورہٹہ تونسہ روڈ گورمانی پمپ کے نزدیک ایک کار اور موٹرسائیکل میں تصادم ہواہے جس کے نتیجے میں موٹر سائیکل پر سوار ایک مرد اور خاتوں شدید زخمی ہوئے، مرد کو ریسکیو 1122 نے موقع پر ابتدآئی طبی امداد دے کر ڈیرہ غازی خان ہسپتال شفٹ کر دیا جب کے خاتون کو شدید چوٹیں آئیں جس کو ریسکیو کر کے فوراََ ڈیرہ غازی خان ہسپتال کے ٹراما سینٹر وارڈ میں شفٹ کر دیا ہے ریسکیو ٹیم کے مطابق خاتوں کی ایک ٹانگ بھی ٹوٹ گئی ہے اور خاتوں اس وقت بیہوشی کی حالت میں ہے ایکسیڈنٹ میں کوئی جانی نقصان نہیں ہوا دوسری جانب کار میں سوار 2 افرادمیں سے ایک فرد کو بھی چوٹیں آئیں عینی شاہدین کے مطابق حادثہ تیز رفتاری کے باعث پیش آیا