Author: ڈاکٹرغلام مصطفی بڈانی

لاہور(باغی ٹی وی)امیر جماعت اسلامی سراج الحق نے کہا ہے کہ عدالت عظمیٰ کے ججز کی تقسیم کے تاثر سے قوم مزید مایوس ہوئی، لوگوں کا ایوانوں کے بعد عدالتوں پر اعتماد ختم ہونا معاشرے کے لیے تباہ کن ہے۔ حکمراں طبقہ اپنے مفاد کی خاطر ہر ادارے کو تباہ کرنے پر تلا ہوا ہے، طاقتور اشرافیہ کے سامنے ادارے بھی بے بس نظر آتے ہیں۔ جماعت اسلامی چاہتی ہے ملٹری اسٹیبلشمنٹ، عدلیہ اور الیکشن کمیشن غیر سیاسی ہو جائیں۔
منصورہ میں مرکزی تربیت گاہ کے شرکا اور بعدازاں فیصل آباد میں ڈونرز کانفرنس سے خطاب کرتے ہوئے سراج الحق نے کہا کہ جماعت اسلامی پنجاب اور خیبرپختونخوا کے امیدواران قومی و صوبائی اسمبلی کا عظیم الشان کنونشن اسلام آباد میں سوموار (پرسوں) کو منعقد کر رہی ہے جس میں فرسودہ نظام اور سٹیٹس کو کی تبدیلی کے لیے اہم اعلانات اور فیصلے کیے جائیں گے۔
انھوں نے کہا کہ عوام ہی ملک میں اسلامی انقلاب کی شمع روشن کر سکتے ہیں، جماعت اسلامی قوم کے تعاون کی طلبگار ہے۔ عوام نے ن لیگ، پیپلزپارٹی کو بھی بار بار آزمایا اور پی ٹی آئی کا پراجیکٹ بھی بری طرح ناکامی سے دوچار ہو گیا، اس وقت پارلیمنٹ میں موجود تمام جماعتیں سوائے جماعت اسلامی کے اقتدار میں ہیں، ان سب سے مہنگائی ختم ہوئی نہ یہ لوگ ملک کی معیشت کو بہتر کرنے کے لیے کسی لانگ ٹرم منصوبے کا اعلان کر سکے۔ حکومت ڈنگ ٹپاؤ پالیسی کے تحت چل رہی ہے، یہ سب لوگ نااہل اور ناکام ثابت ہو گئے۔ قومی معاشی پالیسی قرضوں کے گرد گھومتی ہے جس کا مطلب ہے طاقتور طبقہ کھائے اور بوجھ غریبوں پر ڈالا جائے، عوام ٹیکس دے۔ حکمران سیاسی جماعتوں نے کرسی کے مفاد میں قومی مفاد کو پس پشت ڈال دیا۔
امیر جماعت نے اس عہد کا اعادہ کیا کہ جماعت اسلامی مہنگائی، بے روزگاری، کرپشن، سودی معیشت اور آئی ایم ایف کی غلامی کے خلاف تحریک کو حتمی مرحلے تک پہنچائیں گے۔ انھوں نے کہا کہ حقیقی کامیابی اللہ تعالیٰ کے حکم اور حضورؐ کے طریقوں پر چلنے میں ہے۔ حضور اکرمؐ کے بعد کوئی نبی نہیں آئے گا لہٰذا امت کے ہر فرد کی ذمہ داری ہے کہ وہ دین کی سربلندی،نظام کی تبدیلی اور معاشرہ کی اصلاح کے لیے جدوجہد کرے۔ جماعت اسلامی پاکستان میں اسلامی نظام کے نفاذ کے لیے جدوجہد کر رہی ہے، ہم جسم میں خون کے آخری قطرے تک یہ کوششیں جاری رکھیں گے۔ جماعت اسلامی عوام کی تائید اور اللہ کی مددونصرت سے اقتدارمیں آ کر سودی معیشت کا خاتمہ کرے گی اور وسائل کی منصفانہ تقسیم کو یقینی بنائے گی، اس وقت ملک کے 18بااثر افراد کے چار ہزار ارب کے اثاثے ہیں، چند خاندان وسائل پر قابض ہیں، دوسری جانب کروڑوں عوام دو وقت کے کھانے کے لیے پریشان ہیں، لوگوں کے لیے مشکل ہو گیا کہ اپنے بچوں کے سکول کی فیس ادا کریں یا گھر کے راشن کا بندوبست۔ جماعت اسلامی معاشرے میں اس تقسیم کا خاتمہ کرے گی، زکوٰۃ اور عشر کے نظام سے معیشت میں بنیادی تبدیلیاں لائی جائیں گی، اس وقت چند لاکھ افراد ٹیکس دیتے ہیں، اگر اسلامی نظام آئے تو سات کروڑ سے زائد افراد زکوٰۃ دیں گے۔
سراج الحق نے کہا کہ پی ڈی ایم، پیپلزپارٹی اور پی ٹی آئی کے لیڈران اگر اپنی بیرون ملک دولت واپس لائیں تو بھی ملک کی معیشت ٹھیک ہو جائے۔ چند بڑے ارب پتی جن میں بیوروکریٹ، ریٹائرڈ ججز، جرنیل، سیاست دان، رئیل سٹیٹ کمپنیوں کے مالکان، شوگرملوں اور دیگر بڑی صنعتوں کے مالکان شامل ہیں، اگر اپنی جائز زکوٰۃ بھی دے دیں تو ملک کا قرض اتر جائے۔ حکومت نے آئی ایم ایف کے حکم پر 170ارب ٹیکسز کا بوجھ غریبوں پر لاد دیا، چند ماہ بعد اور ٹیکسز لگیں گے، عوام اپنے حقوق کی حفاظت اور ملک کو قرآن و سنت کا گہوارہ بنانے کے لیے جماعت اسلامی کا ساتھ دے۔

کراچی(باغی ٹی وی)وزیرخارجہ اور چیئرمین پیپلزپارٹی بلاول بھٹو زرداری نے کہاہے کہ ہم غریبوں کے مسائل حل کرنے اقتدار میں آئے ہیں ۔ ہمارا مقابلہ کسی سیاسی جماعت یا کٹھ پتلی سے نہیں، بیروزگاری اور غربت سے ہے
کراچی میں سندھ اسمبلی میں بینظیر انکم سپورٹ پروگرام کے تحت مستحق خواتین کی نادرا کے ذریعے ڈائنامک رجسٹری کے افتتاحی تقریب سے خطاب میں بلاول کا کہنا تھاکہ بلاول بھٹو زرداری کا کہنا تھاکہ دنیا میں دو سوچیں ہیں امیر کو امیر بنائیں گے تو وہ روزگار پیدا کرے گا، امیر لوگ تو ملک میں بہت کم ہوتے ہیں، وہ پورے ملک کو فائدہ نہیں پہنچا سکتے، امیر آدمی کے پاس جتنا پیسہ ہوتا ہے وہ اتنا ہی کنجوس ہوتا ہے، اگر پیسہ نچلے طبقے کے پاس آئے گا تو وہ بینک میں نہیں رکھے گا خرچ کرے گا، پیسےخرچ کرنے سے غریب کا مسئلہ تو حل ہوگا ہی ملک کو بھی فائدہ ہوگا۔
انہوں نے کہا کہ ہم غریبوں کے مسائل حل کرنے اقتدار میں آئے لیکن ایک سابق وزیراعظم کہتا ہے وہ ٹماٹر اور آلو کی قیمتیں مقرر کرنے کیلئے سیاست میں نہیں آیا۔
چیئرمین پی پی نے کہا کہ صدر زرداری نے سارے نظام سے لڑ کر بینظیر انکم سپورٹ پروگرام بنایا، حکومت سے عوام کیلئے پیسہ نکلوانا بہت مشکل تھا۔
انہوں نے کہا کہ ملک کا ہر بابو اور بیوروکریٹ بینظیر انکم سپورٹ کےخلاف تھے، ہمارے مخالفین نے ڈٹ کر بینظیر انکم سپورٹ پروگرام کی مخالفت کی، وہ کہتے تھے کہ ہم ملک کے عوام کو بھکاری بنا رہے ہیں، ہم کہتے تھے کہ غریب خواتین کو حق دلا رہےہیں، ہم پر تنقید ہوئی کہ بینظیر انکم سپورٹ سے کرپشن ہوگی لیکن ہم نے بینظیر انکم سپورٹ پروگرام کو صاف شفاف پروگرام بنایا اور بین الاقوامی ادارے مانتے ہیں کہ یہ صاف شفاف پروگرام ہے۔
ان کا کہنا تھاکہ کورونا کے دوران غریبوں کی بینظیر انکم سپورٹ سے مدد کی گئی، سیلاب متاثرین کی مدد کاکوئی طریقہ نہیں تھا،طریقہ نکلا تو بینظیر انکم سے نکلا، بینظیر انکم سپورٹ پروگرام میں 25 فیصد اضافہ ہوگا، بینظیر پروگرام میں رجسٹر ہر فرد کو 25 فیصد زائد رقم ملے گی۔

کراچی- سندھ اور خیبرپختونخوا بار کونسلز نے الیکشن سے متعلق ازخود نوٹس پر 9 رکنی بینچ پر اعتراض کرتے ہوئے فل کورٹ بنانے کا مطالبہ کردیا۔
سندھ بار کونسل کی جانب سے جاری اعلامیے میں الیکشن کیس کے نو رکنی بینچ میں جسٹس قاضی فائز عیسیٰ، جسٹس طارق مسعود کو شامل نہ کرنے پر اظہار تشویش کیا گیا ہے جبکہ مطالبہ کیا گیا ہے کہ جسٹس اعجاز اور جسٹس مظاہر نقوی کو بینچ سے علیحدہ ہوجانا چاہیے۔
اعلامیے میں کہا گیا ہے کہ جسٹس اعجاز الاحسن اور جسٹس مظاہر نقوی پر متعدد فریق عدم اعتماد کا اظہار کرچکے ہیں لہذا اب انہیں نو رکنی بینچ سے خود کو رضاکارانہ طور پر علیحدہ کرلینا چاہیے۔
بار کونسل نے مطالبہ کیا کہ چیف جسٹس عدلیہ پر عوامی اعتماد کیلیے اقدامات کریں اور اہم سیاسی کیسز کی سماعت کیلیے مخصوص بینچ بنانے کے تاثر کو ختم کرنے کے لیے عملی اقدامات کریں۔ اعلامیے میں مزید کہا گیا ہے کہ ازخود نوٹس کیس میں بینچ کی تشکیل چیف جسٹس کا خصوصی اختیار نہیں ہونا چاہیے۔
دوسری جانب پختونخوا بار کونسل نے سپریم کورٹ کے 9 رکنی لارجر بینچ پر تحفظات کا اظہار کرتے ہوئے کہا ہے کہ الیکشن کیس کے حوالے تشکیل شدہ سپریم کورٹ نو رکنی بنچ میں سینئر ججز شامل نہیں ہیں۔

لاہور،باغی ٹی وی (ویب نیوز)اینٹی کرپشن پنجاب کے ڈائریکٹر جنرل (ڈی جی) سہیل ظفر چٹھہ نے کہا ہے کہ سابق وزیراعلیٰ پنجاب چوہدری پرویز الٰہی کے دور میں ہونے والے ترقیاتی کاموں کا تمام ریکارڈ طلب کر لیا اور پی ٹی آئی دور کے ترقیاتی منصوبوں کا ریکارڈ بھی پنجاب بھر کے کمشنرز سے مانگ لیا گیا ہے جبکہ فرح گوگی کے کیس کو ایف آئی اے بھجوایا جائے گا۔
ایک نجی ٹی وی سے گفتگو میں سہیل ظفر چٹھہ کا کہنا تھاکہ فرخ گوگی کے خلاف درج تمام مقدمات کی نئے سرے سے انکوائری کا آغاز کردیاگیا، اس کے علاوہ شیخ رشید کے خلاف انکوائری کو بھی ری اوپن کر دیا گیا ہے۔
انہوں نے کہا کہ شیخ رشید نے رنگ روڈ اسکینڈل میں سڑک کا رُخ اپنی زمین کی طرف کرایاتھا اور اس طرح اپنی زمین کی قیمت بڑھائی تھی۔
ان کا کہنا تھاکہ فرح گوگی نے اثر و رسوخ سے زرعی زمین سستے داموں فروخت کرائی تھی، ان کا کیس ایف آئی اے کو بھی بھجوایا جائے گا۔
سہیل ظفر نے بتایا کہ پنجاب بھر کی تمام ہاؤسنگ سوسائٹیز کا ریکارڈ بھی طلب کر لیا گیا ہے اور دیکھاجا رہا ہے عثمان بزدار، پرویز الٰہی نے کتنی ہاؤسنگ سوسائیٹیز کو ریلیف دیا۔
ان کا کہنا تھاکہ چوہدری پرویز الٰہی کے دور میں ترقیاتی کاموں کا تمام ریکارڈ طلب کر لیا، اس کے علاوہ پی ٹی آئی دور کے ترقیاتی منصوبوں کی تفصیلات بھی طلب کر لی ہیں اور پی ٹی آئی حکومت کے سینیئر افسران کو انکوائری میں ریکارڈ سمیت بُلا لیا گیا جو افسر اینٹی کرپشن سے تعاون نہیں کرتا اسے گرفتار کیا جائے گا۔
ڈی جی اینٹی کرپشن پنجاب نے بتایا کہ رنگ روڈ اسکینڈل کی فائل بھی دوبارہ انکوائری کیلئے اوپن کر دی گئی ہے، انکوائریاں اور گرفتاریاں آئندہ ہفتے شروع کی جا سکتی ہیں، محمود الرشید، راجہ بشارت، مراد راس، یاسمین راشد اور دیگر وزرا کے محکموں کا ریکارڈ بھی طلب کیا ہے۔
ذرائع کے مطابق مارچ کے پہلے ہفتے سے کرپشن میں ملوث افسران اور سابق وزرا کی گرفتاریاں متوقع ہیں۔